Канон молебный ко святому праведному Иоанну Русскому, исповеднику
Творе́ние Дании́ла мона́ха
По благослове́нии свяще́нника глаго́лем псало́м 142: Го́споди, услы́ши моли́тву мою́: Сла́ва, и ны́не: Та́же: Бог Госпо́дь: во глас 4-й со стихи́ и а́бие тропа́рь свята́го, глас 4.
Подо́бен: Ско́ро предвари́:
От земли́ призва́вый тя в Небе́сныя оби́тели/ соблюда́ет и по сме́рти нетле́нно те́ло твое́, пра́ведне,/ ты бо во Аси́ю я́коже пле́нник взят был еси́,/ иде́же и Христу́ пожи́л еси́, Иоа́нне,/ Его́же у́бо моли́ спасти́ся душа́м на́шим.
Сла́ва, глас то́йже.
Подо́бен: К Богоро́дице приле́жно:
Ко Иоа́нну, ве́рнии, ны́не притеце́м,/ су́щии в беда́х и напа́стех, и припаде́м,/ благоче́стно зову́ще из глубины́ души́:/ пра́ведне, помози́ нам, твои́м моли́твенником,/ потщи́ся и избави́ належа́щия ну́жды,/ не пре́зри моли́твы ско́рбныя/ притека́ющих ко кро́ву твоему́, свя́те.
И ны́не, Богоро́дичен:
Не умолчи́м никогда́, Богоро́дице,/ си́лы Твоя́ глаго́лати, недосто́йнии,/ а́ще бо Ты не бы предстоя́ла моля́щи,/ кто бы нас изба́вил от толи́ких бед,/ кто же бы сохрани́л доны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.
И а́бие псало́м 50-й. Та́же кано́н на 4 без ирмосо́в, глас 8.
Песнь 1. Ирмо́с: Во́ду проше́д:
Припе́в: Свя́тче Бо́жий, моли́ся о нас.
Тя́жкими удруча́емь напа́стьми,/ к тебе́ простира́ю и те́ло, и ду́шу,/ моля́ся ти, преподо́бне о́тче,/ от печа́лей и бед мя изба́вити.
Пло́ти волне́ния нахо́д, блаже́нне Иоа́нне, возмуща́ет мя непреста́нно,/ умири́, о́тче, тишино́ю,/ богоприя́тными предста́тельствы твои́ми.
Де́монов по́лчища лука́вая вою́ют на раба́ твоего́ немилосе́рдно,/ отреши́ их си́лою Креста́,/ человеколю́бными предста́тельствы твои́ми.
Богоро́дичен: Де́во, Врата́ Бо́жия, отве́рзи ми врата́ милосе́рдия/ и от врат смертоно́снаго греха́ Ма́терним дерзнове́нием Твои́м свободи́ мя.
Песнь 3. Ирмо́с: Небе́снаго кру́га:
От челове́к, неду́гующих лука́вством всегда́, ды́шащих ху́льно угро́зы,/ ты мя спаси́, лю́тую сих я́рость разжени́,/ благоче́стных утвержде́ние, о́тче всесла́вне.
Устро́ивый разу́мно дом души́/ и изря́дно украси́вый, Богоблаже́нне,/ благода́ть Ду́ха приимы́й и Све́та исполня́емь, яви́ся, я́ко столп о́гненный.
Богоро́дичен: Чистоты́ де́вства отпа́д, Всечи́стая,/ весь оскверне́н есмь стра́стию блуда́,/ но, ро́ждшая Судию́ согреша́ющих челове́к,/ вся́каго осужде́ния, Де́во, мя изба́ви.
Катава́сия: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
По 3-й пе́сни:
Изба́ви от бед рабы́ твоя́, Богоно́се,/ я́же ве́рою несумне́нною к тебе́ прибега́ющия,/ я́ко к ско́рому помо́щнику в ну́ждах.
При́зри благосе́рдием, Всепе́тая Богоро́дице,/ на мое́ лю́тое телесе́ озлобле́ние/ и исцели́ души́ моея́ боле́знь.
Посе́м ектения́: Поми́луй нас, Бо́же: и помина́ет иере́й, за ни́хже пое́тся моле́бен и мы пое́м: Го́споди, поми́луй. Иере́й: Я́ко ми́лостив:
Та́же седа́лен, глас 2.
Подо́бен: В Вышних:
Предста́тель те́плый и столп непобеди́мый/ показа́лся еси́, му́дре,/ ве́рою вопию́щим тебе́ и благоче́стно взыва́ющим:/ Богоно́се Иоа́нне, предвари́ и от бед изба́ви нас,/ всегда́ Тро́ице предстоя́й.
Песнь 4. Ирмо́с: Услы́шах, Го́споди:
Исцеле́ний дарова́ния, к тебе́ прибега́ющии, почерпа́ем ра́достно/ и сла́вим тя, исто́чниче чуде́с.
Каппадоки́ян сосло́вия и Проко́пиян благочести́выя мно́жества,/ Афо́нских оте́ц собо́ри и Росси́йстии ве́рнии лю́дие/ помо́щника зна́ют и предста́теля вси восхваля́ют тя.
Проше́д му́жественнейше о́блак пло́ти твоея́ дея́нием,/ внутрь был еси́, приснопа́мятне, Све́та Боже́ственнаго,/ я́ко возжеле́л еси́.
Богоро́дичен: Дом была́ еси́, Пречи́стая, Бо́га всех я́ко Присноде́ва,/ сего́ ра́ди дом мя покажи́ доброде́телей,/ одушевле́нных Боже́ственною благода́тию.
Песнь 5. Ирмо́с: Просвети́ нас:
Сохрани́ нас предста́тельствы твои́ми, блаже́нне,/ и руко́ю твое́ю кре́пкою го́рькия де́моны низложи́, всечу́дне.
Да́руй нам здра́вие, моля́щимся тебе́, и души́, и те́ла всегда́/ и благоуха́нную кре́пость, о́тче всебога́те.
Исцели́ лю́ди, притека́ющия к тебе́, чу́дне,/ и па́губныя боле́зни, и огня́, и муче́ний вся́ческих всеце́ло изба́ви.
Богоро́дичен: О Тебе́ ра́дуется, Богоро́дице, вся́кая тварь,/ а́нгельстии собо́ри и челове́честии язы́цы вси сла́вят.
Песнь 6. Ирмо́с: Моли́тву пролию́:
Чуде́с тя сокро́вище вем и исто́чника благи́х, Иоа́нне,/ не́мощей исцеля́юща стра́сти и нало́ги бесо́в отгоня́юща,/ и молю́ся, е́же спасти́ ны́не от па́губы мя злых,/ благода́ти тезоимени́те.
Предста́теля тя ни́щих пропове́дуем и стра́жа Каппадоки́и всея́,/ искуше́ний избавля́юща ста́до,/ нечести́вых вред отгоня́юща,/ и всех ны́не благочести́вых от бед изба́вити мо́лимся.
Приста́нище тя в ско́рбех и́мамы и в печа́лех предста́теля, всеблаже́нне,/ и всесоверше́нное от бед спасе́ние,/ и ре́ку дарова́ний неисчерпа́емую,/ родни́к благодея́ний и исто́чник исцеле́ний приснотеку́щий.
Богоро́дичен: Объя́тии Твои́ми и пе́рсьми, о Влады́чице, к Сы́ну Твоему́, хода́тайствующи,/ покажи́ Твои́м ча́дом, Де́во, Его́ Крест, и копие́, и гу́бу, и трость/ и та́ко уми́лостиви Его́ о нас, мно́го согре́шших.
Катава́сия: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Та́же: Изба́ви от бед рабы́ твоя́, победоно́сче,/ я́же ве́рою несумне́нною к тебе́ прибега́ющия,/ я́ко к ско́рому помо́щнику в ну́ждах.
Чи́стая, Я́же сло́вом Сло́во неизрече́нно/ в после́дния дни ро́ждшая,/ моли́ Его́, я́ко иму́щая Ма́тернее дерзнове́ние.
Ектения́ ма́лая.
Конда́к, глас 6:
Предста́тельство христиа́н Непосты́дное,/ Хода́тайство ко Творцу́ Непрело́жное,/ не пре́зри гре́шных моле́ний гла́сы,/ но предвари́, я́ко Блага́я, на по́мощь нас,/ ве́рно зову́щих Ти:/ ускори́ на моли́тву и потщи́ся на умоле́ние,/ предста́тельствующи при́сно, Богоро́дице, чту́щих Тя.
И посе́м проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Луки́, зача́ло 24.
По 50-м псалме́ стихи́ра, глас 6.
Подо́бен: Все отло́жше:
Не лиши́ мя твоего́ те́плаго предста́тельства,/ Иоа́нне пра́ведне,/ но разруши́, молю́ся, си́лою твое́ю де́рзости безси́льныя/ и стреля́ния де́монов неча́емая,/ боле́зней изба́ви, и искуше́ний, и скорбе́й/ и всех свободи́ бесо́вских нападе́ний,/ да тя почита́ю, и любо́вию воспева́ю,/ и покланя́юся, и велича́ю/ твоя́, свя́те, дея́ния богоприя́тная.
Спа́си, Бо́же, лю́ди Твоя́: Го́споди, поми́луй: 12 раз. Ми́лостию и щедро́тами:
Песнь 7. Ирмо́с: От Иуде́и:
Ду́шу сла́дости и ра́дости вся́кия покажи́ испо́лнену, Богому́дре Иоа́нне,/ и́же тя те́пле воспева́ющих и вопи́ти всегда́ научи́:/ оте́ц на́ших Бо́же, благослове́н еси́.
Освеще́нный стра́стию твое́ю/ омраче́нна мя грехми́ просвети́,/ любо́вию приходя́ща честны́м твои́м моще́м, и взыва́ти сподо́би:/ оте́ц на́ших Бо́же, благослове́н еси́.
Искуше́ний, и бед, и ну́жды, и печа́ли, и вре́да де́монов свободи́/ я́же на тя благоче́стно наде́ющияся и с ве́рою зову́щия:/ оте́ц на́ших Бо́же, благослове́н еси́.
Богоро́дичен: Челове́ков Творе́ц, во чре́ве Твое́м всели́вся, Богора́дованная,/ всех, бу́рею коле́блемых, покро́ва сподо́би, вопию́щих:/ оте́ц на́ших Бо́же, благослове́н еси́.
Песнь 8. Ирмо́с: Царя́ Небе́снаго:
Потопля́емым жите́йскими треволне́нии ру́ку пода́ждь, всеблаже́нне,/ пою́щим и превознося́щим Христа́ во ве́ки.
Твои́х честны́х моще́й каса́ющихся/ испо́лни благоуха́ния Боже́ственнаго,/ Го́спода пою́щих ве́рно во ве́ки.
Моля́щихся непреста́нно, Богоно́се,/ и благода́ти прося́щих приими́,/ и славосло́вящих Бо́га во ве́ки.
Богоро́дичен: От скверн мое́ се́рдце, Де́во, покая́ния очи́сти вода́ми,/ да Тя сла́влю во вся ве́ки.
Песнь 9. Ирмо́с: Вои́стинну Богородицу:
Звезду́, Иоа́нне, тя знаменоно́сную испове́дуем,/ нам свет облистава́ющую, благочести́вии,/ правосла́вно Христу́ служа́щии.
Волне́нием, Богоно́се, обурева́емым мно́гих зол,/ твои́м моли́твенником помози́,/ отгоня́я стре́лы врага́.
Моли́тву мою́ приими́, смири́вшагося,/ и тя́жких, Богоно́се, злострада́ний и греха́ мя изба́ви.
Богоро́дичен: Наде́жду спасе́ния па́дших ро́ди Тя, Богоро́дице, ве́дуще,/ непреста́нно единому́дренно Тя ублажа́ют.
И а́бие: Досто́йно есть:
Та́же стихи́ры на целова́ние честны́х моще́й или́ ико́ны свята́го, глас 2.
Подо́бен: Вы́шшую Небе́с:
Мо́лимся тебе́, о́тче Иоа́нне:/ неви́димых всех и ви́димых ко́зней, нас стужа́ющих, изба́ви,/ под кров твой, те́пле, прибега́ющих.
Разжже́нныя стре́лы врага́ человекоуби́йцы, о́тче,/ отжени́ от нас те́плыми к Тро́ице твои́ми моли́твами,/ я́ко изба́вльшеся сих тя велича́ем.
Звезду́ вси я́сную, от Росси́и возсия́вшую мы́сленно,/ Проко́пиян и Каппадоки́ян сла́ву,/ Афо́нских оте́ц похвалу́,/ Боже́ственнаго Иоа́нна пе́сньми почти́м.
Испроси́ мир от Бо́га, ду́ха тишину́,/ до конца́ терпе́ние, душ спасе́ние,/ нам, твои́м моли́твенником,/ восхваля́ющим любо́вию твоя́ чудеса́.
Та́же: Вся А́нгелов во́инства, Предте́че Госпо́день,/ апо́столов двоенадеся́тице,/ святи́и вси с Богоро́дицею,/ сотвори́те моли́тву,/ во е́же спасти́ся нам.
Трисвято́е. О́тче наш: Посе́м тропари́, глас 2.
Подо́бен: Егда́ от Дре́ва:
Прииди́те, поклони́мся, ве́рнии,/ и, со благогове́нием и любо́вию облобыза́юще сла́вныя и всечестны́я мо́щи Иоа́нна Богому́драго,/ очи́стим уста́, о́чи и чело́ и помо́лимся,/ я́ко да и нас сподо́бит конца́ спаси́тельнаго и Боже́ственнаго/ свои́ми ко Го́споду моли́твами.
Сла́ва: В Вы́шних с А́нгелов ли́ки и с победоно́сцев собо́ры/ свята́я твоя́ душа́ ра́дуется, блаже́нне,/ и свесели́тся и с преподо́бных мно́жествы,/ с ли́ки проро́к же и святи́телей,/ вку́пе с Боже́ственными чи́нми,/ до́лу же всечестно́е те́ло,/ пе́нии и пе́сньми досто́йно от нас почита́емое, сла́вится.
И ны́не: Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
Ектения́: Поми́луй нас, Бо́же: я́коже и по 3-й пе́сни, и быва́ет моли́тва свято́му и отпу́ст.
