Ина служба, общая преподобнаго Симеона Мироточиваго и сына его, святителя Саввы Перваго, архиепископа Сербскаго

НА ВЕЛИ́ЦЕЙ ВЕЧЕ́РНИ

Блаже́н муж: На Го́споди, воззва́х: стихи́ры на 8, глас 4.

Подо́бен: Я́ко до́бля:

Доброде́телей Боже́ственною колесни́цею/ восходя́, Са́вво сла́вне, к Бо́гу,/ Его́же возлюби́л еси́,/ восте́кл еси́ все́ю душе́ю и се́рдцем твои́м,/ и Его́ озаре́нии осия́ем всегда́,/ о́гненный столп показа́лся еси́./ Его́же моли́ от тли и бед изба́витися/ ве́рою соверша́ющим всечестну́ю па́мять твою́.

Просия́в я́ко со́лнце,/ луча́ми слове́с твои́х освети́л еси́ вся концы́ земли́,/ и Се́рбию озари́л еси́ луча́ми благода́ти,/ догма́тствуя благоче́стно и уча́, приснохва́льне,/ Еди́наго Го́спода во двою́ естеству́ Сего́ почита́ти,/ я́ко Влады́ку вся́ческих со Отце́м и Ду́хом.

Просвеще́н Боже́ственным Ду́хом, Симео́не всеблаже́нне,/ сыно́вьим стопа́м после́довал еси́,/ и на Святе́й Горе́ бы́ли есте́, чу́днии,/ Бо́жий дом и благоприя́тен в ней воздви́гше,/ в не́мже ны́не пою́т мона́шествующих мно́жества,/ хва́лящии ны́не вас, отцы́ Боже́ственнии, и Христа́ велича́ющии.

Вся́кую доброде́тель усе́рдно возде́лав, Богодухнове́нне,/ и пома́зався Ду́хом, пома́занием святы́м,/ свяще́нник свяще́ннейший я́ве показа́лся еси́/ и па́стырь и́стиннен и ве́ры побо́рник./ Сего́ ра́ди вся Це́рковь пра́зднует па́мять твою́,/ свяще́нно соверша́ющи и Спа́са сла́вящи.

Сла́ва, глас 6:

Е́же по о́бразу соблю́дше невреди́мо,/ ум вла́дыку на стра́сти па́губныя по́стнически поста́вльше,/ на е́же по подо́бию я́ко мо́щно возшли́ есте́:/ му́жески бо естество́ пону́дивше,/ потща́стеся ху́ждшее покори́ти лу́чшему,/ и плоть порабо́тити ду́ху./ Те́мже мона́шествующим яви́стеся верх,/ жи́телие пусты́ннии, благотеку́щих обучи́телие,/ пра́вила доброде́тели изве́стнейшая,/ и ны́не на Небесе́х, зерца́лом разреши́вшимся,/ отцы́ на́ши Богому́дрии, чи́сте зри́те Святу́ю Тро́ицу,/ моля́щеся несре́дственне/ о и́же ве́рою и любо́вию чту́щих вас.

И ны́не, Богоро́дичен, глас то́йже: Кто Тебе́ не ублажи́т:

Вход. Проки́мен дне, и чте́ния преподо́бническая.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всеплодие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися на Него разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гови быв, возлю́блен бы́сть,/ и живы́й посреде́ гре́шник, преста́влен бысть./ Восхище́н бысть, да не зло́ба измени́т ра́зума его́/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Господеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (гла́вы 5 и 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка облако́в, на наме́рение полетя́т./ И, от каменоме́тныя я́рости испо́лнь, паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к./ Я́ко дана́ есть от Го́спода держа́ва вам/ и си́ла от Вы́шняго.

На лити́и стихи́ры самогла́сны, глас 4:

Преподо́бнии отцы́,/ доброде́тели усе́рдно возде́лавше,/ орга́ны Свята́го Ду́ха яви́стеся,/ и от Него́ прии́мше чуде́с де́йство,/ научи́сте челове́ки презира́ти наслажде́ния./ Ны́не же Боже́ственным Све́том чи́сте осиява́емии,/ просвети́те и на́ша помышле́ния, отцы́ треблаже́ннии.

В преми́рныя ски́нии дух твой,/ святи́телю Са́вво, о́тче му́дре,/ Христо́с Бог досто́йно прия́:/ ты бо Тро́ицы пропове́дник показа́лся еси́,/ Еди́ное Божество́ Сию́ воспе́в я́ве,/ де́йственное хоте́ние по Естеству́ Еди́ному Всемо́щному,/ подо́бяся апо́столов и отце́в уче́нию в ми́ре,/ те́мже чуде́с де́йство Христо́с ны́не тебе́ да́рует,/ утвержда́я твоя́ словеса́./ Сего́ ра́ди, воспева́юще твое́ днесь преставле́ние,/ правосла́вно сла́вим просла́вльшаго тя Го́спода.

Глас 6:

Пра́здник ра́достен в конце́х днесь,/ свята́я па́мять Богоно́сных отце́в, Симео́на и Са́ввы:/ сего́ ра́ди Се́рбия сора́дуется, пра́зднуя в пе́снех и в пе́ниях./ Пра́зднуим же и мы, бра́тие, ра́достно,/ всечестну́ю их па́мять соверша́юще во хвале́бных пе́ниях, и к ним возопии́м:/ ра́дуйся, Симео́не сла́вне и таи́нниче всех Влады́ки Христа́ Бо́га на́шего;/ ра́дуйся, Са́вво Богодухнове́нне, пропове́дниче ве́ры и учи́телю вселе́нныя./ Я́ко иму́ще дерзнове́ние, чето́ светоза́рная,/ Христа́ Бо́га на́шего моли́те поми́ловати ду́ши на́ша.

Сла́ва, глас 5:

Преподо́бнии отцы́,/ глас Ева́нгелия Госпо́дня услы́шавше,/ мир оста́вили есте́,/ бога́тство и сла́ву в ничто́же вмени́вше,/ тем всем вопия́ли есте́:/ возлюби́те Бо́га, и обря́щете благода́ть ве́чную./ Ничто́же предпочти́те па́че любве́ Его́,/ да егда́ прии́дет в сла́ве Свое́й,/ обря́щете поко́й со все́ми святы́ми./ И́хже моли́твами, Христе́,/ сохрани́ и спаси́ ду́ши на́ша.

И ны́не, Богоро́дичен, глас то́йже:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу и прибе́жище душ на́ших.

На стихо́вне стихи́ры, глас 5:

Ра́дуйся, путеводи́телю слепы́х,/ наста́вниче ю́ношества, сла́вне,/ ста́рых же́зле, блужда́ющих па́стырю,/ гре́шников исправле́ние, лу́же благоуха́ннейший,/ мирополо́жниче Ду́ха,/ златостру́йная реко́, необурева́емое приста́нище,/ Святы́я Тро́ицы хра́ме,/ па́мятствовавших, пою́ще тя,/ избавля́яй от скорбе́й и боле́зней и ве́чнаго муче́ния,/ Христа́ моля́й, да́рующаго ми́ру ве́лию ми́лость.

Стих: Честна́ пред Го́сподем/ смерть преподо́бных Его́.

Ра́дуйся, благоче́стия свети́льниче,/ Це́ркве све́тлое, о́тче, со́лнце,/ сла́во мона́шествующих, пра́вило молча́ния,/ Богомы́слия и де́лания учи́телю изря́днейший,/ святи́телю Богоглаго́ливе,/ прему́дрости и ве́дения сокро́вище, Са́вво сла́вне,/ Тро́ицы селе́ние, орга́не Ду́ха, псалти́рю одушевле́нне,/ уста́ Госпо́дня, изводя́щая от недосто́йнаго досто́йное./ Христа́ у́бо моли́ дарова́ти душа́м на́шим ве́лию ми́лость.

Стих: Блаже́н муж, бо́яйся Го́спода,/ в за́поведех Его́ восхо́щет зело́.

Столп, светя́щийся, доброде́тельми утвержде́нный/ и о́блак осеня́ющий яви́лся еси́ су́щим в пусты́ни,/ к Не́бу от земли́ к Бо́гу взира́ющих предводя́яй,/ креста́ жезло́м разве́рзый мо́ре страсте́й,/ устремле́ние же Амали́ка обрати́вый в бе́гство./ Невозвра́тный Небе́сный путь обре́л еси́, Богоблаже́нне,/ и неизрече́нную часть со Безпло́тными у Престо́ла,/ Ему́же, Симео́не, предстоя́,/ Христа́ у́бо моли́, дарова́ти душа́м на́шим ве́лию ми́лость.

Сла́ва, глас 8:

Мона́хов мно́жества/ наста́вники вас почита́ем, отцы́ Боже́ственнии,/ ва́шею бо стезе́ю вои́стинну пра́во ходи́ти позна́хом./ Блаже́ни есте́, Христу́ рабо́тавшии/ и вра́жию си́лу обличи́вшии,/ А́нгелов собесе́дницы, преподо́бных соприча́стницы и пра́ведных./ С ни́миже моли́теся Го́споду,/ поми́ловатися душа́м на́шим.

И ны́не, Богоро́дичен, глас то́йже: Безневе́стная Де́во:

Тропа́рь преподо́бных, глас 1:

Оби́тели Хиланда́рския свяще́нных строи́телей/ и Афо́на свети́льники, Се́рбии похвалу́,/ Симео́на велича́йшаго, преподо́бных ле́поту,/ и род его́ чу́дный, святи́теля,– глаго́лю,– Са́вву,/ прииди́те согла́сно почти́м, глаго́ля:/ моли́те Христа́ Бо́га/ о па́стве ва́шей, блаже́ннии,/ и о е́же Це́ркви свобо́дней бы́ти от обстоя́ний.

Ин тропа́рь, глас 1:

И́же те́плыя засту́пники в ско́рбех и напа́стех иму́ще,/ Симео́на Богоно́снаго и Са́вву первосвяти́теля,/ припаде́м к ни́ма с ве́рою,/ я́ко да моли́твами их от напа́стей избавля́еми,/ по до́лгу благове́рно Спа́са и Бо́га просла́вим, глаго́люще:/ сла́ва Да́вшему вам кре́пость,/ сла́ва Просла́вльшему вы чудесы́,/ сла́ва Изба́вльшему нас от скорбе́й моли́твами ва́шими.

НА У́ТРЕНИ

По 1-м стихосло́вии седа́лен, глас 8:

Па́стырское разуме́ние восприя́в, мона́шествующих сто́лпе и стено́,/ до́бре упа́сл еси́ су́щия разу́мныя па́ствы твоея́:/ возлюби́в бо Христо́во Боже́ственное уче́ние,/ в них сло́во посе́ял еси́, всему́дре,/ отсю́ду же и поревнова́ти А́нгельскому жи́тельству подви́гл еси́ вся,/ единоду́шно сла́вити Бо́га Богому́дренно,/ Са́вво о́тче наш, моли́ Христа́ Бо́га грехо́в разреше́ние дарова́ти/ пра́зднующим любо́вию святу́ю па́мять твою́.

Сла́ва, то́йже, и ны́не, Богоро́дичен:

Небе́сную две́рь и киво́т, всесвяту́ю го́ру, светоза́рный о́блак воспои́м,/ Небе́сную ле́ствицу, слове́сный рай,/ Е́вино избавле́ние, вселе́нныя всея́ вели́кое сокро́вище,/ я́ко спасе́ние в ней соде́лася ми́рови, и оставле́ние дре́вних согреше́ний./ Сего́ ра́ди вопие́м Ей:/ моли́ Сы́на Твоего́ и Бо́га прегреше́ний оставле́ние дарова́ти/ благоче́стно покланя́ющимся пресвято́му Рождеству́ Твоему́.

По 2-м стихосло́вии седа́лен, глас 4:

Гла́су Го́спода твоего́ после́довал еси́,/ мир оста́вив и сла́дкая ми́ра, Симео́не Богому́дре:/ великоду́шно поне́сл еси́ тяготу́ пусты́ни,/ по́лчища де́монов му́жественно отгна́в./ Сего́ ра́ди па́мять твою́ всегда́ пе́сньми пра́зднуем ве́рно.

Сла́ва, то́йже. И ны́не, Богоро́дичен:

Обнови́ла еси́, Чи́стая, Боже́ственным Рождеством Твои́м,/ истле́вшее во страсте́х земноро́дных ме́ртвенное существо́,/ и воздви́гла еси́ вся от сме́рти к животу́ нетле́ния:/ те́мже Тя по до́лгу бла́жим вси, Де́во, препросла́вленная/ я́коже прорекла́ еси́.

По полиеле́и седа́лен, глас 3:

Столпи́ непоколеби́мии благоче́стия,/ основа́ние Богодухнове́нное Це́ркве яви́стеся, отцы́ сла́внии:/ всея́ бо Се́рбии концы́ просвети́сте сло́вом ве́ры,/ Са́вво сла́вне, с Симео́ном Богому́дрым,/ моли́те Христа́ Бо́га дарова́ти нам ве́лию ми́лость.

Сла́ва, то́йже. И ны́не, Богоро́дичен, глас то́йже:

Боже́ственная ски́ния была́ еси́,Сло́ва,/ Еди́на Пречи́стая Де́во Ма́ти, чистото́ю А́нгелы превозше́дшая,/ па́че всех мене́ персть бы́вша, оскверне́на плотски́ми прегреше́ньми,/ очи́сти моли́тв твои́х Боже́ственными вода́ми,/ подаю́щи, Чи́стая, ве́лию ми́лость.

Степе́нна. 1-й антифо́н 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех,/ я́же воздаде́ ми? Таже: Вся́кое дыха́ние: Ева́нгелие от Матфе́я, зача́ло 43. Сла́ва: Моли́твами преподо́бных Твои́х: И ны́не: Моли́твами Богоро́дицы: Поми́луй мя, Бо́же:

По 50-м псалме́ стихи́ра самогла́сна, глас 6:

Преподо́бнии отцы́,/ во всю зе́млю изы́де веща́ние исправле́ний ва́ших,/ те́мже на Небесе́х обрели́ есте́ мзду трудо́в ва́ших,/ де́монския погуби́ли есте́ полки́,/ и А́нгельския дости́гли есте́ чи́ны,/ и́хже житию́ непоро́чно поревнова́ли есте́,/ дерзнове́ние иму́ще ко Христу́ Бо́гу,/ мир испроси́те душа́м на́шим.

Кано́н Богоро́дицы, со ирмосо́м на 6, и святы́х два кано́на на 8. Кано́н святы́х, его́же краестро́чие по алфави́ту. Глас 8.

Песнь 1

Ирмо́с: Колесницегони́теля фарао́ня погрузи́,/ чудотворя́й иногда́/ Моисе́йский жезл крестообра́зно порази́в/ и раздели́в мо́ре,/ Изра́иля же беглеца́, пешехо́дца, спасе́,/ песнь Бо́гови воспева́юща.

Восто́к доброде́телей быв, со́лнце незаходи́мое, святи́телю о́тче,/ ны́не восхваля́ющему тя и прося́щему воспе́ти тя,/ твои́ми моли́твами да́руй ми досто́йно,/ да воспою́ тя, Са́вво святи́телю, о́тче наш.

Ца́рское презре́в благоро́дие, бога́тство и сла́ву, мудре,/ и взем крест, о́тче, на ра́мена, Христу́ после́довал еси́,/ чи́стым по́мыслом Ему́ сле́дуя, преподо́бне Са́вво святи́телю изря́днейший.

Земледе́лав доброде́тельми и труды́,/ се́мя Боже́ственное в душа́х, о́тче, ве́рных посе́ял еси́,/ и ны́не стори́чествующий клас Боже́ственных дел/ возда́л еси́ земледе́лателю и Творцу́, Симео́не, ве́рных похвало́.

Богоро́дичен: Богоявления Тебе́ ра́ди удосто́ися, Богоблагода́тная, сме́ртное естество́,/ Неодержи́маго бо во чре́ве Твое́м обита́вшаго,/ па́че ума́ и сло́ва, Благослове́нная, родила́ еси́, пребыва́ющи Де́ва, Чи́стая.

Ин кано́н о́бщий святы́м кти́тором Се́рбским Симео́ну Мирото́чцу и святи́телю Са́вве чудотво́рцу.

Пи́сан кир Феодо́сием священнои́ноком. Глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся све́тло торжеству́я,/ и воспою́, ра́дуяся, Тоя́ чудеса́.

Отве́рзи уста́ моя́, благи́х Пода́телю, Христе́,/ и, прие́м по́мощь, Ду́хом сло́во благода́рственно отры́гну моле́бней па́мяти Твои́х уго́дник,/ прие́м сих по́мощь, воспою́, ра́дуяся, Твою́ благода́ть.

Отве́рзи устне́ свои́ ми́лостивне/ и ру́це на мольбу́ воздежи́ к Бо́гу всех и Влады́це, Симео́не,/ изба́вити ста́до твое́ от плене́ния и озлобле́ния,/ да тя почита́ем, воспева́юще твоя́ чудеса́.

Отве́ргся, Са́вво, плотски́х роди́телей,/ с ни́ми духо́вне Тро́ицы – всех Бо́гу, усыни́лся еси́,/ Е́йже ны́не предстоя́ще,/ рабы́ своя́ изба́вите наси́лия сопроти́вных и враг обстоя́ния.

Богоро́дичен: Чистоты́ сокро́вище, ра́дуйся,/ Е́юже от паде́ния на́шего воста́хом./ Ра́дуйся, сладкоуха́нный кри́не, Влады́чице, ве́рных благоуха́яй,/ кади́ло благово́нное и ми́ро многоце́нное.

Песнь 3

Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.

Да́ры светода́тельными озаре́н, преподо́бне,/ де́монский мрак всеце́ло отгна́л еси́/ и свет возсия́л еси́ в се́ни сме́ртней седя́щим,/ те́мже тя, Са́вво, почита́ем.

На Го́спода всю, Боже́ственнии преподо́бнии, возложи́вше наде́жду,/ ника́коже поколеба́стеся, е́же отпа́сти от лу́чшаго стоя́ния,/ но зако́нно соверши́сте Боже́ственное тече́ние ума́ пра́востию.

Жития́ чи́стаго улучи́ти потща́вшеся,/ плоть на земли́, Богоно́снии, умертви́ли есте́,/ и ны́не Безсме́ртную часть насле́довали есте́,/ Христу́, блаже́ннии, соца́рствующе.

Богоро́дичен: В сень сме́ртную впав, Чи́стая, Тя призыва́ю,/ Боже́ственную по́мощь Твою́ ско́ро посли́ ми,/ я́ко да спасе́н быв,/ досто́йно любо́вию ублажа́ю Тя, я́коже прорекла́ еси́.

Ин

Ирмо́с: Твоя́ песносло́вцы, Богоро́дице,/ живы́й и незави́стный исто́чниче,/ лик себе́ совоку́пльшия духо́вно утверди́,/ в Боже́ственней Твое́й сла́ве/ венце́в сла́вы сподо́би.

Твои́х раб, Благоде́телю, Животворя́щим Уте́шителем Ду́хом Симео́на и Са́вву просла́вим,/ лик, си́ми духо́вне со́бранный, огради́ Боже́ственным покро́вом/ и благода́ти сла́вы Твоея́ сподо́би.

Твое́ достоя́ние, Симео́не, предвари́ изба́вити от расхище́ния/ зверови́дно на них устремля́ющихся,/ и воста́ния страсте́й на́ших твои́ми моли́твами укроти́,/ и благода́рне твоя́ чудеса́ сла́вити сподо́би.

Твои́м дерзнове́нием, Са́вво, и́же ко Христу́,/ не преста́й моля́ о воспева́ющих тя,/ и в ли́ке сих устро́ити спаса́емых/ и нападе́ния сопроти́вных изба́витися сим сподо́би.

Богоро́дичен: Ра́дуйся, две́ре еди́на,/ Е́юже Сло́во про́йде Еди́но,/ вереи́ и врата́ а́дова, Влады́чице, рождество́м Твои́м сокруши́вшая./ Ра́дуйся, Боже́ственный вхо́де спаса́емых, Богоневе́сто.

Ин конда́к, глас 4:

Днесь Симео́н с Са́ввою, блаже́ннии, в ду́се прише́дше,/ спаса́ют от обстоя́ний па́ству их:/ сии́ бо Тро́ицу пропове́даша Еди́наго Бо́га,/ Це́ркве яви́шася утвержде́ние,/ в преподо́бных Мироточи́вый и во святы́х чудотво́рец:/ сии́ бо и во бра́нех необори́мии защи́тницы показа́шася,/ Афо́на похвала́ и наро́да Се́рбскаго кре́пость.

Седа́лен, глас 8:

Ду́шу преда́вше любви́ Христо́вы,/ земна́я вся оста́вивше му́дре,/ всели́стеся, преподо́бнии, в пусты́нях и гора́х:/ вкуси́вше бо от дре́ва ве́дения, сла́внии,/ а́ки от вод таи́нницы, А́нгельски возсия́ли есте́./ Те́мже тьму пло́тскую превозше́дше, мрак де́монский отгна́ли есте́,/ блаже́ннии Симео́не и Са́вво сла́внии:/ моли́те Христа́ Бо́га прегреше́ний оставле́ние дарова́ти/ любо́вию пра́зднующим святу́ю па́мять ва́шу.

Сла́ва, то́йже. И ны́не, Богоро́дичен:

Я́ко Всенепоро́чная Неве́сто Творца́,/ я́ко Неискусому́жная Ма́ти Изба́вителя,/ прия́телище я́ко су́щи Уте́шителя, Всепе́тая,/ беззако́нию мя су́ща скве́рно жили́ще,/ и де́монов игра́лище, в ра́зуме бы́вша,/ потщи́ся от сих злоде́йствия мя изба́вити,/ све́тло жили́ще доброде́тельми соде́лавши,/ Светода́тельная и Нетле́нная, разжени́ о́блак страсте́й и вы́шняго прича́стия сподо́би,/ и Све́та Невече́рняго, моли́твами Твои́ми.

Песнь 4

Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,/ и просла́вих Твое́ Божество́.

Наи́тие Боже́ственнаго Ду́ха/ яви́ вы свети́льники, чудесы́ сия́ющия,/ Симео́не и Са́вво всехва́льнии.

Боже́ственным озаре́нием вверя́еми,/ яви́стеся, а́ки огни́/ просвеща́юще ве́рных всех по́мыслы, всеблаже́ннии.

Врачева́ний благода́ть Влады́ка всех вам дарова́/ и власть изгоня́ти нечи́стыя ду́хи, отцы́ досточу́днии.

Богоро́дичен: В не́дрех Седя́й, Чи́стая, О́тчих,/ ны́не в Твои́х не́дрех, Чи́стая, почи́,/ тле́нное естество́ исправля́я.

Ин

Ирмо́с: Седя́й в сла́ве на престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Седя́щаго в Вы́шних и Зря́щаго смире́нных,/ Симео́не Богоно́се и Са́вво святи́телю, приле́жно о нас умоли́те/ уще́дрити смире́ние на́ше и лю́тых изба́вите нас и спасти́ вопию́щих:/ сла́ва си́ле Твое́й, Го́споди.

Седа́лище мирска́го влады́чествия оста́вив,/ смире́нием Влады́це своему́ после́довал еси́,/ те́мже и бога́тыми дарова́ньми просла́вил тя есть,/ Его́же непреста́нно, о́тче, моли́,/ ста́до твое́ от расхища́ющих е изба́вити.

Сел еси́ на престо́ле высо́це святи́тельства/ и упа́сл еси́ апо́стольски ста́до свое́/ и оби́тель и́ноков соста́вив, Боже́ственными уче́ньми утверди́л еси́,/ и́хже и ны́не моли́твами свои́ми сохрани́ невреди́мы от супоста́тных нахожде́ний.

Богоро́дичен: Тя, испле́тшую ми́рови нерукоплете́нный вене́ц, песносло́вим,/ ра́дуйся, Тебе́, Де́во, зову́ще:/ храни́лище всех, и огражде́ние, и утвержде́ние, и свяще́нное прибе́жище.

Песнь 5

Ирмо́с: Вску́ю мя отри́нул еси́/ от лица́ Твоего́, Све́те незаходи́мый,/ и покры́ла мя есть чужда́я тьма, окая́ннаго,/ но обрати́ мя, и к све́ту за́поведей Твои́х/ пути́ моя́ напра́ви, молю́ся.

Благода́тныя струи́ изгоня́ющия неду́ги,/ и власть на ду́хи нечи́стыя дарова́ тебе́ Христо́с, му́дре,/ естество́ бо, о́тче, победи́в,/ па́че естества́ даро́в Ду́ха прича́стник был еси́.

Чи́стым умо́м и души́ кре́постию, Богоблаже́нне,/ вра́жия вся наве́ты на зе́млю низве́ргл еси́,/ крест, я́ко ски́петр, восприи́м на ра́мена со Са́ввою, всеблаже́ннии.

Со Безпло́тными, с преподо́бными же, и святи́тели,/ со апо́столи соверша́ем ва́ше торжество́,/ Богоно́се Са́вво со отце́м твои́м Симео́ном,/ согла́сно всегда́ вас ублажа́юще.

Богоро́дичен: Моля́щи не преста́й о воспева́ющих Тя, Свята́я Влады́чице,/ Сы́на Твоего́ и Бо́га и Влады́ку и Го́спода,/ я́ко да даст всем нам оставле́ние грехо́в/ и ра́йских благ наслажде́ние.

Ин

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо Неискусобра́чная Де́во,/ име́ла еси́ во утро́бе над все́ми Бо́га,/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Удиви́15 на нас ми́лости Твоея́ бога́тство, Го́споди, моли́твами Твои́х уго́дник,/ Ты бо, Благосе́рде Влады́ко, прие́млеши тех, приле́жно моля́щихся о нас,/ и, от бу́ри избавля́я, смире́ние подава́еши.

Удивле́н быв во вся́ческих: в смире́нии высокотво́рнем и мироизлия́нии оби́льнем,/ ты бо, чудотво́рче преподо́бне, прие́млеши всех, ве́рою притека́ющих к тебе́,/ и, моли́твами твои́ми от бед избавля́я, смире́ние подава́еши.

Удиви́л еси́ всяк слух па́че естества́ чудотворе́ньми твои́ми,/ звери́ным обузда́нием и соста́ва16 повинове́нием, и еще́ же и А́нгелу повеле́нием,/ ты же, вели́кий святи́телю, и на нас покажи́ чудеса́ твоя́/ и, моли́твами твои́ми от ну́ждных изба́вив, сми́рение пода́ждь.

Богородичен: Простра́нное селе́ние Сло́ва, ра́дуйся, Пречи́стая,/ сосу́де, Боже́ственный би́сер произве́дшая:/ ра́дуйся, всечу́дное всех к Бо́гу примире́ние,/ блажа́щих Тя, Богоро́дице, всегда́.

Песнь 6

Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х, и услы́ши мя,/ Бо́же спасе́ния моего́.

Исто́чник исцеле́ний животворя́щий/ вои́стинну гроб твой соде́лася, Симео́не,/ ему́же предстоя́ще вси, ве́рнии, исцеле́ния восприе́млем.

Житие́ твое́ знамени́то, сла́ва, о́тче, ве́чна,/ путь же твой све́тел,/ кончи́на честна́ пред Го́сподем Бо́гом твои́м, Са́вво сла́вне.

Отве́ргл еси́ су́щую на земли́ честь и сла́ву легкоги́бнущую,/ ве́чный же живо́т и достоя́ние непоколеби́мое, всеблаже́нне, восприя́л еси́,/ в Небе́сных селе́ниях водвори́вшись незы́блемейше.

Богоро́дичен: Вседержи́телевою си́лою вся Нося́й,/ во объя́тиях Твои́х, я́ко сме́ртный носи́м бе, Де́во Всенепоро́чная,/ избавля́я нас от руки́ вра́жия.

Ин

Ирмо́с: Возопи́ прообразу́я погребе́ние тридне́вное/ проро́к Ио́на, в ки́те моля́ся:/ от тли изба́ви мя, Иису́се, Царю́ Сил.

Возопи́те ко Творцу́ и Бо́гу непреста́нно оби́тель ва́шу непоколеби́му сохрани́ти,/ ю́же соста́вльша, в ней по́стнически подвиза́стася,/ я́ко при́сна уго́дника Иису́су, Царю́ Сил.

Взыва́ем к тебе́, неключи́мая17 ча́да твоя́:/ погреби́ в ро́ве па́губнем ра́тующих нас мы́сленныя и чу́вственныя враги́,/ и от тли и напа́стей моли́ возвести́ нас Иису́са, Царя́ Сил.

Взыва́я не преста́й о нас,/ Ему́же Же́ртвы Безкро́вныя прине́сл еси́, я́ко и́стинен святи́тель,/ сохрани́ти нас от обы́шедших зол невреди́мы Иису́су, Царю́ Сил.

Богоро́дичен: Ра́дости вина́, облагодати́ наш по́мысл, е́же зва́ти Тебе́:/ ра́дуйся, неопали́мая Купино́,/ о́блаче всесве́тлый, ве́рныя непреста́нно осеня́ющий.

Конда́к, глас 2:

Го́рнюю жизнь возлюби́вше, сла́внии,/ жизнь су́щую на земли́ презре́сте./ Сего́ ра́ди в вы́шних со А́нгелы всегда́ лику́юще,/ моли́те о всех нас.

И́кос:

Кто возмо́жет досто́йно похвали́ти/ твои́х натрижне́ний и по́двигов и трудо́в мно́гих сла́ву и вели́чие?/ Но моли́твами твои́ми спомози́ ми, и даждь ми благода́ть Ду́ха,/ я́ко да изреку́ твоя́ боре́ния ве́рно,/ и воспою́ па́че сло́ва си́лу твою́ и кре́пость, всеблаже́нне,/ е́юже кова́рнаго врага́ посрами́л еси́,/ Са́вво Богоно́се с Симео́ном Богому́дрым,/ не преста́йте моли́ти о всех нас.

Песнь 7

Ирмо́с: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще:/ благослове́н еси́, Го́споди Бо́же, во ве́ки.

Изба́вите от вся́каго вре́да и плене́ния вра́жескаго ва́рварскаго,/ прибега́ющия к ва́шей Боже́ственней защи́те,/ о Симео́не хва́льне с Са́ввою, во ве́ки.

Те́ло, ду́шу же и се́рдце, и по́мысл и ум очи́стивше,/ в Небе́сный ны́не преста́вистеся бра́чный черто́г,/ о Симео́не хва́льне с Са́ввою, во ве́ки.

Жезл си́лы держа́ – спаси́тельный крест, Са́вво до́бле,/ испыта́ния терпели́во подъе́млеши, великоду́шно воспева́я:/ благослове́н еси́, Го́споди Бо́же, во ве́ки.

Богоро́дичен: Ты мя спаси́, Де́во,/ и исхити́ из руки́ борю́щаго и кова́рнаго врага́ человекоуби́йцы,/ я́ко да пою́, спаса́емый, Твою́ сла́ву во ве́ки.

Ин

Ирмо́с: Спасы́й во огни́ Авраа́мския Твоя́ о́троки,/ и халде́и уби́в/ я́же пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Спасе́нию хода́тая нам, Авраа́му подо́бнаго,/ Симео́на приво́дим Ти, Влады́ко,/ и, я́ко друга́го Исаа́ка, Са́вву священнонача́льника,/ на Горе́ Святе́й в же́ртву прине́сшася Тебе́,/ и́хже моли́твами от бед изба́ви нас, вопию́щих:/ препе́тый благослове́н Бог оте́ц на́ших.

Спасе́ния наде́жде да не погреши́м,/ наде́ющеся сие́ тобо́ю прия́ти, преподо́бне,/ но да получи́м моли́твами твои́ми страсте́м облегче́ние и душа́м спасе́ние, взыва́юще:/ препе́тый оте́ц на́ших Бо́же, благослове́н еси́.

Спасы́й себе́ мирска́го пристра́стия крестоле́пно в пусты́ню Христу́ после́довал еси́,/ в не́йже во и́мя Того́ Пречи́стыя Ма́тере оби́тель соста́вив,/ мно́жество спаса́емых Тому́ приве́л еси́,/ е́йже, ны́не моли́ Его́, сохрани́тися неразори́ме во ве́ки.

Богоро́дичен: Мо́лим раби́ Твои́, и приклоня́ем коле́но се́рдца на́шего:/ приклони́ у́хо Твое́, Чи́стая, и спаси́ скорбьми́ погружа́емыя при́сно,/ и соблюди́ от вся́каго вра́жия плене́ния Твой град, Богоро́дице.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.

Подви́жническому жи́тельству предава́я себе́, блаже́ннии,/ вы́шшаго Богомы́слия дости́гли есте́,/ прия́телище показа́вшеся вмести́тельное Ду́ха Животворя́щаго, пою́ще непреста́нно:/ лю́дие, превозноси́те Христа́ во ве́ки.

Преста́вившися, предвари́л еси́ во град Сио́н,/ во оби́тели же ве́чныя приспе́л еси́,/ и, Небе́сную часть за труды́ обре́т,/ со А́нгельскими ликостоя́нии воспева́еши:/ о́троцы, благослови́те, свяще́нницы, воспо́йте,/ лю́дие, превозноси́те Христа́ во ве́ки.

Всесве́тел, я́ко со́лнце, пусты́ни просвети́л еси́,/ мра́чныя отгна́в де́моны,/ и столп всесве́тел досяза́ющ до Не́ба был еси́, чудотво́рная сия́ния испуска́я,/ взыва́л еси́ непреста́нно:/ свяще́нницы, воспо́йте, лю́дие, превозноси́те Христа́ во ве́ки.

Богоро́дичен: Неве́сто Бо́жия Всенепоро́чная,/ прибега́ющия к Тебе́ исхити́ от пле́на страсте́й,/ и самовлады́чнюю свобо́ду, Чи́стая, Це́ркви Правосла́вных пода́ждь, ве́рою пою́щим:/ свяще́нницы, воспо́йте, лю́дие, превозноси́те Христа́ во ве́ки.

Ин

Ирмо́с: Слы́ши, Отрокови́це Де́во Чи́стая,/ да ре́чет у́бо Гаврии́л/ сове́т Вы́шняго дре́вний, и́стинный:/ бу́ди к прия́тию гото́ва Бо́жию,/ Тобо́ю бо Невмести́мый с челове́ки поживе́./ Тем и, ра́дуяся, вопию́:/ благослови́те, вся дела́ Госпо́дня, Го́спода.

Слы́ши, Благоде́телю, Тво́рче всех, моле́ния, я́же о нас, преподо́бных Твои́х,/ да я́вятся и́же на ны сове́ты18 наси́лующих нам вско́ре су́етны,/ и бу́дем в благодаре́ние гото́вы Тебе́,/ те́ми бо неудо́бь избавля́емых избавля́еми явля́емся,/ тем и, веселя́щеся, вопие́м:/ благослови́те, вся дела́, Го́спода, по́йте и превозноси́те Его́ во ве́ки.

Слы́шав глас Ева́нгельский, преподо́бне Симео́не,/ и рече́ные тобо́ю обе́ты ко Христу́ соблю́л еси́, я́ко и́стинный Сего́ служи́тель,/ и бысть на прия́тие гото́в Ду́хови,/ Его́же благода́тию и нас сохрани́ невреди́мы/ от наве́та борю́щих ны ви́димых враг и неви́димых.

Слы́шана бы́ша твоя́ исправле́ния, Са́вво всеблаже́нне,/ прие́м бо благода́ть Ду́ха, заблужде́ние обрати́л еси́ на путь и́стины,/ бу́ди на прия́тие гото́в моле́ния на́шего,/ тобо́ю и ны́не настоя́щих бед и душе́вных страсте́й изба́витися нам и благода́рственне взыва́ти:/ благослови́те, вся дела́, Го́спода, по́йте и превозноси́те во вся ве́ки.

Богоро́дичен: Ми́ру ро́ждшая спасе́ние, и́мже от земли́ на высоту́ взя́ти бы́хом,/ ра́дуйся, Всеблагослове́нная, покро́ве и держа́во,/ стено́ и утвержде́ние, пою́щим, Чи́стая:/ Го́спода по́йте, дела́, и превозноси́те во вся ве́ки.

Песнь 9

Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.

Ра́дости и весе́лия духо́внаго всех/ ва́ша па́мять исполня́ет, сла́внии,/ ве́рою и любо́вию сию́ пра́зднующих.

Псалмы́ и пе́нии ны́не вас похваля́ем/ и ублажа́ем в пе́снех днесь,/ к Боже́ственному хра́му ва́шему прибега́юще.

О о́тче Богоно́се, Са́вво иера́рше/ с Симео́ном, отце́м твои́м,/ моли́теся о нас, почита́ющих святу́ю па́мять ва́шу.

Богоро́дичен: Благолюби́вая Де́во,/ озло́бленную грехо́м ду́шу мою́ удо́бри,/ Всеблаго́е Сло́во пло́тию носи́вшая.

Ин

Ирмо́с: Яко одушевле́нному Бо́жию киво́ту,/ да ника́коже ко́снется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ ра́дуйся, Благода́тная, Госпо́дь с Тобо́ю.

Я́коже спаси́тельный, Твои́м повеле́нием сотворе́нный, Влады́ко, киво́т,/ та́ко сохрани́ Це́рковь ве́рных от пото́па ересе́й и наси́лия ра́тующих/ моле́нием Симео́на преподо́бнаго и Са́ввы архиере́я, всебога́тых и приснопа́мятных.

Я́коже свяще́ния зако́нный киво́т/ искуше́ние гне́ва Бо́жия наведе́ беззако́нне одержа́щим и де́рзостно прикосну́вшемуся,/ та́ко, мо́лимся, Богоно́се Симео́не, сотвори́ и́же ста́ду твоему́ наси́лующим,/ храм ра́ки моще́й твои́х, и́же тебе́, о́тче, в небреже́ние вменя́ющим.

Я́ко свяще́нствий Боже́ственных и́стинный служи́тель,/ дерзнове́ние име́я к Пастыренача́льнику Христу́,/ ника́коже да оста́виши расхище́ну, ни прикоснове́ну бы́ти ста́ду твоему́ рука́ми неве́рных и безсту́дных,/ и́же соста́ви мно́гими по́ты, Са́вво блаже́нне.

Богоро́дичен: Пощади́, Бо́же, насле́дие Твое́, грехи́ на́ша вся презре́х ны́не,/ на сие́ име́я Моля́щую Тя, на земли́ безсе́менно Тебе́ Ро́ждшую,/ вели́кия ра́ди ми́лости восхоте́вшаго вообрази́тися, Христе́, в челове́чество.

Свети́лен:

Чудотво́рцы свети́льницы, Симео́не со Са́ввою,/ уврачу́йте ду́ши на́ша и телесе́ неду́ги,/ от Го́спода прии́мше благода́ть исцеле́ний.

Сла́ва:

Дво́е свети́льники светоза́рныя,/ святи́теля Са́вву с преподо́бным Симео́ном,/ Боже́ственныя отцы́ и учи́телие на́ша,/ в пе́снех доброгла́сных вси да почти́м.

И ны́не:

Су́щих от Бо́га дае́мых ми́ру благ,/ Ты причи́ною была́ еси́, Пречи́стая,/ но и ны́не уми́лостиви Сы́на Твоего́, Богоро́дице, о о́бщем спасе́нии.

На хвали́тех стихи́ры на 4, глас 8:

О, пресла́внаго чудесе́,/ светосия́нный и ра́достный отце́в пра́здник ны́не нам возсия́, Симео́на и Са́ввы,/ те́мже прииди́те ве́рою,/ сни́дем вку́пе, в па́мяти их веселя́щеся, и возопии́м:/ моле́нии их спаси́ ны, Го́споди Человеколю́бче, я́ко Всеблаги́й.

О́тче Симео́не Богому́дре/ светосия́нный ум, чи́сто озаря́ем, име́яй,/ страсте́й умири́л еси́ многово́лненное мо́ре,/ и безстра́стия чисте́йшими кры́лы облета́я,/ приспе́л еси́, иде́же неизрече́нная добро́та неопису́емая,/ о нас всегда́ моля́ся, хва́лящих тя.

Са́вво Богоглаго́льниче всему́дре,/ свяще́нства пра́вило, целому́дрия о́браз, мона́хов укрепле́ние,/ Це́ркве утвержде́ние, любве́ свети́ло, престо́л чу́вства,/ исто́чник чуде́с, язы́к о́гненный, уста́ сладкоглаго́ливая,/ сосу́д Бо́жияго Ду́ха и рай у́мный был еси́, Богоблаже́нне.

Сла́ва, глас 2:

Доброде́телей ле́ствица/ и о́браз показа́шася на земли́ та́инственно, святи́и,/ и́хже восхва́лим я́ко по́стников украше́ние,/ подвиза́шася бо вои́стинну, я́ко Вели́кий Анто́ний,/ безме́рное у́бо смире́ние яви́ша/ и упа́сше наро́д их благоче́стно,/ во огра́ду святу́ю введо́ша,/ иде́же лик А́нгелов пребыва́ет./ Сего́ ра́ди вопие́м приле́жно:/ не забу́дите па́ствы ва́шея, Са́вво и Симео́не всеблаже́ннии,/ спаса́ти ду́ши на́ша.

И ны́не, Богоро́дичен, глас то́йже:

Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.

Славосло́вие вели́кое.

НА ЛИТУРГИ́И:

Блаже́нны от кано́на святы́х, песнь 3-я и 6-я. Проки́мен, глас 7: Восхва́лятся преподо́бнии во сла́ве,/ и возра́дуются на ло́жах свои́х. Стих: Воспо́йте Госпо́деви песнь но́ву: Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода,/ в за́поведех Его́ восхо́щет зело́. Ева́нгелие от Матфе́я, зача́ло 43. Прича́стен: В па́мять ве́чную бу́дет пра́ведник.