Ина служба священномученика Ипатия, епископа Гангрскаго.Творение иеромонаха Кариона Истомина.

НА МА́ЛОЙ ВЕЧЕ́РНИ

На Го́споди, воззва́х: стихи́ры, глас 1.

Подо́бен: Небе́сных чино́в:

Боготво́рною твое́ю душе́ю/ ума́ све́тлостию вразуми́вся, преблаже́нне Ипа́тие,/ в тебе́ само́м, творе́нии, Бо́га Всетворца́ позна́в,/ всеусе́рдно Ему́ соедини́лся еси́ доброде́тельми,/ и ны́не с Го́рними чи́ны в Небесе́х ликовству́я,/ моли́ Христа́ Человеколю́бца спасти́ ду́ши на́ша.

Пребы́в на земли́ в по́двизе,/ кре́пко на вся враги́ Бо́жия и церко́вныя,/ ви́димыя и неви́димыя, вооружи́вся,/ и си́лою Всезри́теля Бо́га уничто́жил еси́ ты́я,/ Ипа́тие преподо́бне,/ наро́ды же вразуми́л еси́ благозна́ти и служи́ти Триипоста́сному Бо́гу любо́вию,/ к Нему́ же приведи́ и нас, в любле́ние Его́.

Вы́спрь о́ко се́рдца твоего́ име́я,/ ко Всебоже́ственней Тро́ической Вине́/ в стропотнопу́тии стези́ доброхо́дны обре́л еси́, Ипа́тие чудотво́рче,/ Боже́ственная бо благода́ть, такова́ уго́дника своего́/ на вся́ком жи́зни сея́ пути́ храня́щи,/ приведе́ тя ко Христу́ Бо́гу,/ Его́же моли́, благода́тию Его́ спасти́ся нам.

Сла́ва, глас 5:

Блаже́нне о́тче Ипа́тие,/ во всей твое́й жи́зни/ вельми́ потща́лся еси́ благоугожда́ти Бо́гу,/ И́же Сый всю тва́рь в Себе́ содержи́т/ и народоде́тельствует премно́го Свое́ю бла́гостию/ вся́кое су́щих естество́,/ и тя устро́и архиере́я преизя́щна лю́дем Свои́м./ Ты у́бо, о́тче, е́же живя́й в телеси́,/ мно́го по́льзы соде́лав,/ сотвори́л еси́ пресла́вная чудеса́/ и непло́дства супру́гов чадороди́ти/ в произвожде́нии ро́да челове́ча и в насле́дство их/ мольба́ми твои́ми по́дал еси́./ Тем и по сме́рти от свята́го телесе́ твоего́/ о́ная всегда́ содева́ются/ ве́рою чту́щим тя,/ и ны́не, в Небе́сных черто́зех прии́м насле́дство,/ испроси́ у Христа́ Го́спода/ та́яжде дарова́ния и врачева́ния нам получи́ти.

И ны́не, Богоро́дичен:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние мно́гих прегреше́ний, мо́лимся.

На стихо́вне стихи́ры, глас 2.

Подо́бен: До́ме Евфра́фов:

Благослове́н еси́, Бо́же,/ в па́мяти Твоего́ иера́рха,/ блаже́ннаго Ипа́тия,/ его́же моли́твами/ спаса́й от нужд честву́ющих Его́.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Богоно́се святи́телю,/ Тро́ицы Боже́ственныя был еси́ оби́тель,/ Ю́же пропове́дав,/ благода́тнаго Тоя́ на нас призре́ния/ сподо́би, Ипа́тие, хода́тайством твои́м.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Со́лнца тверде́льнаго светле́е/ твоя́ уче́ния,/ освяти́вшая концы́ ми́ра,/ о́тче Ипа́тие,/ в Богоугожде́нии просвети́ ны.

Сла́ва, глас 8:

Прииди́те, благослове́ннии христиа́не,/ все благочести́вое сосло́вие,/ восхва́лим Богоно́снаго отца́ Ипа́тия чудотво́рца,/ архиере́я пресла́внаго,/ Богоуго́дных доброде́телей о́браз духотво́рный,/ па́стыря Богому́драго,/ Це́ркве Бо́жия благоукраси́теля,/ больны́х и ско́рбных врача́ безме́зднаго,/ гре́шных в покая́ние спасе́ния наста́вника благоприя́тнаго/ и ко Христу́ Го́споду в ра́дость ве́чную/ таковы́х вселюбе́знаго представи́теля,/ и́же о всем ми́ре Вседержи́теля Бо́га мо́лит/ спасти́ вся благочести́выя/ во всера́достное Небе́сное блаже́нство.

И ны́не, Богоро́дичен:

Небе́сная пою́т Тя, Обра́дованная Ма́ти Безневе́стная,/ и мы славосло́вим неизсле́дованное Твое́ рождество́, Богоро́дице,/ моли́ спасти́ся душа́м на́шим.

Тропа́рь пи́сан на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 8:

Пре́жде век Сый, Бо́же,/ ве́ки сотвори́вый/ и вся в му́дрости Твое́й устро́ивый,/ многоразли́чною Твое́ю благода́тию/ возблагоде́тельствовал еси́ Твоя́ лю́ди,/ дарова́в свети́льника ми́ру,/ иера́рха Ипа́тия чудотвори́теля,/ в его́же дне́сь па́мяти/ всесвято́е И́мя Твое́ сла́вим.

От ве́ка и до ве́ка/ Ты еси́, Царю́ Го́споди,/ Пресу́щественное Существо́,/ вожделева́ти тя при́сно по́дал еси́/ Богому́дрому Твоему́ священнонача́льнику Ипа́тию,/ и́же в су́щих Су́щаго/ челове́ки зна́ти научи́л есть,/ его́же моли́твами/ виде́ния Твоего́ сподо́би ны, Человеколю́бче.

Триипоста́сный Влады́ко,/ О́тче, Сы́не и Душе́ Святы́й,/ Еди́но Пребоже́ственное Божество́,/ девятогу́бною иера́рхиею/ преми́рных а́нгельских чино́в воспева́емый,/ приими́ и от нас, бре́нных, тебе́ воспева́ние/ и мольба́ми уго́дника Твоего́,/ Богоно́снаго отца́ Ипа́тия/ пода́ждь нам пе́ти Тя во ве́ки.

Сла́ва, глас 5:

Пренача́льнаго Нача́ла в Тро́ице Бо́га на́шего/ неизрече́нная бла́гость излия́ся:/ от небы́тности бо Им в бы́тность созда́ся/ умнослове́сный ве́сь челове́ческий род./ Ему́же, Всетворцу́ на́шему,/ вси благове́рнии лю́дие, хвалу́ возопии́м: аллилу́ия–/ и че́сть воздади́м всеблаже́нному чудотво́рцу Ипа́тию,/ его́же Госпо́дь дарова́нии чуде́сными просла́ви,/ я́ко в свое́й он жи́зни/ о́браз душе́внаго благоро́дия своего́ соблюде́ невреди́мо/ и подо́бие в ми́лости,/ во вся ми́ра концы́ дела́ показа́в,/ страда́в бо за ве́ру Бо́жию кре́пце,/ злочести́вых царе́й и мучи́телей посрами́/ и в ве́ру Иису́с Христо́ву мно́гия наро́ды обрати́./ В Собо́ре Пе́рвом святы́х оте́ц столп Правосла́вия бы́сть и́стинен,/ ерети́чествующих злове́рия мглу разгна́,/ во вся́ких ско́рбех и боле́знех/ ве́рным лю́дем помо́щник и врач чудесото́чный яви́лся,/ прося́щих его́ ве́рно вся́кая проше́ния исполня́ет./ К нему́же возопии́м:/ ра́дуйся, о́тче Ипа́тие,/ чудотво́рче, па́стырю и сострада́телю наш,/ и моли́ о нас Человеколю́бца Бо́га/ насле́дити всем Небе́сных красо́т ве́чное блаже́нство.

И ны́не, Богоро́дичен: В Чермне́м мо́ри:

Вход, проки́мен дне и чте́ния святи́тельская.

При́тчей чте́ние (главы́ 10, 3 и 8):

Па́мять пра́веднаго с похвала́ми,/ и благослове́ние Госпо́дне на главе́ его́./ Блаже́н челове́к, и́же обре́те прему́дрость,/ и сме́ртен, и́же уве́де ра́зум./ Лу́чше бо сию́ купова́ти,/ не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ е́сть./ Долгота́ бо дней и ле́та живота́ в десни́це ея́,/ в шу́йце же ея́ бога́тство и сла́ва./ От уст ея́ исхо́дит пра́вда,/ зако́н же и ми́лость на язы́це но́сит./ Послу́шайте у́бо мене́, о ча́да,/ честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́ – исхо́ди живота́,/ и уготовля́ется хоте́ние от Го́спода./ Сего́ ра́ди молю́ вас/ и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смысл аз призва́х./ Мой сове́т и утвержде́ние,/ мой ра́зум, моя́ же кре́пость./ Аз мене́ лю́бящия люблю́,/ и́щущии же мене́ обря́щут благода́ть./ Разуме́йте у́бо, незло́бивии, кова́рство,/ ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая,/ я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва су́ть разумева́ющим/ и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

Прему́дрости Соломо́новы чте́ние (глава́ 10):

Уста́ пра́веднаго ка́плют прему́дрость,/ устне́ же муже́й му́дрых ве́дят благода́ть./ Уста́ му́дрых поуча́тся прему́дрости,/ пра́вда же избавля́ет от сме́рти./ Сконча́вшуся му́жу пра́ведну не поги́бнет наде́жда,/ сын бо пра́веден ражда́ется в живо́т/ и во благи́х свои́х плод пра́вды обы́мет./ Свет пра́ведным всегда́/ и от Го́спода обря́щут благода́ть и сла́ву./ Язы́к му́дрых до́брая све́сть,/ и в се́рдце их почи́ет му́дрость./ Лю́бит Госпо́дь преподо́бная сердца́,/ прия́тни же ему́ вси непоро́чнии в пути́./ Му́дрость Госпо́дня просвеща́ет лице́ разу́мнаго./ Постига́ет бо жела́ющия ю,/ пре́жде да́же, разуме́ти ю,/ и удо́бь у́зрится от лю́бящих ю./ У́треневавый к ней не утруди́тся,/ и бдяй ея́ ра́ди вско́ре без печа́ли бу́дет./ Я́ко досто́йных ея́ сама́ обхо́дит и́щущи,/ и во стезя́х ея́ явля́ется им благоприе́мне./ Му́дрости никогда́же одоле́ет зло́ба./ Сих ра́ди и рачи́тель бых добро́ты ея́/ и возлюби́х ю, и поиска́х от ю́ности моея́./ И взыска́х неве́сту привести́ себе́,/ я́ко всех Влады́ка возлюби́ ю./ Таи́бница бо есть Бо́жия хи́трости/ и обрета́тельница дел его́./ Труды́ ея́ су́ть доброде́тели,/ целому́дрию же и ра́зуму та учи́т, пра́вде и му́жеству,/ и́хже потре́бнее ничто́же есть в жити́и челове́ком./ А́ще же и мно́гаго иску́сства жела́ет кто,/ ве́сть дре́вняя и бы́ти хотя́щая разсмо́трит./ Све́сть изви́тия слове́с и разреше́ния гада́ний,/ зна́мения и чудеса́ проразуме́ет и сбытия́ време́н и лет,/ и всем сове́тник есть благ,/ я́ко безсме́ртие есть в ней и благосла́вие во обще́ние слове́с ея́./ Сего́ ра́ди бесе́довах ко Го́споду и помоли́хся Ему́,/ и рех от всего́ се́рдца моего́:/ Бо́же отце́в и Го́споди ми́лости,/ сотвори́вый вся сло́вом Твои́м/ и му́дрости Твое́ю устро́ивый челове́ка,/ да владе́ет бы́вшими от Тебе́ тварми́,/ и да управля́ет мир в преподо́бии и пра́вде./ Да́ждь ми Твои́х престо́лов приседя́щую прему́дрость/ и не отлучи́ мене́ от о́трок Твои́х,/ я́ко аз раб Твой и сын Рабы́ни Твоея́./ Посли́ ю с Небе́с от свята́го жили́ща Твоего́/ и от Престо́ла сла́вы Твоея́,/ да су́щи со мно́ю научи́т мя,/ что благоуго́дно есть пред Тобо́ю./ И наста́вит мя в ра́зум и сохрани́т мя в сла́ве свое́й./ Помышле́ния бо сме́ртных вся боязли́ва/ и погреши́тельна умышле́ния их.

Прему́дрости Соломо́новы чте́ние (глава́ 4):

Похваля́ему пра́веднику возвеселя́тся лю́дие,/ безсме́ртие бо есть па́мять его́,/ я́ко от Го́спода познава́ется и от челове́к,/ и уго́дна Го́сподеви душа́ его́./ Возлюби́те у́бо, о му́жие, му́дрость и поживете́,/ восхощи́те ея́ и нака́зани бу́дете,/ нача́ло бо ея́ любы́ и соблюде́ние зако́на./ Почти́те прему́дрость, да во ве́ки ца́рствуете./ Возвещу́ вам и не скры́ю от вас та́ин Бо́жиих:/ я́ко Той му́дрости Наста́вник есть и му́дрых Испра́витель,/ и вся́кому смы́слу и де́лу Хитре́ц./ И всем смы́слом научи́т му́дрость,/ есть бо в ней дух разу́мен и свят и сия́ние све́та присносу́щнаго/ и о́браз бла́гости Бо́жия./ Та дру́ги Бо́жия и проро́ки устроя́ет,/ благоле́пнейши же есть со́лнца и па́че вся́каго сотворе́ния звезд,/ све́ту сосужда́ема, обрета́ется пе́рвейши./ Та угожда́ющих ей от боле́зней изба́ви и наста́ви на стези́ пра́выя,/ даде́ им ра́зум име́ти свят и сохрани́ я от ловя́щих и по́двиг кре́пок подаде́ им./ Да разуме́ют вси, я́ко си́льнейши всего́ есть благоче́стие/ и никогда́же премо́жет зло́ба му́дрости,/ ниже́ пре́йдет злы́я облича́ющи суд./ Реко́ша же в себе́, помы́сливше непра́ведно:/ наси́льствуем пра́ведному и не пощади́м преподо́бства его́,/ ни усрами́мся седи́н ста́рости многоле́тны./ Бу́дет бо нам кре́пость зако́н и улови́м пра́веднаго,/ я́ко неуго́ден нам есть и проти́вится дело́м на́шим/ и поно́сит нам отпаде́ние зако́на/ и облича́ет нам согреше́ния наказа́ния на́шего./ Возвеща́ет нам ра́зум име́ти Бо́жий/ и о́трока Госпо́дня себе́ имену́ет./ Бы́сть нам на обличе́ние помышле́нием на́шим,/ и тя́жек нам есть и ви́димь,/ я́ко неподо́бно ины́м житие́ его́ и измене́ны стези́ его́,/ в поруга́ние вмени́хомся ему́/ и удаля́ется от путе́й на́ших, я́ко от нечисто́т,/ и блажи́т после́дняя пра́ведных./ Уви́дим у́бо, а́ще словеса́ его́ и́стинна су́ть,/ иску́сим я́же сбыва́ются ему́./ Руга́нием и му́кою истя́жем его́,/ да разуме́ем кро́тость его́/ и иску́сим беззло́бство его́,/ сме́ртию безобра́зною осу́дим его́,/ бу́дет бо посеще́ние от слове́с его́./ Сия́ помы́слиша и прельсти́шася,/ ослепи́ бо я зло́ба их/ и не разуме́ша та́ин Бо́жиих,/ и не разсуди́ша, я́ко Ты еси́ Бог Еди́н,/ живота́ име́яй и сме́рти вла́сть,/ и спаса́яй во вре́мя ско́рби, и избавля́яй от вся́каго зла./ Щедр и Ми́лостив и дая́ преподо́бным Свои́м благода́ть,/ и Свое́ю мы́шцею го́рдым противля́яся.

На лити́и стихи́ры, глас 5:

Прииди́те, благослове́ннии христиа́не,/ восхва́лим пе́сненно блаже́ннаго во святы́х Ипа́тия чудотво́рца,/ иера́рха Га́нгрскаго,/ му́жа духо́внаго,/ не по пло́ти, но по ду́ху вре́мя жи́зни проше́дшаго/ и Небе́сное доброде́телей бога́тство стяжа́вшаго,/ не временноувя́дным, но вечнонеувя́дным душе́вныя чистоты́ цве́том/ чистолюби́ву свою́ ду́шу удобри́вшаго,/ не до́льняго, но Го́рняго оте́чества,/ Ца́рства Небе́снаго, взыска́вшаго,/ его́же во Христе́ Иису́се получи́,/ иде́же мо́лит Всесвяту́ю Тро́ицу Боже́ственную/ о ве́рою соверша́ющих па́мять его́.

Глас 3:

Пропове́дниче всечестне́йший и́стиннаго на́шего благоче́стия,/ Ипа́тие прему́дре,/ во пло́ти бо Христа́ Иису́са Бо́га,/ прише́дша гре́шныя лю́ди спасти́,/ во ве́сь мир благовести́л еси́/ и, чудесы́ пресла́вными в си́ле, Богодарова́нней тебе́,/ мно́гия удиви́в,/ в ско́рбех, печа́лех, благода́тно исцели́л еси́,/ те́мже мо́лим тя, святи́телю:/ моли́ Христа́ Го́спода/ от вся́ких зде злоключе́ний сохраня́ти ны/ и Небе́снаго блаже́нства сподо́бити.

Глас 2:

Боже́ственней любви́ всем се́рдцем и душе́ю соедини́лся еси́,/ иера́рше Ипа́тие,/ вре́менная бо вся презре́в,/ злоче́стие же и́дольское и ерети́ческое суетносло́вие искоренева́я,/ утвержда́л еси́ наро́ды/ во и́стинном пребыва́ти благоче́стии,/ да в зде́шнем житии́ ева́нгельскою пра́вдою поживе́м/ и оте́чество Го́рнее насле́дствуим,/ сего́ ра́ди, я́ко Богоуго́дник чудесото́чный/ и и́стиннаго Сло́ва Бо́жия Богопропове́дник,/ моли́ся за ны,/ да в человеколю́бии Христа́ Го́спода/ и в предста́тельстве Присноде́вы Богоро́дицы Мари́и/ даст нам в ско́рбех утеше́ние, и исправле́ние жи́зни,/ и всера́достнаго ве́ка насле́дие.

Сла́ва, глас 6:

Я́ко на небе́сней тве́рди/ свети́ло вели́кое сия́ет,/ та́ко в тве́рди Церко́вней непреста́нно све́тится/ мы́сленное со́лнце – свяще́нный оте́ц наш Ипа́тий,/ иера́рх пресла́вный и Богоуго́дный/ па́стырь Христо́вы Це́ркве,/ Богому́дрыми бо уче́ньми свои́ми/ мно́гия лю́ди просвети́в в ра́зум и́стинный,/ в благове́рие к Бо́гу жи́ву и и́стинну ты́я приведе́,/ воплоти́вшагося Сы́на Бо́жия,/ Единосу́щна Бо́гу Отцу́/ и в Трие́х Ипоста́сех Бо́га Еди́на,/ Творца́ и Прави́теля всея́ тва́ри,/ громогла́сно испове́да пред цари́ и кня́зи идолочти́выми,/ Богопропове́дник и́стинен бы́сть,/ де́монския полки́ от челове́к прогна́,/ сконча́ жизнь от злоде́йственных уби́йц,/ пострада́в за Христа́,/ прише́л есть в ве́чныя оби́тели./ В его́же све́тлей па́мяти дне́сь, ве́рнии,/ сла́вим Всетворца́ на́шего Бо́га,/ да предста́тельством его́ спасе́т ду́ши на́ша.

И ны́не, Богоро́дичен: Творе́ц и Изба́витель:

На стихо́вне стихи́ры, глас 4.

Подо́бен: Дал еси́ зна́мение:

В по́двизе мно́зе быв,/ преподо́бне о́тче Ипа́тие,/ егда́ мучи́тели злобо́жники на тя вооружи́шася/ и преда́ша тя го́рьким му́кам,/ ты же, разже́гся любо́вию Христо́вою,/ терпели́вно вра́жия ко́зни победи́л еси́/ и венце́м страда́ния увяза́лся еси́,/ ве́чно со Христо́м ца́рствуеши.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Богому́дрым смы́слом/ ева́нгельскаго пропове́дания се́яв словеса́,/ Ипа́тие блаже́нне,/ возрасти́л еси́ плоды́, ве́рныя христиа́ны,/ пребыва́ти в доброплодоноше́нии доброде́телей/ и содержа́ти кре́пко/ оте́ческую Богопре́данную ве́ру,/ ю́же собо́рне утверди́ша,/ возрасти́ и в нас плоды́ в любо́вь Бо́жию.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Неизрече́нное Бо́жие смотре́ние/ бы́сть в тебе́, иера́рше всечестны́й,/ я́ко бо сосу́д всезлаты́й,/ Ду́хом Бо́жиим испо́лнен,/ нося́й благово́ние всем челове́ком,/ милосе́рдствовал еси́ мно́гия,/ разли́чными прия́тствы целе́б ре́ки источи́в,/ и ны́не, зря Всемогу́щаго Бо́га,/ моли́ о всех, па́мять твою́ соверша́ющих.

Сла́ва, глас 2:

Возсия́ дне́сь па́мять/ страда́льца и чудотво́рца, Боже́ственнаго Ипа́тия,/ просвеща́ющая и вразумля́ющая благочести́вых собра́ние,/ и́же во всем житии́ бы́сть непоколе́бленный столп благоче́стия,/ Богозда́нный ве́ры степе́нь,/ преосвяще́нная глава́, благокрасо́тство Церко́вное,/ неисчерпа́емая Боже́ственных чуде́с пучи́на,/ корми́тель ни́щих,/ сиро́т и вдови́ц благоро́дный призира́тель,/ непло́дным супру́гом деторо́дие мольба́ми испроша́я у Бо́га/ в размноже́ние славосло́вия Всетворя́щия Вины́,/ Пренача́льныя, Святы́я, Боже́ственныя Тро́ицы,/ Е́юже живодви́жимся и есмы́ зде состоя́нием./ Те́мже в моле́бней отца́ свята́го па́мяти/ Богонача́льному Существу́ благопоко́рственно возопии́м:/ Бо́же наш Триипоста́сный,/ спаси́ ду́ши на́ша благоволе́нием Твои́м,/ я́ко хо́щеши и и́миже ве́си52 судьба́ми во ве́ки.

И ны́не, Богоро́дичен: О, чудесе́ но́ваго:

На благослове́нии хле́бов тропа́рь свята́го, два́жды, и Богоро́дице Де́во: еди́ножды.

Тропа́рь свята́го, глас 3:

В прекра́сном Це́ркве апо́стольския вертогра́де/ из ю́на во́зраста всеси́льною десни́цею Бо́жиею насади́лся еси́,/ Богоблаже́нне о́тче Ипа́тие,/ и в ней, я́ко ве́рен первосвяще́нник,/ ве́рно Богонача́льное и Всетворя́щее Тро́ическое Еди́нство/ пропове́дал еси́ во Вселе́нском Собра́нии,/ Ду́ха же Свята́го в доброде́телех испо́лнен быв,/ ве́лия чудеса́ сотвори́в,/ муче́нием за ве́ру Христо́ву сконча́вся,/ прише́л еси́ в Небе́сный град,/ иде́же Триипоста́снаго Бо́га зря,/ моли́ о честву́ющих тя,/ да в Го́рнем Иерусали́ме со святы́ми жи́ти сподо́бимся.

Ин тропа́рь, глас 4:

Богови́дное досточу́дных доброде́телей зерца́ло,/ Богоправи́мое Правосла́вныя ве́ры пра́вило/ и утвержде́ние Це́ркве Христо́вы,/ за ню́же и страда́л еси́, всечу́дне о́тче Ипа́тие,/ чудесы́, Богодарова́нными тебе́, ве́сь мир удиви́в,/ душеспаси́тельныя по́льзы сотвори́л еси́,/ и ны́не ве́рно призыва́ющим тя во вся́ких беда́х и напа́стех/ испроси́ нам у Го́спода Бо́га/ по́мощь и спасе́ние ве́чное душа́м.

НА У́ТРЕНИ

На Бог Госпо́дь: тропа́рь свята́го, два́жды. Сла́ва, и ны́не, Богоро́дичен.

По 1-м стихосло́вии седа́лен, глас 1.

Подо́бен: Гроб Твой, Спа́се:

Адама́нтный терпе́ния сто́лпе незы́блемый, досточу́дне Ипа́тие,/ не боя́лся у́бо ко́зней вра́жиих,/ му́жески става́я пред мучи́тели злочести́выми,/ ве́ровати в Бо́га Жи́ва и И́стинна учи́л еси́, Богому́дренне, вся наро́ды./ Те́мже сподо́бився Небе́снаго утеше́ния/ и та́мо моли́ о нас Христа́ Го́спода, спасти́ ду́ши на́ша.

Сла́ва, и ны́не, Богоро́дичен:

Богоневе́сто Де́во, Богоро́дице Мари́е,/ превозше́дшая Го́рния а́нгельския чи́ны,/ Тебе́, Цари́це Небе́сней и Предста́тельнице на́шей, сицева́я прино́сим:/ ра́дуйся, престо́ле огнезра́чный Бо́жий,/ седа́лище Богоца́рское, о́дре, преиспещре́нно устла́нный,/ златопорфи́рный черто́же, хлами́до53 червленосве́тлая,/ моли́ Сы́на Твоего́ изба́вити ны от вра́жиих наве́тов.

По 2-м стихосло́вии седа́лен, глас 3.

Подо́бен: Красоте́ де́вства:

Христо́вы любве́ и всего́ зако́на блюсти́тель и учи́тель пра́вый быв,/ всеблаже́нне Ипа́тие, о́тче наш,/ на земли́ живя́й, небозри́тельная твоя́ очеса́/ воздвиза́л еси́ к живу́щему в Небесе́х Неботворцу́ Бо́гу./ Ему́же ны́не в Небесе́х предстоя́,/ испроси́ всем мир и ми́лость.

Сла́ва, и ны́не, Богоро́дичен:

Златоте́чная Бо́жия реко́,/ Небе́сными наводне́нная даро́в Ду́ха Всесвята́го вода́ми,/ Пречи́стая Богома́ти Влады́чице,/ неботе́чную ра́дости Небе́сныя струю́ источа́й на скорбя́щия на́ша ду́ши,/ враги́ же пятоугрыза́тельныя вся́кими прило́ги отжени́ от нас/ и спасе́ние Твое́ нам да́руй.

По полиеле́и седа́лен, глас 8.

Подо́бен: Прему́дрости:

Богосозда́нна себе́ разуме́в,/ богови́дно душе́ю твое́ю ко Бо́гу Творцу́ устреми́лся еси́,/ не прило́жь се́рдца твоего́ к веще́м су́етным,/ Боже́ственная дарова́ния сподо́бился еси́ прия́ти,/ вся́кия неду́ги и боле́зни врачевству́я в лю́дех,/ первобы́тным ты са́ном, Ипа́тие чудотво́рче, не то́кмо де́монов от челове́к,/ но и престра́шных змие́в изгна́л еси́,/ за напа́стующия тебе́ и бию́щия ти лю́ди моли́лся еси́ Го́споду,/ о избавле́нии от грехо́в их,/ Его́же и ны́не о нас моли́,/ оставле́ние грехо́в на́ших дарова́ти честву́ющим всесвяту́ю па́мять твою́.

Сла́ва, и ны́не, Богоро́дичен:

Ку́ю Тебе́, Влады́чице, принесе́м пе́снь?/ Ко́е хвале́ние?/ О Тебе́ бо ра́дуется вся́кая тва́рь,/ а́нгельская вся чинонача́лия и челове́ческа ро́да все благове́рное состоя́ние,/ оба́че при́зри и услы́ши ны, Госпоже́:/ ра́дуйся, Мари́е Богома́ти,/ дванадесятосте́нный гра́де, златокова́нная две́рь,/ Богоукраше́нная ски́ние, светлопозлаще́нная трапе́зо,/ благоуха́нное кади́ло, неусыпогоря́щая лампа́до,/ Богоде́ланная кни́го, воста́ние па́дших,/ безме́здное врачевство́, ско́рое предста́тельство,/ лю́бящих чистоту́ некра́домое храни́лище,/ ра́дуйся, всех христиа́нских душ спасе́ние.

Степе́нна, 1-й антифо́н 4-го гла́са. Проки́мен, глас 4: Свяще́нницы Твои́ облеку́тся в пра́вду,/ и преподо́бнии Твои́ возра́дуются. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Иоа́нна, зача́ло 51.

По 50-м псалме́ стихи́ра, глас 6:

Боже́ственный священнонача́льниче Ипа́тие о́тче,/ благови́дною архиере́йских исправле́ний красото́ю/ Богопоста́вленный престо́л твой боголе́пно укра́сивый,/ ве́сь мир Го́рний и до́льний/ превосхо́дными твои́ми добротворе́ньми чудесодарова́нными/ сла́дце удиви́л еси́./ Безпло́тнии бо Небе́снии чи́ни,/ на Богоуго́дника тя зря́ще, веселя́тся,/ благове́рнии же лю́дие вси,/ не то́кмо прие́мшии врачевство́ в не́мощех свои́х,/ но и ны́не во вся́ких проше́ниих исполне́ния тре́бующии,/ ве́лие воздаю́т благодаре́ние Бо́гу/ и тебе́, святи́теля, мо́лят спасти́ вся христиа́ны,/ во всера́дование со святы́ми жития́ несконча́емаго.

Кано́н, глас 3, в не́мже нача́льная письмена́ в стиха́х, кроме́ ирмосо́в, с нача́ла до 9-я пе́сни сице́ глася́т: Бо́га Царя́ пе́ти, Чудопода́теля, несе́ Карио́н.

Песнь 1

Ирмо́с: Ди́вно, сла́вно творя́й чудеса́/ Ты еси́, Бо́же,/ бе́здну оземлени́вый, и колесни́цы потопи́вый,/ и лю́ди спасы́й, пою́щия Тебе́,/ я́ко Царю́ на́шему и Бо́гу.

Бо́га Тя Всетворца́ разуме́в вседу́шно, возлюби́л есть измла́да,/ доброде́тельми обогати́ся всеблаже́нный Ипа́тий, иера́рх чудоде́льный, Твое́ю благода́тию,/ его́же мольба́ми спаси́ пою́щия Тебе́.

О́гнь любве́ Бо́жия в чистолю́бном се́рдце твое́м объя́в,/ де́монскаго злостра́стия пагубоно́сное те́рние попали́л еси́, блаже́нне о́тче./ Те́мже вся благочести́выя научи́л еси́ пе́ти Царя́ Небе́снаго, Бо́га.

Глаго́лом Ева́нгельским научи́вся,/ после́довал еси́ Боговоплоти́вшемуся Сы́ну Бо́жию Иису́су,/ кре́пко бо от злочести́вых за Него́ пострада́в, иера́рше Ипа́тие,/ ны́не в Небесе́х Его́ зря,/ моли́ изба́вити ны от бед, пою́щия Ему́.

Богоро́дичен: А́нгельское все чинонача́лие удиви́ся,/ зря в Тебе́, Пречи́стая, Бо́га Сло́ва все́льшася,/ Его́же, Преблагослове́нная Де́во Мари́е, преесте́ственно родила́ еси́./ В Небе́снем блаже́нстве су́щи,/ предста́тельствуй о нас, пою́щих Тя.

Песнь 3

Ирмо́с: Непло́дная душе́ и безча́дная,/ стяжи́ плод благосла́вный,/ веселя́щися, возопи́й:/ утверди́хся Тобо́ю, Бо́же,/ не́сть свят, не́сть пра́веден,/ па́че Тебе́, Го́споди.

Ца́рствующаго все́ми Го́спода, Единосу́щна Отцу́,/ пропове́дал еси́ Сы́на Предве́чнаго, в собо́рном ли́ке святы́х оте́ц/ богому́дренно, о́тче, утвержде́ние сотво́рь, пое́ши:/ не́сть свят, па́че Бо́га Триипоста́сна.

А́нгела преудо́бренна в церко́вней иера́рхии тя, досточу́дне Ипа́тие, иму́ще, мо́лим:/ в плодоноше́ние утверди́ ду́ши на́ша,/ духоро́дне пе́ти в Тро́ице Всесвята́го и Пра́веднаго Го́спода.

Росо́ю Боже́ственнаго Ду́ха преизоби́льно напои́вся,/ разли́чна чудотворе́ния во сла́ву Пра́веднаго Бо́га/ в по́мощь ве́рным лю́дем показа́л еси́, блаже́нне,/ и́миже стяжа́ти да́руй и нам плод Его́ хвале́ния.

Богоро́дичен: Язы́к всяк не возмо́жет по достоя́нию хвали́ти Тя, Богома́ти Мари́е,/ Тро́ичная бо Ипоста́сь – Бог Сло́во –/ всели́ся в чре́во Твое́, пожи́в с челове́ки Тобо́ю,/ в Богоразу́мие наста́вль, пе́ти Человеколю́бца Го́спода.

Седа́лен, глас 8.

Подо́бен: Прему́дрости:

Богоукрепле́нный столп Правосла́вия,/ ерети́чествующих со́нмищ ариа́нскаго неду́га54 и Нова́та55 злоде́йства искорени́тель,/ Богоблаже́нне о́тче Ипа́тие,/ во утвержде́ние Христо́вы Це́ркве яви́лся еси́./ За ню же от враго́в, церквоненави́стных новатиа́н,/ в проездоте́сном пути́ неча́янно бие́ние, ра́ны и смерть прие́мь,/ возше́л еси́ душе́ю ко Христу́ Бо́гу в Небе́сную оби́тель./ Но и уби́йцам твои́м, му́чимым де́монами, проще́ние дарова́/ и мно́гая от неду́г свободи́л еси́./ Те́мже Христу́ Бо́гу моли́ся о воспева́ющих па́мять твою́,/ дарова́ти всем ве́лию ми́лость.

Сла́ва, и ны́не, Богоро́дичен:

Все А́нгельское Го́рнее священнонача́лие превозшла́ еси́, Богоневе́сто Де́во Мари́е,/ Бог у́бо Сый престо́л Себе́ Тя соде́ла,/ во пречи́стом чре́ве Твое́м заи́мствова от крове́й Твои́х пло́ть,/ в не́йже се́де одесну́ю Бо́га Отца́, я́ко Единосу́щный,/ па́дшее на́ше челове́ческое естество́ возста́ви/ и соедини́ Себе́ ве́рующия в Него́ и велича́ющия Тя./ Те́мже блажа́т Тя, Госпоже́, вси ро́ди:/ на Небесе́х – вся Небе́сныя си́лы,/ на земли́ – правове́рующия лю́ди./ Пода́ждь всем нам безконе́чное ра́дование.

Песнь 4

Ирмо́с: Приосене́нную го́ру Авваку́м прозря́ше,/ пречи́стую Твою́ утро́бу, Чи́стая./ Тем взыва́ше:/ от ю́га прии́дет Бог/ и Святы́й от горы́ приосене́нныя ча́щи.

Призре́ Госпо́дь свы́ше на твое́ Боголюби́вое се́рдце/ и осени́ тя, избра́ннаго Своего́ иера́рха,/ благода́тию Свое́ю в прославле́ние И́мене Своего́ свята́го,/ Его́же возгласи́л еси́:/ прии́де Бог спасти́ челове́ка.

Е́здяй на у́мных и безпло́тных колесни́цах А́нгельских сил/ и всели́выйся носи́тися в утро́бу Пречи́стыя Де́вы,/ из Нея́же воплоти́ся Бог Сый,/ пропове́дан быв тобо́ю, о́тче, во спасе́ние.

Твое́, блаже́нне о́тче Ипа́тие, рачи́тельство/ ко Всетворцу́ Бо́гу неусы́пное бы́сть,/ вся бо сладостра́стия ми́ра вмени́в уме́ты/ и на верх горы́ доброде́тели возше́д,/ присеня́й56 нас, моля́щих тя, благода́тне.

Богоро́дичен: Изоби́льно благода́ть Свою́ Присносу́щный Бог/ излия́ на Тя, Богома́ти Пречи́стая,/ очи́стив бо Ду́хом, селе́ние Невмести́мый Себе́ во Твое́й утро́бе сотвори́,/ Его́же моли́ спасти́ ны.

Песнь 5

Ирмо́с: Све́том Твои́м Невече́рним, Христе́,/ озари́, Бо́же, смире́нную мою́ ду́шу/ и наста́ви на страх Твой,/ зане́ свет повеле́ния Твоя́.

Че́стно ше́ствие честно́му тебе́ иера́рху бы́сть от Го́спода,/ и́бо в труднохожде́нии нощи́ свет Боже́ственный от воды́, я́ко свещу́, возжже́,/ безбе́ден пу́ть восприя́л еси́./ Те́мже и нам озари́тися моли́.

Удиви́шася наро́ди живу́щей в тебе́, о́тче, благода́ти Бо́жией,/ я́ко го́рькия и непи́тныя во́ды в сла́дость претвори́л еси́,/ и, на́ша у́бо горькоро́дныя стра́сти истреби́в,/ благода́тными напо́й вода́ми.

Ду́ха Свята́го си́лою/ богоде́йственно в цельбу́ ве́рным христолю́бцам исто́чник те́плых вод изве́д,/ изведи́ ны от грехо́вныя тьмы́/ ко врачу́ющему вся Исто́чнику – Христу́.

Богоро́дичен: О́блак дожделию́щий премно́гих дарова́ний/ во утоле́ние жа́жды от зно́я стра́стного порабоще́нным яви́лася еси́, Пречи́стая Де́во,/ моли́ Сы́на Твоего́,/ да вспоко́ит57 ны в воде́ милосе́рдия Его́, чту́щия Тя.

Песнь 6

Ирмо́с: Возведи́ от тли мя, Го́споди Бо́же мой,/ Ио́на вопия́ше;/ и аз вопию́ Ти:/ из глубины́ изба́ви мя, Спа́се, мно́гих мои́х зол/ и к све́ту Твоему́, молю́ся, наста́ви.

Призыва́емь о́тче Ипа́тие, ве́рующими Христу́ Бо́гу,/ скороше́ствовав во вся́ких ско́рбех и напа́стех,/ тем безме́здно врачевство́ дарова́л еси́./ Те́мже от смертоно́сныя тли нас изба́ви.

О́браз Бо́жий, вои́стинну в человекотво́рстве Небеснора́йский, блаже́нне, показа́лся еси́:/ сла́вим бо благотворе́ньми Бо́га,/ от тли ерети́ческих злочти́лищ к све́ту благоче́стия мно́гия лю́ди наста́вил еси́.

Доброде́тельное Богоподо́бие стяжа́в,/ изря́ден па́стырь Га́нгрския Це́ркве был еси́, всече́стне./ Таковы́я подо́бство и свобо́дство от мно́гих на́ших зол пода́ждь нам, мо́лимся.

Богоро́дичен: Ааро́нов жезл процве́тший/ богозна́менно Тя прообрази́ Браконеиску́сную Де́ву:/ Цве́та бо, Све́та всего́ ми́ра, Богочелове́ка Христа́ израсти́вши,/ всем спасе́ние подае́ши ми́лостивно.

Конда́к, глас 2.

Подо́бен: В моли́твах Неусыпа́ющую:

Оби́тель Триипоста́снаго Божества́,/ достоблаже́нне о́тче Ипа́тие, быв,/ во вселе́нную Всетворца́ Бо́га воскли́кнул еси́./ Благода́рственне же чудоде́йствуя,/ вшел еси́ в Небе́сныя оби́тели,/ та́мо моли́ Всесвяту́ю Тро́ицу, мо́лим тя,/ исцели́ти телеса́ и ду́ши на́ша/ в Богосозда́нную на́шу красоту́.

Ин конда́к, глас 4:

О всеблаже́нный чудотво́рче Ипа́тие,/ предстоя́й в Небесе́х Всетворя́щей Боже́ственней Тро́ице,/ с ли́ки Го́рними богоприя́тне и всера́достне возно́сиши хвалы́./ Приими́ от нас сие́ тебе́ хвалорадостносло́вие./ И моли́ Го́спода изба́вити ны от вся́ких грехо́в, напа́стей же и боле́зней/ и дарова́ти Ца́рствие Небе́сное всю́ду пою́щим:/ аллилу́ия.

Песнь 7

Ирмо́с: Трие́ о́троцы в пещи́, Тро́ицу прообрази́вше,/ преще́ние о́гненное попра́ша/ и, пою́ще, вопия́ху:/ благослове́н еси́, Бо́же оте́ц на́ших.

Те́плаго моли́твенника и Богому́драго тя архиере́я самоде́ржец слы́шав,/ на отгна́ние стра́шнаго зми́я призва́ из па́ствы твоея́,/ прише́дша же, ра́достне чествова́,/ благословя́ Бо́га оте́ц на́ших.

Естествови́дный вели́кий змий, ца́рская сокро́вища обдержа́вший,/ не сме́яше на тя зи́нути58, о́тче,/ я́ко и де́моны го́нятся59 тобо́ю,/ первоада́мовым бо Богода́нным де́йством в поко́рстве тебе́ сожже́ся той.

Лю́дие новори́мстии и сам ца́рь,/ ви́дяще, о всеблаже́нне, такова́го стра́шна шестодесятоло́котнаго зми́я,/ от Тебе́ пресла́вно исчезнове́нна,/ тя же в благода́ти Бо́жией неврежде́нна,/ сла́дце вопия́ху:/ отце́в Бо́же, благослове́н еси́.

Богоро́дичен: Языкосло́вие провозгласи́ ца́рствующий проро́к,/ Дще́рь Царе́ву Тя, Боговлады́чице, бы́ти./ Мы же, ви́девше Тя и Ма́терь Царя́ Небе́снаго, всеусе́рдно вопие́м:/ я́ко Всемо́щная, сохрани́ нас от зми́я а́дскаго,/ Чи́стая Благослове́нная.

Песнь 8

Ирмо́с: А́нгелами немо́лчно в Вы́шних сла́вимаго Бо́га,/ Небеса́ небе́с, земля́, и го́ры, и хо́лми, и глубина́,/ и ве́сь род челове́ческий,/ пе́сньми Того́, я́ко Созда́теля и Изба́вителя, благослови́те/ и превозноси́те во вся ве́ки.

Наде́жду крепча́йшую во Всеще́дром Творце́ на́шем Бо́зе положи́в,/ на ерети́ческая собо́рища всеусе́рдно стал еси́, Богому́дре Ипа́тие,/ посрами́в же ариа́нское вредосла́вие,/ Христа́ возсла́вил еси́.

Единоро́днаго Сы́на Бо́жия, Еди́ну Тро́ичну Ипоста́сь,/ пло́ть и ду́шу у́мную всечелове́чество прии́мшаго,/ я́сно во ве́сь мир возгласи́л еси́, чудотво́рче,/ вся ве́рныя научи́в благослови́ти Его́ во ве́ки.

Се́мя сло́ва Ева́нгельскаго/ непреста́нно в се́рдце христиа́н правосла́вных се́ял еси́, блаже́нне,/ не то́кмо бо правове́рныя угобзи́в на ни́ве благоче́стия,/ но и от ерети́ческих со́нмищ многопло́дство сотвори́л еси́/ хвали́ти Бо́га во ве́ки.

Богоро́дичен: Еди́ну во всем творе́нии Свое́м/ Бог Сло́во избра́ Тя, Богоневе́сто, селе́ние Себе́,/ из Тебе́ роди́ся пло́тию преесте́ственне, я́ко ве́сть Сам,/ Его́же, Преблагослове́нная, моли́ па́дшия ны возроди́ти благода́тию,/ пе́ти Его́ и Тя во ве́ки.

Песнь 9

Ирмо́с: Купино́ю и огне́м пропи́санную в Сина́и/ законополо́жнику Моисе́ю/ и Бо́жий во чре́ве неопа́льно заче́ншую О́гнь,/ Всесве́тлую и Негаси́мую Свещу́,/ су́щую Богоро́дицу пе́сньми чту́ще, велича́ем.

А́нгел земны́й и челове́к Небе́сный вои́стинну был еси́, уго́дниче Христо́в, Ипа́тие,/ твои́ми бо труды́ и Богому́дрыми зри́тельствы Це́рковь благоукраси́ся/ и люде́м душеспаси́тельныя по́льзы мно́ги сотвори́шася.

Ра́зумом соверше́нным и Богоподо́бными де́лы/ в чудотворе́ниих всему́ ми́ру возсия́л еси́,/ я́ко со́лнце, о́тче досточу́дне,/ исцеле́ния разли́чна пода́в и де́моны от стра́ждущих челове́к отгоня́я,/ к Со́лнцу Пра́вды возше́л еси́,/ отню́дуже ны призира́й.

Ерети́чествующия вражде́бники подви́же на тя, Богоно́се, дре́вний змий диа́вол,/ и́же в путеше́ствии твое́м, ра́ди Правосла́вия твоего́, окая́нный умертви́ша,/ но бо́лее тя и по сме́рти Госпо́дь Бог просла́ви,/ Его́же моли́ от враго́в изба́витися нам.

Объя́т вели́кий страх и де́монское муче́ние уби́йцы твоя́, свя́те,/ Бо́жиим бо гне́вом вси возбесне́ша60./ Ты же, милосе́рдствуя, о́ныя исцели́в, проще́ние дарова́л еси́,/ и мно́гия у гро́ба твоего́ цельбы́ да́ждь нам ми́лостивно.

Богоро́дичен: Назира́й свы́ше христиа́нское сосло́вие, Богороди́тельнице Де́во Чи́стая,/ и в достоя́ние ве́чнаго блаже́нства упра́ви и от скорбе́й и бед,/ мы́сленных страсте́й избавля́ющи ны,/ да, пе́сньми чту́ще, Тя велича́ем.

Свети́лен.

Подо́бен: Жены́, услы́шите:

Небе́сною Богоприя́тныя моли́твы цельбо́ю/ теле́сныя челове́ков не́мощи преесте́ственно исцели́вый/ и пресла́вная чудеса́ Богодарова́нною си́лою сотвори́вый,/ досточу́дный Ипа́тие, моли́ о нас Христа́ Бо́га,/ да в век всера́достный цельбу́ нам да́рует.

Сла́ва, и ны́не, Богоро́дичен:

Богоблаже́нная Цари́це, Пречи́стая Ма́рие Деви́це,/ Предста́тельнице Боголюбе́зна к Боже́ственней Тро́ице,/ о ве́рно Тя взыва́ющих и благоче́стно сла́вящих,/ моли́ся вы́ну спасти́ ду́ши на́ша.

Стихи́ры на хвали́тех, глас 2:

Ки́ими похвала́ми/ в доброде́телех воспое́м иера́рха тя сла́вна/ и чудоде́льнаго врача́, Ипа́тия всеблаже́ннаго?/ Небе́сною бо благоприя́тныя моли́твы цельбо́ю/ мно́жество боле́знующих преесте́ственно исцели́л еси́,/ Богодарова́нным у́бо ты человеколю́бием/ гото́вый всем призыва́ющим тя в по́мощь,/ те́мже моли́ Человеколю́бца Бо́га/ дарова́ти нам ве́лию ми́лость.

Ки́ими добропе́сненными ле́потами/ восхва́лим благови́дную архиере́йских исправле́ний красоту́,/ столпа́ Це́ркве неподви́жима,/ досточу́днаго Ипа́тия, Га́нгрскаго первоседа́теля,/ свети́ло, вселе́нную просвеща́ющее?/ Богоподража́тельным бо свои́м житие́м/ всего́ ми́ра удиви́в концы́./ Его́же просла́ви всю́ду Христо́с Бог наш,/ да́руяй нам ве́лию ми́лость.

Ки́ими благоглаго́ливыми слове́с устна́ми/ восприве́тствуем святи́теля, Богоно́снаго отца́ Ипа́тия?/ За Христа́ кре́пкаго страда́льца,/ Богопропове́дника благочести́выя ве́ры,/ ересе́й мглы разгоня́ющаго,/ чудеса́ пресла́вно сотвори́вшаго,/ коне́чное насле́дие в Небесе́х восприя́вшаго,/ и отту́ду прося́щим его́/ в по́льзу исполня́ет проше́ния от Христа́ Бо́га,/ иму́щаго ве́лию ми́лость.

Сла́ва, глас 5:

Прииди́те, вси лю́дие,/ ве́сь круг земны́й населя́ющии,/ Богому́дренным смы́слом к Бо́гу Творцу́ вознеси́теся/ и всеусе́рдно Его́ просла́вите,/ я́ко дарова́л в мир безме́зднаго врача́/ во исцеле́ние ве́рных,/ в тве́рдость, предста́тельство от враго́в злосла́вных,/ всепреподо́бнаго отца́ Ипа́тия,/ архипа́стыря всему́драго,/ Ду́ха Бо́жия трубу́ всезлату́ю,/ воструби́вшаго и́стинное благоче́стие,/ основа́тися Трисо́лнечным Божество́м,/ е́же сла́вити О́но/ и пе́рваго достоя́ния в Небе́сном Ца́рстве всем сподо́битися./ К такову́ всече́стну архиере́ю возопии́м:/ Богозда́нный Правосла́вия щи́те,/ правосла́вных от вся́ких бед защити́,/ на вся враги́ побе́ды да́руй,/ архиере́ем блаже́нным в благоле́пное це́рквей Бо́жиих благострое́ние/ да́ждь свы́ше Небе́сную по́мощь/ и всем лю́дем ве́чное спасе́ние испроси́/ у Жизнопода́теля Христа́ Го́спода,/ спаса́ющаго род челове́ческий.

И ны́не, Богоро́дичен, глас то́йже:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и Прибе́жище душ на́ших.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на свята́го пе́сни 3-я и 6-я. Проки́мен, глас 1: Уста́ моя́ возглаго́лют прему́дрость/ и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси, живу́щии по вселе́нней. Апо́стол ко Евре́ем, зача́ло 311. Аллилу́ия, глас 2: Уста́ пра́веднаго поуча́тся прему́дрости, и язы́к его́ возглаго́лет суд. Стих: Зако́н Бо́га его́ в се́рдце его́, и не за́пнутся стопы́ его́. Ева́нгелие от Луки́, зача́ло 67. Прича́стен: В па́мять ве́чную:

Моли́тва благода́рственная свято́му равноапо́стольному священному́ченику Ипа́тию

Трисо́лнечнаго Све́та светоза́рная звездо́, вводя́щая в мир Трисо́лнечный Свет апо́стольскими твои́ми, Богоева́нгельскаго пропове́дания священноуче́нии, священному́чениче, иера́рше Христо́в, Богоблаже́нне Ипа́тие. Ты прия́л еси́ от Святы́я Тро́ицы равноапо́стольную благода́ть, серафи́мскую в горе́честии61 к Бо́гу любо́вь, я́коже верхо́внейший апо́столов Петр, и херуви́мскую многоочи́тую во уче́нии прему́дрость, я́коже вторы́й Па́вел. Просвети́вый прему́дрым твои́м благоче́стия уче́нием тьмочи́сленныя наро́ды, присноусе́рдно подража́я всеме́рнаго Учи́теля, Го́спода Бо́га и Спа́са на́шего Иису́са Христа́. Его́же ра́ди всесмире́нно молю́ богоподража́тельное оте́ческое твое́ благоутро́бие: при́зри ми́лостивно богосве́тлыма твои́ма на су́щее недосто́инство мое́, я́ко всечадолюби́вый по Бо́зе оте́ц, и присноусе́рдный на́шего спасе́ния наста́вник, и всех в Го́рних правонеизме́нный строи́тель, адама́нтная Правосла́вию стена́ и пресве́тлый столп, вводя́щий второно́ваго Изра́иля во всепресве́тлейший Го́рний Сио́н. Потщи́ся вско́ре помоществова́ти на бра́нех во́инству на́шему. Проси́ же при́сно у Святы́я Тро́ицы всем правосла́вным христиа́ном ми́ра и тишины́, душе́внаго спасе́ния и многоле́тняго в телеси́ здра́вия, возду́ха благорастворе́ния, земли́ благопло́дие, непло́дствующим благоча́дие, и в зако́не Госпо́днем воспита́ния, и всех благи́х умноже́ния. А по́сле жития́ коему́ждо жи́зни сея́ сподо́би святы́ми твои́ми моли́твами улучи́ти христиа́нскую кончи́ну бла́гу, непосты́дну и ми́рну, со всепредо́брейшим испове́данием и со прича́стием Святы́х Безсме́ртных Небе́сных и Животворя́щих Христо́вых Та́ин, и с молитвома́слием62 безпрепя́тное возду́шных мыта́рств преше́ствие, насле́дие со святы́ми всера́достныя присносу́щныя жи́зни, в не́йже ку́пно со А́нгельскими чи́нми непреста́нныя хвалы́ вознесе́м Безнача́льному Отцу́ со Единоро́дным Его́ Сыно́м и с Пресвяты́м, Благи́м и Животворя́щим Его́ Ду́хом, и тебе́, вели́кое твое́ оте́ческое ми́лостивое заступле́ние, ны́не, и при́сно, и во ве́ки веко́в. Ами́нь.

Извеще́ние о сочине́нии слу́жбы сия́.

Благоволе́нием Всетворя́щия Вины́, Бо́га Отца́ и Сы́на и Свята́го Ду́ха, во сла́ву Его́ Боже́ственную, в че́сть же Преблагослове́нныя Пречи́стыя Де́вы Богоро́дицы Мари́и и в похвалу́ свята́го отца́ на́шего Ипа́тия чудотво́рца, епи́скопа Га́нгрскаго, слу́жба сия́ вся, какова́ зде обрета́ется: стихи́ры и кано́н, кондаки́ и и́косы, счини́ся и написа́ся но́во, всем Боголюби́вым душа́м в по́льзу, и́же хотя́т твори́ти плод доброде́телей и ражда́ти дух спасе́ния своего́, спе́ющий в жизнь ве́чнаго и всера́достнаго блаже́нства, и́бо честву́ющии сего́ отца́ Ипа́тия ве́рою в проше́ниях свои́х не погреша́т наде́жды своя́. В ца́рствующем гра́де Москве́, во пречестне́й и вели́кой оби́тели Арха́нгела Михаи́ла и во святы́х отца́ на́шего Алекси́я, Всеросси́йскаго митрополи́та и чудотво́рца, в монастыре́ Чу́дове. Мирозда́ния 7215 ле́то, Рождества́ же во пло́ти Го́спода Иису́са Христа́ 1707, в ме́сяце ма́рте, трудоде́йствова в сей святе́й оби́тели, обита́лся ху́ждший иеромона́х Карио́н Исто́мин, смотри́тель бы́вший ца́рственныя типогра́фии.