Канон умилительный преподобному и Богоносному отцу нашему Симеону, Новому Богослову Творение Герасима монаха, Микраяннита
Благослови́вшу свяще́ннику, начина́ем: Го́споди, услы́ши: (псало́м 142), Сла́ва, и ны́не: Бог Госпо́дь: со стихи́.
Та́же тропа́рь, глас 4.
Подо́бен: Вознесы́йся на Крест во́лею:
Я́ко Све́та Трисо́лнечнаго зри́тель/ и та́инственнаго Богосло́вия сказа́тель,/ освяще́нне Симео́не, о́тче наш,/ испроси́ душа́м на́шим просвеще́ния свы́ше/ и страсте́й отгони́ от нас мглу,/ я́ко бо, служи́тель ве́лий Христо́в,/ всем подае́ши поле́зная, преподо́бне.
Сла́ва, то́йже. И ны́не, Богоро́дичен.
Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.
Псало́м 50 и кано́н, глас 8, без ирмосо́в, его́же краегране́сие: Боже́ственный нам свет пода́ждь, Богосло́ве. Гера́сима.
Песнь 1. Ирмо́с: Во́ду проше́д:
От Бо́га я́ко прия́л еси́ ще́дро, Симео́не Богому́дре, Свет Боже́ственный в душе́,/ отгони́ мрак ума́ моего́ и на дела́ Све́та мя подви́гни.
Возгоре́лся еси́, Богопросла́вленне Симео́не, огне́м живоно́сным любве́ Христо́вой,/ сего́ ра́ди огне́м моли́тв твои́х попали́ те́рния страсте́й мои́х.
От скве́рны вся́кия земны́я очи́сти, о́тче, сердца́ на́ша, Богосло́ве,/ моли́твами твои́ми ко Христу́/ и согреше́ний нам подава́й оставле́ние.
Богоро́дичен: Всесве́тлое селе́ние Бо́жие,/ омраче́нную заблужде́нием зло́бы ду́шу мою́ просвети́, Богоро́дице,/ светоза́рным Твои́м предста́тельством и благода́тию.
Песнь 3. Ирмо́с: Небе́снаго кру́га:
Ум твой я́ко испо́лнив Боже́ственныя благода́ти,/ Богосло́вия яви́лся еси́ таи́нник Богому́дрый,/ и́мже наста́ви и озари́, о́тче, помышле́ние на́ше к житию́ Боже́ственному.
Те́плая твоя́ моли́тва, я́же ко Христу́, преподо́бне,/ да бу́дет исто́чник ра́дости па́че ума́, и страсте́й врачева́ние,/ и наста́вник в Го́рняя, Симео́не блаже́нне, пра́зднующим тя.
Тайноводи́тель яви́лся еси́ та́инств святы́х,/ сего́ ра́ди введи́ в та́йну, о́тче, умо́м Богому́дрым/ к лу́чшему позна́нию и та́инственным восхожде́нием Боже́ственнаго сою́за благохва́лящих тя.
Богоро́дичен: Иису́са Спа́са и Вино́вника вся́ческих родила́ еси́ неизрече́нно, Де́во,/ мир обновля́юща от дре́вния кля́твы./ Сего́ ра́ди и мое́ се́рдце покая́ния дея́ньми обнови́, молю́ся.
Катава́сия: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
По 3-й пе́сни:
Спаси́, Симео́не Богосло́ве освяще́нне,/ многообра́зных жите́йских обстоя́ний/ к те́плому заступле́нию твоему́ притека́ющих.
При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние/ и исцели́ души́ моея́ боле́знь.
Ектения́: Поми́луй нас, Бо́же: и седа́лен, глас 2.
Подо́бен: Моле́ние те́плое:
Све́том Боже́ственным просвети́вый се́рдце твое́,/ просвеща́еши непреста́нно на́ша помышле́ния луча́ми слове́с твои́х, Симео́не Богосло́ве блаже́нне./ Сего́ ра́ди вопие́м ти ве́рно:/ от мра́ка страсте́й нас изба́ви.
Песнь 4. Ирмо́с: Услы́шах, Го́споди:
Ум Богому́дрый да́ждь ми, о́тче, уче́нием Боже́ственных слове́с твои́х,/ из ни́хже проистека́ет благода́ть оби́льная и услажда́ет ду́ши на́ша.
Просвеще́нием Боже́ственнаго Ду́ха, твои́ми светоно́сными моли́твами, преподо́бне,/ просвети́ мое́ помышле́ние, Симео́не треблаже́нне, и наста́ви.
Я́ко друг Христо́в и́стинный,/ Того́ вседуше́вно люби́ти, преподо́бне, укрепи́ мя благода́тию твое́ю/ и тле́ннаго отклони́ прикоснове́ния.
Богоро́дичен: Спасе́ния сподо́би Твои́ми ма́терними моли́твами ко Го́споду, Богоро́дице Присноде́во,/ и́скренно Тя ублажа́ющих.
Песнь 5. Ирмо́с: Просвети́ нас:
Сла́вы Боже́ственныя Богосло́в но́вый яви́лся еси́./ Сего́ ра́ди изба́ви безсла́вия мя страсте́й, Симео́не,/ Уте́шителя Богодухнове́нный орга́н.
Одожди́, Симео́не Богоблаже́нне, свы́ше ро́су благода́ти нам,/ изсо́хшим ко́знями супоста́та.
Уста́ Бо́жия многому́дрыя, Симео́не, узре́л еси́,/ сего́ ра́ди исхити́ из уст врага́, и́хже ле́стию лука́вый поглоти́.
Богоро́дичен: Престо́л Бо́жий, Богоро́дице, узре́лася еси́ одушевле́нный/ и черто́г пресве́тлый, Чи́стая,/ Ро́ждшагося от крове́й Твои́х ми́лости ра́ди.
Песнь 6. Ирмо́с: Моли́тву пролию́:
Уязви́ся чи́стое се́рдце твое́ сия́нием Боже́ственныя Тро́ицы./ Сего́ ра́ди и мое́ се́рдце богому́дро яви́ Боже́ственный сосу́д, молю́ся, дыха́ния Бо́жия,/ Симео́не Богосло́ве блаже́нне.
Ум твой зерца́ло Боже́ственное яви́ся, отража́ющ свет невеще́ственный ми́ру./ Сего́ ра́ди ум наш соде́лай чист, о́тче,/ и восприе́млющ твое́ю благода́тию Небе́сное прича́стие, Симео́не, жития́ све́тлостию.
Просвети́вый чу́вства твоя́ душе́вная, о́тче, всеце́ло освяти́лся еси́./ Сего́ ра́ди си́лы душе́вныя на́ша ко Христу́, Симео́не, окрыли́,/ да освяще́ния живота́ доброде́тельнаго причасти́мся, свя́те.
Богоро́дичен: Зижди́тель и Творе́ц вся́ческих, воплоти́выйся от чи́стых Твои́х крове́й,/ святе́йшую Тя показа́ вся́ческих и небе́с ши́ршую, Пречи́стая./ Сего́ ра́ди стесне́ния страсте́й изба́ви нас, Богоро́дице.
Катава́сия: Моли́тву пролию́ ко Го́споду и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
По 6-й пе́сни: Спаси́, Симео́не: При́зри благосе́рдием: (зри выше). Ектения́ ма́лая.
Конда́к, глас 2.
Подо́бен: Крове́й твои́х:
Я́ко Богосло́в Бо́жий Боже́ственнейший/ и моли́твенник наш ве́лий ко Го́споду,/ при́сно, Симео́не, моли́ дарова́ти нам грехо́в проще́ние/ и живота́ исправле́ние, преподо́бне.
Проки́мен преподо́бнаго и Ева́нгелие от Матфе́я, зача́ло 43.
Стихи́ра, глас 6.
Подо́бен: Все отло́жше:
Все се́рдце твое́ свет озари́в Боже́ственный,/ столп небосве́тлый показа́ тя, Симео́не, конце́м земли́,/ всех наставля́ющ к животу́ лу́чшему./ Сего́ ра́ди тебе́ мо́лимся:/ изба́ви нас от тьмы́, искуше́ний же и ско́рби/ и вся́кия напа́сти ны́не те́мнаго миродержи́теля/ и дела́ Све́та помоги́ нам твори́ти,/ да Го́рней све́тлости прича́стницы бу́дем.
Спаси́, Бо́же, лю́ди Твоя́: Го́споди, поми́луй, 12. Ми́лостию и щедро́тами:
Песнь 7. Ирмо́с: От Иуде́и доше́дше:
Да́ром Боже́ственным обогати́выйся, Симео́не Богосло́ве досточу́дне,/ уз веще́ственных и вся́каго пристра́стия нас изба́ви,/ я́ко наста́вник и просвети́тель наш к Бо́гу.
Оби́ды вся́кия, коварнаго велиа́ра, Симео́не преподо́бне,/ и вре́да, и бед, и вся́каго лука́ваго обстоя́ния нас твои́м предста́тельством изба́ви ско́ро.
Возделати Боже́ственный страх – нача́ло доброде́тельнаго жития́, блаже́нно,/ и тве́рдо ше́ствовати по стезя́м Го́спода, Симео́не,/ сподо́би име́ющих бога́тство тя, предста́теля те́плаго, Богосло́ве.
Богоро́дичен: От пречи́стаго чре́ва Твоего́ воплоти́выйся неизрече́нно Преесте́ственный,/ обожи́ естество́ на́ше, па́дшее пре́жде преступле́нием,/ Богороди́тельнице Чи́стая, сме́ртных спасе́ние.
Песнь 8. Ирмо́с: Небе́снаго:
То́ки слов, о Симео́не Богосло́ве, ороси́ наш ум и се́рдце, я́ко да безстра́стия возрасти́м цве́ты.
Свы́ше при́зри на ны, чад твои́х, о́тче,/ предстоя́щих твоему́ Боже́ственному о́бразу,/ и пода́ждь всем оте́ческая твоя́ дая́ния.
Прему́дростию Боже́ственною озаря́емь, о́тче,/ мудрова́ния, я́же супроти́в нас, стра́шнаго велиа́ра вконе́ц упраздни́ и разори́.
Богоро́дичен: Уврачу́й, Де́во, сокруше́ние души́ моея́ благоутро́бным Твои́м судо́м и сострада́нием,/ да Тя сла́влю, Препросла́вленная.
Песнь 9. Ирмо́с: Вои́стинну Богоро́дицу:
Не преста́й, Богосло́ве, та́инственне подава́ти оте́ческая предста́тельства твоего́/ ще́драя дарова́ния нам, ча́дом твои́м.
Но́вый Богосло́ве, Симео́не вели́кий,/ вели́ких боле́зней и скорбе́й изба́ви несумне́нным се́рдцем тя блажа́щих.
Вод греха́ изба́ви мя, о́тче,/ и пото́ков благода́ти испо́лни ны́не жа́ждущую ду́шу мою́, Симео́не преподо́бне.
Богоро́дичен: Изведе́ от чре́ва Твоего́ зрак мой, Де́во,/ И́же во о́бразе Бо́жии Сло́во, я́ко Сопресто́льное,/ и вхо́ды живота́ разшири́л есть ми.
Досто́йно е́сть: и велича́ния:
Ра́дуйся, Богопросла́вленне Симео́не, Но́вый Богосло́ве Це́ркве Христо́вой,/ ра́дуйся, Небе́сных зри́телю та́инств Све́та Трисо́лнечнаго,/ свети́льниче многосве́тлый.
Восше́дый ве́сь превы́ше земны́х,/ непристу́пной мглы дости́гл еси́ с пло́тию, Симео́не треблаже́нне, зре́ний Го́рних,/ и ве́сь обожи́лся еси́ Святы́м Ду́хом.
Уста́ твоя́ Боже́ственная, я́ко исто́чник,/ источи́ ми́ру то́ки Боже́ственных увеща́ний, жи́зни ве́чныя,/ подаю́ще нам, Симео́не Богому́дре, обоже́ния благода́ть.
Сло́во твое́ Боже́ственная ма́нна жи́зни, мед из ка́мени,/ роса́ Боже́ственныя прохла́ды, некта́р безстра́стия и вода́ нетле́ния/ зри́тся на́ми, о Симео́не, о Ду́хе.
Изба́ви небреже́ния худа́го, тя́жкия ле́ности и земны́х удово́льствий нас, Богосло́ве,/ и воздви́гни всех к стяжа́нию награ́ды бде́нием лу́чшим.
Сла́ву трисо́лнечную и све́тлую прие́мля в селе́ниях Небе́сных,/ да́ждь всем, о́тче, Свет Боже́ственный с Небесе́/ и бу́дущия сла́вы нас сподо́би.
Трисвято́е, обы́чныя тропари́, ектения́ и отпу́ст и пое́м стихи́ру, глас 2.
Подо́бен: Егда́ от Дре́ва:
О́тче Богосло́ве Симео́не,/ сосу́де Небе́сных дарова́ний,/ Богосло́вия исто́чниче,/ Свята́го Ду́ха орга́не доброгла́сный,/ вся́кия ско́рби изба́ви/ и вся́кия ну́жды душе́вныя и теле́сныя/ моли́твами твои́ми всех, ве́рно тя чту́щих,/ и подава́й нам с Небесе́ свет,/ дави́дски стезя́м всегда́.
Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.
Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
