Канон молебный святителем Иоанну и Феодору, епископом Суждальским
Тропа́рь, глас 8:
Я́ко апо́столом еди́нонравных учи́телей Су́ждальския страны́,/ и цели́телей душ и теле́с прему́дрых,/ и служи́телей Бо́гу благоприя́тных,/ к ра́кам честны́х моще́й ва́ших притека́юще,/ ублажа́ем вас, святи́телие Богоблаже́ннии, Фео́доре и Иоа́нне,/ в пе́снех же и пе́ниих, ра́дующеся, сла́вим Христа́,/ дарова́вшаго вам благода́ть исцеле́ний/ и гра́ду на́шему Су́ждалю вели́кое в вас утвержде́ние.
Ин тропа́рь, дре́вний, глас то́йже:
Я́ко апо́столом единонра́внии,/ и учи́телие Су́ждальстей стране́,/ и цели́телие душа́м и телесе́м предо́брии,/ и служи́телие Бо́жии благоприя́тнии,/ к ра́кам честны́х моще́й ва́ших притека́юще,/ святи́телю вели́кий Иоа́нне и Фео́доре Богоблаже́ннии,/ соше́дшеся днесь, любо́вию па́мять вашу све́тло пра́зднуем в пе́снех и пе́ниих,/ ра́дующеся и Христа́ сла́вяще,/ И́же такову́ю благода́ть дарова́вшаго исцеле́ний/ и гра́ду Су́ждалю вели́кое утвержде́ние.
Сла́ва, и ны́не, Богоро́дичен:
И́же нас ра́ди рожде́йся от Де́вы/ и распя́тие претерпе́в, Благи́й,/ испрове́ргий сме́ртию сме́рть/ и Воскресе́ние явле́й я́ко Бог,/ не пре́зри, я́же созда́л еси́ руко́ю Твое́ю,/ яви́ человеколю́бие Твое́, Ми́лостиве./ Приими́ ро́ждшую Тя, Богоро́дицу, моля́щуюся за ны,/ и спаси́, Спа́се наш, лю́ди отча́янныя.
Кано́н вели́ким святи́телем и чудотво́рцем Иоа́нну и Фео́дору, епи́скопом Су́ждальским, глас 8, его́же краегране́сие: Плету́ хвалу́ чуде́с великода́телем.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Просвети́ся Боже́ственным манове́нием, я́ко светоза́рное со́лнце на восто́ке,/ в Су́ждальстей стране́ пресла́вная па́мять ва́ша, сла́внии чудотво́рцы Иоа́нне и Фео́доре,/ моли́теся Го́сподеви о чту́щих вас.
Луча́ми чуде́сными и све́тлостьми Пра́веднаго Со́лнца осиява́еми/ и прему́дростию Боже́ственною украси́вшеся, Иоа́нне и Фео́доре блаже́ннии,/ непоро́чным житие́м Бо́гу угоди́сте,/ сего́ ра́ди от Него́ досто́йно просла́вистеся,/ моли́теся о творя́щих па́мять вашу.
Отцы́ си́рым в ми́ре сем яви́стеся,/ вдо́вам и ни́щим пита́телие, скорбя́щим уте́шителие,/ оби́димым засту́пницы, гра́ду на́шему покрови́телие,/ Иоа́нне и Фео́доре, достоблаже́ннии чудотво́рцы пресла́внии.
Богоро́дичен: К Твоему́ прибега́ю покро́ву, Пресвята́я Влады́чице,/ и ра́достно со Арха́нгелом зову́ Ти:/ ра́дуйся, Свет ми́рови ро́ждшая,/ ра́дуйся, стено́ и покро́ве всех нас,/ Бо́га, я́ко Благоде́теля, за ны моли́.
Песнь 3
Ирмо́с: Небе́снаго круга Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Фео́доре блаже́нне и Иоа́нне досточу́дне,/ я́ко иму́ще дерзнове́ние ко Го́споду, святи́телие преподо́бнии,/ моли́теся о нас спасти́ся нам,/ ве́рою честву́ющим свяще́нную па́мять ва́шу.
А́нгели земни́и, челове́цы Небе́снии ста́ду ва́шему яви́стеся,/ воздержа́нием бо и́стинным и моли́твою неукло́нною взыдо́сте в Вы́шний град доброде́тели,/ иде́же Присносу́щнаго наслажда́етеся пото́ка.
Вопие́м вам, святи́и чудотво́рцы, Иоа́нне и Фео́доре святи́телие,/ соверша́ющим па́мять ва́шу моли́теся дарова́ти очище́ние грехо́в,/ священнопропове́дницы су́ще Богоно́снии.
Богоро́дичен: Ма́ти Чи́стая Христа́ Бо́га и Неискусобра́чная, Неве́сто Неневе́стная,/ Того́ моли́ спасти́ ду́ши пою́щих Тя.
Ин кондак, глас 8:
Я́ко доброде́телей учи́тели,/ моли́твами ва́шими подае́те чту́щим вас любо́вию/ доброде́телей исправле́ние/ и собла́знов избавле́ние.
Седа́лен, глас 3:
Сосу́ди честни́и воздержа́ния и бога́тства некра́домаго, благоче́стия, показа́стеся,/ вои́стинну чудотво́рцы вели́цыи, святи́телие Иоа́нне и Фео́доре,/ безстра́стием житие́ просвети́вше, тре́бующим чуде́с лучи́ испуща́юще оби́льно,/ Христа́ Бо́га моли́те дарова́ти нам ве́лию ми́лость.
Сла́ва, и ны́не, Богоро́дичен:
Ки́йждо, иде́же спаса́ется, та́мо пра́ведно и притека́ет,/ и ко́е ино́е таково́е прибе́жище, я́ко Ты, Богоро́дице,/ покрыва́ющее ду́ши на́ша.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Торжество́ ва́ше свяще́нное соверша́юще,/ со слеза́ми притека́ем к ра́кам честны́х моще́й ва́ших и смире́нно мо́лим:/ святи́и чудотво́рцы, святи́телие Иоа́нне и Фео́доре,/ хода́тайствуйте за нас ко Го́споду.
Еди́ницу Несозда́нную богосло́вити науча́юще,/ Треми́ Ли́цы разделя́ему, Непресеко́му и Несмеше́нну,/ просвеща́юще благочести́выя свяще́нными уче́нии ва́шими.
Ра́достно Го́рняго Иерусали́ма достиго́сте, святи́телие Иоа́нне и Фео́доре преблаже́ннии,/ в не́мже ны́не живу́ще и со А́нгелы лику́юще,/ помина́йте творя́щих ве́рою святу́ю па́мять ва́шу.
Богоро́дичен: Свяще́нный лик проро́чески проявля́ше сдале́че/ хотя́щую Тя бы́ти Бо́жию и́стинную Роди́тельницу, Чи́стая,/ вы́шшую Херуви́м и всея́ тва́ри.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Новоявле́нни просия́сте святи́и чудотво́рцы, святи́телие Иоа́нне и Фео́доре,/ па́че со́лнца в Су́ждальстей земли́,/ ра́дуется же свята́я Це́рковь, име́ющи в себе́ нетле́нныя ва́ша мо́щи,/ точа́щия исцеле́ния бога́тно с ве́рою притека́ющим к ра́кам моще́й ва́ших.
Напои́вше ду́ши ва́ша сле́зными пото́ки,/ соде́ясте их, святи́и чудотво́рцы, плодоно́сны доброде́тели вся́кия,/ износя́ще чуде́с показа́ньми, пресла́внии.
Ма́тере Бо́жии Це́ркве красота́ и велеле́пие бы́сте,/ Богопропове́дницы святи́телие Иоа́нне и Фео́доре преблаже́ннии,/ пе́нием и благоле́пием сию́ украси́вше, и ту почи́сте о Го́споде,/ и неотсту́пно с на́ми пребыва́ете, за ны моля́щеся.
Богоро́дичен: Еди́наго от Тро́ицы Пребоже́ственныя, Пречи́стая, родила́ еси́,/ из Тебе́ пло́тию я́вльшагося нам,/ благоволе́нием ро́ждшагося и де́йством Ду́ха Пресвята́го, Де́во Ма́ти.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Госпо́дня ра́дуется Це́рковь и весели́тся сла́вный град Су́ждаль,/ име́я в себе́ чудотво́рныя мо́щи ва́ша,/ святи́телие преблаже́ннии, Иоа́нне и Фео́доре, моли́теся Го́споду о чту́щих вас.
Апо́столом бы́сте подо́бницы, святи́телем удобре́ние,/ и́ноком сла́ва, по́стником утвержде́ние, святи́телие Иоа́нне и Фео́доре преблаже́ннии,/ ны́не же моли́теся Го́споду за град и лю́ди,/ притека́ющия к ра́кам честны́х моще́й ва́ших.
Любе́зно плоды́ благора́зумия возде́ласте,/ и служи́телие Влады́це Христу́ яви́стеся,/ и просвети́сте свои́м уче́нием Су́ждальскую страну́,/ и ра́зуму научи́сте Богоразу́мия, ве́ровати в Тро́ицу Единосу́щную.
Богоро́дичен: Умертви́, Пренепоро́чная Де́во, молю́ Тя, пло́ти моей душетле́нныя стра́сти,/ ро́ждшая пло́тию безстра́стия Исто́чника, Христа́ Бо́га.
Конда́к, глас 8:
Боже́ственных и пречестны́х святи́телей Христовых и чудотво́рцев Иоа́нна и Фео́дора,/ ве́рнии, пою́ще, да ублажи́м,/ я́ко днесь, в па́мять их притека́юще к ра́кам моще́й их,/ мо́лим многообра́зных нас обстоя́ний изба́вити, да вопие́м вам:/ ра́дуйтеся, гра́ду на́шему и Це́ркви Христо́вей вели́кое утвержде́ние.
И́кос:
И́же Боже́ственными добро́тами осиява́еми, святи́телие достосла́внии Иоа́нне и Фео́доре,/ чуде́с лучи́ повсю́ду испуща́юще, и я́ко ре́ки благоче́стия яви́шася,/ и уче́нием всю зе́млю напои́ша,/ те́мже, соше́дшеся благоче́стно, вас почита́ем и приле́жно мо́лим:/ ра́дуйтеся, гра́ду на́шему и Це́ркви Христовей вели́кое утвержде́ние.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Ревни́телю Илии́ и Богови́дцу Моисе́ю возревнова́вше,/ е́реси нача́льников посрами́сте и неве́рных уче́нием просвети́сте,/ святи́телие Иоа́нне и Фео́доре достоблаже́ннии, вопию́ще Христу́:/ оте́ц на́ших Бо́же, благослове́н еси́.
Го́рдаго зми́я смире́нием свои́м смири́вше, святи́телие Иоа́нне и Фео́доре,/ возвыша́еми к Бо́гу чи́стыми ва́шими ра́зумы,/ те́мже вас почита́ем, вопи́юще Христу́:/ оте́ц на́ших Бо́же, благослове́н еси́.
Ору́жием ва́ших моли́тв, святи́и чудотво́рцы, победи́вше бе́сы лука́выя,/ с Небесе́ благода́ть прия́сте исцели́ти неду́ги и прогоняти бе́сы притека́ющим к вам ве́рою и взыва́ющим:/ оте́ц на́ших Бо́же, благослове́н еси́.
Богоро́дичен: Непреста́нно моли́, Чи́стая, со святи́тели/ проше́дшаго из чресл Твои́х Христа́, Бо́га на́шего,/ изба́вити от ле́сти диа́вола пою́щия Тя, Влады́чице, и вопи́ющия:/ оте́ц на́ших Бо́же, благослове́н еси́.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.
Архиере́йства ма́стию умаще́ннии,/ сосу́ди чи́стии и бога́тства некра́домая яви́стеся,/ благоче́стия святи́телие и чудотво́рцы Иоа́нне и Фео́доре,/ но, я́ко иму́ще дерзнове́ние ко Го́споду,/ моли́теся о нас, пою́щих и превознося́щих Христа́ во ве́ки.
Наста́ ны́не честна́я ва́ша па́мять, святи́телие и чудотво́рцы Иоа́нне и Фео́доре,/ свети́льницы бо яви́стеся све́тлии,/ я́коже и пречу́дный святи́тель и учи́тель Росто́вский Лео́нтий, чудотво́рец,/ с ни́мже вку́пе пребыва́юще, и нас озари́те моли́твами ва́шими,/ Христа́ хва́лящих и превознося́щих во ве́ки.
Кре́постию Христовою возмого́сте держа́ву низложи́ти и си́лу вра́жию,/ и похвалу́ побе́дную, по́чести прия́сте,/ и сы́нове бы́сте Трисо́лнечнаго Све́та,/ святи́телие вели́цыи Иоа́нне и Фео́доре, помози́те нам,/ ве́рою призыва́ющим вас и превознося́щим Христа́ во ве́ки.
Богоро́дичен: Си́це, раби́ Твои́, Пресвята́я Де́во, со А́нгелом вопие́м Ти:/ ра́дуйся, ски́ние Бо́жия Сло́ва;/ ра́дуйся, ору́жие и престо́ле;/ ра́дуйся, горо́ приосене́нная,/ от нея́же отсече́н Ка́мень Христо́с.
Песнь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.
Духо́внии орга́ни, Боже́ственным манове́нием озаря́еми,/ свети́льницы всезлати́и, святи́телие и чудотво́рцы Иоа́нне и Фео́доре,/ неисце́льныя стра́сти на́ша и боле́зни исцели́те/ и испроси́те у Христа́ Спаса,/ да моли́твами ва́шими ми́лость полу́чим ны́не и в День воздая́ния.
Ору́жием ва́ших моли́тв, святи́телие и чудотво́рцы Иоа́нне и Фео́доре,/ исцели́те на́ша неду́ги и боле́зни отжени́те/ притека́ющим с ве́рою к цельбоно́сным ра́кам моще́й ва́ших.
Красне́йшее прозябе́ние бы́вше, вели́цыи чудотво́рцы,/ в дому́ Бо́жии, я́ко фи́никсы, прозябо́сте, доброде́тельми украше́ннии,/ и плоды́ чуде́сными мир облагоуха́ете.
Струя́ми уче́ний ва́ших загради́вше му́тная нечести́вых уче́ния,/ я́ко река́ показа́стеся ми́рная,/ благоче́стием напая́юще составле́ния ве́рных,/ святи́телие вели́цыи и чудотво́рцы, Иоа́нне и Фео́доре Богоблаже́ннии.
Богоро́дичен: Ада́мов Соде́тель от крове́й Твои́х чи́стых зи́ждется/ и млеко́м пита́ется, пита́яй вся́кое дыха́ние, Де́во Богоро́дице,/ те́мже, я́ко Богома́терь Тя сла́вяще, ве́рою песнь воспева́ем.
Моли́тва
О вели́цыи уго́дницы Христо́вы и чудотво́рцы, святи́телие Фео́доре и Иоа́нне! Се мы, недосто́йнии и гре́шнии, скорбьми́ мно́гими угнета́емии, к вам усе́рдно прибега́ем и с упова́нием кре́пким мо́лимся: отцы́ благоми́лостивии и благопослу́шливии, ми́лостивно услы́шите ны́не глас наш моле́бный, и потщи́теся на по́мощь на́шу, и, я́ко при жи́зни ва́шей всем скорбя́щим и озло́бленным помо́щницы и уте́шителие бы́сте, та́ко и ны́не любо́вь ва́шу к нам яви́те благода́тным де́йством богоприя́тных моли́тв ва́ших, претворя́юще скорбь на́шу на ра́дость, печа́ль же на утеше́ние, вся бо мо́жете о укрепля́ющем вас Христе́, Его́же ве́рнии служи́телие бы́сте, от Него́же прия́вше вся обетова́нная блага́я, низпосли́те и нам вели́кую и бога́тую ми́лость Госпо́дню, да воспое́м и просла́вим ди́внаго во святы́х Свои́х Бо́га, Отца́ и Сы́на и Свята́го Ду́ха, ны́не, и при́сно, и во ве́ки веков. Ами́нь.
И́на моли́тва
О вели́цыи святи́телие и чудотво́рцы Иоа́нне и Фео́доре, уго́дницы Христо́вы и на́ши те́плии засту́пницы и моли́твенницы, земни́и а́нгели и Небе́снии челове́цы, Боже́ственныя Тро́ицы жили́ща, столпи́ благоче́стия, апо́стольскаго уче́ния пропове́дницы, Правосла́вныя ве́ры утвержде́ние, це́рковная красото́, све́тлии свети́льницы, во бране́х кре́пцыи побо́рницы, стра́нным утеше́ние и покро́в вдо́вам, те́плии засту́пницы, сирота́м корми́тели, боля́щим цели́тели, гра́ду Су́ждалю украше́ние, скорбя́щим уте́шители и всем ве́рою к цельбоно́сным моще́й ва́ших ра́кам притека́ющим ско́рии коего́ждо к потре́бе проше́нию послу́шатели, услы́шите нас, смире́нных и недосто́йных раб свои́х, с те́плою ве́рою и со слеза́ми припа́дающих к цельбоно́сным моще́й ва́ших ра́кам. Не ве́мы бо вас ме́ртвых су́щих, а́ще и преста́вистеся от нас, но, ду́хом с на́ми неотсту́пно пребыва́юще, при́сно исполня́ете потре́бу коего́ждо к по́льзе; проше́ния испроси́те па́стве свое́й и всем нам у Го́спода, всея́ тва́ри Соде́теля: благоде́нствие, земли́ благостоя́ние, возду́ха благорастворе́ние, нам же, принося́щим вам сие́ ма́лое моле́ние, коему́ждо теле́сное здра́вие и душе́вное спасе́ние, и вся́кое проше́ние во благо́е, я́ко да ва́шим заступле́нием и моли́твами сохраня́еми, поклоне́ние и сла́ву и благодаре́ние возсыла́ем в Тро́ице Еди́ному Бо́гу и всех Созда́телю ны́не, и при́сно, и во ве́ки веков. Ами́нь.
