Ина служба святому праведному Иоанну Русскому, исповеднику

ея́же краегране́сие: Блаже́нне Иоа́нне испове́дниче, приими́ сооте́чественника дар и похвалу́ сию́.

Творе́ние митрополи́та Никоди́ма

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 6, глас 4:

Благода́ти нарече́нный соиме́нником,/ Боже́ственныя то́ки спаси́тельныя,/ Святы́м Ду́хом подава́емыя ве́рным,/ приусво́ил еси́, блаже́нне,/ и́миже обогаща́яся,/ житие́ на земли́ соверши́л еси́ благоче́стно,/ предстои́ши ны́не в ра́дости всех Спа́су на Небеси́ с ли́ки Безпло́тных,/ прославля́я вели́чия Бо́жия,/ Его́же моли́, Иоа́нне,/ спасе́ние дарова́ти воспева́ющим тя.

Ли́ку избра́нных сочета́лся еси́ от купе́ли возрожде́ния,/ и, Це́ркве Христо́вы прича́стник быв,/ возраста́л еси́ во стра́се Бо́жии,/ и навы́кл еси́ благода́тию в доброде́тели,/ и дости́гл еси́ Небе́снаго Ца́рствия./ Сего́ ра́ди твое́ Росси́йское оте́чество ра́дуется,/ я́ко име́ет тя засту́пника, предстоя́щаго Святе́й Тро́ице./ И мы вси, лю́дие твои́,/ единоро́дный ти язы́к, весе́лия исполня́ющеся, вопие́м:/ моли́твами твои́ми от вся́каго обстоя́ния спаси́ нас,/ Иоа́нне уго́дниче Христо́в.

А́ще ка́я похвала́ подоба́ет святы́м,/ в телеси́ на земли́ пожи́вшим/ и пред Го́сподем всегда́ ходи́вшим де́лы благи́ми,/ па́че ублажи́ти тя подоба́ет, Иоа́нне:/ в Каппадоки́и бо житие́ нескве́рное соверши́в,/ Боже́ственная повеле́ния испо́лнил еси́/ и душе́ю в Небе́сных селе́ниих Безпло́тным причте́н еси́ си́лам,/ мир ми́рови дарова́ти моли́ся/ и спасе́ния душа́м на́шим.

Житие́, о Иоа́нне, равноа́нгельное соверши́л еси́,/ сохрани́в се́рдце твое́ в чистоте́ от вся́кия скве́рны пло́ти и ду́ха,/ те́мже Вседержи́теля Вы́шних сподо́бился еси́ ви́дети/ и, све́том Того́ сия́я пред челове́ки,/ науча́еши лю́ди ве́ре Правосла́вней,/ указу́еши путь житие́м твои́м к Небе́сному Ца́рствию,/ всем, ко святы́м твои́м моще́м приходя́щим,/ моли́твою твое́ю подае́ши исцеле́ния/ и вся потре́бная к житию́ и благоче́стию,/ в не́мже утверди́ всех, воспева́ющих па́мять твою́.

Сла́ва, глас 2:

Еде́мскаго дре́ва жи́зни/ преслуша́ния ра́ди пра́отец отве́ржен бысть,/ безсме́ртия пи́щи преступле́нием за́поведи лиши́ся,/ предаде́ся сме́рти, я́ко тле́нный./ Нетле́ния вене́ц прия́л еси́, Иоа́нне,/ зако́ну бо ева́нгельскому повину́лся еси́ существо́м твои́м,/ и, Боже́ственныя Евхари́стии вкуше́нием укрепля́яся,/ весь Бо́гу твоему́ сочета́лся еси́,/ Его́же моли́ о всех, чту́щих тя.

И ны́не, Богоро́дичен: Пре́йде сень зако́нная:

Вход. Проки́мен дне. И чте́ния преподо́бническая.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ради прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоугоде́н Бо́гови быв, возлю́блен бысть/ и живы́й посреде́ гре́шных преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 6:

Немощна́я избра́ Бог от ми́ра,/ да прему́дрыя посрами́т бу́йством сло́ва Христо́ва:/ вся, Иоа́нне, претерпе́л еси́/ и сотвори́л еси́, я́же Христо́с повеле́ ученико́м,/ и обле́клся еси́ Того́ ве́чною сла́вою,/ и, Престо́лу Боже́ственнаго А́гнца предстоя́ днесь,/ моли́ся, блаже́нне, дарова́ти мир ми́ру/ и спасти́ся душа́м на́шим.

Ны́не мучениколю́бцы составля́ют собо́ры,/ Иоа́нне испове́дниче и ра́бе Христо́в,/ прославля́юще твоя́ страда́ния и дея́ния,/ почита́юще твою́ ве́ру адама́нтову/ и любве́ пла́мень горя́щий,/ и́мже испо́лнися се́рдце твое́ от купе́ли Креще́ния/ и па́че умно́жися в терпе́нии./ Моли́, страда́льче блаже́нне,/ взе́мшаго грехи́ всех А́гнца Бо́жия/ мир ми́рови дарова́ти/ и Боже́ственную ми́лость.

Сла́ва, и ны́не, глас 2:

Еди́ная а́нгельскаго естества́ в челове́цех Превы́шшая,/ Херуви́мы и Серафи́мы, превозше́дшая,/ Пречи́стая и Благослове́нная,/ утверди́ нра́вы благи́я и целому́дрие/ Твои́ми моли́твами и предста́тельством/ ко Спа́су на́шему, Сы́ну Твоему́.

На стихо́вне стихи́ры, глас 1:

Иоа́нне любому́дре,/ претерпе́л еси́ во И́мя Христо́во зной, и хлад,/ и трудо́в изнуре́ние,/ и алка́л еси́, и, от жа́жды истоща́емь,/ ра́дости же Небе́сныя испо́лнился еси́,/ нощми́ победоно́сцу усе́рдно моля́ся,/ того́ страда́нием сподо́бился еси́ соприча́стия,/ оба́че не устраши́лся еси́ мучи́телей де́рзости,/ яви́лся еси́ сла́ва и похвала́ испове́дников./ Проси́ закла́вшагося за спасе́ние всех А́гнца Бо́жия/ дарова́ти Боже́ственную ми́лость и умире́ние ми́ру.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Овча́, е́же на закла́ние ведо́мое,/ был еси́, блаже́нне Иоа́нне,/ егда́ претерпе́л еси́ зауше́ния и страда́ния,/ оба́че ве́ру соблю́л еси́ непреобори́му/ и оте́чества твоего́ не отпа́л еси́,/ ру́сский те́лом и Христо́в душе́ю пребыва́я./ Моли́ дарова́ти Росси́йстей стране́ благослове́ние Бо́жие,/ спасе́ние чту́щим тя,/ ми́ру же всему́ умире́ние.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

Овча́, е́же на закла́ние: (зри выше).

Сла́ва, глас то́йже:

А́гнец непоро́чен и благоприя́тен яви́лся еси́,/ ева́нгельскую ве́ру внутрь прие́мь,/ пожи́л еси́ на земли́, я́ко безпло́тен,/ и, плене́нный суть, свобо́ду е́же во Христе́ яви́л еси́./ Росси́йския земли́ порожде́ние,/ Элла́де источа́еши чуде́с вели́чество,/ Иоа́нне сла́вне, чудоде́телю,/ моли́ся о всех, чту́щих тя.

И ны́не, Богоро́дичен:

Неве́сто Избра́нная, Богоотрокови́це,/ зачала́ еси́ пло́тию Сы́на Бо́жия/ и Бо́га Сло́ва с земноро́дными сочета́ла еси́,/ Неразде́льнаго и Неразлу́чнаго Отцу́ и Ду́ху Свято́му,/ челове́чеством восприя́вшаго во́лею страсть сме́ртную,/ да свободи́т созда́ние Свое́ от ра́бства тле́нию,/ да пода́ст мир и спасе́ние всем Кресто́м и Воскресе́нием.

Тропа́рь, глас 4:

На Небеси́ предстоя́ Святе́й Тро́ице,/ пра́ведне блаже́нне Иоа́нне,/ земны́й а́нгеле, Бо́жий челове́че,/ с Безпло́тными ли́ки славосло́виши любо́вь неизрече́нную,/ в Це́ркви перворо́дных со святы́ми водворя́яся,/ о нас, су́щих на земли́, возно́сиши моли́твы/ к Соде́телю всех и Спа́су,/ да пода́ст мир всему́ ми́ру,/ Це́рквам на земли́ благостоя́ние и соедине́ние всех,/ чту́щих Сы́на Бо́жия, во пло́ти прише́дша,/ во святе́м Те́ле Христа́ Иису́са,/ е́же есть Це́рковь Бо́га Жива́го,/ во спасе́ние ро́да челове́ческаго.

НА У́ТРЕНИ

По 1-м стихосло́вии седа́лен, глас 2:

Егда́ гони́тели твои́ доса́ду тебе́ сотвори́ша и бие́ния и муче́ния Христа́ ра́ди,/ ра́довался еси́, Иоа́нне,/ и, моля́ся о творя́щих тебе́ напа́сть, востека́л еси́ ду́хом ко Спа́су,/ я́ко безпло́тен во пло́ти явля́яся.

Сла́ва, и ны́не, Богоро́дичен:

И ражда́еши, и млеко́м пита́еши Младе́нца,/ оба́че Присноде́ва пребыва́еши, Пречи́стая Богома́ти./ Бог бо и́стинен есть рожде́йся из Тебе́ и Челове́к соверше́н./ И́же уста́вы естества́ побежда́ет и обновля́ет,/ да́рует нетле́ние и жизнь ве́чную.

По 2-м стихосло́вии седа́лен, глас 3:

Све́тлый А́нгел земны́й был еси́ ли́ком и чист се́рдцем, блаже́нне Иоа́нне,/ благода́ть бо Боже́ственная исполня́ше се́рдце твое́ любве́ неземны́я ко всем лю́дем,/ и́мже твори́л еси́ и твори́ши блага́я,/ и возсия́л еси́ я́ко со́лнце, во Ца́рствии Отца́ Небе́снаго.

Сла́ва, и ны́не, Богоро́дичен:

Пресвята́я Де́во, Богоизбра́нная и Благослове́нная в жена́х,/ обре́тшая благода́ть у Бо́га,/ моли́ся Сы́ну Твоему́ со Иоа́нном блаже́нным/ изба́вится рабо́м Твои́м от собла́знов, скорбе́й и обстоя́ний./ Ты бо еси́ покро́в и заступле́ние прибега́ющим к Тебе́.

По полиеле́и седа́лен, глас 5:

Ору́жия си́льнаго и непобеди́маго, Креста́ Христо́ва си́лою обле́клся еси́, пра́ведне Иоа́нне,/ творя́й святы́ню жития́ твоего во стра́се Бо́жии,/ добр бо во́ин оте́чества твоего́ был еси́ и досто́йный учени́к Христо́в,/ и от земна́го во́инства преше́л еси́ к Небе́сным си́лам./ О нас непреста́нно моли́ся.

Сла́ва, и ны́не, Богоро́дичен:

Всем конце́м земли́ упова́ние непосты́дное, Пречи́стая,/ простира́еши тре́бующим ру́ку по́мощи, Влады́чице,/ вся неду́жныя и скорбя́щия утеша́еши,/ подвиза́ющихся во спасе́ние укрепля́еши Твое́ю моли́твою,/ ро́да бо христиа́нскаго и Це́ркве Святы́я Ты прибе́жище и заступле́ние.

По 50-м псалме́ стихи́ра, глас 8:

Естеству́ а́нгельскому приобщи́лся еси́,/ Иоа́нне преподо́бне и пра́ведне,/ на земли́ бо пожи́л еси́, я́ко безпло́тен,/ на Небеси́ трисвяту́ю песнь воспева́еши с Херуви́мы,/ оте́чества твоего́ до́брый во́ин пребы́л еси́/ и Бо́га Вы́шняго и́стинен служи́тель,/ повину́яся Ему́ па́че, не́же челове́ком./ Моли́ся Святе́й Тро́ице о всех лю́дех,/ и́хже в житии́ твое́м ева́нгельски люби́л еси́ по сло́ву Спа́сову.

Кано́н, глас 4.

Песнь 1

Ирмо́с: Пое́м песнь побе́дную Еди́ному Бо́гу,/ сотво́ршему пресла́вная:/ дре́вле бо фарао́на/ со всево́инством в мо́ри погрузи́.

Душе́ю Го́рнему Ца́рству прибли́зимся/ и, очи́стивше ум и о́чи серде́чныя,/ взы́дем, иде́же а́нгельская ликостоя́ния пою́т непреста́нно,/ и, на земли́ лик соста́вльше,/ просла́вим уго́дника Бо́жия Иоа́нна, пра́веднаго и блаже́ннаго,/ предстоя́щаго в моли́тве за нас Престо́лу Бо́жию.

Небе́сный Оте́ц благоизво́ли тя просла́вити в Ца́рстве сла́вы со А́нгелы и святы́ми Свои́ми,/ иде́же во Све́те невече́рнем и присносу́щнем предстои́ши Ему́,/ ты бо, пожи́в на земли́, подвиза́лся еси́, я́ко безпло́тен,/ и ны́не, Иоа́нне, моли́ся о всех, чту́щих па́мять твою́.

И про́сим тя и моли́твы тебе́, я́ко хода́таю на́шему, Иоа́нне, прино́сим,/ и сла́вим твоя́ по́двиги и страда́ния, я́же претерпе́л еси́ на земли́, да Христа́ приобря́щеши,/ Ему́же моли́ся о всех, чту́щих па́мять твою́.

Богоро́дичен: Чи́стая, ра́дуйся, Богоотрокови́це,/ Ты бо родила́ еси́ Спаси́теля ми́ру, дарова́вшаго жизнь и безсме́ртие нам, земноро́дным./ Те́мже сла́вим Тя, Всепе́тая Ма́ти.

Песнь 3

Ирмо́с: Утвержде́ние ве́рных, и похвало́,/ и нетле́ния Исто́чниче,/ и благи́х Прошениода́вче, Христе́,/ в любви́ Твое́й утверди́ мя.

Еще́ измла́да Це́ркве Христо́вы ча́до честно́е был еси́, Иоа́нне,/ и навы́кл еси́ в доброде́тели провожда́ти житие́ твое́,/ укрепи́ и нас твое́ю моли́твою твори́ти досто́йная,/ да прии́мем от Бо́га нетле́нный вене́ц.

Пресла́вное и ди́вное яви́ся на тебе́, Иоа́нне, чу́до:/ я́ко а́нгел во пло́ти пожи́л еси́ на зе́мли,/ и, ве́ру кре́пку адама́нтову име́я, победи́л еси́ не́мощь плотску́ю,/ и прия́л еси́ от Бо́га нетле́нный вене́ц.

Ра́зум му́дрый име́я, Подвигополо́жнику подража́л еси́, Иоа́нне,/ егда́ твори́л еси́ блага́я в житии́ твое́м и егда́ претерпе́л еси́ за Христа́ страда́ния,/ и ны́не душа́ твоя́ во благи́х водворя́ется,/ прия́л бо еси́ от Бо́га нетле́нный вене́ц.

Богоро́дичен: Испо́лнися изрече́нное дре́вле:/ Христо́с, Спас ми́ра, роди́ся от Тебе́, Пренепоро́чная Ма́ти./ Лику́ют в Небе́сней сла́ве, ви́дяще исполне́ние обетова́ний, Иа́ков и Дании́л,/ Иезекии́ль же и веща́вый рожде́ние Бо́га от Де́вы Иса́ия,/ с ни́ми ра́дуется и Иоа́нн пра́ведный, спасе́нный Кро́вию Сы́на Твоего́,/ Его́же проро́цы, предвозвести́ша.

Седа́лен, глас 7:

Изря́дная муче́ния претерпе́л еси́, испове́дниче,/ Христа́ Го́спода твоего́ ра́ди,/ Его́же люби́л еси́ и сла́вил еси́ Его́ душе́ю твое́ю и в телеси́,/ храм вои́стинну Ду́ха Свята́го быв, Иоа́нне./ Те́мже ны́не почита́ем честны́я мо́щи твоя́.

Сла́ва, и ны́не, Богоро́дичен:

Чи́стая, Всенепоро́чная и Неискусобра́чная,/ еди́на безле́тнаго Сы́на и Сло́ва Бо́жия в ле́те ро́ждшая,/ Того́ со святы́ми и честны́ми апо́столы, му́ченики, и проро́ки, и преподо́бными моли́/ дарова́ти нам очище́ние и ве́лию ми́лость.

Песнь 4

Ирмо́с: Любве́, ра́ди, Ще́дре, Твоего́ о́браза/ на Кресте́ Твое́м стал еси́,/ и раста́яшася язы́цы:/ Ты бо еси́, Человеколю́бче,/ кре́пость моя́ и хвале́ние.

Моли́тву – ору́жие, и щит – пречестны́й Крест, и веру прии́м, Иоа́нне,/ предста́л еси́ мучи́телем и Христа́ испове́дал еси́ небоя́зненно,/ сего́ ра́ди венча́лся еси́ от Бо́га.

И́стинныя Лозы́ – Христа́ Иису́са был еси́ розга́ многопло́дная,/ живото́чною благода́тию укрепля́емь, Еди́ному Спа́су служи́л еси́,/ и Его́ ра́ди страда́л еси́, ра́дуяся, и нетле́нием почте́н еси́,/ и венце́м сла́вы венча́лся еси́ от Бо́га.

Смире́нных и кро́тких сла́вная похвало́ ты еси́, Иоа́нне,/ зря́ще бо естества́ твоего́ не́мощь и ви́дяще,/ я́ко вся мо́жет несоверше́нный челове́к твори́ти о укрепля́ющем его́ Иису́се,/ и, се́рдцем просты́й, послужи́л еси́ лю́дем и венча́лся еси́ от Бо́га.

Богоро́дичен: О Тебе́, Благода́тная, ра́дуемся,/ Тобо́ю бо, Неискусобра́чная, спасе́ние прии́де ро́ду челове́ческому,/ Сы́на Бо́жия пло́тию родила́ еси́./ Те́мже Богоро́дицу Тя вои́стинну испове́дуем и пропове́дуем.

Песнь 5

Ирмо́с: Возсия́й ми, Го́споди, свет повеле́ний Твои́х,/ я́ко к Тебе́ дух мой у́тренюет и пое́т Тя:/ Ты бо еси́ Бог наш/ и к Тебе́ прибега́ю, Царю́ ми́ра.

О́браз вои́стинну Христо́в созида́я в души́ твое́й/ и ме́ртвость Го́спода Иису́са в те́ле нося́,/ был еси́ служи́тель Бо́жий, Иоа́нне, преподо́бный и пра́ведный,/ и сподо́бился еси́ Ца́рства Небе́снаго,/ иде́же, предстоя́ Святе́й Тро́ице, о нас непреста́нно моли́ся.

Ты удиви́л еси́, Иоа́нне, челове́ки и А́нгели житие́м твои́м,/ ве́ру бо тве́рду, я́ко адама́нт, и любо́вь, я́же николи́же отпа́дает,/ к Спа́су твоему́ и лю́дем име́я,/ чистоту́ стяжа́л еси́ и Бо́га зрел еси́ духо́вныма очи́ма,/ Ему́же предстоя́, о нас непреста́нно моли́ся.

Естество́ сме́ртное и пе́рстное в муче́нии победи́л еси́ си́лою Бо́жиею, Иоа́нне,/ и ве́тхаго челове́ка умертви́л еси́ в себе́ и послужи́л еси́ всем во и́мя Христо́во на земли́,/ и ны́не на Небесе́х о нас непреста́нно моли́ся.

Богоро́дичен: Челове́ки любо́вию спасти́ Хотя́щаго родила́ еси́, Пренепоро́чная Де́во Богома́ти,/ И́же лю́таго мироде́ржца, пра́отца Ада́ма ра́я лиши́вшаго и прама́тери Е́ве печа́ль сотвори́вшаго,/ сокруши́ Кресто́м и Воскресе́нием/ и разори́ а́довы основа́ния и держа́ву,/ сме́ртию Свое́ю попра́в смерть.

Песнь 6

Ирмо́с: Обурева́ему мне, Ще́дре,/ бу́рею волн мои́х,/ молю́ся: воззови́ мя и спаси́, Го́споди,/ я́ко Ио́ну от зве́ря у́мнаго.

Егда́ А́гнцу Бо́жию, взе́мшему грехи́ всех и пострада́вшему спасе́ния на́шего ра́ди,/ страда́нии твои́ми после́довал еси́, Иоа́нне,/ ра́довался еси́ душе́ю и пел еси́ Ему́:/ жи́зни ве́чныя и всех благи́х Пода́телю, Го́споди, сла́ва Тебе́.

Сла́вим вели́чия Бо́жия, на тебе́, Иоа́нне, бы́вшия,/ невреди́м бо сохрани́ся в муче́ниих/ и моли́твенник показа́ся лю́дем непосты́ден, Христу́ взыва́яй:/ жи́зни ве́чныя и всех благи́х Пода́телю, Го́споди, сла́ва Тебе́.

Ты Отца́ Небе́снаго ча́до досто́йное был еси́/ и све́том Христо́вым возсия́л еси́ пред челове́ки,/ я́же ви́деша дела́ твоя́ блага́я и пречу́дная и взыва́ша:/ жи́зни ве́чныя и всех благи́х Пода́телю, Го́споди, сла́ва Тебе́.

Богоро́дичен: Всех спасти́ Хотя́щаго и грехи́ ми́ра Взе́мшаго,/ Богоневе́стная Де́во, Ма́ти Христа́ Иису́са Го́спода, родила́ еси́ пло́тию,/ во обою́ естеству́ соверше́нна Бо́га и Челове́ка,/ Тя, Богоро́дице, сла́вим и упова́ем на моли́твы Твоя́,/ Твое бо предста́тельство стяжа́хом.

Конда́к, глас 4:

Ева́нгельския любве́ служи́теля,/ пра́вды Бо́жия ревни́теля,/ чистоты́ душе́вныя и теле́сныя храни́теля,/ ве́ру Христо́ву испове́давша в страда́ниих,/ пра́веднаго Иоа́нна ублажа́ем и почита́ем днесь/ и, житие́м его́ назида́ющеся, пое́м:/ ра́дуйся, моли́твенниче наш, от Бо́га просла́вленный.

И́кос, глас то́йже:

Нам о́браз Бо́жий, живы́й в тебе́, яви́л еси́, Иоа́нне,/ его́же напечатле́л еси́ в души́ твое́й/ и после́довал еси́ во всем Христу́ Спа́су,/ и, смире́нием возвыша́емь, был еси́ Бо́жий служи́тель,/ не поработи́вся страсте́м и челове́ком,/ ны́не же предстои́ши в ве́чней сла́ве, и мы тебе́ вопие́м:/ ра́дуйся, моли́твенниче, наш, от Бо́га просла́вленный.

Песнь 7

Ирмо́с: Заве́т Твой/ помяну́вый, Христе́ Бо́же,/ о́троки из пла́мене изба́вил еси́/ А́нгеловым снизхожде́нием,/ Еди́не и́стинно Препросла́вленный.

Низложи́в, во́ине Христо́в Иоа́нне, вся искуше́ния, от пло́ти, ми́ра и диа́вола находя́щия,/ вшел еси́ в ра́дость ве́чную,/ и предста́тельствуеши и мо́лишися о нас, твоего́ заступле́ния прося́щих,/ и сла́виши Спа́са всех, просла́вльшаго тя:/ благослове́н еси́, Го́споди Бо́же, во ве́ки.

Испове́дник и́стинен, му́чеником был еси́ соприча́стник,/ преподо́бным же и пра́ведным сочета́лся еси́,/ житие́м бо чист и свят Бо́гу был еси́, Иоа́нне,/ просла́вил еси́ Христа́ Иису́са и от Него́ просла́влен был еси́,/ ны́не пое́ши Ему́ с небожи́тели:/ благослове́н еси́, Го́споди Бо́же, во ве́ки.

Кади́лу, еле́ю и ми́ру благоуха́нному моли́твы твоя́ подо́бны, Иоа́нне,/ восхо́дят бо ко Престо́лу Вседержи́теля Бо́га и ми́лость Его́ преклоня́ют к нам,/ сердца́ же на́ша умягча́ют и врачу́ют и подвиза́ют взыва́ти:/ благослове́н еси́, Го́споди Бо́же, во ве́ки.

Богоро́дичен: Ада́мова Изба́вителя и всего́ челове́ча ро́да Спаси́теля,/ Ты, Пресвята́я Ма́ти Де́во, родила́ еси́ пло́тию,/ И́же пре́жде век Сый, Рожде́н от Отца́,/ Той да́рует ми́ру нетле́ние и смерть упраздни́,/ Ему́же вся тварь вопие́т:/ благослове́н еси́, Го́споди Бо́же, во ве́ки.

Песнь 8

Ирмо́с: Песнь но́вую пои́м, лю́дие,/ соше́дшему на зе́млю спасти́ ны,/ во́лею бо на Кресте́ пригвозди́ся Госпо́дь,/ показа́вый язы́ком,/ я́ко Ада́ма ра́ди/ в ра́бий о́браз облече́ся/ в Вы́шних Живы́й во ве́ки.

Доброде́телию преукра́шен и благода́тию Боже́ственною освяще́н, пра́ведне Иоа́нне,/ предстои́ши во сла́ве Небе́сней, и о нас моли́твы прино́сиши,/ и подае́ши нам разуме́ние Живонача́льныя Тро́ицы,/ и исцеля́еши неду́жныя си́лою Христо́вою,/ Его́же пое́м и превозно́сим во ве́ки.

Алка́л еси́ ева́нгельскую испо́лнити пра́вду, Иоа́нне,/ был еси́ пра́веден и благочести́в, чист се́рдцем и те́лом твои́м,/ и украси́лся еси́ страда́ньми, и венча́лся еси́ венце́м нетле́ния от Христа́ Го́спода,/ Его́же пое́м и превозно́сим во ве́ки.

Ребра́ Спа́сова осяза́нием уве́рися Фома́ иногда́,/ ты же блаже́н еси́, Иоа́нне, я́ко испове́дуеши Христа́, Жизнь ве́чную,/ и ве́руеши, не ви́дя Того́ очи́ма, но разуме́я се́рдцем,/ Его́же пое́м и превозно́сим во ве́ки.

Богоро́дичен: Изба́ви нас от вся́каго обстоя́ния, Влады́чице,/ от наве́тов и искуше́ний, находя́щих на ны,/ Це́рковь Христо́ву изба́ви от собла́знов и да́руй ей мир,/ Ты бо родила́ еси́ Сло́во Бо́жие, плоть восприе́мшее,/ обнови́вшее все созда́ние и сокруши́вшее главу́ злонача́льника.

Песнь 9

Ирмо́с: Сокрове́нное Бо́жие неизрече́нное/ в Тебе́ соверша́ется я́вственное та́инство,/ Де́во Пречи́стая,/ и́бо Бог из Тебе́ воплоти́ся за милосе́рдие,/ Те́мже Тя я́ко Богоро́дицу велича́ем.

Предста́теля изря́дна ко Пресвяте́й Тро́ице ве́мы тя, Иоа́нне,/ ты бо, еще́ сый на земли́ во пло́ти, дерзнове́нно моли́лся еси́ о лю́дех,/ ны́не же со святы́ми ликостоя́нии воспева́еши песнь трисвяту́ю, сугу́бую восприня́в благода́ть,/ и про́сиши всем нам блага́я и поле́зная./ Те́мже тя велича́ем и ублажа́ем.

О страстоте́рпче Иоа́нне,/ Небе́сную сла́ву восприи́м, земны́х нас не оставля́еши,/ про́сиши нам у Бо́га ми́лость и благода́ть,/ утвержда́еши нас в любви́ и ве́ре,/ науча́еши ходи́ти досто́йно христиа́нскаго зва́ния./ Мы же по до́лгу тя ны́не велича́ем и ублажа́ем.

Храм и оби́тель Ду́ха Свята́го был еси́, Иоа́нне,/ чистоту́ се́рдца и телесе́ соблю́л еси́ да́же до сме́рти,/ и в страда́ниих твои́х ве́ра твоя́ пребы́сть, я́ко зла́то в горни́ле,/ и любо́вь Боже́ственную яви́л еси́ и явля́еши ко всем лю́дем, я́коже Христо́с повеле́./ Те́мже тя ны́не велича́ем и ублажа́ем.

Богоро́дичен: Воспева́ют язы́цы спасе́ние и свет открове́ния Бо́жия,/ возсия́вый им рожде́нным Тобо́ю Сы́ном, Пренепоро́чная Ма́ти Де́во,/ Единоро́дный бо Сын Оте́ч Тобо́ю вочелове́чися/ и грех упраздни́ и смерть низложи́ Воскресе́нием.

Свети́лен, глас 5:

А́нгельским изрещи́ язы́ком то́чию возмо́жно есть вели́чия Христа́ Го́спода,/ Све́та от Све́та, Бо́га и́стинна от Бо́га Отца́ Безнача́льнаго,/ просвеща́ющаго вся́каго челове́ка, гряду́щаго в мир,/ И́же просвети́ благода́тию и пра́ведника вели́каго Иоа́нна,/ его́же, в сия́нии сла́вы Небе́сныя предстоя́ща, слы́шит, о нас моля́щася.

Сла́ва, и ны́не, Богоро́дичен:

Лучеза́рный о́блак су́щим во тьме грехо́вней Ты еси́, Богома́ти Пречи́стая,/ из Тебе́ бо про́йде Христо́с, Со́лнце Пра́вды,/ и озари́ всю тварь богове́дением./ Те́мже моли́ся о всех омраче́нных Светода́вцу Спа́су, Сы́ну Твоему́.

На хвали́тех стихи́ры на 4, глас 4:

Удиви́шася, адама́нте ве́ры,/ Иоа́нне пра́ведне и досточу́дне,/ Небе́сныя во́инства и си́лы/ дарова́нию, свы́ше в тебе́ явле́нному,/ прему́дрость бо и ра́зум прия́л еси́ от Бо́га/ и стра́хом Госпо́дним утверди́л еси́ себе́,/ не ду́хом стра́ха и боя́зни,/ но ду́хом сыноположе́ния и любве́ к Небе́сному Отцу́,/ в ни́хже и нас утверди́ твои́ми моли́твами.

Сын невече́рняго Све́та был еси́, Иоа́нне пра́ведне,/ и плод Боже́ственнаго Ду́ха яви́л еси́ на земли́,/ обле́клся бо еси́ бла́гостию, и пра́вдою,/ и и́стиною, я́ко ри́зою,/ и се́рдце твое́ соде́ял еси́ Того́ благода́тный орга́н,/ и нас наставля́еши,/ да не бу́дем нему́дри, но прему́дри,/ и позна́ем во́лю Го́спода на́шего,/ и воспое́м Ему́ в сердца́х на́ших песнь но́вую.

Избра́нник на земли́ яви́лся еси́ Бо́жий, Иоа́нне,/ душе́ю непоро́чен и те́лом,/ Ева́нгелия Христо́ва испо́лнитель неукло́нный,/ и страда́ньми показа́л еси́ любо́вь твою́/ к распе́ншемуся нас ра́ди Христу́ Спа́су,/ Ему́же моли́ся дарова́ти мир ми́ру,/ Святе́й Це́ркви благостоя́ние/ и всем лю́дем ми́лость и благослове́ние.

Сла́ва, глас 6:

Ю́ныя естества́ стремле́ния победи́л еси́, Иоа́нне,/ и вся стра́сти души́ и те́ла попра́л еси́/ и восприя́л еси́ плод духо́вен:/ в любви́, ра́дости и ми́ре пребыва́я,/ долготерпе́ние и кро́тость с воздержа́нием стяжа́л еси́,/ и явля́еши ны́не лю́дем милосе́рдие и бла́гость,/ о оте́честве твое́м Росси́йстем хода́тайствуеши непреста́нно,/ и Элла́де мо́щи твоя́ чудоде́йствуют./ О всем ми́ре моли́ся, Бо́жий служи́телю ве́рный.

И ны́не, Богоро́дичен, глас то́йже:

Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловати ду́ши на́ша.

Славосло́вие вели́кое, ектении́, и отпу́ст.

НА ЛИТУРГИ́И

Блаже́нны от кано́на, песни́ 3-я и 6-я. Проки́мен, глас 7: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную: