Служба иже во святых отец наших равноапостольных Мефодия и Кирилла, учителей Словенских

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры пра́здника 3 и святы́х 5, глас 2.

Подо́бен: Ки́ими похва́льными венцы́:

Ки́ими похва́льными венцы́/ увязе́м Богому́дрыя учи́тели,/ язы́ки слове́нския, во тьме неве́дения и се́ни сме́ртней седя́щия,/ све́том Ева́нгелия просвети́вшия,/ Тро́ицы Единосу́щныя велегла́сныя пропове́дники./ И́миже и мы, я́ко ди́вия ма́слина,/ к благопло́дному ко́рени Правосла́вия прицепи́хомся/ и прия́хом от Христа́ Бо́га мир и ве́лию ми́лость.

Ки́ими похва́льными пе́сньми/ ублажи́м Богому́дрыя учи́тели,/ Мефо́дия пустыннолю́бнаго,/ в безмо́лвнем пребыва́нии плоды́ Ду́ха обогати́вшася,/ и Кири́лла златоглаго́ливаго,/ раче́нием любому́дрия Го́рнюю прему́дрость стяжа́вшаго/ и бу́иих мудреце́в ага́рянских суесло́вие посрами́вшаго./ ихже ра́ди Христо́с Бог наш/ дарова́ и нам ве́лию ми́лость.

Ки́ими пе́сненными добро́тами/ восхва́лим Богому́дрыя учи́тели,/ Мефо́дия, вся кра́сная ми́ра любве́ ра́ди Христо́вы презре́вшаго/ и во а́нгельстем о́бразе Небе́сному Царю́ кре́пко во́инствовавшаго,/ и Кири́лла, от о́трочества прему́дрость в сожи́тие себе́ избра́вшаго/ и от Бо́га да́нныя тала́нты во сла́ву Его́ усугу́бившаго./ И́миже и мы Присносу́щную Тро́ицу, Отца́ и Сы́на и Свята́го Ду́ха,/ Еди́наго Бо́га позна́вше,/ и́мамы от Христа́ Бо́га ве́лию ми́лость.

Ки́ими духо́вными пе́сньми/ возвели́чим вас,/ о преблаже́ннии учи́телие,/ спасе́ния ра́ди люде́й слове́нских апо́стольски подвиза́вшияся,/ и в просвеще́нии их све́том Богове́дения до́бре потруди́вшияся,/ к нему́же дверь затворе́нная/ ва́ми писме́н слове́нских изобре́тением отве́рзеся нам?/ В ню́же входя́ще,/ та́инство благове́стия Христо́ва разумева́ем/ и прие́млем от Христа́ Бо́га мир и ве́лию ми́лость.

Сла́ва, глас 6:

Апо́столом единонра́вныя,/ иера́рхов удобре́ние,/ язы́ков слове́нских просвети́тели и те́плыя засту́пники,/ прииди́те, празднолю́бцы,/ похва́льными пе́нии воспои́м, глаго́люще:/ ра́дуйся, Кири́лле, Богосло́вия трубо́ златокова́нная,/ та́инство Святы́я Тро́ицы подо́бием со́лнечным уясни́вый/ и тем злоху́льная уста́ ага́рянская загради́вый;/ ра́дуйся и ты с ним, Мефо́дие, единому́дренно подвиза́выйся,/ моли́твами и зна́мении тому́ споспешеству́я;/ и ны́не, отцы́ всеблаже́ннии,/ не преста́йте моля́щеся о нас Христу́ Бо́гу,/ ве́рою и любо́вию вас велича́ющих.

И ны́не, пра́здника.

Вход. Проки́мен дне. И чте́ния три святи́тельская.

При́тчей чте́ние (главы́ 10 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва,/ от уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да!/ честна́я бо реку́,/ и блаже́н челове́к, и́же пути́ моя́ сохрани́т, исхо́ди бо мои́ исхо́ди живота́/ и уготовля́ется хоте́ние от Го́спода./ Сего́ ра́ди молю́ вас/ и предлагаю́ мой глас сыново́м челове́ческим,/ я́ко аз, прему́дрость, устро́их сове́т,/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте убо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки,/ честна́я бо реку́, и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х,/ ничто́же в них стро́потно, ниже́ развраще́нно./ Вся пра́ва суть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́веден прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их,/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну,/ не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ в него́же ме́сто предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бысть/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́,/ и посеще́ние во избра́нных Его́.

На лити́и стихи́ры хра́ма. Сла́ва, глас 8:

Я́ко учи́телие нело́жнии,/ повеле́нная Го́сподем са́ми пре́жде сотво́рше/ и в благода́ти апо́стольства просия́вше,/ лю́ди слове́нския наказа́ньми к благоче́стию приведо́сте,/ Кири́лле и Мефо́дие Богому́дрии,/ неве́рныя же па́ки вразуми́сте/ к позна́нию ве́ры Правосла́вныя/ и Креще́нием святы́м просвети́сте./ Но у́бо пе́рвии наста́вницы ро́да слове́нскаго/ и за́поведей Бо́жиих храни́телие,/ спаса́йте нас моли́твами ва́шими,/ ве́рою и любо́вию вас в по́мощь призыва́ющих.

И ны́не, пра́здника.

На стихо́вне стихи́ры глас 8:

Све́тлостию жития́ ва́шего,/ учи́телие равноапо́стольнии,/ я́ко зве́зды небе́сныя, на тве́рди церко́вней просия́ли есте́/ и, мре́жею уче́ний ва́ших мно́гия язы́ки Христу́ улови́вше,/ ко Све́ту Непристу́пну востекли́ есте́,/ иде́же со А́нгелы ны́не водворя́ющеся,/ мольбу́ сотвори́те о нас,/ свяще́нную па́мять ва́шу о Го́споде пра́зднующих.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Прииди́те, о празднолю́бцы,/ возвели́чим учи́тели,/ апо́столом равнопресто́льныя и слове́н сла́ву:/ и́ми бо от пре́лести бесо́вския свободи́вшеся,/ свет благове́стия Христо́ва прия́хом/ и позна́хом Предве́чное Сло́во,/ от мра́ка грехо́внаго изба́вльшеся.

Стих: Уста́ пра́веднаго поуча́тся прему́дрости/ и язы́к его́ возглаго́лет суд.

Кири́лле Богому́дре и Мефо́дие Боголюби́ве,/ Це́ркве слове́нския апо́столи и первоучи́тели/ и ве́рных засту́пницы,/ благоче́стия ревни́тели,/ Ду́ха Свята́го орга́ни сладкогла́снии,/ ны́не ве́лие дерзнове́ние у Христа́ Пастыренача́льника иму́ще,/ моли́теся о нас, честну́ю па́мять ва́шу соверша́ющих,/ да возведе́т от тли живо́т наш, я́ко Многоми́лостив.

Сла́ва, глас то́йже:

Ра́дуйся, дво́ице свяще́нная,/ све́том Богопозна́ния нас озари́вшая:/ Кири́лле, духо́вныя му́дрости исто́чниче живоно́сный,/ язы́ки слове́нския, жа́ждею истаява́ющия, напои́вый,/ Мефо́дие, моли́твы чи́стое обита́лище./ Христу́, Ему́же во сла́ве предстоите́,/ моли́теся приле́жно,/ да ку́пно с ва́ми Его́ велича́ем/ и превозно́сим во вся ве́ки.

И ны́не, пра́здника.

На благослове́нии хле́бов тропа́рь святы́м, два́жды. И Богоро́дице Де́во: еди́ножды.

Тропа́рь святы́м, глас 4:

Я́ко апо́столом единонра́внии/ и слове́нских стран учи́телие,/ Кири́лле и Мефо́дие Богому́дрии,/ Влады́ку всех моли́те,/ вся язы́ки слове́нския утверди́ти в Правосла́вии и единомы́слии,/ умири́ти мир/ и спасти́ ду́ши на́ша.

НА У́ТРЕНИ

На Бог Госпо́дь: тропа́рь пра́здника два́жды. Сла́ва: святы́х. И ны́не: пра́здника.

По 1-м стихосло́вии седа́лен, глас 3:

Тро́ице Живонача́льней, Ю́же немо́лчно славосло́вят а́нгельския си́лы/ и Ю́же велегла́сно во язы́цех пропове́дасте,/ ны́не во Све́те непристу́пнем предстоя́ще, моли́теся приле́жно, Кири́лле и Мефо́дие,/ долго́в разреше́ние дарова́ти и ве́чнаго осужде́ния изба́вити/ любо́вию па́мять ва́шу почита́ющия.

Сла́ва, и ны́не, пра́здника.

По 2-м стихосло́вии седа́лен, глас 5:

Да ра́дуются днесь ро́ди слове́нстии,/ свяще́нную па́мять учи́телей Богому́дрых све́тло пра́зднующе:/ те́ми бо нача́тся на сро́днем нам язы́це слове́нстем литурги́я Боже́ственная/ и все церко́вное служе́ние соверша́тися,/ и тем неисчерпа́емый кла́дязь воды́, теку́щия в жизнь ве́чную, даде́ся нам/ от нея́же пию́ще, не преста́нем велича́ти вас, Кири́лле и Мефо́дие./ Вы же, во сла́ве святы́х веселя́щеся,/ моли́теся приле́жно спасти́ся душа́м на́шим.

Сла́ва, и ны́не, пра́здника.

Велича́ние:

Велича́ем вас,/ святи́и равноапо́стольнии Мефо́дие и Кири́лле,/ вся слове́нския страны́ уче́ньми свои́ми просвети́вшия/ и ко Христу́ приве́дшия.

Псало́м избра́нный святи́тельский.

По полиеле́и седа́лен, глас 4:

Прииди́те, просвети́тели на́ша велегла́сно хвала́ми почти́м:/ ти́и бо язы́ки слове́нския, гла́дом сло́ва Бо́жия погиба́вшия,/ ма́нною уче́ния Богому́драго напита́ста/ и преложе́нием Благове́стия сы́на Гро́мова на сро́дную им бесе́ду,/ я́ко луче́ю со́лнечною, просвети́ста,/ от нея́же и мы озаре́ние прие́мше, благода́рственно воззове́м:/ ра́дуйтеся, Кири́лле и Мефо́дие присносла́внии.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Услы́шите сия́, вси язы́цы, внуши́те, вси, живу́щии по вселе́нней. Вся́кое дыха́ние: Ева́нгелие о́бщее святи́телем.

По 50-м псалме́ стихи́ра, глас 6:

Апо́столом единонра́вныя: зри сла́вник на Го́споди, воззва́х:

И́на стихи́ра, глас то́йже:

Излия́ся благода́ть во устна́х ва́ших,/ преподо́бнии отцы́,/ и бы́сте па́стырие Христо́вы Це́ркве,/ уча́ще слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

Кано́н пра́здника на 6 и святы́х на 8, глас 3.

Песнь 1

Ирмо́с: Во́ды дре́вле ма́нием Боже́ственным/ во еди́но со́нмище совокупи́вый/ и раздели́вый мо́ре изра́ильтеским лю́дем,/ Сей Бог наш препросла́влен есть,/ Тому́ Еди́ному пои́м, я́ко просла́вися.

Во́ды мяте́жа мирска́го прейти́ недоумева́я, преподо́бне Мефо́дие,/ оста́вил еси́ вся кра́сная ми́ра сего́/ и, во а́нгельстем о́бразе на неви́димыя враги́ во́инствуя,/ Бо́гу еди́ному порабо́тал еси́, ра́достно воспева́я:/ Тому́ еди́ному пои́м, я́ко просла́вися.

Избра́нный сосу́д от пеле́н показа́лся еси́, Кири́лле блаже́нне,/ ю́ношеских шата́ний чужд яви́вся и Му́дрость Боже́ственную возлюби́в,/ те́мже Святы́я Правосла́вныя Це́ркве уче́нием просвеще́н,/ и сам мно́гим учи́тель и просвети́тель был еси́.

Вода́ми уче́ний ва́ших ороси́вшася,/ слове́нския страны́ да́же додне́сь Влады́це Христу́ плоды́ благоприя́тны прино́сят./ Сего́ ра́ди ублажа́ет вас Свята́я Це́рковь, зову́щи:/ от бед изба́вите нас, уго́дницы Христо́вы.

Богоро́дичен: Во́ды грехо́вныя внидо́ша до души́ моея́, Влады́чице,/ и в тиме́нии страсте́й углебо́х,/ к Тебе́ прибега́ю, Всенепоро́чная,/ нечи́стых помышле́ний волне́ние утиши́/ и ми́рное устрое́ние ми да́руй.

Песнь кано́на преподо́бным Кири́ллу и Мефо́дию, соста́вленная митрополи́том Моско́вским Филаре́том

Ирмо́с, глас 5: Спаси́телю Бо́гу,/ путе́м но́вым и ди́вным из тьмы еги́петския лю́ди Своя́ изве́дшему/ и све́том Своего́ богопи́саннаго зако́на просвети́вшему,/ пои́м Ему́, я́ко просла́вися.

Богому́дрии учи́телие, святи́телие Кири́лле и Мефо́дие,/ от облагода́тствованнаго разуме́ния ва́шего/ низпосли́те луч све́та несве́тлому моему́ ра́зуму,/ о вас любому́дрствующему.

Бог, Ему́же ве́дома суть от ве́ка вся дела́ Его́,/ еще́ во о́трочестве твое́м, Богому́дре Кири́лле,/ назна́мена тя бы́ти прему́дрости Его́ люби́теля и служи́теля,/ показа́в тебе́ во сне обруче́ние твое́ с де́вою Софи́ею,/ Софи́я бо толку́ется прему́дрость.

Изхудо́жествовав пи́смена слове́нская, прему́дре Кири́лле,/ а́бие кни́ги Боже́ственныя, святы́я и моли́твенныя,/ те́ми написа́л еси́ и пре́дал еси́ лю́дем./ Моли́ Христа́, Бо́жию Прему́дрость,/ да сы́нове росси́йстии, кни́жнаго уче́ния вожделе́вше,/ не прелага́ются в науче́ния стра́нна и разли́чна,/ но сло́вом Бо́жиим и уче́нием святы́х да просвеща́ют ра́зумы своя́/ и благода́тию да утвержда́ют сердца́ своя́.

Испо́лнися ты́сяща лет,/ отне́леже и́стина Христо́ва и Ева́нгельский дух жи́зни/ вни́де в сло́во и пи́смя слове́нское твои́м, Богому́дре Кири́лле, служе́нием/ и да́же доны́не спаси́тельным богове́дением просвеща́ет слове́нския и росси́йския лю́ди./ О сем ра́дующеся и Христа́ Светода́вца сла́вяще,/ и твое, преподо́бне, благодея́ние благода́рне испове́дуем./ Ты же споспешеству́й нам твои́ми моли́твами,/ я́ко да и безле́тныя блаже́нныя жи́зни дости́гнем Правосла́вною ве́рою/ и за́поведей Христо́вых исполне́нием.

Богоро́дичен: Блага́я Ма́ти Блага́го Царя́ и Пра́веднаго Судии́,/ да́рующаго Ца́рствие Бо́жие язы́ку, творя́щему плоды́ Его́ и отъе́млющаго от недосто́йных,/ ми́лостива сотвори́ Его́ нам Твои́м предста́тельством,/ да неотъи́мет от нас Ца́рствия Своего́,/ я́ко не прине́сших Ему́ плодо́в благоче́стия,/ пра́вды, воздержа́ния, братолю́бия,/ но да обрати́т нас к покая́нию и исправле́нию/ и соблюде́т нас в чи́не сыно́в Ца́рствия Своего́.

Песнь 3

Ирмо́с: И́же от несу́щих вся приведы́й,/ сло́вом созида́емая,/ соверша́емая Ду́хом,/ Вседержи́телю Вы́шний,/ в любви́ Твое́й утверди́ мене́.

Глаго́л Госпо́день, я́ко – и́же по Мне ити́ хо́щет, да во́зьмет крест свой,–/ слу́хом се́рдца твоего́ услы́шав, преподо́бне Мефо́дие,/ крест и́ноческаго жития́ возложи́в на ра́мо твое́, после́довал еси́ Христу́,/ Его́же моли́, да и мене́, хла́днаго, в любви́ Свое́й утверди́т.

И́же дре́вле Иа́кову в со́ннем виде́нии ле́ствицу, к небеси́ возводя́щую, показа́,/ Той и тебе́, свя́те Кири́лле, еще́ о́троку су́щу, в ди́внем сне Софи́ю де́ву обручи́:/ се же бысть Престо́лу Его́ приседя́щая Прему́дрость,/ Я́же в любви́ Всевы́шняго утверди́ тя.

И́же от не су́щих вся Приведы́й, и вас, отцы́ досточу́днии,/ от чре́ва ма́терня освяти́ в сосу́ды избра́нная Себе́,/ во е́же пронести́ И́мя Его́ пред язы́ки;/ те́мже честну́ю па́мять ва́шу соверша́юще, мо́лим вас, Кири́лле и Мефо́дие,/ вла́ющийся ум наш во испове́дании пра́выя ве́ры утверди́ти.

Богоро́дичен: Я́же ми́рови мир пода́вшая/ и Нача́льника тишины́ ро́ждшая,/ укроти́ во́лны страсте́й мои́х, Чи́стая,/ и на ка́мени мя безстра́стия утверди́.

Святы́м седа́лен, глас 4:

Уподо́бил еси́ со́лнцу Тро́ицу Святу́ю Единосу́щную, Кири́лле Богодухнове́нне,/ во о́браз Святы́я Тро́ицы зри́мому на небеси́ со́лнцу созда́ну бы́ти, глаго́ля:/ подо́бие Бо́га Отца́ со́лнечный круг есть,/ не имы́й конца́, ни нача́ла,/ и, я́коже от кру́га со́лнечна исхо́дит луча́ све́та, поднебе́сную просвеща́ющая,/ си́це от Бо́га Отца́ ражда́ется Сын, О́тчее сия́ние,/ теплота́ же, вселе́нную оживля́ющая,/ от того́жде кру́га ку́пно с луче́ю излива́емая,/ подо́бие есть Ду́ха Свята́го,/ от Того́жде Отца́ исходя́щаго./ Ди́вному уче́нию твоему́ вне́млюще,/ и мы в Тро́ице Еди́ному Бо́гу покланя́емся,/ па́мять же твою́ ублажа́ем, досточу́дне.

Сла́ва, и ны́не, пра́здника.

Песнь 4

Ирмо́с: Положи́л еси́ к нам тве́рдую любо́вь, Го́споди:/ Единоро́днаго бо Твоего́ Сы́на/ за ны на смерть дал еси́./ Те́мже Ти зове́м, благодаря́ще:/ сла́ва си́ле Твое́й, Го́споди.

Положи́л еси́ хране́ние за́поведей, я́ко ка́мень краеуго́лен,/ на не́мже созида́я хра́мину души́ твоея́, преподо́бне Мефо́дие,/ Ду́ха Свята́го селе́ние сотвори́л ю еси́;/ аз же, селе́ние греха́ сый, к тебе́ припа́даю, всеблаже́нне,/ очи́сти мя росо́ю моли́тв твои́х, да зову́, благодаря́:/ сла́ва си́ле Твое́й, Го́споди.

Даждь ми, да разуме́ю, что есть уго́дно Тебе́, Влады́ко,–/ взыва́л еси́, блаже́нне Кири́лле,/ егда́ со ю́ным царе́м в науче́ние кни́жное вдан был еси́./ Сего́ ра́ди, ку́пно со вне́шним любому́дрием,/ Ду́ха прему́дрости и стра́ха Бо́жия свы́ше прия́л еси́,/ земну́ю же му́дрость ни во что́же вмени́л еси́, зовы́й:/ сла́ва си́ле Твое́й, Го́споди.

Положи́л еси́ любо́вь к Зижди́телю твоему́, я́ко печа́ть, на се́рдце твое́м, всеблаже́нне./ Сего́ ра́ди земну́ю обру́чницу и сла́ву ми́ра сего́ отри́нул еси́, Кири́лле,/ и, я́ко пти́ца, от се́ти ловя́щих бе́гая,/ в ти́хое приста́нище и́ночествующих дости́гл еси́/ и в ри́зу ра́дования обле́клся еси́, воспева́я со Мефо́дием:/ сла́ва си́ле Твое́й, Го́споди.

Богоро́дичен: Положи́в беззако́ния и непра́вды моя́ предо мно́ю,/ ви́жду, я́ко па́че песка́ морска́го умно́жишася./ К Тебе́ прибега́ю, Всенепоро́чная,/ стру́пы души́ моея́ исцели́,/ да зову́ к Ро́ждшемуся от Тебе́, благодаря́:/ сла́ва си́ле Твое́й, Го́споди.

Песнь 5

Ирмо́с: Я́ко ви́де Иса́ия обра́зно/ на Престо́ле превознесе́на Бо́га,/ от А́нгел сла́вы дориноси́ма,/ о, окая́нный, – вопия́ше, – аз!/ прови́дех бо воплоща́ема Бо́га, Све́та Невече́рня,/ и ми́ром Влады́чествующа.

Я́ко крин благоуха́нный, в пусты́ни процве́л еси́, преподо́бне Мефо́дие,/ моли́твами, бде́нием и поще́нием ду́шу твою́ украша́я,/ и, на земли́ равноа́нгельно пожи́в,/ ны́не со А́нгелы све́тло созерца́еши Све́та Невече́рня/ и ми́ром Влады́чествующа.

От А́нгел сла́вы дориноси́мому моля́ся в пусты́ни, Кири́лле,/ ну́ждею в Ца́рствующий град возвраще́н был еси́/ и са́ном свяще́нства украси́лся еси́,/ да путь спасе́ния челове́ком пока́жеши,/ све́том уче́ния просвеща́я и Безкро́вную Же́ртву о всех принося́ Све́ту Невече́рнему/ и ми́ром Влады́чествующу.

Я́ко кла́дязь прему́дрости неисчерпа́емый, яви́лся еси́, Богоно́се Кири́лле,/ егда́ в сарацы́ны на препре́ние ху́лящих Пресвяту́ю Тро́ицу от царя́ по́слан был еси́:/ не возмого́ша бо му́тными вода́ми злоуче́ния потопи́ти тя,/ Све́том Невече́рним свы́ше озаря́ема.

Богоро́дичен: Я́ко дре́во непло́дное, сый,/ ка́ко не ужаса́юся гро́знаго посече́ния, о окая́нный аз!/ Ско́ро притецы́ ко Богоблагода́тней, душе́ моя́:/ а́ще бо не Она́ засту́пит тя,/ узре́ти не и́маши Све́та Невече́рня и ми́ром Влады́чествующа.

Песнь 6

Ирмо́с: Бе́здна после́дняя грехо́в обы́де мя,/ и исчеза́ет дух мой;/ но простры́й, Влады́ко, высо́кую Твою́ мы́шцу,/ я́ко Петра́, мя, Упра́вителю, спаси́.

Се, я́ко пучи́на морска́я, естество́ Бо́жие есть,/ непостижи́мое умо́м и неизрече́нное глаго́лы,–/ рекл еси́ ко ага́ряном, прему́дре Кири́лле,–/ ту́ю бо пучи́ну кроме́ свята́го Ева́нгелия преплы́ти хотя́щии потопля́ются, не ве́дуще пе́ти:/ я́ко Петра́ ны, Упра́вителю, спаси́.

В бе́здне ра́зума лжеиме́ннаго угле́бшии ага́ряне/ та́йно яд сме́ртный предложи́ша тебе́;/ реки́й же во Ева́нгелии Христо́с:/ я́ко а́ще что сме́ртно испие́те, не вреди́т вы,–/ соблюде́ тя це́ла и с че́стию в Ца́рствующий град возврати́./ Ты же, царе́м и патриа́рхом досто́йно ублажа́емь,/ не превозне́слся еси́ и взыва́ти не преста́л еси́:/ я́ко Петра́ мя, Упра́вителю, спаси́.

Дре́вле реки́й Боже́ственный Дух:/ отдели́те Ми Варна́ву и Са́вла на де́ло, на не́же призва́х их;/ подо́бне и вас, отцы́ преподо́бнии,/ в слове́нския страны́ посла́ти повеле́,/ и та́ко лю́дие, во тьме и се́ни сме́ртней седя́щии,/ све́том уче́ния ва́шего просвети́вшеся, воззва́ша:/ я́ко Петра́ ны, Упра́вителю, спасл еси́.

Богоро́дичен: Бе́здна после́дняя грехо́в обы́де мя,/ и, тре́петом одержи́мь есмь, ужаса́яся всеконе́чнаго потопле́ния./ Те́мже мольбу́ приношу́ Ти, Пренепоро́чная:/ поми́луй стра́стную мою́ ду́шу,/ простри́ ру́ку Твою́, я́ко Блага́я,/ и, я́ко Петра́ спасе́ Сын Твой,/ та́ко мя, Упра́вительнице, спаси́.

Конда́к, глас 3:

Свяще́нную дво́ицу просвети́телей на́ших почти́м,/ Боже́ственных писа́ний преложе́нием исто́чник Богопозна́ния нам источи́вших,/ из него́же да́же додне́сь неоску́дно почерпа́юще,/ ублажа́ем вас, Кири́лле и Мефо́дие,/ Престо́лу Вы́шняго предстоя́щих/ и те́пле моля́щихся о душа́х на́ших.

И́кос:

В доброде́тели просия́вшия пропове́дники благоче́стия,/ и́стинныя столпы́ и основа́ния Це́ркве,/ трубы́ Боже́ственныя Христо́вых догма́тов,/ Богоно́сныя отцы́ Мефо́дия и Кири́лла, прииди́те, ве́рнии, восхва́лим:/ ти́и бо, мрак неве́рия от нас отгна́вше/ и е́реси нече́стия огне́м Ду́ха попали́вше,/ преложе́нием писа́ний род слове́нский из ди́вия ма́слины в благопло́дную премени́ша,/ и Боже́ственным Креще́нием в ве́ру Христо́ву приведо́ша,/ и вселе́нную всю мно́жеством чуде́с испо́лниша./ Того́ ра́ди днесь а́ки венцено́сцы предстоя́т Вседержи́телю Бо́гу, к ни́мже возопии́м:/ отцы́ Боже́ственнии и равноапо́стольнии,/ предста́тельством ва́шим да́руйте всем племено́м слове́нским в правове́рии тве́рдость и единомы́слие,/ те́пле моля́щеся о душа́х на́ших.

Песнь 7

Ирмо́с: Пре́жде о́бразу злато́му, перси́дскому чти́лищу,/ о́троцы не поклони́шася,/ трие́ пою́ще посреде́ пе́щи:/ отце́в Бо́же, благослове́н еси́.

Пре́жде еди́н со Еди́ным пребыва́я,/ ду́шу твою́, я́ко рай богонасажде́нный, сотвори́л еси́, Мефо́дие,/ та́же на про́поведь апо́стольскую ку́пно с Богому́дрым Кири́ллом шед,/ во страна́х слове́нских потруди́лся еси́,/ иде́же, я́ко о́троцы, огне́м нече́стия неопаля́еми, воспева́сте:/ отце́в Бо́же, благослове́н еси́.

Иуде́и и сарацы́ны препре́л еси́, прему́дре Кири́лле,/ и страну́ Хаза́рскую святы́м Креще́нием просвети́л еси́, у́зников мно́жество свобожда́я,/ и в пусты́ни безво́дней во́ду сла́ную в сла́дкую преложи́л еси́./ Лю́дие же, спасе́ннии тобо́ю, воспева́ху:/ отце́в Бо́же, благослове́н еси́.

Сосу́ди избра́ннии бы́сте, отцы́ преподо́бнии, пронести́ И́мя Госпо́дне пред язы́ки,/ сего́ ра́ди и и́ны страны́ слове́нския возжеле́ша све́том уче́ния ва́шего озари́тися./ Вы же предсуди́сте сла́дость безмо́лвия на труд апо́стольский премени́ти,/ да мно́жайшия Христу́ приобря́щете и ку́пно с ни́ми воспое́те:/ отце́в Бо́же, благослове́н еси́.

Богоро́дичен: Сосу́д полн страсте́й есмь, Пресвята́я Богоро́дице Де́во,/ и сме́рти о́ныя после́дния и о́гненнаго преще́ния страшу́ся./ Но Ты, Пречи́стая, спаси́ мя, погиба́ющаго,/ кре́постию препоя́ши дух мой,/ да плени́цы грехо́вныя расто́рг, благода́рственно воспою́:/ Изба́вителя плене́нных ро́ждшая, благослове́на еси́.

Песнь 8

Ирмо́с: Веще́ственнаго огня́ пла́мень/ невеще́ственным увяди́ша Богозри́мии о́троцы, и поя́ху:/ благослови́те, вся дела́ Госпо́дня, Го́спода.

Невеще́ственным све́том благода́ти вы́ну озаря́емь,/ прия́л еси́ сан свяще́нства, блаже́нне Кири́лле,/ и споспе́шествующу тебе́ Ду́ху Свято́му, писмена́ слове́нская изобре́л еси́,/ да богодухнове́нных книг на сро́дную им бесе́ду преложе́нием лю́дие просвети́вшеся, воспою́т:/ благослови́те, вся дела́ Госпо́дня, Господа.

Пе́рвее сы́на Гро́мова неземны́я глаго́лы: в нача́ле бе Сло́во,–/ я́ко ве́ры на́шея глави́зну возгреме́ли есте́, отцы́ всехва́льнии./ Те́мже псалти́рь сладкогла́сную на глаго́лы слове́нския преложи́ли есте́,/ е́юже и ны́не Свята́я Це́рковь, веселя́щися, взыва́ет:/ благослови́те, вся дела́ Госпо́дня, Го́спода.

Невеще́ственным сокро́вищем обогати́сте нас, отцы́ досточу́днии:/ Боже́ственная бо Литурги́я на язы́це слове́нстем нача́тся от вас соверша́тися./ Сея́ благода́ти и мы додне́сь прича́стницы су́ще, воспева́ем Бо́га, глаго́люще:/ благослови́те, вся дела́ Госпо́дня, Го́спода.

Богоро́дичен: Огнь искуше́ний и напа́стей злых обы́де мя,/ к Тебе́ прибега́ю, Богоро́дице Де́во:/ не пре́зри, Чи́стая, моле́ний раба́ Твоего́,/ от одержа́щих мя лю́тых изба́ви,/ да, благословля́я, благословлю́ Тя и превознесу́ и́мя Твое́ во ве́ки.

Песнь 9

Ирмо́с: Тебе́, неопали́мую купину́ и Святу́ю Де́ву,/ Ма́терь Све́та и Богоро́дицу,/ наде́жду всех нас, велича́ем.

Тебе́ по достоя́нию восхвали́ти кто возмо́жет, Мефо́дие всесла́вне?/ По́двиги и труды́ твоя́,/ я́же апо́стольски спасе́ния ра́ди люде́й заблу́ждших подъя́л еси́, Кири́лле, кто изочте́т?/ Па́че же мы, ва́ми сла́вити Бо́га Вы́шняго на сро́днем нам язы́це научи́вшеся,/ единому́дренно и вас с Ним велича́ем.

Тебе́, Кири́лле блаже́нне, я́ко уже́ де́ло соверши́вшу и тече́ние сконча́вшу,/ бысть извеще́ние свы́ше о кончи́не твое́й,/ е́же прии́м, ра́достно воспе́л еси:/ о ре́кших мне, вни́дем во дворы́ Госпо́дни, возвесели́ся дух мой./ Та́же вожделе́в, в Го́рняя душе́ю возне́слся еси́,/ иде́же с Небе́сными си́лами Тро́ицу Единосу́щную вы́ну велича́еши.

Це́ркве Мора́вския епи́скопство прие́м, преподо́бне Мефо́дие,/ мно́гия труды́ и по́двиги, ве́ру святу́ю возвеща́я, подъя́л еси́,/ мно́гия беды́ и изгна́ния претерпе́л еси́,/ ны́не же ку́пно со святы́м Кири́ллом в Вы́шних ра́дующеся, моли́теся о нас,/ да мы я́ко засту́пники и хода́таи на́ша вы́ну вас велича́ем.

Богоро́дичен: Превы́шшая А́нгел и Херуви́м честне́йшая,/ предста́тельством святы́х Кири́лла и Мефо́дия, на на́ше смире́ние умилосе́рдися, мо́лим Ти ся,/ из глубины́ грехо́вныя возведи́ и ве́чнаго осужде́ния нас изба́ви,/ да ку́пно с ни́ми Тебе́, Ма́терь Све́та и Богоро́дицу, наде́жду всех нас, велича́ем.

Свети́лен:

Учи́тели святи́и,/ па́мять ва́шу све́тло пра́зднующе,/ мо́лим вас всеусе́рдно:/ язы́ки, и́хже сокро́вищем благове́стия обогати́сте,/ на ка́мени испове́дания Христо́ва утверди́те,/ и соблюди́те в ми́ре живо́т наш.

Сла́ва, и ны́не, пра́здника.

На хвали́тех стихи́ры пра́здника 3 и святы́х 3, глас 4.

Подо́бен: Я́ко до́бля:

Кири́лле и Мефо́дие Богому́дрии,/ апо́стольским стопа́м после́дующе,/ ко взыска́нию люде́й заблу́ждших единому́дренно подви́гшеся,/ я́ко орли́ скоропаря́щии, страны́ слове́нския облете́ли есте́,/ я́же све́том богопозна́ния озари́вше,/ приведо́сте ко Иису́су Человеколю́бцу/ и Спа́су душ на́ших.

Виногра́да Христо́ва де́лателие,/ благоче́стия насади́тели,/ лю́ди слове́нския, я́ко дра́хму поги́бшую,/ со тща́нием взыска́вше обрели́ есте́, Богоно́снии отцы́,/ ю́же в сокро́вищницу жи́зни ве́чныя прия́т,/ ра́дуяся, со А́нгелы Иису́с Человеколю́бец,/ и Спас душ на́ших.

Святы́я Тро́ицы побо́рницы/ и заблу́ждших наста́вницы,/ злохуле́ние ага́рянское препре́вшии/ и нече́стие иуде́йское посрами́вшии,/ Це́рковь, ю́же стяжа́ли есте́/ богоуго́дными труды́ и по́ты ва́шими,/ сохрани́ти потщи́теся от наве́тов вра́жиих неврежде́ну/ и благоприя́тну Иису́су Человеколю́бцу/ и Спа́су душ на́ших.

Сла́ва, глас 6:

Просвети́телей на́ших благоче́стно па́мять соверша́юще,/ лю́дие, благода́рственно возопии́м:/ ра́дуйтеся, свети́льницы пресве́тлии,/ све́том Богопозна́ния страны́ слове́нския озари́вшии,/ ра́дуйтеся, па́стырие до́брии,/ слове́сныя о́вцы, в де́брех неве́рия разсе́янныя,/ во еди́но собра́вшии/ и к Пастыренача́льнику Христу́ приве́дшии./ Его́же велича́юще, вас ублажа́ем.

И ны́не, пра́здника.

Славосло́вие вели́кое. И отпу́ст.

НА ЛИТУРГИ́И

Блаже́нны от кано́на святы́х, пе́сни 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол ко Евре́ем, зача́ло 318. Аллилу́ия, глас 2: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Ева́нгелие от Матфе́я, зача́ло 11. Прича́стен: В па́мять ве́чную.

Моли́тва

О пресла́внии просвети́телие слове́нских язы́к, святи́и равноапо́стольнии Мефо́дие и Кири́лле, ва́ших писме́н и уче́ний све́том просвети́вшеся и в ве́ре Христо́вой наста́вльшеся, я́ко ча́да ко отце́м, усе́рдно ны́не прибега́ем и сокруше́нием серде́чным мо́лимся: а́ще и заве́т ва́ших не соблюдо́хом, о угожде́нии бо Бо́гу небрего́хом и от бра́тняго единомы́слия в ве́ре отпадо́хом, оба́че я́коже дре́вле в земно́м житии́ ва́шем, си́це и ны́не гре́шных и недосто́йных не отврати́те тщи, но, я́ко иму́ще ве́лие ко Го́споду дерзнове́ние, приле́жно Того́ моли́те, да обрати́т нас в путь спасе́ния, да умири́т раздо́ры единове́рных, да приведе́т к единомы́слию отпа́дших и всех нас ду́хом любве́ да соедини́т Еди́ней Святе́й, Собо́рней и Апо́стольстей Це́ркви! Ве́мы бо, я́ко мно́го мо́жет моли́тва пра́ведных ко благосе́рдию Влады́ки. Не оста́вите у́бо нас, уны́лых и недо́стойных, чад ва́ших, и́хже ра́ди грехо́в па́ства ва́ша, враждо́ю разделя́ема и собла́знми иносла́вных прельща́ема, ума́лися, о́вцы же слове́сныя, разрева́емы, восхища́ются во́лки губи́тельными. Пода́ждьте у́бо нам моли́твами ва́шими ре́вность Правосла́вия, я́ко да оте́ческая преда́ния до́бре сохрани́м, кано́ны церко́вныя ве́рно соблюде́м, вся́ких лжеуче́ний стра́нных отбежи́м и, та́ко в житии́ богоуго́днем преспева́юще, жи́зни ра́йския на Небеси́ сподо́бимся, иде́же ку́пно с ва́ми просла́вим в Тро́ице Еди́наго Бо́га во ве́ки веко́в. Ами́нь.

И́на моли́тва

О всехва́льнии равноапо́столи Мефо́дие и Кири́лле, припа́дающе пред честно́ю ико́ною ва́шею, усе́рдно мо́лим вы: воззри́те ми́лостивно на нас, и́хже трудо́м ва́шим просвети́ли есте́, и оградите́ нас неусы́пным предста́тельством ва́шим от злых ко́зней вра́жиих! При́зрите у́бо на виногра́д сей, его́же насади́ли есте́, и не преда́йте ди́веему ве́прю озоба́ти его́. Сохрани́те, святи́и уго́дницы Бо́жии, Це́рковь на́шу Правосла́вную, ю́же вы назда́ли есте́ на краеуго́льном Ка́мени, Христе́, я́ко да бу́дет недви́жима, но да разсы́пятся о Ка́мень сей во́лны вся́каго малове́рия. Укрепи́те па́стырей на́ших во всех доброде́телех и в по́двизе пропове́дания, вразуми́те же пасо́мых, во е́же послу́шати гла́са их. Сохрани́те вся страны́ слове́нския от вся́каго оскуде́ния, от огня́ и меча́, от смертоно́сныя я́звы и от вся́каго зла. Услы́шите и вся́каго челове́ка, с ве́рою к вам приходя́щаго и благода́тныя по́мощи ва́шея тре́бующаго. В стра́шный же час сме́ртный предста́ните всем нам блази́и хода́таи и те́мных зра́ков де́монских прогони́телие, да в ми́ре и покая́нии сконча́вше земно́е по́прище, дости́гнем ве́чных благ наслажде́ния и ку́пно с ва́ми просла́вим Пресвяту́ю Тро́ицу – Отца́ и Сы́на и Свята́го Ду́ха, ны́не, и при́сно, и во ве́ки веко́в. Ами́нь.