Служба иже во святых отца нашего Григория Паламы, архиепископа Солунскаго, чудотворца

А́ще хо́щет настоя́тель, твори́м бде́ние.

НА ВЕЛИ́ЦЕЙ ВЕЧЕ́РНИ

Блаже́н муж: На Го́споди, воззва́х: стихи́ры на 8, глас 5.

Подо́бен: Преподо́бне о́тче:

Преподо́бне о́тче, свяще́нне Григо́рие,/ от ко́рене прозябе́ Боголюби́ва и све́тла ве́твь,/ я́коже дре́во, узре́ся, при исхо́дищих Боже́ственных во́д/ до́бре насажде́но,/ источа́я пре́жде вре́мене плоды́ безсме́ртия,/ удивля́я всяк слух естество́м, и сло́вом, и дея́нии Боже́ственными,/ вити́й в вити́ях и прему́др в любому́дрых дея́ниих./ Сосу́д держа́внаго Боговиде́ния,/ Христо́ви моля́ся, Христа́ жада́я повсегда́/ и превосходя́ от Боже́ственныя сла́вы в сла́ву/ и от си́лы в си́лу,/ вои́стину нетле́нную.

Преподо́бне о́тче, досточу́дне Григо́рие,/ сла́ву оста́вль вре́менную и ни́зу влеку́щую,/ нетле́нная возлюби́в и Го́рняя,/ бога́тства мимотеку́щаго му́дре отступи́,/ бога́тство пребы́тное139 нищету́ вмени́в,/ душе́вное твое́ о́ко очи́стив воздержа́нием,/ и слеза́ми, и мно́гим пла́чем,/ отню́дуже сосу́д Ду́ха све́тел яви́ся,/ весь благода́ти Того́ испо́лнь,/ Того́ сия́ния и Того́ сла́вы проси́ дарова́ти/ Еди́ному Бо́гу покланя́ющимся, Тро́ице Всеси́льней.

Преподо́бне о́тче, свяще́ннейший Григо́рие,/ меч у́бо сло́ва обостри́в Ду́хом,/ огнь чи́ном был еси́ богобо́рных,/ я́коже с высоты́ мо́лния сходя́,/ отсека́я и попаля́я тех языкобо́лия,/ ве́рных же всех наставля́я к Боже́ственней зари́ Трисо́лнечней,/ ею́же просвеща́ем,/ свет вторы́й яви́лся еси́,/ сопресто́лен и единочи́слен верхо́вным Богосло́вцем,/ с ни́ми хвали́м, с ни́ми пребыва́я,/ и ны́не моли́ дарова́ти Це́ркви еди́нство,/ ми́р и ве́лию ми́лость.

И́ны стихи́ры, глас 4.

Подо́бен: Яко до́бля:

Свети́льник неугаса́емый,/ сия́ние неусыпа́ющее,/ и́же в мо́ри пла́вающим/ спаси́тельное, и ти́хое приста́нище, и безмяте́жное благода́ти,/ сше́дшеся, в пе́снех досто́йне пое́м ти, моля́щеся:/ у́мныя бу́ри изба́ви Це́рковь твои́ми моли́твами,/ о не́йже му́жески подвиза́яся.

Гла́са тя Сло́ву, дыха́ние духо́вное,/ о́гненный язы́к неугаса́емый Богосло́вия, Григо́рие,/ собра́ние скверне́ное ерети́ческое/ све́тло попали́ша благода́тию,/ мо́лим сопроти́вных веле́ний настоя́ния/ изба́витися моли́твами ти/ правосла́вно воспева́ющим тя.

В труде́х пе́рвие и безмо́лвии просия́вша/ и писа́ние неудо́бь ве́домое и глубо́кое/ с Ду́хом возгреме́вша,/ Христо́с све́щника тя возлага́ет све́тла Це́ркви, Григо́рие,/ ми́р вся́кий освеща́юща, о́тче,/ твои́ми моли́твами, и словесы́, и чуде́с си́лою,/ и не утвержде́нных утвержда́я.

Сла́ва, глас 4:

Прему́дростию сло́во свое́ украси́в,/ и доброде́телию непоро́чною/ преудобре́н во обои́х был еси́, Григо́рие,/ Боговеща́нным ти глаго́лом/ украша́я и веселя́ лю́ди разу́мно,/ Тро́ицы Еди́но Божество́ прему́дре просте́р,/ те́мже и препросла́вленными уче́нии/ иноплеме́нныя е́реси попра́в,/ держа́ву ве́ры в конце́х воздви́гл еси́,/ Христо́ви предстоя́ с Невеще́ственными служи́тели,/ и душа́м на́шим испроси́ ми́р и ве́лию ми́лость.

И ны́не, Богоро́дичен: И́же Тебе́ ра́ди:

Вход. Проки́мен дне и чте́ния три святи́тельская.

При́тчей чте́ние (главы́ 10, 3, 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́:/ и блаже́н челове́к, и́же пути́ мои́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим./ Я́ко аз, прему́дрость, устро́их сове́т,/ и ра́зум, и смы́сл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзски же пре́до мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (гла́вы 10, 6, 8, 9):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет их от сме́рти./ Сконча́вшуся му́жу пра́ведну, не поги́бнет наде́жда./ Сын бо пра́веден ражда́ется в живо́т/ и во благи́х свои́х плод пра́вды объи́мет./ Свет пра́ведным всегда́,/ и от Го́спода обря́щут благода́ть и сла́ву,/ язы́к му́дрых до́брая свесть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же Ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго:/ постига́ет бо жела́ющия ю,/ пре́жде да́же разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея ра́ди вско́ре без печа́ли бу́дет./ Я́ко досто́йных ея́ сама́ обхо́дит, и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́,/ и возлюби́х ю, и поиска́х от ю́ности мое́я./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница133 бо есть Бо́жия хи́трости/ и обрета́тельница дел Его́./ Труды́ ея́ суть доброде́тели:/ целому́дрию же и ра́зуму та учи́т,/ пра́вде и му́жеству,/ и́хже потре́бнее ничто́же есть в житии́ челове́ком./ А́ще же и многоиску́сства жела́ет кто,/ весть дре́вняя и бы́ти хотя́щая разсмо́трит:/ свесть изви́тия слове́с и разреше́ния гада́ний,/ зна́мения, и чудеса́ проразуме́ет,/ и сбытия́ време́н и лет,/ и всем сове́тник есть благ./ Я́ко безсме́ртие есть в ней/ и благосла́вие во обще́нии слове́с ея́./ Сего́ ра́ди бесе́довах ко Го́споду,/ и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся Сло́вом Твои́м/ и му́дростию Твое́ю устро́ивый челове́ка,/ да владе́ет бы́вшими от Тебе́ тва́рьми/ и да управля́ет мир в преподо́бии и пра́вде,/ даждь ми Твои́х Престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да, су́щи со мно́ю, научи́т мя,/ что благоуго́дно есть пред Тобо́ю,/ и наста́вит мя в ра́зум,/ и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (гла́вы 4, 6, 7, 2):

Похваля́ему пра́веднику возвеселя́тся лю́дие:/ безсме́ртие бо есть па́мять его́,/ я́ко от Го́спода познава́ется и от челове́ков,/ и уго́дна Го́споду душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ Нача́ло бо ея́ – любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих,/ я́ко Той му́дрости Наста́вник есть,/ и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость:/ есть бо в ней Дух Разу́мен и Свят,/ и сия́ние Све́та Присносу́щнаго,/ и о́браз бла́гости Бо́жия;/ та́я дру́ги Бо́жия и проро́ки устроя́ет./ Благоле́пнейши же есть со́лнца/ и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та́я, угожда́ющия ей, от боле́зни изба́ви/ и наста́ви на стези́ пра́выя./ Даде́ им ра́зум име́ти свят,/ и сохрани́ от ловя́щих,/ и по́двиг кре́пок подаде́ им./ Да разуме́ют вси,/ я́ко си́льнейши всего́ есть благоче́стие./ И никогда́же премо́жет зло́ба му́дрости,/ ниже́ пре́йдет, злы́я облича́ющи, суд./ Реко́ша же в себе́, помы́сливше непра́ведно:/ наси́льствуем пра́веднаго/ и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н,/ и улови́м пра́веднаго,/ я́ко неуго́ден нам есть:/ и проти́вится дело́м на́шим,/ и поно́сит нам отпаде́ние зако́на,/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бысть нам на обличе́ние помышле́ний на́ших,/ и тя́жек нам есть, и ви́димь:/ я́ко неподо́бно ины́м житие́ его́,/ и измене́ны стези́ его́./ В поруга́ние вмени́хомся ему́:/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо,/ а́ще словеса́ его́ и́стинна суть,/ иску́сим, я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́,/ и иску́сим беззло́бство его́:/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася:/ ослепи́ бо я зло́ба их./ И не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти власть,/ и спаса́яй во вре́мя ско́рби,/ и избавля́яй от вся́каго зла́./ Щедр и ми́лостив,/ и дая́й преподо́бным Свои́м благода́ть,/ и Свое́ю мы́шцею го́рдым противля́яйся.

На стихо́вне стихи́ры, глас 5.

Подо́бен: Ра́дуйся:

Ра́дуйся, Правосла́вия свети́льниче,/ Це́ркви све́тлое, о́тче, со́лнце,/ похвала́ и́ночествующим,/ церко́вное пра́вило,/ и́же благодея́ния учи́тель изря́дный, святи́телю Григо́рие,/ и́же прему́дрости и ра́зума жили́ще,/ бли́жним и да́льним орга́н духо́вный,/ пе́снивец140 одушевле́н,/ уста́ Госпо́дня, изводя́ от недосто́инства досто́йнаго,/ Христа́ моли́/ низпосла́ти душа́м на́шим ми́р и ве́лию милость.

Стих: Честна́ пред Го́сподем/ сме́рть преподо́бных Его́.

Ра́дуйся, высо́кий у́ме,/ зри́телю та́инства,/ Ду́ха сосу́д дарова́ний,/ светоно́сный све́щниче,/ блиста́ние Боже́ственнаго осия́ния,/ любви́ держа́вное и честно́е спребыва́ние,/ кро́ткий вои́стину, и прост, у́бо и незло́бив,/ открове́ние и писа́ний явле́ние,/ мо́ре разуме́ний Боже́ственных, Григо́рие,/ бе́здна Боже́ственна Сло́ва уче́ния неизчерпа́ема,/ Христа́ моли́/ низпосла́ти душа́м на́шим ми́р и ве́лию милость.

Сти́х: Блаже́н му́ж, боя́йся Го́спода,/ в за́поведех Его́ восхо́щет зело́.

Ра́дуйся, Богосло́вия глубино́,/ Правосла́вия пра́вило пра́вое,/ Тро́ицы Еди́но естество́ возвести́ высоко́,/ во еди́ном хоте́нии и де́йствии,/ про́сто Божество́, всеси́льно и не со́здано,/ посрами́вый же благода́тию духо́вною и безле́тною отве́ргшихся обоже́ния,/ уста́ Богосло́вец, святи́телю Григо́рие,/ сла́во отце́м Боже́ственным и, соприча́стник исчи́слен,/ свети́льниче Церко́вный,/ да́руяй на́м моли́твами ти ве́лию милость.

Сла́ва, глас 4:

Житие́ Боже́ственно испра́вль,/ виде́нием дея́ние уясни́л еси́, Богоявле́нне Григо́рие,/ прему́дрость бо возлюби́в жела́нием Боже́ственным,/ из у́ст Ду́ха благода́ти обогати́ся,/ я́ко сот ме́двеный,141/ сла́дость твои́х слове́с иска́пая,/ при́сно весели́ши ра́зумы Боже́ственными Це́рковь Христо́ву,/ те́мже, на Небесе́х со святи́тели водворя́яся,/ о нас непреста́нно моли́ся,/ о творя́щих па́мять твою́.

И ны́не, Богоро́дичен: При́зри на моле́ния:

Тропа́рь, глас 8:

Правосла́вию наста́вниче, святи́телем украше́ние,/ Богосло́вцем побо́рниче непобеди́мый, Григо́рие чудотво́рче,/ Солу́ню вели́кая похвало́, пропове́дниче благода́ти,/ моли́ Христа́ Бога спасти́ся душа́м на́шим.

Сла́ва, и ны́не, Богоро́дичен: И́же на́с ра́ди рожде́йся:

НА У́ТРЕНИ

На Бог Госпо́дь: тропа́рь свято́му два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой:

Боже́ственнаго Христо́ва святи́теля воспева́ем,/ столпа́ о́гненнаго, све́ту о́блака,/ ду́хом предходя́ща Изра́илеви но́вому день/ и вводя́ща в разу́мную зе́млю ми́ра,/ в митропо́лии же о Христе́ перворо́дных,/ вели́каго Григо́рия.

Сла́ва, и ны́не, Богоро́дичен:

Всели́ся в Тя Божества́ все исполне́ние, Чи́стая,/ я́коже Па́вел предрече́,/ все обоготвори́ тле́нных естество́, Влады́чице,/ Ты же была́ еси́ нача́ло благода́ти таковы́я/ и спаси́тельное руково́дство и́же ве́рою и любо́вию чту́щих Тя.

По 2-м стихосло́вии седа́лен, глас 1.

Подо́бен то́йже:

Измы́в до́бре твои́х сле́з тече́ньми дух,/ у́мне восприя́л еси́ Боже́ственныя благода́ти, досточу́дне,/ прича́стник был еси́ обоже́ния,/ е́же па́че естества́,/ Сло́ва, Е́же пропове́дал е́си Несо́здано всем и Еди́но, Богому́дре Григо́рие.

Сла́ва, и ны́не, Богоро́дичен:

Све́та разу́мнаго светле́йший сосу́д,/ тьму моего́ разреши́ се́рдца,/ страсте́й же тяжча́йшее бре́мя, молю́ся, облегчи́,/ наставля́ющи мя к покая́нию стезя́м/ и бу́дущему сподобля́ющи мя све́ту, Всеблаже́нная Влады́чице.

По полиеле́и седа́лен, глас 8.

Подо́бен: Прему́дрости:

Отсту́пль теку́щих, о́тче прему́дре Григо́рие,/ ца́рских, и друго́в, и сро́дник,/ стяжа́л еси́ пребыва́ющая и стоя́щая, блаже́нне,/ и дом весь, и род, приве́л еси́ Влады́це всех, честно́е всесожже́ние./ И́мже наставля́ем, ду́шу освяти́л еси́ и ум с те́лом Бо́гови, Григо́рие, виде́нием и дея́нием же/ моля́ся Ему́ приле́жно согреше́нием оставле́ние дарова́ти/ пра́зднующим любо́вию святу́ю па́мять твою́.

Сла́ва, и ны́не, Богоро́дичен:

В плоть Твою́ оде́явся, я́ко Благ,/ зрак Влады́ка ра́бий обожи́, Влады́чице,/ совокупи́вся по соста́ву и естество́ все испо́лнив Ду́хом,/ святы́х собо́ры соде́лав благода́тию,/ отню́ду же прии́м вину́ неизрече́нных дел/ и пе́рвую, Ду́хом испо́лньшуюся,/ пою́ще Тя от души́, зове́м Ти:/ ра́дуйся, спасе́ния Нача́льнице;/ ра́дуйся, согреше́нием разреше́ние/ покланя́ющимся ве́рою Рождеству́ Твоему́.

Степе́нна, 1-й антифо́н 4-го гла́са. Проки́мен: Честна́ пре́д Го́сподем: Стих: Что возда́м Го́сподеви о всех: Ева́нгелие от Иоа́нна, зача́ло 35.

По 50-м псалме́ стихи́ра самогла́сна, глас 6:

Благоче́стия и́стиннаго пропове́дника/ и Це́ркви пресве́тлую звезду́/ пе́сньми похва́льными почти́м,/ Солу́ню све́тлаго свети́льника,/ Све́ту ученика́ и дру́га Христо́ва,/ се́яй сло́во благоче́стия Боже́ственно/ в сердца́ всех ве́рных,/ всем ко спасе́нию да́рует/ и мо́лится приле́жно Го́сподеви/ поми́ловатися душа́м на́шим.

Кано́н, творе́ние Патриа́рха Филофе́я. Глас 1.

Песнь 1

Ирмо́с: Твоя́ победи́тельная десни́ца/ Боголе́пно в кре́пости просла́вися,/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Ты даро́ваний исто́чнику и прему́дрости духо́вней, пресла́вне,/ уста́ и мысль приложи́в,/ благода́ти яви́лся еси́ пучи́на,/ от нея́ же ка́плю, о́тче, и мне пода́ждь, пою́щему тя.

Уста́в и пра́вило па́че естества́/ и́ноческому жи́тельству ты был еси́,/ уста́ Богосло́вец же, и святи́тель, и учи́тель Боже́ственная,/ отню́дуже, соше́дшеся вку́пе, тебе́ пе́ние плету́т.

Ин яви́лся еси́ от чре́ва Иереми́я ве́дом,/ Сотво́ршему весь возло́жен, освяще́н, Богоно́се, весь же,/ отню́дуже твоя́ уста́ Бо́жия сло́ва восприя́ша.

Престо́лу предстоя́ Боже́ственному со А́нгелы, Богови́дче Григо́рие,/ лучу́ восприе́мля ны́не явле́нне непристу́пную,/ моли́ся тьмы грехо́вныя нам разреши́тися, мо́лимся.

Богоро́дичен: Свет, возсия́вый, Богороди́тельнице, от Твоея́ утро́бы, ви́дети жела́я, Григо́рий,/ Тебе́, Моли́твеницу, и Соде́теля представля́ет/ и жела́емыя от Тебе́ получи́ благода́ти.

Песнь 3

Ирмо́с: Еди́не, Ве́дый челове́ческаго существа́ не́мощь/ и ми́лостивно в не вообра́жся,/ препоя́ши мя с высоты́ си́лою,/ е́же вопи́ти Тебе́, Святы́й,/ одушевле́нный хра́ме неизрече́нныя сла́вы Твоея́, Челове́колюбче.

Юро́дство, прему́дре, мирску́ю му́дрость вмени́л еси́,/ кре́стное юро́дство возлюби́л еси́ и сего́, на ра́мо прии́м,/ показа́л еси́, я́коже Па́вел рече́,/ е́же юро́дством мирски́я му́дрости превше́д.

Возлюби́л еси́, о́тче, от души́/ нищету́, и смире́ние, и ху́дость, и нестяжа́тельство, челове́к бе́гая,/ отню́дуже гони́м еси́ в пусты́ню,/ всегда́, в воню́ мир твои́х, Христо́ви зовя́ше:/ теку́ вслед Тебе́.

Умертви́л еси́, прему́дре, ве́тхаго тле́ющаго челове́ка/ воздержа́нием вся́ким и пла́чем, исто́чники сле́зными дово́льне омыва́яся,/ житие́м восприя́л еси́ дре́внюю свою́ добро́ту о Христе́ и в но́ваго оде́явся.

Восхва́лим, мно́жества и́нок с ме́стных же состоя́ния,/ со свяще́нники все́ми и пита́тельницы, гла́сы кра́сными и словесы́ Боже́ственными днесь/ о́бщаго учи́теля, и́же нас украси́вшаго де́лы же и словесы́, Григо́рия.

Богоро́дичен: Ви́дев, ю́же жела́ше, зарю́ духо́вную, Григо́рие, предста́тельством Богома́тере,/ ясне́йши же ны́не Тою́ освеща́ем,/ Тоя́ моли́ тьмы страсте́й нас премени́ти Све́том благода́тным.

Седа́лен, глас 8.

Подо́бен: Прему́дрости:

Воздержа́нием, и пла́чем, и моли́твою, и де́йством,/ и нището́ю, и о́бщим умове́нием, Григо́рие, сле́зным очи́стил еси́ свое́ се́рдце,/ весь восхище́н быв, и Христо́ви совокупи́ся ду́хом,/ отню́дуже, я́ко Па́вел, неизрече́нных услы́шав и сосу́д быв избра́нен,/ ты поне́сл еси́ Христо́во И́мя,/ Несо́здано пропове́дал еси́ высо́це и Про́сто Еди́но Божество́,/ е́же моля́ непреста́й спасти́ся ста́ду твоему́.

Сла́ва, и ны́не, Богоро́дичен:

И́же пре́жде от не су́щих приве́д су́щих естества́, Сло́ве Бо́жий,/ поче́т о́бразом же и руко́ю челове́ка, истле́вша того́ пре́лестию змии́ною,/ назда́в142 па́ки Кресто́м честны́м Ти,/ вся́кое же естество́ освяти́л еси́, Ще́дре,/ Святы́м Твои́м Ду́хом и теле́сным восприя́тием,/ Ма́тере Твоея́ мольба́ми, Влады́ко Христе́ Бо́же,/ согреше́нием оставле́ние да́руй покланя́ющимся ве́рою держа́ве твое́й.

Песнь 4

Ирмо́с: Го́ру Тя, благода́тию Бо́жиею приосене́нную/ прозорли́выма Авваку́м усмотри́в очи́ма,/ из Тебе́ изы́ти Изра́илеву/ провозглаша́ше Свято́му/ во спасе́ние на́ше и обновле́ние.

Нощь безлу́чную и тьму, Григо́рие, страсте́й моли́твенною па́лицею ра́нив,/ я́коже Моисе́й Еги́пта, восте́кл еси́ па́че естества́ к виде́нию Боже́ственному/ и законода́вец нам был еси́.

На высоту́ возше́д Боже́ственную, о́тче Григо́рие, доброде́телей,/ я́коже на Фаво́ре Христо́вы дру́зи и ученицы́,/ О́ного узре́л еси́, есте́ственную и Боже́ственную сла́ву явля́юща,/ и, обожи́вся, друго́е показа́ся со́лнце.

Таи́нник Божества́, Богови́дче Григо́рие, и неизрече́нных прича́стник ты быв,/ Богосло́вити Того́ та́йну,/ Еди́но Тоя́ возвести́в и Несо́здано си́лою и Естество́м Треми́ Соста́вы.

Богоро́дичен: Сло́во Ро́ждшую, Бо́жие Неизрече́нное, словесы́ воспе́л еси́ свяще́нными/ и та́йну све́тло Боже́ственнаго воплоще́ния возвести́л еси́,/ Ю́же ны́не моли́ Це́рковь соблюда́ти необурева́ему.

Песнь 5

Ирмо́с: Просвети́вый сия́нием/ прише́ствия Твоего́, Христе́,/ и освети́вый Кресто́м Твои́м ми́ра концы́,/ сердца́ просвети́ Све́том Твоего́ Богоразу́мия/ правосла́вно пою́щих Тя.

Ум Вели́кий, Прему́дрости глубина́ неизрече́нная,/ обре́те твой, Богоно́се, ум вселе́ние, себе́ содруже́н,/ Уму́ и Прему́дрости орга́н тя Це́ркви дарова́л есть.

Я́ко лучу́ све́тлую, пре́жде на Афо́не, Григо́рие, возсия́,/ све́тлому тя гра́ду да́рует,/ Све́том духо́вным Того́ Богодви́жим, освяща́я и оте́чески преднаставля́я.

Дар Боже́ственный от Бо́га тя и бога́тство неистощи́мое обре́т,/ Фетта́льская держа́вная митропо́лия созыва́ет сосе́ды/ к прича́стию твои́х слове́с и чуде́с, блаже́нне.

Жела́ющии по́двига и слове́с благода́тей Григо́риевых,/ песнь тому́ ны́не принося́ще, того́ помо́лим/ его́же моли́твами Зижди́теля и Влады́ку ми́лостива всем соде́лати.

Богоро́дичен: Просвети́вый земли́ широту́ со́лнца све́тлостию,/ Свет су́щим яви́ся во тьме, Де́во, Невече́рний,/ Его́же моли́ тьмы лю́тыя и грехо́вныя нас изба́вити, Влады́чице.

Песнь 6

Ирмо́с: Из утро́бы Ио́ну младе́нца изблева́ морски́й зверь,/ якова́ прия́т,/ в Де́ву же все́льшееся Сло́во/ и плоть прие́мшее про́йде, сохра́ншее нетле́нну,/ Его́же бо не пострада́ истле́ния,/ Ро́ждшую сохрани́ неврежде́нну.

Пра́вило доброде́тели, обоже́ное житие́ твое́ ви́дено бысть ве́рными вои́стину, Григо́рие,/ благоче́стия же прави́тель сло́во твое́, и веле́ние,/ и́ми же свое́ ро́дное и пусторо́дное разсужда́ется,/ Еди́наго Бо́га пропове́дающе всеси́льна, Еди́наго и Несо́здана.

Еди́но благоче́стно пропове́дав Божество́, вели́кий нам яви́ся, Григо́рие,/ Соста́вми Треми́ Еди́но Естество́ и си́лу, вся́чески Ту́ю Про́сту и Несо́здану,/ всех посрами́л еси́ держа́вне, буесло́вящих со́здано Божество́.

Безу́мнаго мудрова́ние облича́еши Акинди́на, я́ко и пре́жде Варлаа́ма го́рдаго,/ е́ллинским бо приобщи́вшимся сла́вам,/ сведо́ша Божество́ в тварь,/ обесче́стивше, я́коже жи́дове пе́рвие, Сы́на Бо́жия досто́инство.

Уста́вы приводя́ веле́ний, Григо́рие, и словеса́ све́тла,/ и́миже отве́рзл еси́ мысль честны́х Богосло́вец Ду́хом,/ моли́твами ти неподви́жиму соблюди́ Христо́ву, избавля́ющи, Це́рковь от вся́кия е́реси.

Богоро́дичен: Престо́л Херуви́мских и всех Небе́сных Сил, Влады́чице,/ и вся́каго вку́пе Го́рняго чи́на вы́шши Ты показа́ся,/ я́ко престо́л неизрече́нен бы́вши Бо́жия Соста́ва,/ Его́же, я́ко Сы́на Своего́, ми́лостива ми, ве́рно Тя пою́щу, соде́лай.

Конда́к, глас 8.

Подо́бен: Взбра́нной:

Прему́дрости свяще́нный и Боже́ственный орга́н,/ Богосло́вия све́тлую согла́сно трубу́,/ воспева́ем тя, Григо́рие Богоглаго́льниче,/ но, я́ко ум, Уму́ Пе́рвому предстоя́й,/ к Нему ум наш, о́тче, наста́ви, да зове́м:/ ра́дуйся, пропове́дниче благода́ти.

И́кос:

А́нгел яви́лся еси́ на земли́, неизрече́нных Боже́ственная тле́нным возвеща́я,/ и́бо Безпло́тных гласово́м, челове́ческим же умо́м и те́лом живы́й, удиви́л еси́/ и сотвори́л еси́ зва́ти ти, Богоглаго́ливе, сия́:/ ра́дуйся, его́же ра́ди Свет пропове́дася;/ ра́дуйся, Его́же ра́ди тьма отгна́ся;/ ра́дуйся, Несо́зданнаго Божества́ возвести́телю;/ ра́дуйся, со́зданнаго естества́ и бу́яго вои́стину обличи́телю;/ ра́дуйся, высото́ невосхо́дная, Бо́жие естество́ рек;/ ра́дуйся, глубино́ неудо́бь зри́тельная, де́йство рек;/ ра́дуйся, я́ко сла́ву Бо́жию до́бре рекл еси́;/ ра́дуйся, я́ко мудрова́ния зло́бных отре́к;/ ра́дуйся, свети́ло, показа́вый со́лнце; ра́дуйся, сосу́де, Боже́ственнаго пития́ прия́телище;/ ра́дуйся, и́мже и́стина сия́ет:/ ра́дуйся, и́мже помрачи́ся лжа;/ ра́дуйся, пропове́дниче благода́ти.

Песнь 7

Ирмо́с: Тебе́, у́мную, Богоро́дице, пещь/ разсмотря́ем, ве́рнии,/ я́коже бо о́троки спасе́ три Превозноси́мый,/ мир обнови́, во чре́ве Твое́м всеце́л,/ хва́льный отце́в Бог и препросла́влен.

Я́коже гро́ма глас твои́х веле́ний и слове́с Боже́ственных мо́лние ужа́сных/ зре́ти я́вствене, о́тче, не возмога́ют пре́лестию плене́ннии/ и осяза́ют, я́коже пи́шет, я́ко слепы́й, ны́не сте́ны сме́шне безу́мнии.

Нощь не светла́ непокори́вым бысть,/ и ны́не Свет Есте́ственный – Ца́рство Сла́вы Бо́жия,/ и́же яви́ таи́нником Человеколю́бец на Фаво́рстей, Григо́рие,/ е́юже, причасти́вся дово́льне, приобща́ешися угоди́вшим.

И́же нечести́ве в благода́ть, пресла́вне, поху́лившим Бо́жие безмо́лвие и моли́тву,/ обоже́нию же неизрече́нному скве́рне насмея́вшихся,/ тех посрами́в, отгна́л еси́ Боже́ственнаго двора́,/ его́же соблюдае́ши всегда́ твои́ми мольба́ми.

Богоро́дичен: Прииди́ ны́не в на́шу по́мощь, спасе́ние о́бщее,/ Григо́риевы моли́твы при́емлющи, Влады́чице,/ стра́сти у́бо усыпа́ющи душе́вныя и теле́сныя/ и о́бщий мяте́ж и тле́ние вско́ре разреша́ющи.

Песнь 8

Ирмо́с: В пещи́ о́троцы Изра́илевы,/ я́коже в горни́ле,/ добро́тою благоче́стия чисте́е зла́та блеща́хуся, глаго́люще:/ благослови́те, вся дела́ Госпо́дня, Го́спода,/ по́йте и превозноси́те во вся ве́ки.

Яви́лся еси́, о́тче, весь све́тел, сла́достен, прав, кро́ток,/ ве́рою приходя́щим ти источа́я сла́дкое слове́с, Григо́рие, Боже́ственное пи́во,/ всех веселя́ благочести́вых сердца́,/ капля́ неду́гующих душе́вными чу́вствы.

Ум и язы́к, вои́стину благоро́ден,/ наказа́ние же и словеса́ се́рдце очище́но обре́т,/ Бо́жия в тя всели́ся Прему́дрость,/ е́йже друг дру́гу сосвяза́вшися, о́тче,/ чу́до всем стра́нно показа́ тя ми́рови.

В пещи́ де́ти неврежде́ны евре́йския показа́ держа́ва благоче́стия,/ и́мже подо́бяся, прему́дре,/ пла́мень удержа́л еси́ злоче́стия посреди́ пе́щи искуше́ний,/ и до́блествене поя́ Влады́ку, и опаля́я гоня́щих.

У́мнаго погрузи́л еси́ фарао́на тече́ньми твои́х слез/ и все еги́петское потопи́л еси́ во́инство,/ возше́л еси́ на го́ру безстра́стия,/ побива́я отту́ду Ду́ха си́лою полки́ бори́тель, я́коже Моисе́й вели́кий.

Богоро́дичен: Све́тлый благода́ти, Чи́стая, пропове́дник и Богосло́вец Ду́ха, Богоро́дице,/ да́ннаго Тобо́ю ми́рови, ны́не словесы́ торжеству́я пе́ние,/ пе́сни же и ли́ки вся Ти собира́ет,/ я́ко ве́рный раб, па́мять Твою́ сла́вя.

Песнь 9

Ирмо́с: О́браз чи́стаго Рождества́ Твоего́/ огнепали́мая купина́ показа́ неопа́льная,/ и ны́не на нас напа́стей свирепе́ющую угаси́ти, мо́лимся, пещь,/ да Тя, Богоро́дице,/ непреста́нно велича́ем.

Престо́лу предстоя́, Григо́рие, Трисо́лнечнаго и Безнача́льнаго Божества́/ и де́йством дово́льне насы́тився благода́тию, ю́же воспе́л еси́,/ соде́йственик и друго́в, ны́не воспомяну́вших тя, помина́й.

Обре́л еси́ возда́ние боле́зней твои́х, Ца́рство, о́тче, Бо́жие Безнача́льное,/ е́же благоче́стне на земли́ воспропове́дал еси́,/ венцы́ триплете́ны восприя́л еси́ испове́дания Боже́ственнаго, свяще́нства же и безмо́лвия.

Яви́лся еси́ и́ночествующим похвала́, Богосло́вец Боже́ствен,/ свяще́нства же пра́вило изве́стное,/ сего́ ра́ди зде даст ти ся чудесе́м Боже́ственная благода́ть,/ словеса́ твоя́ утвержда́я.

Зако́н похва́льных, пресла́вне, и слове́сных по́двиг вои́стину исше́д,/ и на земли́ живы́й, и исше́д от те́ла,/ но приими́ ма́лое пе́ние изря́днейши/ и проше́ния подава́й тебе́ жела́ющих моли́твами свои́ми.

Богоро́дичен: Уста́ стра́шнаго Рождества́ Твоего́ и Богослове́сный язы́к, Влады́чице, бысть,/ е́же па́че естества́ от Тебе́ я́вльшагося обоже́ния честны́й Твой раб Григо́рий,/ его́ же ны́не мольбы́ прие́млющи, спаси́ всех.

Свети́лен:

Подо́бен: Со ученики́:

Ра́дуйся, отце́м похвала́, Богосло́вец уста́, безмо́лвия жили́ще,/ дом Прему́дрости, учи́телей держа́ва, бе́здна сло́ва;/ ра́дуйся, дея́ния орга́н, виде́ния верх, цели́телю страсте́й и боле́знем челове́ческим;/ ра́дуйся, Ду́ха Свята́го селе́ние, и у́мер, и жив, о́тче.

Сла́ва, и ны́не, Богоро́дичен:

Ра́дуйся, ра́дости Хода́таице;/ ра́дуйся, кля́тве разреше́ние,/ ра́дуйся, Ада́мово воскресе́ние;/ ра́дуйся, паде́ние бесово́м;/ ра́дуйся, же́нскаго студа́ потребле́ние;/ ра́дуйся, а́дово испражне́ние, тля сме́рти, освяще́ние челове́ческаго естества́;/ ра́дуйся, Де́во, ра́дуйся, всех Влады́чице;/ ра́дуйся, Бо́жия Ма́ти.

На хвали́тех стихи́ры, глас 8.

Подо́бен: О, пресла́внаго чудесе́:

О́тче, свяще́нне Григо́рие,/ ты, Бо́га изде́тска возлюби́в,/ возненави́дел еси́ ве́щное пристра́стие/ и ми́ра не постоя́тельное/ и, крест до́блествен восприи́м,/ своему́ Влады́це после́довал еси́,/ пла́чем и слеза́ми ду́шу очи́стив свою́ и ум,/ весь был еси́ Богови́днейший.

О́тче, свяще́нне Григо́рие,/ ты се́рдце до́бре виде́нием же и дея́нием очи́стив си,/ Ду́хови был еси́ селе́ние/ и, осия́ние Того́ прие́мля,/ свет яви́лся еси́ вои́стину приближа́ющимтися,/ се сын Све́та был еси́ по благода́ти, сла́вне,/ е́же Сам Естество́ быв Бо́жие, не разделя́яся.

О́тче, Богому́дре Григо́рие,/ ты зле́йшее се́мя и ко́рень раскопа́л еси́,/ Варлаа́ма скве́рнаго отсе́кл еси́ мече́м духо́вным,/ преда́теля же а́бие ве́ре/ и сотаи́нника сему́, суему́дренаго Акинди́на,/ Боже́ственнаго исполне́ния ерети́чествующих отгна́в,/ сочета́л еси́ ху́льником евре́ом,/ поревнова́вша си́х безу́мию.

О́тче, Богому́дре Григо́рие,/ ду́шу очи́стил еси́,/ умо́м свои́м избежа́в от нечи́стаго диа́вола,/ вои́стину сла́вен свои́м вели́чеством,/ дух свой пре́дал еси́ Христу́, Бо́гу на́шему.

Сла́ва, глас 1:

И́же пра́выя ве́ры до́блий подви́жниче,/ и́же пострада́в, я́ко добр во́ин Христа́ Бо́га,/ и Воево́де угоди́вый,/ и подвиза́ся ны́не в Це́ркви до́брым по́двигом,/ соблюда́я ю твои́ми уче́ньми на недви́жимом основа́нии, Григо́рие.

И ны́не, Богоро́дичен:

Ра́дуйся, Богоро́дице Де́во;/ ра́дуйся, похвало́ всея́ вселе́нныя;/ ра́дуйся, Пречи́стая Ма́ти Бо́жия, Благослове́нная.

Славо́словие вели́кое, и ча́с 1-й, и отпу́ст.

НА ЛИТУРГИ́И

Блаже́нны, пе́сни 3-я и 6-я. Проки́мен: Уста́ моя́ возглаго́лют: Апо́стол ко Евре́ем, зача́ло 318. Еванге́лие от Иоа́нна, зача́ло 36.