Ина служба явлению иконы Пресвятыя Владычицы нашея Богородицы «Державныя»

ВЕ́ЧЕР

На Го́споди, воззва́х: поста́вим стихо́в 8 и пое́м стихи́ры, глас 4.

Подо́бен: Я́ко до́бля:

Я́ко вели́ка су́щи Цари́ца и Ма́ти/ на Небеси́ превысо́ких сил Царя́,/ пречи́стыя Твоя́ ру́це просте́рши,/ моле́бно за ны предстои́ши,/ и на земли́, я́ко Держа́вная Помо́щница,/ Боже́ственною Твое́ю ико́ною и ду́хом с Твои́ми рабы́ пребыва́еши,/ и ве́село спаса́еши,/ и избавля́еши от вся́кия напа́сти/ благоче́стно Богоро́дицу Тя испове́дающия.

Херуви́мов и Серафи́мов превы́шши еси́, Богоро́дице,/ Небесе́ же и земли́ простра́ннейши,/ ви́димыя тва́ри и неви́димыя яви́лася еси́ преиму́щи 9/ несосу́дным сосужде́нием 10,/ Его́же бо простра́нствия небеса́ не вмеща́ют,/ в Твое́й утро́бе вмести́ла еси́, Чи́стая,/ Его́же моли́ спасти́ся рабо́м Твои́м.

О Всеми́лостивая христиа́ном Помо́щнице,/ не мо́жет Тя воспе́ти досто́йно ум челове́ческий и А́нгельский,/ я́ко всея́ тва́ри честне́йши,/ Небе́сных и земны́х сла́внейши,/ всех бо родила́ еси́ Творца́ и Бо́га./ Но, о Влады́чице!/ приими́ ми́лостивно, ю́же Тебе́ от се́рдца возложи́хом пе́снь,/ спаса́й нас всегда́, на Тя бо наде́емся.

Глас 2:

Всем предста́тельствуеши, Блага́я,/ прибега́ющим с ве́рою в держа́вный Твой покро́в,/ ина́го бо не и́мамы, гре́шнии, к Бо́гу в беда́х и ско́рбех при́сно избавле́ния,/ обремене́ннии гре́хи мно́гими,/ Ма́ти Бо́га Вы́шняго,/ те́мже Ти припа́даем,/ изба́ви от вся́каго обстоя́ния рабы́ Твоя́.

Упова́ние и покро́в держа́вный к Тебе́ притека́ющих, Богороди́тельнице,/ благо́е предста́тельство ми́ра,/ моли́ со Безпло́тными приле́жно,/ Его́же родила́ еси́, Человеколю́бнейшаго Бо́га,/ изба́витися душа́м на́шим от вся́каго преще́ния,/ еди́на Благослове́нная.

Глас 6:

Тебе́ вси ро́ди челове́честии/ хва́льныя да́ры прино́сят, Влады́чице,/ и мо́лятся я́ко Цари́це и Ма́тери Бо́жии,/ проро́цы Тя прему́дро пропове́даша,/ леви́ти благослови́ша,/ апо́столи и му́ченицы испове́даша,/ христоимени́тии лю́дие покланя́ются,/ архиере́и пропове́дуют,/ мона́си и прости́и благогове́ют,/ бога́тии и убо́зии, си́роты и вдо́вы,/ и всяк во́зраст, и вся́ко преспе́яние, ста́рческое и младе́нческое,/ под кров Твой держа́вный с ве́рою прибега́ем:/ покры́й и соблюди́, Госпоже́, моли́твами Твои́ми/ и спаси́ от бед ду́ши на́ша.

Всем Предста́тельница те́плая показа́лася еси́, Богороди́тельнице,/ всех покро́в, Держа́ва же от Бо́га прибега́ющим к Тебе́,/ в ну́ждах су́щим Помо́щница,/ плене́нным ско́рое избавле́ние,/ Тебе́ бо Христо́с на ва́рвары положи́л есть Мсти́тельницу,/ и Засту́пницу, и сте́ну неруши́мую,/ и немощны́м кре́пость непреобори́мую,/ и ми́ра Пода́тельницу душа́м на́шим.

Глас 8:

Прииди́те, возра́дуемся Держа́вней Засту́пнице ро́да на́шего,/ Цари́це Богоро́дице,/ прииди́те, ти́хому Ея́ и чу́дному, почита́емому А́нгелы/ честно́му поклони́мся о́бразу,/ да́рует бо Богоро́дица ве́рным оби́льныя да́ры целе́бныя,/ от неистощи́маго исто́чника – святы́я ико́ны,/ неоску́дную благода́ть источа́ющи,/ тьмы́ избавля́ет нас искуше́ний и бед и вся́каго греха́,/ благоче́стно и богоприя́тно прославля́ющих/ и чту́щих све́тлую и чу́дную Богома́тере святу́ю ико́ну./ Тем, воспева́юще, воззове́м Первообра́зней:/ ра́дуйся, любе́зная ми́ру По́моще/ во спасе́ние душ на́ших.

Сла́ва, и ны́не, Богоро́дичен, глас 4: И́же Тебе́ ра́ди Богооте́ц, проро́к Дави́д:

Вход. Проки́мен дне и чте́ния

Бытия́ чте́ние (глава́ 28):

Изы́де Иа́ков от студенца́ кля́твеннаго/ и и́де в Харра́нь./ И обре́те ме́сто, и спа та́мо,/ за́йде бо со́лнце./ И взят от ка́мения ме́ста того́, и положи́ возгла́вие себе́,/ и спа на ме́сте о́ном, и сон ви́де:/ и се ле́ствица, утвержде́на на земли́,/ ея́же глава́ досяза́ше до Небе́с,/ и А́нгели Бо́жии восхожда́ху и низхожда́ху по ней./ Госпо́дь же утвержда́шеся на ней и рече́:/ Аз Бог Авраа́мов, отца́ твоего́,/ и Бог Исаа́ков, не бо́йся,/ земля́, иде́же ты спи́ши на ней,/ тебе́ дам ю и се́мени твоему́./ И бу́дет се́мя твое́, я́ко песо́к земны́й,/ и распространи́тся на мо́ре, и ли́ву, и се́вер, и на восто́ки./ И возблагословя́тся о тебе́ вся коле́на земна́я и о се́мени твое́м./ И се Аз с тобо́ю, сохраня́яй тя на вся́ком пути́, а́може а́ще по́йдеши./ И возвращу́ тя в зе́млю сию́,/ я́ко не и́мам тебе́ оста́вити,/ до́ндеже сотвори́ти Ми вся, ели́ка глаго́лах тебе́./ И воста́ Иа́ков от сна своего́ и рече́:/ я́ко есть Госпо́дь на ме́сте сем, аз же не ве́дех./ И убоя́ся, и рече́:/ я́ко стра́шно ме́сто сие́,/ не́сть сие́, но дом Бо́жий,/ и сия́ врата́ Небе́сная.

Проро́чества Иезеки́илева чте́ние (гла́вы 43 и 44):

Та́ко глаго́лет Госпо́дь:/ бу́дет от дне осма́го и про́чее,/ сотворя́т иере́и на олтари́ всесожже́ния ва́шего/ и я́же спасе́ния ва́шего,/ и прииму́ вы,– глаго́лет Адонаи́ Госпо́дь./ И обрати́ мя на пу́ть врат святы́х вне́шних, зря́щих на восто́ки,/ и сия́ бя́ху затворе́на./ И рече́ Госпо́дь ко мне:/ врата́ сия́ затворе́на бу́дут и не отве́рзутся,/ и никто́же про́йдет сквозе́ их,/ я́ко Госпо́дь Бог Изра́илев про́йдет и́ми, и бу́дут затворе́на./ Я́ко игу́мен ся́дет в них сне́сти хлеб,/ по пути́ Ела́мских врат вни́дет и по пути́ его́ изы́дет./ И введе́ мя по пути́ врат святы́х, су́щих к се́веру, пря́мо хра́му,/ и ви́дех, и се испо́лнь сла́вы храм Госпо́день.

При́тчей чте́ние (глава́ 9):

Прему́дрость созда́ Себе́ дом/ и утверди́ столпо́в се́дмь./ Закла́ Своя́ же́ртвенная, и раствори́ в ча́ши Свое́й вино́,/ и угото́ва Свою́ трапе́зу./ Посла́ Своя́ рабы́, созыва́ющи с высо́ким пропове́данием на ча́шу, глаго́лющи:/ и́же есть безу́мен, да уклони́тся ко Мне./ И тре́бующим ума́ рече́:/ прииди́те, яди́те Мой хлеб и пи́йте вино́,/ е́же раствори́х вам./ Оста́вите безу́мие, и жи́ви бу́дете,/ и взыщи́те ра́зума, да поживете́,/ и испра́вите ра́зум в ве́дении./ Наказу́яй злы́я, прии́мет себе́ безче́стие,/ облича́яй же нечести́ваго, опоро́чит себе́,/ обличе́ния бо нечести́вому – ра́ны ему́./ Не облича́й злых, да не возненави́дят тебе́,/ облича́й прему́дра, и возлю́бит тя./ Да́ждь прему́дрому вину́, и прему́дрший бу́дет,/ сказу́й пра́ведному, и приложи́т приима́ти./ Нача́ло прему́дрости – страх Госпо́день,/ и сове́т святы́х – ра́зум./ Разуме́ти бо зако́н – по́мысла есть блага́го,/ сим бо о́бразом мно́гое поживе́ши вре́мя,/ и приложа́тся тебе́ ле́та живота́.

На лити́и стихи́ры, глас 1:

Любо́вию, Чи́стая Де́во,/ Твою́ святу́ю ико́ну почита́ющим,/ и Бо́жию Тя и́стинную Ма́терь согла́сно возвеща́ющим,/ и ве́рно покланя́ющим Ти ся/ Храни́тельница яви́ся и Держа́вная Предста́тельница,/ вся́кое зло от сих удаля́ющи,/ я́ко вся могу́щая.

Да и́мя Твое́, Богоро́дице,/ на земли́ славосло́вится,/ И́же из Тебе́ просия́в/ гре́шником держа́вную наде́жду и сте́ну Тя дарова́:/ Тобо́ю бо вся́кое дыха́ние к Бо́гу притека́ет.

Сла́ва, и ны́не, глас 5:

Востру́бим трубо́ю пе́сней,/ воспои́м согла́сно/ Засту́пнице страны́ на́шея,/ Цари́це Богоро́дице:/ ра́дуйся, благоволе́нием Твои́м оте́чество на́ше/ от лет дре́вних венча́вшая/ и благода́ть тому́ источа́ющая./ Те́мже и пречи́стый Твой покро́в/ и па́мяти тьма́ми тем 11 чуде́с Твои́х/ Це́рковь на́ша Росси́йская све́тло пра́зднует./ Не отыми́ у́бо от нас, о Влады́чице,/ и ны́не ми́лости Твоя́,/ при́зри на ско́рбь и тесноту́ на́шу/ и воздви́гни нас держа́вным заступле́нием Твои́м.

На стихо́вне стихи́ры, глас 3:

Прииди́те, вси концы́ земли́,/ честну́ю ико́ну Бо́жия Ма́тере ублажи́м,/ и́бо, ру́це к Сы́ну возде́ющи, мо́лится./ Те́мже святы́м и держа́вным Ея́ предста́тельством/ мир оживле́н бы́сть,/ псалмы́, и пе́ньми, и пе́сньми духо́вными/ со все́ми святы́ми пра́зднуем све́тло.

Стих: Помяну́ и́мя Твое́/ во вся́ком ро́де и ро́де.

Вельми́ добро́тою украси́ Тя Бог,/ я́ко в челове́цех Свет на руку́ Твое́ю,/ Я́же еди́на во Све́те Его́,/ упова́ние христиа́ном,/ Помо́щница су́щим в ну́ждах и ско́рбех/ и приста́нище в пучи́не тружда́ющимся,/ моли́ изба́витися от напа́стей/ любо́вию пою́щим и́мя Твое́, Держа́вная Влады́чице.

Стих: Слы́ши, Дщи, и ви́ждь,/ и приклони́ у́хо Твое́.

Всечестно́е Твое́ и держа́вное и́мя,/ Пресвята́я Де́во Чи́стая,/ А́нгел мно́жество на Небесе́х/ и челове́ческий род на земли́ блажи́т,/ я́ко Ма́ти бы́сть Творца́ всех, Христа́ Бо́га./ Того́ моля́щи за ны не преста́й, мо́лим Тя,/ и́же на Тя с Бо́гом упова́ние возложи́хом,/ Богоро́дице Препе́тая и Неискусобра́чная.

Сла́ва, и ны́не, глас то́йже:

Прибе́жище и си́ла на́ша, Богоро́дице,/ держа́вная по́мощь ми́ра,/ моли́твами Твои́ми покры́й рабы́ Твоя́/ от вся́кия ну́жды,/ еди́на Благослове́нная.

Тропа́рь, глас 4:

А́нгелов ли́цы благогове́йно Тебе́ слу́жат,/ и вся Небе́сныя си́лы немо́лчными гла́сы Тя ублажа́ют,/ Богоро́дице Де́во,/ усе́рдно мо́лим Тя, Влады́чице:/ да пребу́дет Боже́ственная благода́ть/ на честне́й ико́не Твое́й Держа́вней,/ и светоза́рный луч сла́вы чуде́с Твои́х да нисхо́дит от нея́/ на всех, с ве́рою Тебе́ моля́щихся/ и вопию́щих Бо́гу: аллилу́ия.

НА У́ТРЕНИ

На Бог Госпо́дь: тропа́рь, три́жды.

По 1-м стихосло́вии седа́лен, глас 6:

Свята́я Влады́чице Богоро́дице,/ Христа́ Бо́га на́шего Ма́ти,/ я́ко всех Творца́ неизрече́нно ро́ждшая,/ моли́ся всегда́ бла́гости Его́, страсте́й нас изба́вити/ и оставле́ние нам да́ти грехо́в.

Сла́ва:

Прегреше́ний пу́чиною обурева́емь,/ к ти́хому приста́нищу пречи́стыя Твоея́ моли́твы прибе́г, Богороди́тельнице, взыва́ю Ти:/ спаси́ мя, держа́вную Твою́ просте́рши десни́цу рабу́ Твоему́, Всенепоро́чная.

И ны́не:

Наде́ждо ми́ра, Блага́я Богоро́дице Де́во,/ Твое́ и еди́но стра́шное предста́тельство дви́жем,/ умилосе́рдися на безпо́мощныя лю́ди,/ умоли́ ми́лостиваго Бо́га изба́витися душа́м на́шим от вся́каго преще́ния,/ еди́на Благослове́нная.

По 2-м стихосло́вии седа́лен, глас 4:

Ты еси́ похвала́ и вене́ц святы́м всем, о Цари́це!/ Ты упова́ние на́ше и Помо́щница по Бо́зе,/ и на Тя наде́жду спасе́ния на́шего возложи́хом вси./ Тебе́ мо́лимся, я́ко Бо́жии Ма́тери:/ одожди́ гре́шным рабо́м Твои́м бога́тыя Твоя́ душеспаси́тельныя ми́лости.

Сла́ва:

Недви́жимое утвержде́ние ве́ры и честны́й дар душ на́ших,/ Богоро́дицу пе́сньми велича́ем, ве́рнии:/ ра́дуйся, Ка́мень жи́зни во чре́ве Твое́м вмести́вшая;/ ра́дуйся, конце́в на́деждо, скорбя́щих заступле́ние./ Ра́дуйся, Неве́сто Неневе́стная.

И ны́не:

Всех Царя́ и Творца́ заче́нши, Де́во, родила́ еси́/ и се ны́не, я́коже Цари́ца, одесну́ю Сего́, Чи́стая, предстои́ши./ Те́мже молю́ Тя:/ шу́ия ча́сти изба́ви мя в час Суда́ и десны́м овца́м сопричти́.

Велича́ние:

Досто́йно е́сть/ велича́ти Тя: (о́бщее Богоро́дице), или́ сие́:

Досто́йно е́сть/ велича́ти Тя,/ Богоро́дице,/ земли́ Ру́сския Цари́цу Небе́сную/ и люде́й правосла́вных/ Влады́чицу Держа́вную.

По полиеле́и седа́лен, глас 4:

Госпо́дьственно и и́стинно, Богоро́дице, моля́щися, я́ко Ма́ти, со дерзнове́нием Сы́ну Твоему́ и Бо́гу на́шему,/ сохрани́ лю́ди, изря́дно к покро́ву Твоему́ притека́ющия,/ в Тебе́ Держа́ву иму́щия, к Тебе́ прибега́ющия –/ Приста́нищу, Стене́, еди́ному Предста́тельству ро́да челове́ческаго.

Сла́ва, и ны́не, то́йже.

Та́же степе́нна, 1-й антифо́н 4-го гла́са. Проки́мен, глас 4: Помяну́ и́мя Твое́/ во вся́ком ро́де и ро́де. Стих: Слы́ши, Дщи, и ви́ждь, и приклони́ у́хо Твое́. Вся́кое дыха́ние: Ева́нгелие от Луки́, зача́ло 4.

По 50-м псалме́ стихи́ра, глас 6:

При́зри на ны, Всепе́тая Богоро́дице,/ возсия́й просвеще́ние сердца́м омраче́нным,/ и озари́ ста́до Твое́, Пречи́стая,/ ели́ко бо хо́щеши и мо́жеши,/ я́ко Ма́ти су́щи Зижди́теля Твоего́,/ и возопи́й моля́щим Тя:/ Аз е́смь с ва́ми, и никто́же на вы.

Кано́н, глас 8.

Песнь 1

Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.

От земноро́дных возра́стши и Зижди́теля ро́ждши,/ ра́дуйся, на́ша похвало́, Богоро́дице Чи́стая,/ Тя, я́ко облада́ющую тва́рьми, велича́ем.

Своего́ прие́мши Соде́теля, я́ко Сам восхоте́,/ от безсе́меннаго Твоего́ чре́ва па́че ума́ воплоща́ема, Чи́стая,/ тва́рей вои́стинну яви́лася еси́ Влады́чица.

Пречи́стая Богоро́дице,/ Тобо́ю спасе́ние нетле́нно дарова́ся/ и неразруши́мо весе́лие и наде́жда, покро́в и Держа́ва/ и душа́м на́шим прибе́жище.

Цари́ца еси́ всех еди́на,/ Бо́гу, Богороди́тельнице Чи́стая, святы́й престо́л и пала́та Христа́ Бо́га,/ Его́же моли́ о чту́щих ико́ну Твою́ честну́ю,/ пода́ти грехо́в оставле́ние.

Бу́ди нам по́мощь, Твои́м рабо́м, Влады́чице Чи́стая,/ ве́рно моля́щим Тя, я́ко ми́лостива,/ и держа́вны нас воздви́гни, во е́же пе́ти Тя.

Спаса́еши, я́ко мо́жеши, при́сно всех,/ я́ко ро́ждши Влады́ку,/ влады́чествия мя сла́стнаго и страсте́й свободи́, да пою́, ра́дуяся:/ ра́дуйся, Престо́ле Вы́шняго, Благослове́нная.

Катава́сия: Отве́рзу уста́ моя́:

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Наде́ждо ми́ру держа́вная, покро́ве и предста́тельство, Всесвята́я Де́во,/ не пре́зри, Блага́я, моле́ния рабо́в,/ от любве́ Тя при́сно ублажа́ющих.

Вопло́щся от утро́бы Твоея́ Госпо́дь, госпо́дствуя тва́рию,/ и Тебе́, Де́во, Госпожу́ показа́в ви́димым же всем и неви́димым,/ я́ко Ма́терь прославля́я Непоро́чную.

Мари́е, честно́е Влады́ки прия́телище,/ возста́ви ны, па́дшия в про́пасть лю́таго отча́яния, и прегреше́ний, и скорбе́й,/ Ты бо еси́ гре́шных спасе́ние, и по́мощь, и держа́вное предста́тельство/ и спаса́еши рабы́ Твоя́.

Су́щая Влады́чица на́ша, Всесвята́я Де́во,/ моля́щи не преста́й, Его́же родила́ еси́, Бо́га,/ Ца́рствия Своего́ нас сподо́бити.

Кня́зь ми́рный прии́де на престо́л Дави́дов,/ ца́рствуя из Тебе́, Богоро́дице, Бог воплоща́емь./ О, чу́до!/ и, бра́нь разре́шь, почте́ кня́зи моави́тския/ и Тебе́, Ро́ждшую, Цари́цу показа́.

Цари́це Де́во,/ ро́ждшая Царя́ Христа́,/ уще́дри и спаси́ мя, страстьми́ преклоне́ннаго,/ ве́рою утверди́ и наста́ви мя ко спасе́ния стези́, ве́рных спасе́ние.

Седа́лен, глас 4:

Да откры́еши нам всем мно́жество Твоея́ ми́лости/ и бла́гости безпреде́льную пучи́ну,/ грехи́ рабо́в Твои́х вся изгла́ди./ И́маши бо, Всенепоро́чная, я́ко Ма́ти Бо́жия, вла́сть над созда́нием/ и си́лою Твое́ю изво́диши вся, я́ко хо́щеши,/ и́бо благода́ть Ду́ха Свята́го, я́ве все́льшаяся в Тя,/ соде́йствует Ти во всем, при́сно Всеблаже́ннейшая.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Тя, Богоневе́сто, похвалу́ всем Христо́с яви́/ и Держа́ву, пою́щим ве́рно Твое́ та́инство.

Ста́нем благогове́йно в дому́ Бо́га на́шего и возопии́м:/ ра́дуйся, ми́ру Влады́чице,/ ра́дуйся, Мари́е, Госпоже́ всех нас;/ ра́дуйся, еди́на непоро́чная в жена́х и до́брая;/ ра́дуйся, сто́лпе о́гненный, вводя́щий в Вы́шнюю жизнь челове́чество.

Прибе́жище, Засту́пницу и си́льный покро́в Тя иму́ще,/ Благослове́нная Пречи́стая Ма́ти Бо́жия./ Твое́ю по́мощию и покро́вом Боже́ственным сохрани́ нас.

Де́во господоимени́тая и Цари́ца всея́ тва́ри,/ мно́гими проро́ки пронарече́нная и ро́ждшая Царя́ Небе́сных сил,/ Ца́рствия Небе́снаго, Госпоже́, всех нас сподо́би моли́твами Твои́ми.

Чи́ны а́нгельския удивля́ет, Богоро́дице, та́йны Твоея́ глубина́,/ бе́сы же смуща́ет Твоя́ ико́на,/ е́йже мы кла́няемся, чту́ще Тя, Бо́жию Ма́терь.

Вы́сшую Херуви́м и всея́ тва́ри восхва́лим,/ Еди́ну, ро́ждшую Зижди́теля и Го́спода/ и отве́рзшую две́ри ра́йския нам.

К Тебе́ прибега́ю, Еди́ней Держа́вней, ве́рных покро́ву,/ на Тя наде́жду возлага́ю спасе́ния моего́,/ Пресвята́я Влады́чице Богоро́дице, не пре́зри мене́.

Песнь 5

Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.

Богоро́дице, всех Цари́це, правосла́вных похвало́,/ ерети́чествующих шата́ния разори́,/ мир же пода́ждь чту́щим, Пречи́стая, честны́й Твой о́браз.

Держа́вным Твои́м кро́вом от враг наве́та/ нас, Чи́стая, Твоя́ рабы́, сохрани́ вся невре́дны,/ Тя бо стяжа́хом еди́ну прибе́жище в ско́рбех.

Скоре́йшею моли́твою, бо́дрым Твои́м покро́вом,/ держа́вною Твое́ю, Влады́чице Чи́стая, по́мощию,/ ны́не соблюди́ ве́рныя Твоя́ рабы́ от вся́каго сопроти́внаго прило́га/ и страсте́й, и прегреше́ний, и напа́стей спаси́.

Цари́ца еси́ Царя́ Христа́ и Го́спода,/ па́че сло́ва ро́ждши Разо́ршаго а́дова ца́рствия,/ Его́же приле́жно моли́, Отрокови́це,/ Вы́шняго Ца́рствия сподо́бити вся, чту́щия Тя.

Избавля́ющи яви́ся, Пречи́стая, от страсте́й наведе́ния 12 и бесо́в лука́вых Твоего́ раба́,/ стяжа́вшаго Тя держа́вное заступле́ние и Предста́тельницу Непосты́дную.

Песнь 6

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Преукраше́на сла́вою Боже́ственною,/ Честна́я Цари́ца Сы́ну Своему́ и Бо́гу предстои́т,/ спасе́ние душе́вное нам прося́щи.

Благоде́теля ро́ждши, до́брых Вино́внаго,/ благодея́ния бога́тство всем источи́:/ вся бо мо́жеши,/ я́ко си́льнаго в кре́пости Христа́ ро́ждши, Богоблаже́нная.

Да прии́дет ны́не на ны держа́вная Твоя́ дла́нь, Влады́чице,/ и ча́емыя челове́ческия ско́рби да изба́вит нас.

Влады́чице, Ма́ти Изба́вителя,/ приими́ моли́твы Твои́х непотре́бных раб,/ и́мже возда́ждь избавле́ние грехо́в/ и богоуго́дныя жи́зни прия́тное исправле́ние.

Цари́ца еси́ всех еди́на, Бо́гу, Богороди́тельнице Чи́стая,/ святы́й престо́л и пала́та Христа́ Бо́га,/ Его́же моли́ о чту́щих честну́ю ико́ну Твою́,/ пода́ти грехо́в оставле́ние.

Раб, ны́не прихожду́ к Тебе́, Ма́тери всех Бо́га,/ от всех изба́витися напа́стей моля́ся./ Но, о Богороди́тельнице,/ ца́рствующи с Сыно́м Твои́м, христиа́нский род сохраня́й.

Держа́вный Твой покро́в, Богороди́тельнице,/ я́ко Засту́пница су́щи,/ да́ждь ми вско́ре, напа́стьми одержи́му,/ и невре́дна от сих сохрани́ мя.

Конда́к, глас 8:

Взбра́нней Воево́де, Засту́пнице на́шей Держа́вней,/ пе́сни благода́рственныя прино́сим о дарова́нии нам ико́ны Ея́ святы́я,/ е́юже огражда́еми, ничесо́же устраши́мся,/ не от челове́к бо спасе́ние на́ше,/ но Преблагослове́нныя Влады́чицы милосе́рдием./ Те́мже дне́сь ра́дуемся и пра́зднуем све́тло,/ я́ко прии́де Держа́вная на стра́жу земли́ Своея́.

Ин конда́к, глас то́йже:

Избра́нней от всех родо́в Засту́пнице ро́да христиа́нскаго,/ покро́вом Своея́ бла́гости покрыва́ющей страну́ на́шу правосла́вную,/ благода́рственныя пе́ния прино́сим Ти, Влады́чице,/ о явле́нии нам чу́дныя ико́ны Твоея́ Держа́вныя./ Ты же, я́ко Всеми́лостивая Засту́пница всех, с ве́рою к Тебе́ притека́ющих,/ от вся́ких нас бед свободи́, да зове́м Ти:/ ра́дуйся, Ма́терь Бо́жия Держа́вная,/ Засту́пнице Усе́рдная ро́да христиа́нскаго.

Песнь 7

Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́йческою пла́мень пе́щный попра́ша, пою́ще:/ отце́в Бо́же, благослове́н еси́.

Богооте́ц у́бо Дави́д Твою́ сла́ву напису́ет, Де́во,/ и Тебе́ тва́рей Цари́цу я́вленно проро́чествует,/ предстоя́щую одесну́ю, Всенепоро́чная, Бо́га оте́ц на́ших.

Цари́ца Де́ва, злато́ю оде́ждою украше́на,/ Сы́ну Царю́ ны́не предстои́т,/ Я́же без сравне́ния А́нгел превы́шши.

Ро́дове Тя вси блажа́т, Чи́стая,/ Иису́с бо еди́н, рожде́йся от Твоея́ утро́бы,/ Той, я́ко ве́сть, сотвори́, Отрокови́це Де́во, с Тобо́ю вели́чия,/ Его́же моли́ спасти́ся ста́ду и лю́дем Твои́м.

Цари́ца всех, прише́дши свято́ю ико́ною Свое́ю,/ Небе́сный кров на сла́ву нам уста́ви,/ и́мже спаса́емся от неви́димых враг нахожде́ния, к Сы́ну Ея́ вопию́ще:/ благослове́н Бог оте́ц на́ших.

Я́ко жениха́ Тя кра́сный черто́г,/ я́ко Влады́чню пала́ту одушевле́нну,/ я́ко порфи́ру всезлату́ю,/ я́ко красне́йшее оби́телище Христо́во,/ Влады́чице всех, умоля́ющаго Тя спаси́ мя.

Отча́явся по́мощи вся́кия,/ к Тебе́, Пренепоро́чная, Держа́вной Храни́тельнице и Покро́ву, притеко́х:/ не отри́ни у́бо мене́ от Боже́ственнаго покро́ва Твоего́.

Песнь 8

Ирмо́с: Царя́ Небе́снаго,/ Его́же пою́т во́и А́нгельстии,/ хвали́те и превозноси́те во вся ве́ки.

Кто не воспое́т Тя от земноро́дных, Нескве́рная, Чи́стая Голуби́це,/ Ты бо родила́ еси́ нам Свет вели́кий, жи́зни бога́тство, Иису́са Спа́са,/ Его́же пое́м, хва́ляще я́ко Го́спода, и превозно́сим во вся ве́ки.

Тебе́, све́тлому Изба́вителя све́щнику,/ прекра́сный спле́тше лик, пое́м:/ вся дела́ Госпо́дня, по́йте непреста́нно Де́ву Мари́ю/ и превозноси́те Ю во ве́ки.

Тро́ицы яви́лася еси́ честны́й храм,/ в Не́мже Оте́ц – любо́вию, Сын – пло́тию,/ Дух Святы́й наше́ствием оби́тель Себе́ сотвори́, Еди́н и́стинный Бог наш,/ Его́же умоли́ о нас, Предста́тельнице всемо́щная.

Позлаще́нною ри́зою, я́коже Цари́цу, Сын Твой просвети́в заре́ю Ду́ха,/ Тебе́ одесну́ю Себе́ поста́ви, Пречи́стая,/ Его́же превозно́сим во вся ве́ки.

Ты – две́рь Царя́ Небе́с и храм сла́вы Его́, Де́во Всепе́тая,/ отве́рзи нам две́ри милосе́рдия/ и введи́ ны моли́твами Твои́ми в жили́ще Небе́сныя сла́вы.

Ма́ти Пресвята́я,/ Ея́же моли́твами род челове́ческий при́сно соблюда́ется,/ поклони́ся Отцу́, умоли́ Сы́на, призови́ Свята́го Ду́ха/ и уми́лостиви Бо́га, в Тро́ице Еди́наго, о мно́жестве грехо́в на́ших,/ да, Тобо́ю поми́ловани бы́вше,/ Творца́ и Тебе́ благослови́м отны́не и до ве́ка.

Песнь 9

Ирмо́с: Вои́стинну Богоро́дицу,/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Рече́м Твои́х усте́н, Всечи́стая, после́дующе, Тя ублажа́ем,/ с Тобо́ю бо вои́стинну вели́чия сотвори́вый Госпо́дь возвели́чи Тя/ и и́стинную Бо́жию Ма́терь, рожде́йся из чре́ва Твоего́, показа́.

Приклони́вый Небеса́ в Тя, Де́во, всели́ся/ и ны́не на моли́тву Твою́ зрит, Богоро́дице Чи́стая,/ Твое́, Цари́це, исполня́я проше́ние,/ Ему́же за ны усе́рдно помоли́ся,/ на Тя бо наде́емся, Благослове́нная.

Святы́х Свята́я, Де́во Чи́стая,/ святы́х Свята́го родила́ еси́,/ всех освяща́ющаго, Христа́ Изба́вителя./ Те́мже Тя, Цари́цу и Влады́чицу всех, я́ко Ма́терь Зижди́теля тва́рей пропове́дуем.

Предъизбра́нная от всех родо́в, услы́ши глас наш/ и да́руй проще́ние душ на́ших, избавле́ние страсте́й и боле́зней,/ вся могу́щая, я́ко Ма́ти Бо́жия.

Цари́цу Де́ву Тя пропове́дует Дави́д, Пречи́стая, Чи́стую,/ те́мже мо́лим Тя:/ Небе́снаго ны Ца́рствия сотвори́ насле́дники, да ублажа́ем Тя.

Приими́ е́же от души́ моле́ние мое́, Пречи́стая Влады́чице,/ Я́же Бо́га ро́ждши пло́тию,/ к Тебе́ бо прибего́х, к держа́вней по́мощи,/ да не погрешу́ наде́жды моея́.

Свети́лен, глас 1:

Влады́чице, всех Влады́чица и всех вы́шшая,/ всех же превосходя́щая Го́рних во́инств,/ простри́ ру́ку держа́вну и сохрани́ мир,/ свяще́нники благослови́, Тебе́ священноде́йствующия,/ мона́хи же прости́, моля́щияся Тебе́,/ оте́чество на́ше соблюди́, Свята́я Богоро́дице./ И ны́не нас сподо́би ви́дети Небе́сное Ца́рство и ра́йскую две́рь,/ егда́ ся́дет Судия́ суди́ти вселе́нней/ во второ́м и Стра́шном Суди́лище, Влады́чице А́нгелов.

Сла́ва, и ны́не:

Да и́мя Твое́, Богоро́дице, на земли́ славосло́вится,/ И́же из Тебе́ просия́в гре́шником держа́вную наде́жду и сте́ну Тя дарова́,/ Тобо́ю бо вся́кое дыха́ние к Бо́гу притека́ет.

На хвали́тех стихи́ры, глас 5:

Блажи́м Тя, Богоро́дице Де́во,/ и сла́вим Тя, ве́рнии, по до́лгу:/ град непоколеби́мый,/ сте́ну необори́мую,/ тве́рдую Предста́тельницу/ и прибе́жище душ на́ших.

Святе́йшая Херуви́м,/ вы́шшая Небе́с, Всепе́тая Богоро́дице,/ Тя вои́стинну испове́дующе,/ и́мамы, гре́шнии, спасе́ние/ и обрета́ем во искуше́ниих предста́тельство./ Те́мже не преста́й о нас моля́щи,/ Держа́во и прибе́жище душ на́ших.

Востру́бим трубо́ю пе́сней,/ прекло́нишися бо свы́ше, Всецари́ца Ма́ти и Де́ва/ благослове́ньми венчава́ет воспева́ющия Ю,/ христоимени́тии лю́дие да стеку́тся/ и Цари́це да воспле́щут в пе́снех,/ Царя́ ро́ждшей,/ сме́ртию одержи́мыя пе́рвее/ разреши́ти человеколю́бно благоволи́вшаго./ Па́стырие и учи́телие,/ до́браго Па́стыря Пречи́стую Ма́терь, соше́дшеся, восхва́лим,/ све́щник златоза́рный, светоно́сный о́блак,/ Небе́с простра́ннейшую, одушевле́нный киво́т,/ огнезра́чный Влады́чень престо́л,/ манноприе́мную злату́ю ста́мну,/ заключе́нную Сло́ва две́рь,/ всех христиа́н прибе́жище,/ пе́сньми Богоглаго́ливыми похваля́юще, си́це рцем:/ пала́то Сло́ва,/ сподо́би смире́нныя ны Небе́снаго Ца́рствия,/ ничто́же бо невозмо́жно хода́тайству Твоему́.

Сла́ва, и ны́не, глас 8:

Подо́бен: О, пресла́внаго чудесе́:

О, пресла́внаго чудесе́:/ Небесе́ и земли́ Цари́ца,/ от святы́х сро́дников на́ших умоля́емая,/ до ны́не зе́млю Ру́сскую покрыва́ет/ и ли́ка Своего́ изображе́ниями ми́лостивно обогаща́ет./ О Влады́чице Держа́вная,/ не преста́ни и на бу́дущее вре́мя/ во утвержде́ние на Руси́ Правосла́вия/ ми́лости и чудеса́ излива́ти до ве́ка. Ами́нь.

Славословие вели́кое и отпу́ст.

На Литурги́и слу́жба вся Богоро́дицы

Моли́тва

О Держа́вная Влады́чице, Пресвята́я Богоро́дице, на объя́тиих Свои́х держа́щая Содержа́щаго дла́нию всю вселе́нную, Царя́ Небе́снаго! Благодари́м Тя за неизрече́нное милосе́рдие Твое́, я́ко благоволи́ла еси́ яви́ти нам, гре́шным, сию́ святу́ю чудотво́рную ико́ну Твою́ во дни сии́. Благодари́м Тя, я́ко призре́ла еси́ с высоты́ святы́я Своея́ на чад правосла́вных, и, я́ко со́лнце све́тлое, увеселя́еши ны́не изнемо́гшия от печа́ли очеса́ на́ша пресла́достным зре́нием держа́внаго о́браза Твоего́! О Преблагослове́нная Ма́терь Бо́жия, Держа́вная Помо́щнице, Кре́пкая Засту́пнице, благодаря́ще Тя, со стра́хом и тре́петом, я́ко раби́ непотре́бнии, мы припа́даем, со умиле́нием, с сокруше́нием серде́чным, со слеза́ми мо́лим Тя: вкорени́ в сердца́х всех нас пра́вду, мир и ра́дость о Ду́се Свя́те, водвори́ в стране́ на́шей тишину́, благоде́нствие, безмяте́жие, любо́вь друг ко дру́гу нелицеме́рную! Держа́вою Твое́ю всеси́льною поддержи́ нас, сла́бых, малоду́шных, немощны́х, уны́лых, подкрепи́, возста́ви! Я́ко да под держа́вою Твое́ю всегда́ храни́ми, пое́м, велича́ем и сла́вим Тя, Держа́вную Засту́пницу ро́да христиа́нскаго во ве́ки веко́в. Ами́нь.

И́на моли́тва

О ми́ра Засту́пнице, Ма́терь Всепе́тая, со стра́хом, ве́рою и любо́вию припа́дающе пе́ред честно́ю ико́ною Твое́ю Держа́вною, усе́рдно мо́лим Тя: не отврати́ лица́ Твоего́ от прибега́ющих к Тебе́, умоли́, Милосе́рдная Ма́терь Све́та, Сы́на Твоего́ и Бо́га на́шего, Сладча́йшаго Го́спода Иису́са Христа́, да сохрани́т в ми́ре страну́ на́шу, да утверди́т держа́ву на́шу в благоде́нствии, да изба́вит нас от междоусо́бныя бра́ни и укрепи́т Святу́ю Це́рковь на́шу Правосла́вную, да непозы́блему соблюде́т ю от неве́рия, раско́ла и ересе́й. Не и́мамы бо ины́я по́мощи, не и́мамы ины́я наде́жды, ра́зве Тебе́, Пречи́стая Де́во: Ты еси́ Всеси́льная христиа́н Засту́пница пред Бо́гом, пра́ведный гнев Его́ умягча́ющая. Изба́ви всех, с ве́рою Тебе́ моля́щихся, от паде́ний грехо́вных, от наве́та злых челове́к, от гла́да, скорбе́й и боле́зней. Да́руй нам дух сокруше́ния, смире́ние се́рдца, чистоту́ помышле́ний, исправле́ние грехо́вныя жи́зни и оставле́ние согреше́ний на́ших, да вси, благода́рне воспева́юще вели́чия Твоя́, сподо́бимся Небе́снаго Ца́рствия и та́мо со все́ми святы́ми просла́вим Пречестно́е и великоле́пое И́мя в Тро́ице сла́вимаго Бо́га: Отца́, Сы́на и Свята́го Ду́ха. Ами́нь.