Служба иже во святых отца нашего Евтихия, архиепископа Константинопольскаго
Стихи́ры, глас 2.
Подо́бен: Егда́ от Дре́ва:
Ста́ду и овца́м Христо́вым слове́сным,/ Евтихи́е блаже́нне,/ тебе́ жре́бий подаде́/ побо́рника непобеди́ма Це́рковь Бо́жия,/ злочести́ваго отгоня́ща Несто́рия от сея́,/ пресла́вную Бо́жию Ма́терь Чи́стую всу́е поху́лившаго,/ Сию́, глаго́люща, пои́стинне не бы́ти Богоро́дицу,/ его́же отри́нул еси́.
На траве́ ве́ры пра́выя/ и на воде́ и́стинныя му́дрости живы́я,/ и зла́це кра́сне пребы́ти твоему́ ста́ду,/ му́дре наста́вил еси́,/ в па́жить Богонасажде́нну,/ пи́щу нетле́ния, неотпа́дающую и неоскуде́ющу,/ уста́, износя́ща Боже́ственныя глаго́лы жи́зни ве́чныя/ и неразори́мо умышле́ние.
Коре́ние и те́рние посека́я учи́тельным твои́м серпо́м,/ ерети́ческая словеса́/ ра́лом твои́м сердца́ посека́л еси́ ме́рзостная,/ и се́ял еси́ Боже́ственных повеле́ний/ твое́ исправле́ние и правоту́,/ и, сия́ плодоно́сна показа́в,/ и́маши тала́нт твой сугу́б,/ и сего́ прино́сиши Влады́це твоему́.
Сла́ва, и ны́не, Богоро́дичен, подо́бен то́йже:
Ина́го держа́внаго прибе́жища/ и кре́пости, столпа́ и стены́ необори́мыя/ вои́стинну не стяжа́хом, ра́зве Тебе́, Пречи́стая./ К Тебе́ прибега́ем и Тебе́ вопие́м:/ Влады́чице, помози́, да не поги́бнем,/ покажи́ Твою́ благода́ть на ны,/ и кре́пости сла́ву,/ и милосе́рдия Твоего́ вели́чество.
Крестобогоро́дичен:
Дре́ву Кре́стному Тя, Иису́се,/ пригвожде́на зря́щи, Неискусобра́чная,/ пла́чущи, глаго́лаше:/ Ча́до сла́дкое,/ почто́ оста́вил еси́ Мене́, ро́ждшую Тя, еди́ну,/ Све́те непристу́пный Пребезнача́льнаго Отца́?/ Потщи́ся и просла́вися,/ я́ко да сла́ву получа́т Боже́ственную/ Боже́ственныя стра́сти Твоя́ сла́вящии.
Тропа́рь, глас 4:
Пра́вило ве́ры и о́браз кро́тости,/ воздержа́ния учи́теля/ яви́ тя ста́ду твоему́/ я́же веще́й и́стина,/ сего́ ра́ди стяжа́л еси́ смире́нием высо́кая,/ нището́ю бога́тая./ О́тче Евтихи́е,/ моли́ Христа́ Бо́га/ спасти́ся душа́м на́шим.
Кано́н, его́же краегране́сие: Чудоде́тельному Евтихи́ю удивля́юся. Творе́ние Феофа́ново. Глас 6.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.
Доброде́тельми благополу́чествовав и просве́щся светолу́чными сия́ньми даро́в Бо́жиих,/ злополуче́ния изба́ви мя страсте́й моли́твами твои́ми, му́дре,/ я́ко да воспою́ тя.
Небосажде́нна розга́ во дво́рех Бо́жиих,/ прозя́бл еси́ гобзова́нныя плоды́ доброде́тельных дея́ний, вку́пе и чуде́с/ пои́стинне, блаже́нне Евтихи́е.
Ум влады́ку сотвори́в, страсте́й томи́тельство, преподо́бне, удержа́л еси́,/ те́мже, безстра́стия кри́лы возвы́сився,/ к са́мым Бо́жиим приве́лся еси́ селе́нием.
Богоро́дичен: Твоего́ прие́мше Соде́теля, я́ко Сам восхоте́,/ из безсе́меннаго Твоего́ чре́ва, па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица.
Песнь 3
Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Свята́го Ду́ха был еси́ храм, Богоно́се,/ тебе́ сама́го очи́стив от тиме́ния страсте́й прилежа́нием мно́гим,/ святи́телю сла́вне Евтихи́е.
Сын дне прича́стием све́тлости невеще́ственныя показа́лся еси́/ и све́том врачева́ний нело́жных/ мглу страсте́й отго́ниши вре́да, всеприснопа́мятне.
Сосца́ ссав изде́тска воздержа́ния,/ в ме́ру моли́твами непреста́нными во́зраста Христо́ва дости́гл еси́ вои́стинну,/ святи́телю сла́вне Евтихи́е.
Богоро́дичен: Боже́ственнаго рождества́ Твоего́, Чи́стая, вся́кий естества́ чин превосхо́дит чу́до:/ Бо́га бо преесте́ственне зачала́ еси́ во чре́ве/ и, ро́ждши, пребыва́еши Присноде́ва.
Седа́лен, глас 3:
Подо́бен: Боже́ственныя ве́ры:
Боже́ственною си́лою оде́явся, обнажи́л еси́ кре́пость льсти́ваго,/ чудоде́йствуя, Богоно́се, изря́дная./ Отгна́н же непра́ведно ста́да твоего́, па́ки возврати́лся еси́ в не,/ прославля́ем, о́тче преподо́бне:/ Христа́ Бо́га моли́ дарова́ти нам ве́лию ми́лость.
Сла́ва, и ны́не, Богоро́дичен.
Боже́ственная ски́ния была́ еси́ Сло́ва,/ еди́на Пречи́стая Ма́ти Де́во, чистото́ю А́нгелы превозше́дшая,/ па́че всех мене́, персть бы́вша, оскверне́на плотски́ми прегреше́ньми,/ очи́сти моли́тв Твои́х Боже́ственными вода́ми,/ подаю́щи, Чи́стая, ве́лию ми́лость.
Крестобогоро́дичен:
Нескве́рная А́гница Сло́ва, нетле́нная Де́ва Ма́ти,/ на Кресте́ зря́щи пове́шена из Нея́ без боле́зни прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Заре́ю, всему́дре, Боже́ственныя благода́ти осиява́емь,/ вся́кое ерети́ческое мне́ние омрачи́л еси́/ и уясни́л еси́ люде́й правосла́вных собо́ры.
Не стужи́л еси́, за ве́ру гоне́ния терпя́,/ и́бо Того́ име́л еси́, спобора́юща тебе́,/ гони́маго Христа́, святи́телю всече́стне.
Возвы́сив, поста́ви на ка́мени Христо́с Своея́ и́стины/ твоея́ души́, блаже́нне, стопы́/ и запя́т враго́в вознесе́нная мудрова́ния.
Богоро́дичен: Яко вои́стинну невеща́нна и непости́жна Твоего́ боголе́пнаго, Богоро́дице, суть рождества́/ су́щим на земли́ и на Небеси́, Присноде́во, та́инства.
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
До́блественне терпя́ разлуче́ние вруче́ннаго ти ста́да, о́тче,/ непра́ведно изгна́н был еси́;/ а́бие же к сему́ па́ки тече́ши ра́достно,/ вельми́ от всех восхваля́емый.
Не в гада́ниих зри́ши сла́ву,/ и́же возжела́л еси́ Бо́жию от младе́нства, блаже́нне Евтихи́е,/ лице́м же па́че ны́не к лицу́ разре́шшимся зерца́лом плотски́м, о́тче наш.
Вод Боже́ственных твоя́ душа́, о́тче, испо́лньшися,/ ре́ки Це́ркви вои́стинну источи́ уче́ний, му́дре Евтихи́е,/ и сея́ напая́еши, блаже́нне, бразды́.
Богоро́дичен: И́же Богоро́дицу Тя от души́, Влады́чице ми́ра Блага́я, испове́дающия спаса́й:/ Тя бо предста́тельство непобори́мое стяжа́хом,/ су́щую Богороди́тельницу.
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.
В тебе́ всели́ся Тро́ица я́ко в чи́стом от страсте́й слия́ния/ и дарова́ний испо́лни вои́стинну, Богому́дре Евтихи́е,/ и́миже всяк неду́г отго́ниши при́сно.
Возвы́сился еси́, стяжа́в в се́рдцы твое́м нело́жне высокотво́рное смире́ние,/ и де́монския вся ко́зни до конца́ смири́л еси́,/ святи́телю Госпо́день пресла́вне.
Жите́йское мо́ре безво́лненне преше́д,/ к приста́нищем дости́гл еси́ Ца́рствия, о́тче, Небе́снаго,/ Бо́гу бре́мя души́ спасл еси́, досточу́дне.
Богоро́дичен: Пречи́стая Влады́чице, ро́ждшая челове́ком Ко́рмчию и Го́спода,/ страсте́й мои́х нестоя́нное и лю́тое утоли́ смуще́ние/ и тишину́ пода́ждь се́рдцу моему́.
Конда́к, глас 8:
Боже́ственнаго ве́рно Евтихи́я вси пою́ще, лю́дие,/ любо́вию да ублажи́м, я́ко па́стыря вели́ка и служи́теля,/ и учи́теля прему́дра, и прогони́теля ересе́й,/ мо́лит бо Го́спода о всех нас.
Песнь 7
Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
Снегови́дну, о́тче, ду́шу стяжа́в,/ доброде́телей бе́лостию уподо́бился еси́ А́нгелом./ Те́мже с ни́ми лику́еши и, ра́дуяся, вопие́ши:/ благослове́н еси́, Бо́же оте́ц на́ших.
Же́ртву я́ко непоро́чну,/ прине́сл еси́ тя сама́го от младе́нства, преподо́бне, Влады́це твоему́/ сласте́й умерщвле́нием я́ко вои́стинну./ Те́мже, ра́дуяся, вопие́ши:/ благослове́н еси́, Бо́же оте́ц на́ших.
То́ки твои́х слез, о́тче, угаси́ша о́гненное пале́ние плотски́х сласте́й/ и бы́ша исцеле́ний роса́ ве́рно зову́щим всегда́ Христу́:/ благослове́н е́си, Бо́же оте́ц на́ших.
Богоро́дичен: Тя, Всенепоро́чная и Ма́ти Присноде́во, позна́хом спасе́ние, челове́цы,/ и́бо в не́дрех Отца́ неразлу́чный Сын из Тебе́ воплоти́ся./ Те́мже Благослове́на еси́ в ро́ды родо́в.
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Дрема́ние уны́ния оттря́с доброде́телей попече́нием, о́тче,/ бдел еси́, до́ндеже Бо́га Иа́ковля яви́лся еси́ селе́ние,/ Его́же превозно́сим во вся ве́ки.
Щито́м благоче́стия защища́яся, и, я́ко обоюдоо́стр меч, восприи́м повеле́ние честно́е,/ тве́рдо вся ссекл еси́ ерети́ческия полки́, Богому́дре.
Безкро́вныя же́ртвы Бо́гу прине́сл еси́,/ смире́нием се́рдца, о́тче Евтихи́е,/ же́ртвуя тебе́ ра́ди пожре́нному, я́ко овча́ти,/ Его́же превозно́сим во вся ве́ки.
Тро́ичен: Еди́но естество́ Тро́ицы,/ неисче́тную си́лу, превозше́дшую времена́ вся и естества́ по́мысл,/ при́сно правосла́вно пропове́даем и превозно́сим во вся ве́ки.
Богоро́дичен: В рождестве́ избежа́ла еси́ боле́зни, Чи́стая,/ и, ро́ждши, Де́ва па́ки пребыла́ еси́: вся бо твори́т Иису́с Бог и Челове́к,/ Его́же превозно́сим во вся ве́ки.
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Ма́лыми велича́йшая стяжа́в и тле́нными нетле́нная до́бре искупи́в,/ Ца́рство недви́жимое прия́л еси́, немимоходя́щую сла́ву получи́л еси́,/ доброде́телей твои́х добро́тами украша́емь.
Чи́сто житие́ твое́ соверши́л еси́/ и Чи́стыя Де́вы служи́тель яви́лся еси́, Евтихи́е,/ иера́рх Бо́жий и́стиннейший, столп правосла́вия, твердь ве́ры,/ стена́ лю́дей избра́нных, Богоблаже́нне.
Плотско́е мудрова́ние повину́л еси́ по́мыслу/ и, я́коже безпло́тен, во пло́ти на земли́ пожи́л еси́, Евтихи́е,/ те́мже со Безпло́тными Боже́ственными си́лами/ Влады́це всех и Бо́гу, ра́дуяся, предстои́щи.
Я́ко А́нгелом ны́не купножи́тель,/ патриа́рхом, му́чеником и преподо́бным равносе́льник,/ с ни́ми моли́ся Го́сподеви реше́ние грехо́в всем дарова́ти,/ свяще́нную твою́ на земли́ па́мять творя́щим, му́дре.
Богоро́дичен: Сы́на, безле́тно от Отца́ возсия́вшаго,/ Ты, во чре́ве несказа́нно заче́нши,/ родила́ еси́, Богома́ти Чи́стая, Де́во нескве́рная./ Моли́, Пресвята́я, о рабе́х Твои́х Того́, я́ко Человеколю́бца Бо́га,/ спасти́ род наш.
