Служба благовернаго великаго князя Феодора и чад его, благоверных князей Давида и Константина, Смоленских и Ярославских чудотворцев
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры пра́здника 3 и святы́х 5. Глас 8.
Подо́бен: Что вас нарече́м:
Преподо́бне о́тче Фео́доре,/ просвеще́нный благода́тию/ Святы́я и Пресла́вныя/ и Единосу́щныя Тро́ицы,/ све́том Безнача́льнаго Све́та,/ и тем всю зе́млю просвети́/ и мно́гия на́ша грехи́ потреби́,/ о́тче преподо́бне,/ моли́ о спасе́нии душ на́ших.
Све́тлости духо́вныя/ ты был еси́ испо́лнен,/ о́тче преподо́бне Фео́доре,/ проти́ву труду́ твоему́ вели́кому, свя́те./ Те́мже ны́не/ во тьме су́щия ны грехо́вней просвети́,/ я́ко дерзнове́ние име́я к Бо́гу/ и Спа́су всех,/ моли́ спасти́ся душа́м на́шим.
Благода́тию Всесвята́го Ду́ха/ грехо́вный мрак от серде́ц на́ших отгна́в,/ облегчи́ лежа́щий грех/ на ра́мех на́ших,/ преподо́бне Фео́доре,/ да вси твою́ па́мять,/ соше́дшеся, воспои́м,/ очище́ния прося́ще,/ моли́ о спасе́нии душ на́ших.
Я́ко зве́зды всесве́тлыя,/ де́тельми за́поведей Госпо́дних/ сия́юще, пресла́внии,/ мир украси́сте, всечестни́и,/ луча́ми просвеща́юще веле́ний благове́рия,/ и е́реси тьму отго́ните, преподо́бнии/ Фео́доре и Дави́де с Константи́ном сла́вным./ Моли́те от тли и бед изба́витися/ ве́рою творя́щим всечестну́ю па́мять ва́шу.
И́ны стихи́ры, глас 8.
Подо́бен: О, пресла́внаго чудесе́:
Преподо́бнии отцы́ прему́дрии,/ Фео́доре и Дави́де с Константи́ном сла́вным,/ слепы́м подае́те свет, и боля́щим исцеле́ние,/ и хромы́м здра́вие, ми́лостивно преклоня́ющеся/ приходя́щим ве́рою к хра́му ва́шему/ и прося́щим по́мощи ва́шея./ Вас бо засту́пники и предста́тели и храни́тели,/ вси ве́рнии, обрето́хом,/ восхваля́юще вас.
Преподо́бнии отцы́ всечестни́и,/ Фео́доре и Дави́де и Константи́не,/ до́брыми де́тельми возше́дше,/ а́ки на колесни́цу, к Бо́гу востеко́сте,/ побе́дныя по́чести прие́млюще,/ и, я́ко ми́лоти, телеса́ ва́ша нам, положе́на во гро́бе, отцы́, оста́висте/ источа́ти исцеле́ния/ и прогони́ти ду́хи лука́выя./ Те́мже блажи́м вас, прехва́льнии.
Лико́м по́стническим сочета́стеся,/ тех житие́м украси́вшеся, блаже́ннии,/ Фео́доре и Дави́де/ с Константи́ном сла́вным,/ и ны́не в Небе́сных селе́ниих живете́, веселя́щеся,/ иде́же лику́ют А́нгели,/ све́том Боже́ственным обожа́еми./ Помина́йте вы́ну блажа́щих вас на земли́/ и свято́е ва́ше творя́щих успе́ние.
Сия́нии духо́вными/ озари́вшеся, святи́и,/ светода́тельная заря́/ яви́стеся, блаже́ннии,/ и, я́ко лучи́, доброде́тели/ во вся концы́ простира́ете,/ и ве́рных просвеща́ете совокупле́ния,/ и отго́ните тьму ересе́й, преподо́бнии,/ си́лою от Де́вы Возсия́вшаго.
Сла́ва, глас 8. Самогла́сен:
Равноа́нгельное житие́ пожи́вше,/ боле́зньми по́стническими, отцы́ преподо́бнии,/ Фео́доре и Дави́де с Константи́ном сла́вным,/ воздержа́нием те́ло порабо́тивше, покори́ли есте́ ду́ху./ Де́лателе бы́вше за́поведей Госпо́дних,/ испе́рва подо́бную добро́ту о́браза сохрани́ли есте́,/ и страда́льныя по́двиги от по́стных по́тов соверши́ли есте́,/ и, сугу́быми венцы́ украси́вшеся,/ приле́жно Спа́са моли́те спасти́ся нам.
И ны́не, пра́здника, глас то́йже:
Днесь Влады́ка тва́ри/ и Госпо́дь сла́вы/ на Кресте́ пригвожда́ется/ и в ре́бра пробода́ется,/ же́лчи и о́цта вкуша́ет Сла́дость церко́вная,/ венце́м от те́рния облага́ется покрыва́яй не́бо о́блаки,/ оде́ждею облачи́тся поруга́ния и зауша́ется бре́нною руко́ю,/ руко́ю созда́вый челове́ка,/ по плеще́ма бие́н быва́ет,/ одева́яй не́бо о́блаки,/ заплева́ния и ра́ны прие́млет,/ поноше́ния и зауше́ния,/ и вся терпи́т мене́ ра́ди, осужде́ннаго,/ Изба́витель мой и Бог,/ да спасе́т мир от пре́лести,/ я́ко Благоутро́бен.
Вход. Проки́мен дне. Чте́ния три преподо́бническая.
Прему́дрости Соломо́новы чте́ние (главы́ 5 и 6):
Пра́ведницы во ве́ки живу́т, и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние Свое́ и вооружи́т тварь в месть враго́м./ Облече́тся в броня́ пра́вды и возложи́т шлем, суд нелицеме́рен./ Прии́мет щит непобеди́мый, преподо́бие./ Поостри́т же напра́сный гнев во ору́жие;/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я, ре́ки же потопя́т я на́гло./ Сопроти́в ста́нет им дух си́лы, и, я́ко ви́хор, разве́ет их/ и опустоши́т всю зе́млю беззако́ние, и злоде́йство превратя́т престо́лы си́льных./ Слы́шите у́бо, ца́рие, и разуме́йте, навы́кните судии́ конце́в земля́./ Внуши́те, держа́щии мно́жества и гордя́щиися о наро́дех язы́ков,/ я́ко дана́ есть от Го́спода держа́ва вам и си́ла от Вы́шняго.
Прему́дрости Соломо́новы чте́ние (глава́ 3):
Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти, и вмени́ся озлобле́ние исхо́д их./ И е́же от нас ше́ствие сокруше́ние, они́ же суть в ми́ре./ И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Яко зла́то в горни́ле искуси́ их, и я́ко всепло́дие же́ртвенное прия́т я./ И во вре́мя посеще́ния их возсия́ют и, я́ко и́скры по сте́блию, потеку́т./ Су́дят язы́ком и облада́ют людьми́, и воцаря́тся Госпо́дь в них во ве́ки./ Наде́ющиися Нань разуме́ют и́стину и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́, и посеще́ние во избра́нных Его́.
Прему́дрости Соломо́новы чте́ние (глава́ 4):
Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости житие́ нескве́рное./ Благоуго́ден Бо́гу быв, возлю́блен бысть, и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая, и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга./ Уго́дна бо бе Го́споду душа́ его́, сего́ ра́ди потща́ся от среды́ лука́вствия./ Лю́дие же ви́девше и не разуме́вше, ниже́ положи́вше в помышле́нии таково́е./ Я́ко благода́ть и ми́лость в преподо́бных Его́, и посеще́ние во избра́нных Его́.
На лити́и стихи́ры, глас 6:
По́стническому житию́ поревнова́л еси́,/ преподо́бне о́тче Фео́доре,/ и страстны́я прило́ги в тече́ниих слез твои́х потопи́л еси́,/ и благоприя́тное житие́ твое́/ ле́ствица боже́ственна и честна́,/ возводя́ща на Небеса́, всем показа́ся,/ благоче́стия бо плоды́ в себе́ показа́в,/ си́лою Ду́ха Свята́го отгоня́ неможе́ния страсте́й от ве́рно пою́щих ти:/ ра́дуйся, восто́ка звездо́ светоза́рная;/ ра́дуйся, мона́шествующих свети́льниче приснопа́мятный;/ ра́дуйся, Це́ркве до́брое воспита́ние и непозы́блемое утвержде́ние;/ ра́дуйся, заблу́ждших вели́кий вождю́;/ ра́дуйся, на́ша похвало́/ и вселе́нныя ра́дование све́тлое.
И́же на земли́ А́нгела/ и на Небесе́х челове́ка Бо́жия,/ ми́ру благо́е украше́ние,/ о́браз благи́х де́телей,/ по́стников похвалу́,/ Фео́дора почти́м:/ насажде́н бо в дому́ Бо́жии,/ процвете́ пра́ведно,/ я́ко кедр в пу́стыни,/ в преподо́бстве и пра́вде.
Преподо́бне о́тче Фео́доре,/ измла́да в доброде́тели приле́жне пости́вся,/ орга́н был еси́ Свята́го Ду́ха/ и, от Него́ прии́м чуде́с де́тель,/ научи́л еси́ челове́ки преоби́дети сла́дкая,/ и ны́не, Боже́ственным све́том чи́сте сия́я,/ просвети́ на́ша ра́зумы,/ о́тче преподо́бне Фео́доре.
Преподо́бне о́тче Фео́доре,/ тве́рдаго поще́ния страда́ньми утверди́вся,/ и в незаходи́мый свет ду́хом преложи́лся еси́;/ пусты́нным бо себе́ совокупи́в духо́вно,/ огнепа́льныя стре́лы де́монския попра́л еси́/ и, превы́ше вся́кия доброде́тели быв,/ соводворя́ешися во Ца́рствии Небе́снем с го́рними чи́ны:/ с ни́ми моли́ся Христу́ Бо́гу,/ спасти́ ду́ши на́ша.
Сла́ва, глас 5:
Преподо́бне о́тче Фео́доре,/ глас ева́нгельский Госпо́день услы́шав,/ мир оста́вив, бога́тство и сла́ву в ничто́же вмени́в,/ тем всем возопи́л еси́, глаго́ля:/ возлюби́те Бо́га, и обря́щете благода́ть ве́чную,/ ничто́же предпочти́те па́че любве́ Его́,/ да егда́ прии́дет в сла́ве Свое́й,/ обря́щете поко́й со все́ми святы́ми./ Ихже моли́твами, Христе́,/ сохрани́ и спаси́ ду́ши на́ша.
И ны́не, пра́здника, глас то́йже: Глас проро́к Твои́х, Иса́ии и Дави́да:
Глас проро́к Твои́х, Иса́ии и Дави́да,/ испо́лнися, Бо́же, глаго́лющий:/ прии́дут вси язы́цы, Го́споди,/ и покло́нятся пред Тобо́ю./ Се бо лю́дие, и́же Твоея́, Бла́же, благода́ти напо́лнишася,/ во дво́рех Твои́х Иерусали́ма./ Крест претерпе́вый за ны/ и Воскресе́нием Твои́м животворя́й,/ сохрани́ и спаси́ ны.
На стихо́вне стихи́ры, глас 5.
Подо́бен: Ра́дуйся:
Ра́дуйся, по́стных вои́стину по́двигов/ благово́нный сосу́де:/ крест бо на ра́мена взем/ и Влады́це Христу́, всеблаже́нне, возложи́в себе́,/ плотски́х покори́л еси́ долере́тный16 смысл,/ доброде́тельми ду́шу преосия́в,/ и к Боже́ственному воскрили́лся еси́ раче́нию./ Тем всесвяту́ю ва́шу обстоя́ще, всехва́льнии, ра́ку,/ Боже́ственнаго человеколю́бия про́сим/ получи́ти ва́шими моли́твами/ и ми́ру дарова́ти ве́лию ми́лость.
Стих: Честна́ пред Го́сподем/ смерть преподо́бных Его́.
Угль богосве́тлый,/ огню́ приобщи́вся, богоно́се, Ду́ха,/ показа́лся еси́ в ми́ре, Фео́доре,/ просвеща́я ду́ши ве́рно и благомы́сленно приступа́ющих ти:/ к Све́ту бо вшед невече́рнему, преподо́бне,/ пусты́нныя ороша́еши свы́ше Боже́ственною благода́тию/ и увяди́л еси́ у́гли лю́тыя./ Тем и побе́дный я́вственно дарова́ тебе́ вене́ц, о́тче преподо́бне Фео́доре,/ Боже́ственныя пра́вды Строи́тель Христо́с,/ Его́же моли́ дарова́ти нам ве́лию ми́лость.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Ле́ствица небовосхо́дная/ я́сно житие́ твое́, богомы́сленне, бысть,/ е́юже к высоте́ взя́лся еси́/ и Влады́це Христу́ бесе́довати, всеблаже́нне Фео́доре, сподо́бился еси́./ Ум просвеща́я, су́щими отту́ду сия́ний луча́ми освеща́емь,/ равноа́нгельную све́тлость прия́л еси́./ Ему́же ны́не предстоя́,/ моли́, преподо́бне Фео́доре,/ соверша́ющия боже́ственную и святу́ю па́мять твою́/ с тобо́ю предста́вити/ и ми́ру дарова́ти ве́лию ми́лость.
Сла́ва, глас 5:
Преподо́бне о́тче Фео́доре,/ не дал еси́ сна очесе́м твои́м,/ ниже́ ве́ждом дрема́ния,/ до́ндеже ду́шу и те́ло от страсте́й свободи́л еси́/ и Ду́ха жили́ще себе́ соде́лал еси́:/ прише́д бо Христо́с со Отце́м,/ оби́тель в тебе́ сотвори́,/ и, Единосу́щныя Тро́ицы благода́ть восприи́м,/ великопропове́дниче, преподо́бне Фео́доре,/ моли́ спасти́ся нам.
И ны́не, пра́здника, глас то́йже:
Прииди́те, лю́дие,/ пресла́вное чу́до ви́дяще, Креста́ си́ле поклони́мся:/ я́ко дре́во в раи́ смерть прозябе́,/ сие́ же жизнь процвете́,/ безгре́шнаго иму́щее пригвожде́нна Го́спода,/ от Него́же, вси язы́цы, нетле́ние взе́млюще, зове́м: / И́же Кресто́м смерть упраздни́вый/ и нас свободи́вый, сла́ва Тебе́.
Тропа́рь святы́х, глас 4:
От ю́ности ва́шея Христо́ве любви́ прилепи́вшеся, святи́и,/ усе́рдно зако́н и оправда́ния Того́ сохрани́сте,/ отону́дуже и чуде́сными дарова́ньми обогати́вшеся,/ исцеле́ния источа́ете,/ Фео́доре, Дави́де и Константи́не,/ о ве́рою вас почита́ющих моли́те Христа́ Бо́га,/ спасти́ся душа́м на́шим.
Тропа́рь на преставле́ние Фео́дора, глас 4:
Я́ко цели́тель преизря́ден и каза́тель благоприя́тен,/ мирски́й мяте́ж оста́вил еси́,/ и, крест свой на ра́мо взем,/ боже́ственным житие́м пожи́л еси́, и воздержа́нием пло́ти украси́лся еси́,/ к тебе́ притека́ющим сосу́д избра́нный показа́вся, всеблаже́нне Фео́доре,/ воспева́ющим твою́ па́мять в псалме́х и пе́снех, преподо́бне,/ моли́ся о душа́х на́ших.
Ин тропа́рь, глас 4:
Измла́да яви́лся еси́, богому́дре кня́же,/ боже́ствен сосу́д, невозбра́нен Бо́гови,/ ны́не то́чиши нам многоцеле́ния,/ вся е́реси потопля́я, и спаса́я при́сно свой град,/ и всех ве́рных сохраня́я неви́димо от ви́димых враг,/ ве́рою тя мо́лим, преподо́бне о́тче наш, кня́же Фео́доре,/ моли́ спасти́ся душа́м на́шим.
Сла́ва, и ны́не, тропа́рь пра́здника.
Тропа́рь на пренесе́ние моще́й святы́х, глас 8:
Я́ко зве́зды многосве́тлыя, от ю́ности возсия́вше,/ освети́ли есте́ сердца́ ве́рных пренесе́нием честны́х моще́й ва́ших,/ во пло́ти я́ко Ангели на земли́ показа́стеся,/ поще́нием насажде́ни бы́сте, я́ко древа́, при вода́х воздержа́ния,/ напое́ни струя́ми слез ва́ших, и скве́рну омы́сте./ Сего́ ра́ди яви́стеся прия́телища Бо́жия Ду́ха,/ Фео́доре и Дави́де и Константи́не,/ моли́те Христа́ Бо́га спасти́ся душа́м на́шим.
Ин тропа́рь, глас 4:
Я́ко апо́столом сприча́стницы и вра́чеве предо́брии,/ служи́телие богоприя́тнии/ па́мяти ва́шей боже́ственней притека́ющим,/ святи́и богому́дрии, достоблаже́ннии, благочести́вии кня́зие,/ новоявле́ннии чудотво́рцы Фео́доре и Дави́де и Константи́не,/ соше́дшеся любо́вию в па́мять ва́шу, све́тло пра́зднуем,/ в пе́снех и пе́ниих, ра́дующеся, Христа́ сла́вяще,/ такову́ю благода́ть дарова́вшего вам исцеле́ний,/ гра́ду ва́шему Яросла́влю вели́кое утвержде́ние.
НА У́ТРЕНИ
На Бог Госпо́дь: тропа́рь пра́здника два́жды. Сла́ва, свята́го. И ны́не, пра́здника.
По 1-м стихосло́вии седа́лен, глас 1:
Трисия́ннаго Све́та зарю́ в души́ стяжа́в, о́тче преподо́бне Фео́доре,/ в по́двизе твое́м посто́м и моли́твами и бде́нии при́сно ду́шу твою́ просвеща́я,/ тем прия́л еси́ дерзнове́ние избавля́ти ны от бед и зол безчи́сленных/ моли́твами твои́ми, преблаже́нне о́тче.
Сла́ва, и ны́не, пра́здника.
По 2-м стихосло́вии седа́лен, глас 8:
Тве́рдостию ра́зума украша́я себе́/ и плотска́я тяготы́ отве́рг, горды́ню попра́л еси́/ и был еси́ оби́телище избра́нно Пресвята́го Ду́ха;/ неукло́нным ра́зумом простира́лся ко Христу́ Бо́гу,/ многоко́зненнаго стре́лы притупи́л еси́/ и лук врага́ сокруши́л еси́, преблаже́нне Фео́доре./ Моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, пра́здника.
По полиеле́и седа́лен, глас 1:
Жите́йское мо́ре воздержа́нием без труда́ преплы́вше,/ и в приста́нище мы́сленное безстра́стия приста́ли есте́,/ сосу́ди воздержа́нием бога́тства некра́дома благоче́стия яви́стеся, блаже́ннии,/ Фео́доре и Дави́де и Константи́не,/ безстра́стием житие́ ва́ше просвети́вше,/ тре́бующия ми́лости обогаща́ете,/ Христа́ Бо́га моля́ще дарова́ти нам ве́лию ми́лость.
Сла́ва, и ны́не, пра́здника.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем,/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 8:
Преподо́бнии отцы́ святи́и,/ Фео́доре и Дави́де с Константи́ном сла́вным,/ поучи́вшеся день и нощь в зако́не Госпо́дни,/ досто́йни бы́сте дре́ва живо́тнаго сады́ бы́ти,/ и плод ваш доброде́тельными венцы́ цвете́т./ Дерзнове́ние иму́ще к трудополо́жнику Христу́ Бо́гу,/ проси́те нам очище́ния и ве́лия ми́лости.
Кано́н пра́здника на 6 и святы́х на 8.
Кано́н святы́х, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Мрак грехо́вный отжени́, Светода́вче Христе́,/ свы́ше просвети́ окая́нную мою́ ду́шу,/ моли́твами преподо́бнаго Фео́дора.
Просвеще́нием Трисо́лнечнаго Божества́ озари́вшеся, му́дрии,/ Фео́доре и Дави́де и Константи́не, свети́ла яви́стеся/ и просвеща́ете светоно́сную ва́шу па́мять ве́рно чту́щия.
Све́том благода́ти озаря́еми, преподо́бнии,/ Фео́доре и Дави́де и Константи́не сла́внии,/ ве́рно па́мять ва́шу торжеству́ющия просвети́те/ и от тьмы грехо́вныя моли́твами ва́шими изба́вите.
Богоро́дичен: Пло́тию ро́ждши Безпло́тнаго, Богороди́тельнице Пречи́стая,/ теле́сныя на́ша и душе́вныя скве́рны омы́й/ окропле́нием боже́ственныя Твоея́ моли́твы.
Ин кано́н, глас 4.
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,/ и воспою́, ра́дуяся, Тоя́ чудеса́.
Вси вы Творцу́ возложи́сте себе́/ и все душе́вное жела́ние излия́сте к Нему́,/ сего́ ра́ди духо́вную благода́ть восприя́сте,/ све́том ея́ озаря́еми,/ преподо́бне Фео́доре и Дави́де с Константи́ном сла́вным.
Измла́да Христа́ возлюби́л еси́, всеблаже́нне Фео́доре, новоявле́нне чудотво́рче,/ и пречи́стую Его́ Ма́терь,/ и ны́не просвеща́еши чудесы́, я́ко мо́лния, всю вселе́нную.
Ны́не, преблаже́нне Фео́доре, душа́ твоя́ почива́ет/ на Небеси́ со Христо́м во Ца́рствии Небе́снем,/ зде же честны́я твоя́ мо́щи/ даю́т исцеле́ния приходя́щим с ве́рою.
Богоро́дичен: Ра́дуйся, Пречи́стая Богоро́дице,/ А́нгелов удивле́ние, проро́ков про́поведь и апо́столов немо́лчная уста́,/ моли́ся Сы́ну Твоему́ и Бо́гу на́шему,/ да сохрани́т град и ме́сто сие́ преподо́бных моле́нием.
Катава́сия пра́здника: Крест начерта́в:
Песнь 3
Ирмо́с: Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Непреста́нныя моли́твы при́сно принося́ще к Бо́гу,/ блаже́нне Фео́доре и Дави́де с Константи́ном, за весь мир/ и трисве́тлою Заре́ю озари́вшеся,/ просвеща́ете, я́ко мо́лния, вселе́нную.
Предстоя́ще Го́споду со безпло́тными Си́лами,/ неизрече́нною сла́вою блиста́юще,/ преблаже́нне Фео́доре и Дави́де и Константи́не, за ны моли́теся,/ творя́щия честну́ю и пресла́вную па́мять ва́шу.
Напои́вше ду́ши сле́зными пото́ки,/ соде́ясте их, преподо́бнии, плодоно́сны доброде́тельми,/ вся́кая износя́ще чудеса́ на показа́ние, пресла́внии.
Богоро́дичен: Ни́ва духо́вная,/ я́коже из бразды́ клас, изнесла́ еси́/ всю тварь Пита́ющаго вся́чески, Присноде́во.
Ин
Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия, духо́вно утверди́,/ в Боже́ственнеи́ Твое́й сла́ве/ венце́в сла́вы сподо́би.
Я́ко светоза́рное со́лнце яви́стеся Триипоста́снаго Божества́,/ Фео́доре блаже́нне с Дави́дом богому́дрым и Константи́ном пресла́вным,/ омраче́нных ду́ши просвеща́юще моли́твами ва́шими.
Измла́да во́зраст восприя́л еси́ во гра́де Смоле́нске,/ по Христо́ву веле́нию на успе́ние твое́ прише́л еси́ в сла́вный град Яросла́вль/ и сия́вши, я́ко со́лнце, блиста́нием доброде́телей,/ преподо́бне Фео́доре.
Креста́ Госпо́дня си́лою укрепи́вся, блаже́нне Фео́доре,/ и поще́нием и моли́твами вооружи́вся,/ стремле́ния де́монская на земли́ победи́л еси́ Бо́жиею си́лою.
Тро́ичен: Тро́ицу я́сно пропове́дуем, неразде́льную сла́вою,/ Ли́ца же разде́льны, Отца́ и Сы́на и Свята́го Ду́ха.
Богоро́дичен: Ра́дуйся, Влады́чице Де́во,/ Церкве́й красота́, ве́рных держа́ва и похвала́,/ непреста́нно моли́ся Христу́ Бо́гу,/ да сохрани́т град сей и лю́ди моли́твами Твои́ми.
Конда́к и и́кос пра́здника.
Седа́лен, глас 1:
Жите́йское мо́ре воздержа́нием без труда́ преплы́вше,/ и в приста́нище мы́сленное безстра́стия приста́ли есте́,/ сосу́ди воздержа́нием бога́тства некра́дома благоче́стия яви́стеся, блаже́ннии,/ Фео́доре и Дави́де и Константи́не,/ безстра́стием житие́ ва́ше просвети́вше,/ и тре́бующия ми́лости обогаща́ете,/ Христа́ Бо́га моля́ще дарова́ти нам ве́лию ми́лость.
Сла́ва, и ны́не, пра́здника.
Песнь 4
Ирмо́с: Ты моя́ кре́пость, Господи,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Ты на земли́ други́й А́нгел наре́клся еси́ чистото́ю,/ о́тче преподо́бне Фео́доре,/ полки́ вся де́монския и е́реси попаля́я духо́вною благода́тию./ Тем, соше́дшеся в па́мять ва́шу,/ прославля́ем Спа́са и Бо́га на́шего.
Ди́вный орга́н ты на земли́ яви́ся,/ весь мир сла́достно науча́я пра́вым уче́нием,/ о́тче преблаже́нне Фео́доре.
Я́ко Христо́во смире́ние возлюби́вше,/ возвы́систеся безстра́стием, смири́вше де́монскую горды́ню;/ возсия́вше, я́ко со́лнце от восто́ка,/ чуде́с луча́ми просвеща́ете всю подсо́лнечную.
Кади́ло благово́ния Всеви́дцу, преподо́бнии,/ Фео́доре и Дави́де с Константи́ном богому́дрым,/ ва́ша моли́твы принесо́сте, я́же обоня́, и прия́т,/ и в по́стнем ку́пно пра́зднице устроя́ет.
Богоро́дичен: Без Се́мене зачала́ еси́ во чре́ве Творца́ и Го́спода,/ без поро́ка я́вльшися, Ма́ти Бо́жия,/ весь мир крила́ми Твои́ми покрыва́еши, Непоро́чная Госпоже́ Пречи́стая,/ пречи́стыя Твоя́ ру́ки вознося́щи к Нему́,/ изба́ви ны от бу́дущаго гне́ва.
Ин
Ирмо́с: Седя́й в сла́ве,/ на Престо́ле Божества́,/ во о́блаце ле́гце/ прии́де Иису́с Пребоже́ственный,/ нетле́нною дла́нию,/ и спасе́ зову́щия:/ сла́ва, Христе́, си́ле Твое́й.
На земли́ степе́нь име́л еси́, всеблаже́нне Фео́доре,/ но твои́ми моли́твами и го́рнее Ца́рство восприя́л еси́, преподо́бне,/ и ны́не на Небеси́ со Христо́м ца́рствуеши.
Исцеле́ние содева́ет боже́ственный храм ваш,/ Фео́доре и Дави́де и Константи́не,/ отго́ните неду́ги от челове́ков/ и укрепля́ете мудрова́ния их/ восхвали́ти труды́ ва́ша, всечестни́и.
Со враго́м дре́вле бра́вшеся воздержа́нием,/ кре́пости поста́висте побе́ду, преподо́бнии,/ Фео́доре и Дави́де с Константи́ном сла́вным,/ му́жески низложи́вше де́монская ополче́ния.
Богоро́дичен: Христа́ нам родила́ еси́, Пречи́стая Влады́чице,/ Богора́дованная Де́во,/ спаси́ град и лю́ди, к Тебе́ упова́ющия,/ Богоро́дице Всенепоро́чная.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Просвети́ твое́ житие́ всю вселе́нную,/ преподо́бне о́тче Фео́доре,/ правове́рными словесы́ сия́ющее, я́ко со́лнце,/ Трили́чнаго Божества́ заре́ю просвеща́ем.
Це́ркве ты был еси́ пропове́дник, свя́те,/ вся́ку е́ресь и лесть де́монскую разоря́я:/ те́мже со А́нгелы ны́не лику́еши.
Еди́ной любви́ Христо́ве вы приложи́вше ду́ши своя́,/ Фео́доре и Дави́де с Константи́ном сла́вным,/ и исполни́телие Бо́жиих за́поведей бы́вше,/ мно́гих чуде́с прия́сте благода́ть, всехва́льнии.
Незло́биви и кро́тцы, вся зло́бы вра́жия погу́бльше/ и ми́лостиви до конца́ я́вльшеся, блаже́ннии,/ от Еди́наго Ми́лостиваго благода́ть прия́сте,/ и́стинную и спаси́тельную.
Богоро́дичен: Воспо́йте, вся земля́,/ по́йте же Возсия́вшему из чре́ва боголе́пно Неискусобра́чныя/ и Сию́ ве́рным Показа́вшему/ тве́рду наде́жду и похвалу́.
Ин
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ безле́тнаго Сы́на,/ всем воспева́ющим Тя/ мир подава́ющая.
Зако́нно моли́твами и посто́м всегда́ претерпева́сте,/ в безстра́стие оде́явшеся,/ пло́тский ра́зум смири́вше/ кре́постию Боже́ственнаго Ду́ха.
От ю́ности возжада́л еси́ о́браза мона́шескаго/ и от Христа́ восприя́т вене́ц неувя́дный и ри́зу нетле́нную,/ и ны́не, блаже́нне Фео́доре, со А́нгелы ра́дуется дух твой.
Гроб честна́го твоего́ телесе́/ показа́л еси́ ве́рным лю́дем душ освяще́ние,/ и теле́с исцеле́ние, и страсте́й избавле́ние,/ от твои́х моще́й цельбы́ почерпа́ющим.
Богоро́дичен: Всесве́тлым укра́шена све́том, Богора́дованная Ма́ти,/ Ты бо породила́ еси́, Честне́йшая всех, Христа́, Бо́га на́шего,/ Его́же моли́, да изба́вит ны от вся́ких напа́стей.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Ве́рою и любо́вию прилепи́вся Влады́це вы́шних Сил, прему́дре Фео́доре,/ возсия́л еси́ на земли́, я́ко со́лнце,/ мглу и́дольскую всю́ду потребля́я,/ ве́рныя же просвеща́я моли́твами твои́ми.
Моли́твами предваря́я к Бо́гу и Тому́ предстоя́ со А́нгелы,/ за весь мир моли́ся,/ брань неприя́зненную всю потреби́ти/ и побе́ду изве́стну да́ти на сопоста́ты во́инству на́шему.
Благи́ми нра́вы украси́вся,/ Христу́ прилепи́лся еси́ от ю́ности,/ и плотски́я стра́сти умори́в воздержа́нием,/ и к жи́зни, преподо́бне Фео́доре, преста́вился еси́.
Глаго́лов зако́нных испо́лнитель Бо́жиих был еси́,/ испо́лнился еси́, о́тче прему́дре Дави́де, Боже́ственных даро́в/ и чуде́с лучи́ всем испусти́л еси́.
Богоро́дичен: Души́ моея́ стра́сти исцели́,/ Безстра́стия бы́вшая исто́чник/ и просвети́вшая ли́ки преподо́бных отце́в/ Рождество́м Свои́м.
Ин
Ирмо́с: Боже́ственное сие́ и всечестно́е/ соверша́юще пра́зднество,/ богому́дрии, Богома́тере,/ прииди́те, рука́ми воспле́щим, / от Нея́ ро́ждшагося Бо́га сла́вим.
Моля́ приле́жно Го́спода,/ недви́жущагося о́трока це́ла сотворя́еши/ и безгла́сна пре́жде, Бо́жиим Про́мыслом, многоглаго́лива показа́л еси́,/ о́тче наш чудотво́рче Фео́доре,/ мона́шествующих свети́льниче пресве́тлый.
Удиви́ся, блаже́нне, чудесе́м твои́м/ весь мир, прему́дре Дави́де,/ и восприя́л еси́ от Христа́ вене́ц Небе́сный,/ его́же сподо́би и нам получи́ти твои́ми моли́твами, всече́стне.
Лук си́льных сокруши́л еси́/ и брань вся́ку неприя́знену истреби́л еси́, всеблаже́нне Фео́доре,/ де́йством, я́ко веща́нием, испусти́л еси́/ чудеса́ во всю вселе́нную.
Всеблаже́нне Фео́доре, уго́дниче Христо́в,/ на Небесе́х предстои́ши Христу́, моля́ся,/ зде же честны́я мо́щи твоя́ боля́щих исцеля́ют и от грех изыма́ют.
Богоро́дичен: Изсуши́ла еси́ сады́ безбо́жных челове́ков,/ Всенепоро́чная Де́во,/ Твои́м прозябе́нием,/ прозя́бшую во мне зло́бу искорени́,/ Богоневе́стная.
Конда́к на преставле́ние, глас 4.
Подо́бен: Яви́лся еси́:
Яви́ся ве́лие со́лнце Христо́ве Це́ркви,/ просвеща́я уче́ний светлостьми́, всече́стне,/ я́ко черпа́лом златы́м, от Кла́дязя неиско́паннаго чуде́с поче́рпл еси́,/ от Исто́чника неистощи́маго, всеблаже́нне Фео́доре,/ и ны́не о всех мо́лиши, да улучи́м грехо́в проще́ние.
И́кос на преставле́ние:
На высоте́ Госпо́дь воздержа́нием и́стинным тя положи́,/ я́ко звезду́ небла́знену, просвеща́ющу стра́нных, чудоно́сче,/ быстрины́ слове́с твои́х и Боже́ственных чуде́с источи́л еси́ ми́рови,/ и ду́ши ве́рных напита́л еси́,/ ерети́ческия полки́ победи́л еси́, я́ко други́я еги́птяны,/ поклоне́ние Тро́йческое во Еди́ном Божестве́ пропове́дуя,/ сего́ ра́ди соблюди́ нас от враг ви́димых и неви́димых, преблаже́нне Фео́доре,/ я́ко о всех мо́лиши, да улучи́м грехо́в проще́ние.
Ин конда́к, глас 1, самогла́сен:
Многому́дренне пресели́вся, преподо́бне кня́же Фео́доре, в град присноцвету́щ,/ яви́лся еси́ я́ко многосве́тлая звезда́, в ми́ре сия́я,/ в поще́нии испра́вив жизнь свою́,/ ны́не получи́л еси́ живо́т ве́чный на Небесе́х.
Конда́к на пренесе́ние моще́й, глас 8:
Яви́стеся свети́льницы всесве́тлии во пло́ти, я́ко Ангели,/ и, я́ко жи́зни древеса́ ра́йская,/ поще́нием, бде́нием и ве́рою возраща́еми, процвели́ есте́,/ моли́твами ва́шими Небе́сныя благода́ти прие́мше,/ вра́чеве кре́пцы я́вльшеся, исцеля́ете неду́гующих ду́ши,/ с ве́рою прибега́ющих к ра́це моще́й ва́ших,/ чудотво́рцы сла́внии, Фео́доре, Дави́де и Константи́не,/ моли́те Христа́ Бо́га грехо́в оставле́ние дарова́ти,/ ве́рою и любо́вию чту́щим па́мять ва́шу.
И́кос на пренесе́ние моще́й:
Свы́ше зва́ние прие́мше пресла́вно,/ безсме́ртную жизнь насле́довасте,/ с пло́тию бо на земли́ безпло́тных житие́ проше́дше,/ бы́сте страсте́й неприя́тии./ Те́мже восхваля́ем вы, отцы́ преподо́бнии, сицева́я глаго́люще:/ ра́дуйтеся, све́тлая свети́ла и правосла́вных сла́ва;/ ра́дуйтеся, целому́дрия столпи́ необори́мии;/ ра́дуйтеся, прему́драго ра́зума явле́ние;/ ра́дуйтеся, пра́вды рачи́телие изве́стнии;/ ра́дуйтеся, я́ко по́стническими по́двиги умертви́вше плотски́х дея́ний стремле́ния;/ ра́дуйтеся, умы́ наслажда́ющеся Небе́сных неизрече́нных;/ ра́дуйтеся, всю тварь благоче́стно удивля́юще чудесы́, и́миже посрами́шася де́мони;/ ра́дуйтеся, оружено́сцы духо́внии, и́миже вся́ка страсть умертви́ся;/ ра́дуйтеся, исто́чницы жизненото́чных вод;/ ра́дуйтеся, помо́щницы ве́рно восхваля́ющим вас;/ ра́дуйтеся, чудотво́рцы достохва́льнии, Фео́доре и Дави́де и Константи́не;/ ра́дуйтеся, помо́щницы ве́рою и любо́вию чту́щим па́мять ва́шу.
Ин конда́к на пренесе́ние моще́й, глас 8.
Подо́бен: Я́ко нача́тки:
Я́ко свети́льницы и вра́чеве преизря́днии яви́стеся,/ ве́рныя озаря́юще светлостьми́ чуде́с ва́ших,/ во пло́ти бо на земли́ благоутоди́сте Бо́гу,/ и́же во святы́х Прославля́емому,/ Его́же непреста́нно моли́те о всех нас.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Приле́жныя твоя́ по́двиги и труды́ почита́юще/ и сла́дость уче́ния твоего́, преподо́бне о́тче Фео́доре,/ и́миже просвети́ ны и научи́ воспева́ти Триипоста́сное Божество́:/ отце́в на́ших Бо́же, благослове́н еси́.
Ору́жием ва́ших моли́тв, Фео́доре и Дави́де с Константи́ном сла́вным,/ победи́сте де́моны и с Небесе́ благода́ть прия́сте исцеля́ти боле́зни/ и прогони́ти ду́хи лука́выя от взыва́ющих:/ благослове́н Бог оте́ц на́ших.
Посто́м и моли́твою и бде́нием, преподо́бне Фео́доре, просвети́вся,/ вшел еси́ на высоту́ доброде́телей/ и научи́л еси́ житие́м твои́м весь мир ве́рно воспева́ти:/ отце́в на́ших Бо́же, благослове́н еси́.
Богоро́дичен: Ору́жие, Чи́стая, храня́щее пре́жде врата́ еде́мская,/ плещи́, Де́во, всем дае́т,/ низложи́вшим по́стнически бори́теля врага́,/ при́сно взыва́ющим:/ отце́в на́ших Бо́же, благослове́н еси́.
Ин
Ирмо́с: Не послужи́ша тва́ри богому́дрии/ па́че Созда́вшаго,/ но, о́гненное преще́ние му́жески попра́вше ра́довахуся, пою́ще:/ препе́тый отце́в Госпо́дь и Бог, благослове́н еси́.
Блаже́нно житие́ твое́/ и кончи́на безсме́ртна, преподо́бне Фео́доре:/ сего́ ра́ди тя Христо́с свы́ше украси́ венце́м,/ и просвеща́еши весь мир чудесы́, всечу́дне.
Яви́лся еси́ ны́не гра́да Яросла́вля, Дави́де богоблаже́нне,/ столп неколе́блен и стена́ неруши́ма,/ вели́кое прибе́жище притека́ющим/ и прие́млющим исцеле́ний благода́ть неоску́дную.
Хоте́нием от мирски́х сла́достей отлуча́ющеся,/ стра́нно челове́ком Я́вльшемуся Пло́тию присво́ившеся,/ и бу́дущая нетле́нная стяжа́сте, святи́и, пою́ще:/ благослове́н Бог отце́в на́ших.
Богоро́дичен: Безсе́менно заче́нши, Творца́ всех, Христа́ Бо́га,/ неизрече́нно родила́ еси́,/ Его́же моли́, дерзнове́ние иму́щи к Нему́,/ да спасе́т ны, вопию́щия:/ благослове́н Бог отце́в на́ших.
Песнь 8
Ирмо́с: Седмери́цею пещь/ халде́йский мучи́тель/ богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Слез ва́ших ка́пли погаси́ша собла́зны грехо́вныя,/ реку́ же чуде́с показа́сте всем нам,/ вся́кия стра́сти потопля́ющую притека́ющих к вам,/ пресла́внии отцы́ святи́и, Фео́доре и Дави́де с Константи́ном сла́вным.
Ве́ру и наде́жду неразори́му и любо́вь и́стинную име́ли есте́, отцы́,/ и ми́лостивное прилежа́ние, терпе́ние бла́го и поуче́ние слове́с духо́вных,/ смиренному́дрие и соверше́нное беззло́бие.
Подвиза́вшеся до́бре, победи́сте вра́жия вся де́йства/ и по конце́ жития́ венча́стеся, му́дрии,/ ко всем преподо́бным приче́тшеся,/ с ни́миже чтим вы, превознося́ще Христа́ во ве́ки.
Богоро́дичен: Ма́ти Бо́жия Чи́стая,/ страсте́й мои́х у́зы грехо́вныя и молвы́ и неду́ги отжени́:/ и́маши бо к Нему́ дерзнове́ние и о́бласть/ поми́ловати ны, Госпоже́ милосе́рдая,/ Спа́са поро́ждши пло́тию,/ Его́же непреста́нно моли́ спасти́ся нам.
Ин
Ирмо́с: О́троки благочести́выя в пещи́/ Рождество́ Богоро́дичо спасло́ есть,/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Лику́ют на Небесе́х чи́ни а́нгельстии, всеблаже́нне Фео́доре,/ и ве́рных собе́ри на земли́, твою́ па́мять похваля́юще, вопию́т:/ Го́спода воспева́йте, дела́,/ и превозноси́те Его́ во ве́ки.
Помоли́ся Христу́ Бо́гу, преблаже́нне Фео́доре,/ о приходя́щих к тебе́ с ве́рою/ и хотя́щих от Тебе́ почерпсти́ исцеле́ния неоску́дную благода́ть, пою́щих:/ Го́спода воспева́йте, дела́,/ и превозноси́те Его́ во ве́ки.
Со безтеле́сными Си́лами, преподо́бнии отцы́,/ Христу́ предстоите́,/ моли́твами ва́шими, святи́и, душе́вныя на́ша боле́зни исцели́те/ и от безчи́сленных зол изба́вите нас, вопию́щих:/ Го́спода воспева́йте, дела́,/ и превозноси́те Его́ во ве́ки.
Богоро́дичен: Из пречи́стаго Твоего́ чрева́, Богома́ти,/ Небе́снаго Дождя́ Ка́пля нам ука́ну,/ на омове́ние скверн, на здра́вие теле́с, на прогна́ние лука́ваго./ Те́мже Тя блажи́м, Чи́стая, во ве́ки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с,/ тем Тя, Богоро́дицу,/ А́нгелов и челове́к чинонача́лия велича́ют.
Естество́ тле́нное премени́вше,/ в ве́чныя оби́тели взыдо́сте, блаже́ннии,/ житие́м чи́стым после́довавше Влады́це Бо́гу./ Те́мже честву́юще успе́ние ва́ше, святи́и,/ непреста́нно Христа́ велича́ем.
Се отве́рзеся вам, отцы́, Небе́сное Ца́рство,/ сконча́вшим до́брое тече́ние,/ и ви́дите, я́же ви́дят А́нгели,/ воздая́ние трудо́в подае́т вам по́чести Бог./ Те́мже ублажа́ем вы.
Выспрь к Бо́гу мысль иму́ще, преподо́бнии, земна́я оста́висте,/ труда́ ра́ди воздержа́нием за неосла́бное облегча́еми,/ и со А́нгелы ны́не водворя́етеся,/ Христа́ велича́юще.
Богоро́дичен: Пощади́ мя, Го́споди, пощади́, егда́ хо́щеши суди́ти ми,/ не осуди́ мене́ во огнь, ниже́ я́ростию Твое́ю обличи́ мя,/ мо́лит Тя Де́ва, ро́ждшая Тя, Христе́,/ и А́нгелов собо́ри, и преподо́бных соста́вы.
Ин
Ирмо́с: Всяк земноро́дный/ да взыгра́ется, Ду́хом просвеща́ем,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная,/ Богоро́дице, Чи́стая Присноде́во.
Удиви́ся во всем ми́ре, Фео́доре, твоя́ па́мять,/ чудесы́ сия́ющи, я́коже со́лнце, и злы́я боле́зни исцеля́ющи всех./ Те́мже на́ша стра́сти разжени́, мо́лимся тебе́,/ прося́ нам отпуще́ния, чудотво́рче Христо́в,/ и просвети́ ны твои́ми моли́твами, да тя вси велича́ем.
Да вхо́дят ны́не во святы́й храм,/ к честны́м твои́м моще́м, преподо́бне Фео́доре,/ благоче́стия держа́тели и всяк во́зраст, припа́дающе,/ про́сят от Тебе́ почерпсти́ исцеле́ния, здра́вия и спасе́ния,/ Христа́ велича́юще.
И ны́не моли́теся ко Христу́ Бо́гу, всечу́днии,/ Фео́доре и Дави́де и Константи́не,/ да ва́ша честны́я мо́щи всегда́ подаю́т слепы́м прозре́ние и хромы́м хожде́ние,/ больны́м исцеле́ние и всем здра́вие и спасе́ние,/ да вас вси велича́ем.
Богоро́дичен: Пресвята́я Де́во, Богоро́дице Мари́е,/ со А́нгелы и Арха́нгелы и со всеми Небе́сными Си́лами,/ и со проро́ки и апо́столы, и с ли́ки преподо́бных отце́в и свяще́нных му́ченик,/ и со блаже́нным Фео́дором,/ моли́ся Сы́ну Твоему́, Христу́ Бо́гу на́шему,/ да изба́вит ны от всех бед, Тя велича́ющия.
Свети́лен:
Я́коже со́лнце блиста́я,/ зарю́ испуща́еши чуде́с,/ просвеща́я всех сердца́,/ твою́ сла́вную па́мять творя́щих ве́рно,/ преблаже́нне Фео́доре,/ и спаса́еши от бед и будущаго гне́ва.
Ин свети́лен:
Госпо́дь тя просла́ви в чудесе́х, всеблаже́нне Фео́доре,/ жи́ва прославля́я, изба́вил есть от сме́рти, я́ко Своего́ уго́дника,/ сего́ ра́ди и чуде́с твои́х па́мять восхваля́ем.
Сла́ва, и ны́не, пра́здника.
На хвали́тех стихи́ры, глас 8:
Преподо́бне о́тче, досточу́дне Фео́доре,/ обре́тши ду́шу твою́ от скве́рны вся́кия чи́сту,/ Ду́ха благода́ть Всесвята́го в тя всели́ся,/ я́ко незаходи́мый свет:/ Его́же де́йством ду́хи лука́выя отго́ниши всегда́/ и исцеля́еши неду́ги и боле́зни/ приходя́щих к тебе́ просты́м се́рдцем,/ и соверша́ющих твою́ па́мять святу́ю,/ и кла́няющихся моще́м твои́м, и вопию́щих:/ богоно́се, Христо́в уго́дниче,/ моли́ спасти́ся нам.
Чу́вства вся пло́ти обузда́в/ и нака́зан зако́ном быв, му́дре, Боже́ственнаго зна́ния,/ отту́ду просла́вился еси́ сла́вою,/ и от сла́вы сла́вне в сла́ву преше́л еси́,/ и, я́ко исто́чник, Ду́ха Свята́го си́лою/ чудеса́ ди́вна соде́ял еси́, преподо́бне о́тче Фео́доре,/ дея́ния дар равноапо́столен прии́м от вы́шняго Про́мысла,/ и щито́м и́стинным огра́ждься, си́лою Креста́ укрепи́вся,/ полки́ проти́вных побежда́я;/ и челове́ки я́сно научи́,/ просвеща́я чудесы́ мно́гими, Фео́доре блаже́нне,/ моли́ спасти́ся нам.
Вся чту́щия ве́рою па́мять твою́ све́тло/ сподо́би твои́ми моли́твами/ лю́тых напа́стей и стра́стных бурь всех гонзну́ти17 при́сно,/ и грехо́в проще́ние прия́ти,/ и доити́ ми́лости и ра́дости неизрече́нныя,/ преблаже́нне Фео́доре,/ моли́ спасти́ся нам.
Сла́ва, глас то́йже:
Прииди́те, вси ве́рнии,/ согла́сно воспои́м преблаже́ннаго Фео́дора,/ благоче́стия све́тлость, воздержа́ния пра́вило,/ терпе́ния столп, чистоты́ сокро́вище,/ смире́ния реку́ оби́льную,/ ни́щих утеше́ние, стра́нных странноприи́мника,/ и́стинныя любве́ Христо́вы де́лателя и́стинно и́скренняго,/ и Сему́ у́бо жив предстои́т,/ челове́ков засту́пник и спаси́тель показа́ся,/ боле́зней и страсте́й неисце́льных и вся́ких напа́стей исцели́тель,/ и мо́лит спасти́ся нам.
И ны́не, пра́здника, глас то́йже: Его́же дре́вле Моисе́й:
Его́же дре́вле Моисе́й прообразова́в собо́ю,/ Амали́ка низложи́в, победи́,/ и Дави́д песнопе́вец/ подно́жию Твоему́, вопия́, кла́нятися повелева́ше,/ честно́му Кресту́ Твоему́, Христе́ Бо́же,/ днесь, гре́шнии, кла́няемся,/ устна́ми недосто́йными/ Тя, изво́лившаго пригвозди́тися на нем, воспева́юще, мо́лимся:/ Го́споди, с разбо́йником Ца́рствия Твоего́ сподо́би нас.
НА ЛИТУРГИ́И
Блаже́нны пра́здника, песнь 7-я, на 4, и святы́х, песнь 3-я, на 4. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́: Ева́нгелие от Матфе́я, зача́ло 10. Прича́стен: В па́мять ве́чную бу́дет пра́ведник:
