Служба преподобнаго Афанасия затворника, в Ближних пещерах почивающаго
ВЕ́ЧЕР
На Го́споди, воззва́х: стихи́ры на 6, глас 4.
Подо́бен: Я́ко до́бля:
Умертви́ти хотя́ плоть свою́,/ в те́сный затво́р, аки во гроб, вшел еси́, о́тче,/ и погре́бл еси́ тую непосла́бне по́стническими дея́нии,/ но пре́жде о́бщаго воскресе́ния изве́стное воста́ние ме́ртвых показу́я,/ по двою́ дню воскре́сл еси́./ И ны́не, в безсме́ртии живы́й,/ моли́ся и нам ве́чныя избежа́ти сме́рти/ и улучи́ти у Христа́ Бо́га ве́лию ми́лость.
Ве́руяй в Мя,– я́коже рече́ Писа́ние,–/ а́ще и у́мрет, жив бу́дет во ве́ки,–/ на тебе́ сло́во де́лом испо́лнися, Афана́сие преподо́бне:/ у́мерл бо еси́ ми́ру и пло́ти,/ но ве́ра, споспешеству́ема благи́ми де́лы,/ воздви́же тя на живо́т лу́чший,/ и был еси́ во удивле́ние всем у́жа́сно,/ па́че же в поле́зное исправле́ние,/ е́же и нам пода́ждь моли́твами твои́ми, мо́лимтися,/ па́мять твою́ соверша́юще.
Сказа́вый пути́ ве́чныя жи́зни,/ не дал еси́ ви́дети преподо́бному Твоему́ истле́ния,/ по двою́ дню того́ воздви́гнувы́й,/ я́коже Ла́заря четверодне́внаго,/ разруши́в узы сме́ртныя Боже́ственнаго гла́са воззва́нием./ Сим и нас воззови́, Христе́ Царю́,/ и от ме́ртвых дел воскреси́,/ мо́лимтися, Жизнода́вче и Спа́се душ на́ших.
Сла́ва, глас 3:
По воста́нии Твое́м, Христе́ Спа́се,/ сме́рти вереи́ сотро́шася,/ и ве́рнии лю́дие то́ю не суть облада́еми,/ я́коже показа́ нам чу́дный в преподо́бных Афана́сий,/ уверя́я свои́м воста́нием/ и поле́зное подая́ треми́ де́тели и́ночествующим исправле́ние./ Сие́ и в на́ших сердцах утверди́, Спа́се, мо́лимтися,/ ле́тнюю па́мять преподо́бнаго Твоего́ почита́юще.
И ны́не, Богоро́дичен или Крестобогоро́дичен.
На стихо́вне во Окто́ихе.
Сла́ва, глас 2:
Сле́зными ту́чами, преподо́бне,/ облада́ющую во удесе́х смерть потопи́л еси́,/ Тридне́вновавшему же во гро́бе Животу́ всех уподо́бився,/ от ме́ртвых по двою́ дню воскре́с,/ тесне́йшую стезю́ к ве́чной жи́зни избра́л еси́,/ е́юже дости́г в безсме́ртную страну́,/ отту́ду да при́зриши на ны незакосне́нно,/ умерщвля́ющия ны стра́сти да прожене́ши/ и прича́стники безсме́ртию твоему́ нас сотвори́ши,/ во дне́шний день па́мять твою́ соверша́ющих,/ о́тче Афана́сие преблаже́нне.
И ны́не, Богоро́дичен или Крестобогоро́дичен.
Тропа́рь, глас 3:
Блаже́нство пла́чущих получи́ти жела́я,/ день и нощь непреста́нно пла́кал еси́,/ име́я во уме́ час Су́дный,/ тем по кончи́не твое́й обре́л еси́ утеше́ние на Небеси́,/ преподо́бне Афана́сие./ Пода́ждь и нам пла́катися зде грехо́в на́ших вы́ну,/ я́ко да пла́ча безконе́чнаго избы́вше,/ та́мо прии́мем ве́чное утеше́ние.
Кано́н, глас 1.
Песнь 1
Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.
Бре́нными усты́ пе́ти сугу́бое твое́ успе́ние хотя́ща мя ны́не, о́тче, не пре́зри,/ но уще́дри, молю́тися, зовы́й ны́не в день торжества́ твоего́,/ в о́ньже па́мять твоя́ просла́вися.
Сме́ртною секи́рою посека́емь,/ в ми́ре сем живо́т челове́ческий разуме́в, преподо́бне,/ да сокруши́ши ту собо́ю, к тве́рдому Ка́мени прите́кл еси́/ и, притупи́в доброде́тельми сме́ртныя прило́ги,/ пое́ши Бо́гу, я́ко просла́вися.
У́мер пе́рвее ми́ру отверже́нием того́ многостра́стных ловле́ний,/ стопы́ ше́ствий твои́х упра́вил еси́, свя́те, к Животу́ непозы́блемому:/ те́мже ны́не, сын Живота́ су́щи, при́зри на ны,/ пою́щия в па́мяти твоей Бо́гу, я́ко просла́вися.
Богоро́дичен: Умерщвле́нную мою́ ду́шу самохо́тными страстьми́/ оживотвори́ти потщи́ся, Чи́стая Де́во:/ Ты бо еси́ Ма́ти Живота́ и подае́ши уме́ршим воста́ние.
Песнь 3
Ирмо́с: Ка́мень, его́же небрего́ша зи́ждущии,/ сей бысть во главу́ у́гла:/ той есть Ка́мень,/ на не́мже утверди́ Це́рковь Христо́с,/ Ю́же от язы́к искупи́.
Связа́лся еси́, преблаже́нне, Богоуго́днаго жити́я ве́рвию,/ смерть у́бо плени́ся, не иму́щи на тебе́ вла́сти:/ а́ще бо и похи́ти тя, но па́ки возврати́ти повеле́л есть мно́гим в по́льзу/ и́же сме́ртию Свое́ю всех от сме́рти искупи́.
Мертв свя́зан лежал еси́, о́тче, ма́нтии укро́ем на одре́,/ и Вы́шняго Про́мысл чудотвори́ти тща́шеся тобо́ю:/ по двою́ бо дню возврата́ ду́шу твою́,/ и жив обре́лся еси́ во удивле́ние всем зря́щим,/ и́же ви́дяху твое́ успе́ние.
Боле́знь твоя́ не бя́ше, преподо́бне, к сме́рти, но к сла́ве Бо́жией:/ у́мерл бо, смерть, а́ки сон, прия́л еси́ во отра́ду боле́зни твоея́,/ и по двою́ дню, а́ки от сна, воспря́нув,/ лице́ твое́ умыва́л еси́ струя́ми сле́зными.
Богоро́дичен: Боле́знь сме́ртную пресе́кшая Святы́м Рождество́м Твои́м/ и Живо́т да́вшая всему́ ми́ру,/ аз еди́н оста́х, умерщвле́н скве́рными де́лы,/ Ма́ти Бо́жия, возложи́ на мя ру́ку, и живо́т лу́чший обря́щу.
Седа́лен, глас 8:
На безсме́ртие взира́я, да сме́рти ве́чныя избе́гнеши,/ живо́т те́сный избра́л еси́, Афана́сие преблаже́нне,/ во умерщвле́нном ти телеси́./ Сего́ ра́ди, удивля́ющеся ди́вному на тебе́ смотре́нию,/ сла́вим Еди́наго Челове́колюбца, И́же даде́ всем живо́т и нетле́ние.
Сла́ва, и ны́не, Богоро́дичен:
Сме́ртной повину́вшихся рабо́те свободи́ла еси́ Рождество́м Твои́м, Богоневе́сто Де́во,/ тем Тя пе́сньми сла́вят христиа́нстии ро́ди,/ я́ко дала́ еси́ им живо́т и нетле́ние.
Песнь 4
Ирмо́с: Взя́тся со́лнце, и луна́ ста в чи́не свое́м,/ возне́слся еси́, Долготерпели́ве, на Дре́во/ и водрузи́л еси́ на нем Це́рковь Твою́.
Лежа́ безду́шен, воздви́глся еси́/ и, дыха́ние прие́мь, па́ки на бы́тие́ прише́л еси́, о́тче,/ е́же ви́девше, предстоя́щий со стра́хом славосло́виша Бо́жию си́лу.
Коль стра́шен час сме́рти и Суда́, ви́дев, блаже́нне,/ го́рце рыда́я, молча́нием и воздыха́нием изъяви́л еси́,/ и бы́ша сле́зы твоя́ мно́гим написа́ние Суда́ Стра́шнаго.
При́сно исхо́д свой помина́я, свя́те,/ пла́кал еси́ в жи́зни сей боле́зненной,/ и бо́льшая прибыва́ху ти рыда́ния, чу́вственне ви́девшу,/ ка́ков отходя́щии и́мут страх и тре́пет,/ его́же да убежи́м и мы,/ моли́ся, о́тче преподо́бне.
Богоро́дичен: Суда́ Стра́шнаго не бою́ся,/ ни страшу́ся го́рькия гее́нны,/ я́ко от мно́гих страсте́й окамене́ мое́ се́рдце./ Се́чивом бла́гоутро́бия Твоего́, Чи́стая Де́во Ма́ти, порази́ е,/ да очувстви́тся па́мятию мук стра́шных.
Песнь 5
Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ и́мену́ем,/ я́ко Бог живы́х и ме́ртвых еси́.
Твой плач и неуте́шное рыда́ние предстоя́щии ви́девше,/ ужа́сни прося́ху, да ска́жеши им сло́во на по́льзу./ Ты же три поле́зная сказа́л еси́ им:/ да храня́т послуша́ние, покая́ние и моли́тву,/ я́ко бо́льшия доброде́телей ине́х,/ в ни́хже и мы да утверди́мся, моли́ся, о́тче Афана́сие.
Сам послушли́в сый за́поведем Христо́вым,/ послуша́ние вы́ше всех доброде́телей бы́ти бра́тии сказа́л еси́, преподо́бне,/ то бо и по сме́рти не умира́ет, но снабдева́ет живо́т с Бо́гом,/ и́же есть стра́шен Судия́ живы́м и ме́ртвым.
Покая́ние и моли́тва – две криле́ о́гненне,/ и си́ми прехо́д неудержи́мь от мыта́рств возду́шных извести́л еси́, блаже́нне,/ молча́ния яви́л еси́ пути́, и́ми́же поте́кл еси́ на бо́льшая,/ наказа́ние оста́вль вопроси́вшим./ И нам даждь исправле́ние, день весе́лия твоего́ соверша́ющим.
Богоро́дичен: Моли́твеннице ско́рая о христиа́нстем ро́де, Мари́е Де́во,/ моли́твы певе́ц Твои́х прие́мши в Пречи́стыя дла́ни,/ принеси́ к Твоему́ Сы́ну и испроси́ нам грехо́в проще́ние/ и тишину́ даждь су́щим в страсте́х.
Песнь 6
Ирмо́с: Отве́ргл мя еси́ во глуби́ны се́рдца морска́го,/ и спасл еси́ мя, Спа́се, от рабо́ты сме́ртныя,/ и разреши́л еси́ узы беззако́ний мои́х.
Отве́ргся коне́чнее живота́ и чу́вственнаго све́та ви́дети,/ в те́мен затво́р вшел еси́, пременя́я чу́вственное на мы́сленнаго Све́та зре́ние,/ его́же и мы да улучи́м моли́твами твои́ми, о́тче,/ отве́ргшеся беззако́ний на́ших.
Умерщвле́нную плоть по́стническими труды́ да оживи́ши, свя́те,/ струя́ми слез твои́х напая́л еси́ вы́ну,/ двана́десят лет пребы́в в пеще́ре, жив погребе́н,/ наде́ждою живота́ безсме́ртнаго оживля́емь.
Дре́во жи́зненное плоть твоя́, Афана́сие преподо́бне, израсти́ покая́ния всем плоды́,/ от ни́хже вкуси́ти даждь и мне любо́вию твое́ю,/ да укреплю́ся разреши́ти у́зы беззако́ний мои́х.
Богоро́дичен: Дре́во присноцвету́щее Ты еси́, Пречи́стая Де́во,/ пали́мых зно́ем беззако́ний покрыва́ющее се́нию Твое́ю./ Се́ю и нас покры́й, страстьми́ жего́мых, и воспое́м:/ ра́дуйся, Дре́во благосенноли́ственное, и́мже покрыва́ются мно́зи.
Конда́к, глас 5:
Яко безсме́ртия тезоимени́т, по уме́ртвии свое́м воста́л еси́ жив;/ показу́я же, я́ко зело́ лю́та есть смерть, пла́кался еси́ го́рько./ Ны́не, обре́тши неконча́емую ра́дость,/ моли́ся о нас, я́ко да пла́ча ве́чнаго избу́дем.
Песнь 7
Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.
Жизнь твою́ в пла́че и воздыха́нии проводи́в/ и струя́ми слез твои́х убели́в а́нгельскаго о́браза ри́зу,/ отше́л еси́ в безплаче́вныя страны́, радующися и пою́щи:/ благослове́н Бог оте́ц на́ших.
Чи́ни А́нгельстии в день успе́ния твоего́ приспе́ша/ и, дух твой ми́рно прие́мше, проводи́ша в ра́йския оби́тели,/ иде́же живы́й, помяни́ нас, о́тче преподо́бне, пою́щих:/ благослове́н Бог оте́ц на́ших.
Мертве́ц два́жды в жи́зни сей был еси́, свя́те,/ и пе́рвее у́бо возвраща́ющася вси ви́деша тя па́ки в плотски́х соста́вах,/ от ни́хже втори́цею разре́шся, ны́не живе́ши со А́нгельскими чи́нми,/ иде́же и нас не забу́ди, пою́щих:/ благослове́н Бог оте́ц на́ших.
Богоро́дичен: Уме́ршаго мя злы́ми дея́нии оживотвори́те потщи́ся, Влады́чице:/ на Тя бо упова́ние возложи́х несумне́нно,/ я́ко ро́ждшую Безсме́ртнаго Царя́ и ми́ру всему́ Живода́вца.
Песнь 8
Ирмо́с: Небеса́ небе́с и вода́, я́же превы́ше небе́с,/ благослови́те, по́йте Го́спода/ и превозноси́те Его́ во ве́ки.
Небеса́ ра́дуются, прие́мше дух твой в не́дра своя́,/ и мы весели́мся, кла́няющеся моще́м твои́м, преподо́бне,/ от ни́хже пода́ждь тре́бующим благода́ть/ и сподо́би пе́ти Го́спода во ве́ки.
А́нгели торжеству́ют, сожи́теля тя иму́ще,/ весели́тся и гора́ Пече́рская, содержа́щи ра́ку моще́й твои́х, а́ки би́сер многосве́тлый,/ сим просвети́ нас, мра́ком страсте́й одержи́мых,/ и даждь пе́ти Го́спода во ве́ки.
Благоугоди́л еси́, о́тче, в жи́зни сей Влады́це своему́/ и прия́л еси́ дар неду́ги исцеля́ти./ Нас, страстьми́ одержи́мых, посети́, я́коже ля́двиями боля́ща Вави́лу,/ и сподо́би Го́спода пе́ти во ве́ки.
Богоро́дичен: В печа́ли и тузе́ есмь, скве́рное мое́ житие́ помышля́я, и не и́мам наде́жды./ К Тебе́ Еди́ной прибега́ю, ра́дости всеми́рной, Чи́стая Де́во,/ и молю́, да ра́дость возсия́ет души́ мое́й во ве́ки.
Песнь 9
Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Израи́лев,/ в ни́хже посети́ нас Восто́к с высоты́/ и напра́вил ны есть на путь ми́ра.
Сотвори́ любо́вь моля́щимся тебе́, о́тче,/ и моли́твою твое́ю даждь цельбу́ стра́ждущим неду́ги душе́вными,/ па́че же ра́туемых вра́жиими наве́ты напра́ви на путь ми́рен.
Пое́т Вели́кая Ла́вра труды́ и по́двиги твоя́, преподо́бне,/ сла́вит вы́ну пеще́ра, храня́щая чудотво́рныя мо́щи твоя́,/ и́мже и мы покланя́ющеся, мо́лим тя:/ напра́ви стопы́ на́ша на путь ми́рен.
Воста́ни ско́ро и прииди́, аз исцелю́ тя,– рцы, Афана́сие преблаже́нне,/ се бо от мно́гия боле́зни душе́вныя вопию́ ти, не имы́й отра́ды,/ па́че же молю́:/ наста́ви мя на спасе́ния путь ми́рен.
Сла́влю Тя, Тро́ице Пресвята́я, О́тче Безнача́льне с Сыно́м Безле́тным,/ и пою́ Ду́ха Твоего́ Свята́го,/ Его́же даждь се́рдцу моему́ хода́тайтвом уго́дника Твоего́,/ да обря́щу путь ми́рен.
Богоро́дичен: А́ще кто не сла́вит чи́стаго зача́тия/ и не пое́т несказа́ннаго Рождества́ Твоего́, Марие́ Богоневе́сто,/ да отпаде́т ве́чныя Сла́вы/ и не бу́дет соо́бщник Све́та и сын присносу́щнаго мира.
Свети́лен:
В преподо́бных ди́внаго Афана́сия пе́сньми, лю́дие, восхва́лим:/ той бо жив у́мре, и по двою́ дню воскре́се, и па́ки преста́вися,/ живе́т, не ктому́ сме́ртию облада́емь,/ но присносу́щную нача́ жизнь,/ я́ко сын су́щи Живота́ и Воскресе́ния пра́ведных насле́дник.
Сла́ва, и ны́не, Богоро́дичен:
Ди́вны Твоя́ та́йны, Чи́стая, кто испове́сть/ или́ кто возвести́т на Тебе́ сбытие́ неизрече́нных?/ Родила́ бо еси́ в ле́то Сы́на, пре́жде век от Отца́ рожде́нна,/ Живота́ и Воскресе́ния Пе́рвенца,/ моли́ у́бо Его́, да и аз Воскресе́ния бу́ду и Живота́ насле́дник.
На хвали́тех стихи́ры, глас 2.
Подо́бен: Егда́ от Дре́ва:
Прииди́те, лю́дие, воспое́м/ на Небеси́ от А́нгел пое́маго ди́внаго Афана́сия,/ по́стников красоту́ и преподо́бных сия́ние,/ и́хже житию́ поревнова́в,/ те́сный путь неле́ностно про́йде,/ вся́кия стра́сти увяди́в воздержа́нием,/ неудержи́мое жела́ние име́я к Бо́гу,/ Ему́же предстои́т ны́не со А́нгелы/ и мо́лится о душа́х на́ших.
Прииди́те, бра́тие и празднолю́бных собо́ри,/ вся́кое сосло́вие Богоно́сных усте́н,/ принесе́м венцы́ песносло́вных цвето́в,/ ко гро́бу ше́ствуим преблаже́ннаго отца́/ и припаде́м, глаго́люще:/ преподо́бне преблаже́нне, А́нгелом сожи́телю,/ не забу́ди, хода́тайствуя ко Влады́це всех Бо́гу,/ да улучи́м ве́чный живо́т и ми́лость в День Су́дный.
Прииди́те, и́ночествующих ли́ки,/ к ра́це многочуде́сных моще́й преподо́бнаго Афана́сия/ и почти́м Богоглаго́ливая уста́,/ наказу́ющая нас послуша́нию,/ всегда́шнему́ же покая́нию и моли́тве,/ и, си́ми доброде́тельми, а́ки о́гненными криле́,/ к Бо́гу восходя́ще,/ обря́щем благода́ть и ве́лию ми́лость.
Сла́ва, глас 8:
Преподо́бне, преблаже́нне, свя́те во святы́х Афана́сие,/ твое наказа́ние мно́гим бысть исправле́ние/ и от паде́ния возставле́ние па́мятию бу́дущаго Суда́,/ его́же и сам ожида́я по твоем воскресе́нии,/ неутоли́мыя сле́зы от о́чию изводи́л еси́./ Со весе́лием ны́не Христу́ предстоя́,/ моли́ся пою́щим че́стное твое преставле́ние прия́ти грехо́в оставле́ние/ и ве́лию ми́лость в День Су́дный.
И ны́не, Богоро́дичен:
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
