Служба блаженнаго Иоанна Милостиваго Власатаго, Ростовскаго чудотворца
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры, глас 8.
Подо́бен: О, пресла́внаго чудесе́:
Блаже́нне Иоа́нне богому́дре,/ чи́стая твоя́ душа́/ правове́рным смы́слом сия́ющи/ и блиста́ющи доброде́телей светлостьми́,/ озаря́ет ве́рных исполне́ние,/ бесо́вскую тьму отгоня́ющи,/ те́мже я́ко прича́стника тя невече́рней благода́ти/ ублажа́ем благоче́стно вси,// досточу́дне.
Име́я ду́шу ми́лостиву,/ и чист по́мысл, и се́рдце бо́дро,/ ве́ру небла́зненну/ и любо́вь вои́стину нелицеме́рну,/ от земли́ преста́вился еси́ к Небе́сным/ и с ли́ки пра́ведных водворя́ешися./ Те́мже тя почита́ем свяще́нными пе́сньми/ и благоче́стно вси сла́вим,// досточу́дне Иоа́нне.
Боже́ственными уче́нии укрепля́яся,/ стра́сти плотска́я от души́ отгна́л еси́/ и Святе́й Тро́ице селе́ние предочи́щенное был еси́./ Тем к Боже́ственней жи́зни преста́вился еси́,/ Бо́гу соблюда́ющу и ны́не/ невреди́мо твое́ блаже́нное те́ло/ Боже́ственным судо́м,// и́мже Сам весть, прославля́яй тя я́ве, Иоа́нне.
Сла́ва, глас 1:
Ка́ко не диви́мся житию́ твоему́/ или́ ка́ко не похва́лим, преподо́бне Иоа́нне, житие́ равноа́нгельное,/ по́мысла целому́дренное/ и кро́тости твоея́ смире́нное и молчали́вое,/ ми́лостыни неоску́дное?/ Все́ми доброде́тельми украси́лся еси́, блаже́нне./ Те́мже тебе́ ожида́ет неизглаго́ланная ра́дость// и Небе́сное Ца́рствие.
И ны́не, Богоро́дичен, глас то́йже: Всеми́рную сла́ву:
Вход. Проки́мен дне и чте́ния 3 преподо́бническая.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 1:
Подо́бен: Небе́сных чино́в:
Наста́, богоно́се,/ со́лнца светле́йший твой пра́здник,/ озаря́ет приходя́щия к тебе́ ве́рою/ и безсме́ртием облагоуха́ет,/ и душа́м источа́ет исцеле́ния, Иоа́нне преподо́бне,// моли́твенниче о душа́х на́ших.
Чу́вственныя стра́сти теле́сныя/ победи́в воздержа́ния бразда́ми, чудоде́йственниче Иоа́нне,/ и ре́вности безпло́тных на земли́ показа́в,/ вся плотска́я жела́ния ду́ху повину́л еси́,/ тем ны́не, в Небе́сных селе́ниях водворя́яся,// моли́ о душа́х на́ших.
Процве́л еси́, я́ко фи́никс, Дави́дски, о́тче,/ оби́тель яви́лся еси́ Ду́ха Пресвята́го/ и сла́вен вселе́нней показа́вся./ О нас непреста́нно моли́,/ почита́ющих ве́рою// пречестну́ю па́мять твою́, преподо́бне.
Сла́ва, глас 2:
Преподо́бне о́тче,/ измла́да доброде́тели приле́жно обучи́вся, орга́н был еси́ Свята́го Ду́ха/ и, от Него́ прии́м чуде́с де́йство,/ увеща́л еси́ челове́ки преоби́дети сла́дкая./ Ны́не же Боже́ственным Све́том чисте́йше осиява́ем,// просвети́ и на́ша мы́сли, Иоа́нне, о́тче наш.
И ны́не, Богоро́дичен, глас то́йже:
Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.
На стихо́вне стихи́ры, глас 2.
Подо́бен: До́ме Евфра́фов:
Дом и жили́ще/ Ду́ха Пресвята́го,/ прему́дре Иоа́нне, был еси́./ Те́мже и нас до́мы Того́ соде́лай,// святу́ю твою́ па́мять почита́ющих.
Стих: Возвесели́тся пра́ведник о Го́споде// и упова́ет на Него́.
Житие́ твое́, я́ко со́лнце,/ в сердца́х ве́рных возсия́,/ чудеса́ испуща́я,/ те́мже и нас све́том невече́рним озари́,/ всечестну́ю твою́ па́мять почита́ющих.
Стих: Пра́ведник, я́ко фи́никс, процвете́т,// я́ко кедр, и́же в Лива́не, умно́жится.
Не преста́й моля́ся, Иоа́нне,/ о любо́вию чту́щих тя/ и твоего́ предста́тельства прося́щих,/ да вси честно́е твое́ пра́зднество,/ веселя́щеся, почита́ем.
Сла́ва, глас 4:
Земны́й А́нгел и Небе́сный челове́к/ яви́лся еси́, преблаже́нне,/ исто́чник умиле́ния, ми́лости пото́к,/ пучи́на чуде́с, струя́ исцеле́ний,/ Иоа́нне досточу́дне,/ ма́слина Бо́жия, вои́стину плодови́та,/ еле́ем трудо́в твои́х умаща́я ве́рою тя хва́лящих/ и моля́ Человеколю́бца/ от бед изба́вити/ любо́вию чту́щих всечестну́ю па́мять твою́.
И ны́не, Богоро́дичен, глас то́йже: При́зри на моле́ния:
Тропа́рь, глас 8:
Яви́лся еси́ во гра́де, я́ко в пусты́ни,/ в смиренному́дрии, чистоте́ и в труде́х, и по́двизех, и в терпе́нии мно́зе, преблаже́нне о́тче Иоа́нне./ Взем бо Крест Христо́в, после́дова Ему́/ и бе в моли́твах и псалмопе́нии иноязы́чнаго рече́ния день и нощь/ о спасе́нии всего́ ми́ра христиа́нскаго,/ и пресели́лся еси́ к Невече́рнему Све́ту./ Ны́не же ко гро́бу твоему́ ве́рнии приходя́щии,/ моля́щеся Го́сподеви, Богоро́дице и Предте́чи, прие́млют исцеле́ния моли́твами твои́ми./ Но при́сно за ны моли́ся, блаже́нне о́тче Иоа́нне,/ спасти́ся душа́м на́шим.
Ин тропа́рь, глас 4:
Яви́лся еси́ во гра́де, я́ко в пусты́ни,/ смиренному́дрием и чистото́ю/ и, взем Крест Христо́в, после́дова Ему́/ в труде́х и по́двизех и в терпе́нии мно́зе, преблаже́нне о́тче Иоа́нне./ И ны́не моли́ о нас, соверша́ющих па́мять твою́/ и усе́рдно притека́ющих к ра́це моще́й твои́х,/ изба́витися от бед и душа́м на́шим пода́ти ве́лию ми́лость.
Сла́ва, и ны́не, Богоро́дичен.
НА У́ТРЕНИ
На Бог Госпо́дь: тропа́рь свята́го два́жды. Сла́ва, и ны́не, Богоро́дичен.
По 1-м стихосло́вии седа́лен, глас 5:
Тве́рдаго адама́нта и столпа́, непоколеби́ма вра́жиими прило́ги,/ богоно́снаго Иоа́нна пе́сньми почти́м./ Терпе́нием бо вои́стину посрами́в прило́ги сопроти́внаго врага́ и без ве́сти его́ сотвори́вша,/ и ны́не мо́лится о спасе́нии душ на́ших.
Сла́ва, и ны́не, Богоро́дичен::
Ужа́сно чу́до зача́тия и несказа́нен о́браз Рождества́/ в Тебе́ позна́ся, Чи́стая Присноде́во,/ ужаса́ет мой ум и удивля́ет по́мысл./ Сла́ва Твоя́, Богоро́дице, всем простре́ся/ во спасе́ние душ на́ших.
По 2-м стихосло́вии седа́лен, глас 5:
По́стника Госпо́дня пе́сньми почти́м,/ я́ко умертви́вша вся прило́ги страсте́й/ воздержа́нием и тве́рдым терпе́нием вои́стину,/ и посрами́вша зело́ противобо́рца врага́ и всю его́ горды́ню,/ и ны́не моля́щася ко Го́споду, поми́ловатися душа́м на́шим.
Сла́ва, и ны́не, Богоро́дичен:
Предста́тельнице необори́мая оскорбля́емых/ и те́плое заступле́ние упова́ющих на Тя,/ от бед мя изба́ви:/ Ты бо еси́ всех Помо́щница.
По полиеле́е седа́лен, глас 1:
Погре́бл еси́ страсте́й все воста́ние/ умерщвле́нием пло́ти, свяще́нный о́тче,/ и жизнь безконе́чную по сме́рти прия́л еси́./ Те́мже днесь Христо́ва Це́рковь пра́зднует твою́ досточу́дную па́мять,/ преподо́бных украше́ние.
Сла́ва, и ны́не, Богоро́дичен:
Тебе́ велича́ем, Богоро́дице, вопию́ще:/ Ты еди́на Благослове́нная,/ из Тебе́ бо неизрече́нно роди́ся Христо́с Бог наш.
Степе́нна, 1-й антифо́н 4-го гла́са. Проки́мен, глас 4: Возвесели́тся пра́ведник о Го́споде;/ и упова́ет на Него́. Стих: Услы́ши, Бо́же, глас мой, внегда́ моли́тимися к Тебе́. Ева́нгелие от Матфе́я, зача́ло 43.
По 50-м псалме́ стихи́ра, глас 8:
Челове́че Бо́жий, Иоа́нне чу́дный,/ ты у́бо, восше́д на ле́ствицу доброде́телей,/ по ней возше́л еси́ к го́рнему Иерусали́му/ и та́мо узре́л еси́ жела́емаго Христа́,/ Его́же ра́ди плоть твою́ изнури́л еси́/ и те́ло ме́ртвенное на безсме́ртную жизнь измени́л еси́./ О нас непреста́нно моли́ся// дарова́ти душа́м на́шим мир и ве́лию ми́лость.
Кано́н Богоро́дицы на 6 и свята́го на 8, глас 4.
Песнь 1
Ирмо́с: Мо́ря чермну́ю пучи́ну:
Тво́рче всея́ тва́ри, Преблаги́й Го́споди Иису́се Христе́, Бо́же наш,/ яви́л еси́ нам, рабо́м Твои́м, сего́ блаже́ннаго Иоа́нна, по́мнящим и слы́шавшим его́,/ и́же ны́не, ра́ди Твоего́ свята́го и́мене и Пречи́стыя Богоро́дицы и Предте́чи Иоа́нна/ ко гро́бу его́ приходя́ще, прие́млют исцеле́ния,/ тем Твое́ человеколю́бное смотре́ние сла́вим и мо́лим Тя:/ спаси́ нас, Го́споди.
Ми́лостивому Бо́гу на земли́ подо́бен был еси́, о́тче Иоа́нне,/ правове́рным смы́слом оста́вль оте́чество свое́, прии́де во град, я́ко в пусты́ню./ И, я́ко ца́рскою багряни́цею и ви́ссом, власяни́цею оде́явся, о́тче,/ и венце́м терпе́ния с пострада́вшими увязе́ся,/ моли́ Христа́ Бо́га о всех нас.
Отче Иоа́нне блаже́нне,/ ко Христу́ ве́ру небла́зненну име́яй, чист по́мысл и любо́вь нелицеме́рну,/ терпе́нием же твои́м и смиренному́дрием/ прича́стника тя невече́рней благода́ти благоче́стно сла́вим.
Богоро́дичен: Роди́выйся от Де́вы, Христе́ Бо́же, и мир просвети́вый от нетле́ния,/ изба́ви и мене́, окая́ннаго, Богоро́дицы ра́ди и всех святы́х Твои́х/ от прегреше́ний мои́х.
Катава́сия: Крест начерта́в:
Песнь 3
Ирмо́с: Весели́тся о Тебе́ Це́рковь Твоя́:
Христа́ Бо́га в се́рдце свое́м восприя́л еси́, о́тче Иоа́нне,/ и Престо́ла Бо́жия дости́гл еси́,/ Пресвяту́ю Тро́ицу непреста́нно зре́ти сподо́бился еси́./ Мо́лим тя: испроси́ пода́ти правосла́вным христиа́ном здра́вие,/ на враги́ одоле́ние и ми́ру умире́ние, земли́ благопло́дие/ и душа́м на́шим спасе́ние.
Име́я, о́тче Иоа́нне, ду́шу чи́сту и ми́лостиву и се́рдце бо́дро,/ тем вселе́ние во дворе́ ове́ц Христо́вых и путь предочи́щен обре́т к Пресвяте́йТро́ице,/ к ве́чному животу́ прибли́зился еси́, и нас спаси́ моли́твами твои́ми.
Пресвято́му Ду́ху на земли́ был еси́ жили́ще, блаже́нне Иоа́нне,/ ны́не же на Небеси́ предстои́ши Го́сподеви./ Те́мже мо́лим тя:/ и нас Свято́му Ду́ху дом соде́лай моли́твами твои́ми, чту́щих тя.
Богоро́дичен: Роди́тельнице безму́жная, Ма́ти Христа́ Бо́га, Де́во Мари́е,/ мо́лим Тя, Госпоже́:/ спаси́ рабы́ Твоя́ от всех зол.
Ин конда́к, глас 2:
Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я,/ земна́я же вся презре́ и ни во что́же вмени́,/ и на земли́ а́нгельское житие́ име́я,/ пресели́лся еси́ в ве́чный поко́й,/ иде́же, предстоя́ Христу́ Бо́гу,/ моли́ спасти́ся нам и всему́ христиа́нскому ро́ду, я́ко да зове́м ти:// ра́дуйся, преблаже́нне о́тче Иоа́нне.
Седа́лен: Тве́рдаго адама́нта: пи́сан по 1-м стихосло́вии. Сла́ва, и ны́не, Богоро́дичен.
Песнь 4
Ирмо́с: Вознесе́нна Тя ви́девши:
Лучеза́рными светлостьми́ Пресвяты́я Тро́ицы просия́л еси́, о́тче Иоа́нне,/ я́ко ма́слина плодови́та в дому́ Бо́жии, еле́ем трудо́в твои́х./ И ны́не, в неизглаго́ланней ра́дости пребыва́я,/ посеща́й нас моли́твами твои́ми, чту́щих тя.
Богому́дре о́тче Иоа́нне,/ чи́стая твоя́ душа́ с ли́ки святы́х на Небесе́х предстоя́т Христу́ Бо́гу, ра́дуяся./ Те́мже мы святу́ю твою́ па́мять пе́сньми почита́ем и мо́лим тя спасти́ся нам.
Житие́ твое́ на земли́, блаже́нне Иоа́нне, я́ко со́лнце возсия́,/ ны́не же, на Небесе́х предстоя́ Го́сподеви, мо́лишися за ны./ Зде же от гро́ба твоего́ чуде́с лучи́, исцеле́ния прие́млюще, мо́лим тя:/ просвети́ нас Невече́рним Све́том, моли́твами твои́ми.
Богоро́дичен: Я́ко заче́нши Преве́чное из Безнача́льнаго Отца́ Сло́во,/ пло́тию ро́ждши па́че сло́ва, Де́во Ма́ти, Преве́чнаго Бо́га,/ Того́ моли́ спасти́ся рабо́м Твои́м.
Песнь 5
Ирмо́с: Ты, Го́споди, мой Свет:
Свети́ло пресве́тлое от Бо́га возсия́л еси́, о́тче Иоа́нне, в преимени́том гра́де Росто́ве/ и в доброде́тельных све́тлостех чудесы́ просия́л еси́./ Те́мже тя прославля́ем, па́мять твою́ почита́юще.
Яви́лся еси́ во гра́де Росто́ве земны́й А́нгел и Небе́сный челове́к,/ подава́я всем исто́чник благоче́стия и ми́лости,/ по преставле́нии же да́руя душа́м на́шим спасе́ние и телесе́м исцеле́ние.
Ко́е похвале́ние принесе́м ти, честны́й о́тче Иоа́нне,/ ви́дяще и слы́шаще блаже́нное твое́ житие́ и терпе́ние?/ Яко и ны́не, приходя́ще к тебе́, прие́млем неоску́дно исцеле́ние и здра́вие,/ и что ти возда́мы, не ве́мы, но то́кмо глаго́лем:/ ди́вен Бог во святы́х Свои́х, творя́й чудеса́ Еди́н.
Богоро́дичен: Всесвята́я Богоро́дице,/ во вре́мя живота́ моего́ не оста́ви мене́,/ челове́ческому предста́тельству не вве́ри мя,/ но Сама́ заступи́ и поми́луй мя.
Песнь 6
Ирмо́с: Пожру́ Ти со гла́сом:
Богому́дре и всеблаже́нне Иоа́нне,/ смиренному́дрием, терпе́нием и по́двиги возжеле́л еси́ Небе́снаго Ца́рствия./ Ны́не же, предстоя́ со все́ми святы́ми Царе́ви Си́лам,/ моли́ спасти́ся рабо́м твои́м.
Бога́тства Небе́снаго возжела́л еси́, земну́ю сла́ву и бога́тство ни во что́же вмени́в,/ обре́т Ца́рство Небе́сное, нетле́нным и ве́чным бога́тством обогати́лся еси́,/ и нас спаси́ моли́твами твои́ми от всех зол.
Посо́бием и вселе́нием в тя Пресвята́го Ду́ха, о́тче Иоа́нне,/ на земли́ терпе́нием побежда́я бесо́вския полки́,/ обре́л еси́ вене́ц нетле́нный от Христа́ Бо́га и Спа́са душ на́ших./ Моли́ спасти́ся рабо́м твои́м.
Богоро́дичен: Пое́м Тя, Де́во, Богома́ти Чи́стая, Мари́е,/ па́че рождества́ Твое́ богому́жное Рождество́ и нетле́нную чистоту́,/ и́бо сочета́ся де́вство и рождество́.
Конда́к, глас 8:
Христо́вою любо́вию уязви́вся, о́тче Иоа́нне блаже́нне,/ вы́шния красоты́ жела́я, земна́я же вся презре́ и ни во что́же вмени́;/ и на земли́ а́нгельское житие́ препроводи́, в ве́чный поко́й дости́же,/ иде́же глас пра́зднующих, с ни́миже моли́ся за ны// и душа́м на́шим проще́ние и телесе́м исцеле́ние да́руй.
И́кос:
Ка́ко возмогу́ аз, окая́нный, воспе́ти равноа́нгельное житие́ твое́ на земли́:/ целому́дрие, терпе́ние и те́плую я́же ко Христу́ любо́вь?/ По отше́ствии же твое́м к Бо́гу/ с ве́рою приходя́щим ко гро́бу твоему́ подае́ши исцеле́ния./ И что́ ти принесе́м? То́чию мо́лим тя и си́це вопие́м:/ ра́дуйся, честны́й о́тче наш Иоа́нне блаже́нне,/ ты бо еси́ гра́ду на́шему похвала́ и утвержде́ние,/ боля́щим исцеле́ние и душа́м на́шим спасе́ние.
Песнь 7
Ирмо́с: В пещи́ авраа́мстии:
Све́тло сия́ющим спаси́тельным бога́тством на земли́ обогатится еси́, блаже́нне о́тче Иоа́нне,/ всели́лся в боже́ственный град Росто́в и причти́лся еси́ с ли́ки пра́ведных в ве́чное ра́дование./ Моли́ся за ны, пою́щия:/ благослове́н Бог оте́ц на́ших.
Боже́ственными веле́нии и уче́нии оде́явся в смысл безстра́стный и моли́твенный,/ вни́де во двор ове́ц Па́стыря Небе́снаго,/ иде́же ли́цы святы́х веселя́щеся пою́т:/ благослове́н Бог оте́ц на́ших.
Ди́вен еси́, Бо́же наш,/ я́ко и ко́сти на́ги де́йствуют в ми́ре чудеса́ и подаю́т исцеле́ния,/ да благослови́м Го́спода, пою́ще:/ благослове́н Бог оте́ц на́ших.
Богоро́дичен: Безневе́стная Чи́стая браконеиску́сная Де́во, Ма́ти Христа́ Бо́га,/ моли́ Того́ о спасе́нии пою́щих:/ благослове́н Бог оте́ц на́ших.
Песнь 8
Ирмо́с: Ру́це распросте́р, Дании́л:
Благи́м смиренному́дрием твои́м ум свой простира́я к Вы́шнему,/ Боже́ственным призыва́нием вни́де в ра́дость Го́спода своего́,/ хваля́ и благословя́ Христа́ во ве́ки.
Мольба́ми твои́ми и благоду́шным терпе́нием, ду́шу твою́ и те́ло очи́стив от вся́кия скве́рны,/ обре́л еси́ ве́чный поко́й,/ иде́же есть жили́ще веселя́щихся и сла́вящих Христа́ во ве́ки.
После́довал еси́, о́тче, отце́м, Иоа́нне блаже́нне,/ и́же Христа́ ра́ди на земли́ мно́ги ско́рби претерпе́вый и Боже́ственная веле́ния вся соверши́вый./ Ты бо тле́нная вся мудрова́ния от себе́ отве́ргл еси́,/ тем Небе́сное Ца́рство насле́дова во ве́ки.
Богоро́дичен: Я́ко Цари́цу, Царя́, всех Бо́га, Ро́ждшую,/ ве́рнии, со Арха́нгелом Благослове́нную возвели́чим Ма́терь Бо́жию:/ ра́дуйся, Ма́ти Творца́ тва́ри.
Песнь 9
Ирмо́с: Ка́мень нерукосе́чный:
Ра́нами и наруга́нием от бесо́в и лука́вых челове́к, моли́твенным терпе́нием свои́м/ вра́жия полки́ побежда́я по́мощию Свята́го Ду́ха,/ вселя́лся еси́ к Невече́рнему Све́ту Бо́жия благода́ти./ Тем тя, хва́ляще, ублажа́ем.
Посреде́ ми́ра живы́й и вся стре́лы лука́ваго диа́вола сокруши́в,/ моли́твами твои́ми дости́гл еси́ горняго Иерусали́ма,/ предстоя́ Христу́ Бо́гу за чту́щия тя.
Мо́лим тя, блаже́нне Иоа́нне,/ моля́ Христа́ Бо́га, и Пречи́стую Богоро́дицу, и Предте́чу Иоа́нна, и всех святы́х/ пода́ти правосла́вным христиа́ном здра́вие и побе́ду на вся ви́димыя и неви́димыя враги́/ и жела́ние о исполне́нии соверше́нства во ве́ки веко́в.
Богоро́дичен: И́же нас ра́ди рожде́йся от Де́вы, Христе́ Бо́же,/ и за ны распны́йся, и сме́ртию смерть разруши́вый,/ моли́твами Богоро́дицы и всех святы́х поми́луй и спаси́ нас.
Свети́лен:
Процве́л еси́, я́ко фи́никс, Дави́дски, о́тче,/ и оби́тель яви́лся еси́ Ду́ха Пресвята́го,/ и сла́вна тя вселе́нней показа́./ О нас непреста́нно моля́, почита́ющих ве́рою пречестну́ю па́мять твою́,/ преподо́бне Иоа́нне.
Сла́ва, и ны́не, Богоро́дичен:
От Бо́га ми́рови по́данных благи́х Ты вина́ была́ еси́, Богоро́дице,/ но и ны́не моля́ о о́бщем спасе́нии благопреме́ннаго Бо́га.
На хвали́тех стихи́ры, глас 4.
Подо́бен: Дал еси́ зна́мение:
Дал еси́ при́тчу терпе́ния и му́жества,/ Преблаги́й Го́споди,/ пра́веднаго Иоа́нна и многочуде́снаго,/ доброде́тельми и словесы́/ и де́лы сия́юща,/ целому́дрием украша́ема и кро́тостию./ Тем Твое́ неизрече́нное строе́ние сла́вим,/ Иису́се Всеси́льне// и Спа́се душ на́ших.
Пра́веден и незло́бив,/ и́стинен же и непоро́чен и ве́рен,/ уклоня́яйся от вся́кия зло́бныя ве́щи,/ показа́лся еси́, Иоа́нне блаже́нне,/ просвеще́н доброде́тельми/ и благоче́стием сия́я./ Тем тя ублажа́ем/ и свято́е твое́ и честно́е днесь пра́зднуем успе́ние,// ра́дующеся, богому́дре.
Целому́дрием и благове́рием,/ я́ко багряни́цею многоце́нною, оде́явся, Иоа́нне,/ пра́вдою же и кро́тостию,/ я́ко Боже́ственным венце́м, увя́злся еси́,/ со стра́ждущими Христа́ ра́ди/ ца́рствовати возжела́л еси́./ И ны́не Царю́ Сил предстои́ши,/ Иису́су Всеми́лостивому// и Спа́су душ на́ших.
Сла́ва, глас 2:
Преподо́бне о́тче,/ из младе́нства доброде́тели приле́жно обучи́вся,/ орга́н был еси́ Свята́го Ду́ха/ и, от Него́ прии́м чуде́с де́йство,/ увеща́л еси́ челове́ки преоби́дети сла́дкая./ Ны́не же Боже́ственным Све́том чисте́йше осиява́ем,/ просвети́ и на́ша мы́сли,// Иоа́нне, о́тче наш.
И ны́не, Богоро́дичен, глас то́йже:
Все упова́ние мое́ на Тя возлага́ю,/ Ма́ти Бо́жия,// сохрани́ мя под кро́вом Твои́м.
Славосло́вие вели́кое и отпу́ст.
НА ЛИТУРГИ́И
Блаже́нны свята́го от кано́на, пе́сни 3-я и 6-я. Проки́мен, глас 7: Честна́ пред Го́сподем// смерть преподо́бных Его́. Стих : Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́, род пра́вых благослови́тся. Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:
