Ина служба, бденная, святителя Парфения, епископа Лампсакийскаго

НА МА́ЛОЙ ВЕЧЕ́РНИ

Стихи́ры на 4, глас 5.

Подо́бен: Ра́дуйся:

Ра́дуйся, Богоно́се Парфе́ние,/ от младе́нства Иису́са возлюби́вый,/ чистото́ю Тому́ присво́ивыйся,/ де́тскою ве́рою после́дствовавый,/ в простоте́ се́рдца послужи́вый Ему́/ и ра́зум соверше́ннейший от Него́ восприе́мый,/ и́мже просвети́л еси́ челове́ков умы́./ Те́мже и засту́пник наш яви́лся еси́,/ прося́й нам ми́ра и ве́лия ми́лости.

Ра́дуйся, преблаже́нне Парфе́ние,/ плач неуте́шный де́моном наведы́й:/ лю́дие бо, им служи́вшии иногда́,/ апо́стольски тобо́ю науче́ннии,/ поплева́ша горды́ню их/ и Боголе́пно просла́виша в душа́х свои́х и телесе́х/ еди́наго и́стиннаго Христа́ Бо́га,/ подаю́щаго ми́рови ве́лию ми́лость.

Ра́дуйся, преподо́бне Парфе́ние,/ во́лею Христу́ сораспны́йся,/ страсте́й умерщвле́нием пострада́вый,/ уме́рый всеконе́чно греху́,/ нетле́нию же и безсме́ртию воскресы́й/ и а́нгельски во пло́ти пожи́вый,/ мир чудесы́ просвеща́я/ и при́сно Го́сподеви моля́ся/ дарова́ти ми́рови мир и душа́м на́шим ве́лию ми́лость.

Сла́ва, глас 1:

Треблаже́ннейший о́тче,/ чистоты́ сокро́вище,/ погиба́ющих помо́щниче,/ даждь нам ру́ку по́мощи,/ и, грехми́ погружа́емых при́сно,/ от смертоно́сных глуби́н возведи́,/ и про́чее вре́мя живота́/ в покая́нии сконча́ти нам помози́/ и от ве́чнаго гне́ва спасти́ся.

И ны́не, пра́здника: Днесь дре́вле Моисе́ю: (зри в сам день праздника, 2 февраля).

Аще же отда́ние пра́здника бысть уже́, пое́м на И ны́не, Богоро́дичен глас то́йже:

Мари́е Непоро́чная/ и ума́ вся́каго превосходя́щая/ честне́йшая колесни́це,/ обдержи́ма мя мно́гими грехми́ и стесня́ема,/ к широте́ пока́яния наста́ви мя/ всеси́льнейшим Твои́м предста́тельством,/ и́бо можеши, я́ко Ма́ти вся Могу́щаго.

На стихо́вне стихи́ры, глас 6.

Подо́бен: Тридне́вен:

О́тче Парфе́ние,/ по́стничества украше́ние/ и воздержа́ния ве́нче,/ от злых воздержа́тися/ нам, лю́бящим тя/ и к тебе́ при́сно притека́ющим, да́руй.

Стих: Свяще́нницы Твои́ облеку́тся в пра́вду,/ и преподо́бнии Твои́ возра́дуются.

Пла́кати ми да́руй,/ о́тче преподо́бне,/ о гресе́х мои́х непреста́нно,/ мучи́тельства же вра́жия/ и ра́бства стра́стнаго свободи́тися сподо́би.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Па́стырю до́брый,/ прожени́ душегу́бныя зве́ри,/ и́же ду́шу ско́рбную/ и лю́те смуща́ему,/ восхи́тити тща́тся, о чудотво́рче!

Сла́ва, глас и подо́бен то́йже:

Росо́ю Небе́сною,/ прохлади́ мое́ те́ло,/ воспале́нное лю́те уязвле́нием змии́ным,/ и а́да грехо́внаго осла́би жже́ние .

И ны́не пра́здника, глас тойже:

Германово: На рука́х ста́рческих во дне́шний день,/ я́ко на колесни́це Херуви́мстей,/ восклони́тися благоизво́ливый, Христе́ Бо́же,/ и нас, пою́щих Тя,/ страсте́й мучи́тельства призыва́емый изба́ви/ и спаси́, я́ко Человеколю́бец.

Или́ Богоро́дичен, глас и подо́бен то́йже:

Никто́же, притека́яй к Тебе́,/ посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.

Тропа́рь пи́сан на вели́цей вече́рни. Сла́ва, и ны́не, пра́здника: Ра́дуйся, Благода́тная Богоро́дице Де́во: (зри в службе святому выше).

Или Богоро́дичен: Е́же от ве́ка утае́ное:

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры на 6

А́ще ли попра́зднство и по́сле, пра́зднику стихи́ры 3 и свято́му 5, глас 1 (зри в службе святому выше).

И́ны стихи́ры, глас 4.

Подо́бен: Я́ко до́бля:

Пе́рстною пло́тию обложе́н,/ дух моли́твою воскриля́л еси́/ и, к Бо́гу вознося́ся,/ го́рния добро́ты узре́л еси́ сла́ву,/ отону́дуже на тле́нную ми́ра сего́ красоту́/ и безу́мный мяте́ж челове́ческий ско́рбно взира́л еси́/ и, воздыха́я, сле́зы пролива́л еси́,/ в Небе́сное оте́чество пресели́тися жела́я.

Де́моном стра́шная твоя́ моли́тва/ вели́чия твоего́ вино́вна бысть,/ той бо све́том просвети́вся,/ ум Христо́в стяжа́л еси́/ и, еди́ное на потре́бу позна́вый,/ я́ко Мари́я при ногу́ Иису́сову,/ неотто́рженною приседе́л еси́ любо́вию,/ неизглаго́ланная та́инства познава́я/ о спасе́нии душ на́ших.

Вели́кую твою́ святы́ню/ всем возвеща́ют чудеса́ твоя́:/ ка́ко бо можа́ше челове́к гре́шник,/ сицева́я зна́мения сотвори́ти?/ Вои́стину свят еси́, Парфе́ние,/ и́бо и́мя твое́, я́ко со́лнца луча́,/ сквозе́ веко́в тьму блиста́ет,/ се бо прославля́ет Госпо́дь прославля́ющия Его́/ пред челове́ки и пред Отце́м Свои́м.

Сла́ва, глас 8:

Ему́же всего́ себе́ от младе́нства возложи́л еси́,/ Его́же во уме́ твое́м при́сно обноси́л еси́,/ Его́же ра́ди вся сла́дкая ми́ра отри́нул еси́,/ и́же святы́х Святе́йший Иису́с,/ огнь паля́щий творя́й слу́ги Своя́,/ Той тебе́ пла́мень в се́рдце вложи́,/ те́рние страсте́й пожига́ющий,/ тьму же неразу́мия просвеща́ющий/ и всем ве́рным указу́ющий путь в Ца́рство Небе́сное.

И ны́не, пра́здника, глас тойже:

И́же на Херуви́мех носи́мый и пева́емый от Серафи́м,/ днесь в Боже́ственное святи́лище по зако́ну приноси́м,/ на ста́рческих, я́ко на престо́ле, седи́т рука́х/ и от Ио́сифа прие́млет да́ры Боголе́пно,/ я́ко супру́г го́рличищ,/ нескве́рную Це́рковь и от язы́к новоизбра́нныя лю́ди,/ голуби́на же два птенца́,/ я́ко Нача́льник Ве́тхаго же и Но́ваго./ Е́же к Нему́ обеща́ния Симео́н коне́ц прие́м,/ благословя́ Де́ву Мари́ю Богоро́дицу,/ страсте́й о́бразы, И́же из Нея́, провозгласи́/ и от Него́ проша́ше отпуще́ния, вопия́:/ ны́не отпусти́ мя, Влады́ко,/ я́коже пре́жде возвести́ ми,/ я́ко ви́дех Тя, Первове́чнаго Све́та/ и Спа́са Го́спода христоимени́тым лю́дем.

Или́ Богоро́дичен, глас 8.

Та́же вход. Проки́мен дне и чте́ния три святи́тельская.

При́тчей чте́ние (гла́вы 10, 3 и 8):

Па́мять пра́веднаго с похвала́ми, и благослове́ние Госпо́дне на главе́ его́./ Блаже́н челове́к, и́же обре́те прему́дрость, и сме́ртен, и́же уве́де ра́зум./ Лу́чше бо сию́ купова́ти, не́жели зла́та и сребра́ сокро́вища./ Честне́йшая же есть ка́мений многоце́нных,/ все же честно́е недосто́йно ея́ есть./ Долгота́ бо дней и ле́та живота́ в десни́це ея́,/ в шу́ице же ея́ бога́тство и сла́ва./ От уст ея́ исхо́дит пра́вда, зако́н же и ми́лость на язы́це но́сит./ Послу́шайте у́бо ме́не, о ча́да, честна́я бо реку́,/ и блаже́н челове́к, и́же пути́ моя́ сохрани́т:/ исхо́ди бо мои́, исхо́ди живота́, и уготовля́ется хоте́ние от Го́спода./ Сего́ ра́ди молю́ вас и предлага́ю мой глас сыново́м челове́ческим,/ я́ко аз, прему́дрость, устро́их сове́т/ и ра́зум, и смы́сл аз призва́х./ Мой сове́т и утвержде́ние, мой ра́зум, моя́ же кре́пость./ Аз мене́ лю́бящия люблю́, и́щущии же мене́ обря́щут благода́ть./ Разуме́йте у́бо, незло́бивии, кова́рство, ненака́заннии же, прилага́йте сердца́./ Послу́шайте мене́ и па́ки, честна́я бо реку́,/ и отве́рзу от усте́н пра́вая, я́ко и́стине поучи́тся горта́нь мой,/ ме́рзки же предо мно́ю устны́ лжи́выя./ С пра́вдою вси глаго́лы уст мои́х:/ ничто́же в них стро́потно, ниже́ развраще́нно./ Вся пра́ва суть разумева́ющим и про́ста обрета́ющим ра́зум./ Науча́ю бо вас и́стине,/ да бу́дет о Го́споде наде́жда ва́ша,/ и испо́лнитеся Ду́ха.

При́тчей чте́ние (гла́вы 10 и 11):

Уста́ пра́веднаго ка́плют прему́дрость, язы́к же непра́веднаго поги́бнет./ Устне́ муже́й пра́ведных ка́плют благода́ти, уста́ же нечести́вых развраща́ются./ Ме́рила льсти́вая – ме́рзость пред Го́сподем, вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их, и поползнове́ние отрица́ющихся упасе́т их./ Не по́льзуют име́ния в день я́рости, пра́вда же изба́вит от сме́рти./ У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́, в нече́стие же па́дает непра́вда./ Пра́вда муже́й пра́вых изба́вит их, безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет, вме́сто же его́ предае́тся нечести́вый./ Во усте́х нечести́вых сеть гра́жданом, чу́вство же пра́ведных благопоспе́шное./ Во благи́х пра́ведных испра́вится град, и в поги́бели нечести́вых ра́дование./ Во благослове́нии пра́вых возвы́сится град, усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется,/ седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть и живы́й посреде́ гре́шник преста́влен бысть./ Восхище́н бысть, да не зло́ба измени́т ра́зума его́, или́ лесть прельсти́т ду́шу его́./ Раче́ние бо зло́бы помрача́ет до́брая и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́ди же ви́девше, и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры, глас 6:

Днесь, ве́рнии,/ свяще́нное соверша́им торжество́,/ па́мять чту́ще Парфе́ния чу́днаго,/ А́нгела бы́вша невеще́ственным житие́м,/ апо́стола, я́ко лесть и́дольскую упраздни́, проро́ка же, я́ко бу́дущая прозира́ше,/ до́бляго му́ченика, я́ко вся ра́дости ми́ра сего́ отве́рже,/ и плоть свою́ умертви́./ Те́мже и со дерзнове́нием мо́лится/ дарова́ти ми́рови мир и душа́м на́шим ве́лию ми́лость.

Прииди́те, вси ве́рнии, днесь/ воспои́м вели́каго Парфе́ния,/ и́же, я́ко о́блак све́тел и росоно́сен, нам яви́ся,/ пла́мень гне́ва небе́снаго на гре́шныя/ се́нию свое́ю утиша́ющий,/ страсте́й же зной охлажда́ющий излия́нием умиле́нныя моли́твы/ и изсо́хшия на́ша сердца́ оживля́ющий,/ плоды́ же доброде́лания приноси́ти помога́ющий всем,/ с ве́рою и любовию притека́ющим к нему́.

Челове́ческое естество́/ я́ко вои́стину превосше́дый,/ воздая́ние неизглаго́ланное восприя́л еси́,/ вся бо неду́ги челове́ков цели́ши,/ бесо́м же и и́мя твое́ еди́но губи́тельно бысть./ И ны́не А́нгелов равностоя́тель яви́лся еси́,/ трисвяту́ю Бо́гови песнь вопия́/ и моля́ся о душа́х на́ших.

Сла́ва, глас 7:

Чистото́ю со́вести твоея́ сия́я,/ сме́рти теле́сныя не страши́лся еси́,/ сего́ ра́ди и свои́х си всеконе́чно отве́ргся/ и апо́стольски во язы́цех благовеству́я,/ просвети́л еси́ помраче́нныя челове́ки/ и Христо́ви приве́л еси́ пре́жде диа́вольскую лови́тву./ Оба́че не я́ко госпо́дствуяй, но я́ко служа́й,/ во обраще́нных тобо́ю пожи́л еси́,/ смире́нием и кро́тостию украша́емь;/ те́мже и Бог тебе́ превознесе́/ и дарова́ тебе́ благода́ть моли́тися за ны.

И ны́не, пра́здника:

Украси́ твой черто́г, Сио́не,/ и подыми́ Царя́ Христа́,/ целу́й Мари́ю, Небе́сную Дверь:/ Та бо престо́л Херуви́мский яви́ся,/ Та но́сит Царя́ Сла́вы./ О́блак све́та есть Де́ва,/ нося́щи на рука́х Сы́на пре́жде денни́цы,/ Его́же прие́мь Симео́н на ру́ки своя́,/ пропове́дуя лю́дям Влады́ку Сего́ быти живота́ и сме́рти/ и Спа́са ми́ру.

Или́ И ны́не, Богоро́дичен, глас то́йже:

Под кров Твой, Влады́чице,/ вси земноро́днии притека́юще,/ вопие́м Ти: Богоро́дице, упова́ние на́ше,/ изба́ви ны от безме́рных прегреше́ний/ и спаси́ ду́ши на́ша.

На стихо́вне стихи́ры, глас 6:

Подо́бен: Всю отложи́вше:

Я́ко му́дрый строи́тель,/ не на песце́ самонаде́янна,/ но на ка́мени Христо́вы ве́ры/ дом доброде́тели смире́нием созида́л еси́,/ те́мже ника́яже скорбь и теснота́,/ ниже́ ко́е искуше́ние и беда́/ не возмого́ша тебе́ поколеба́ти/ и разлучи́ти от любве́ Го́спода твоего́,/ Ему́же не преста́й моля́ся,/ о́тче наш Парфе́ние,/ спасти́ и просвети́ти ду́ши на́ша.

Стих: Восхва́лятся преподо́бнии во сла́ве/ и возра́дуются на ло́жах свои́х.

До́брою земле́ю твоего́ се́рдца/ се́мя любве́ Бо́жия восприи́мь,/ от пути́ су́етнаго отбега́л еси́/ и в безмо́лвии возраща́л еси́ дар,/ терпе́нием ко́рени доброде́тели углубля́я в себе́,/ вся же собла́зны отрева́я моли́твою./ Сего́ ра́ди и плод Боже́ственный прине́сл еси́,/ и́мже насыща́еши гла́дныя ду́ши на́ша.

Стих: Честна́ пред Го́сподем/ смерть преподо́бных Его́.

Вся пристра́стия мирска́я отря́сл еси́, о́тче,/ ни име́ния когда́ стяжа́в,/ ни сла́достей жития́ вожделе́в,/ ни сла́вы су́етныя возлюби́в./ Те́мже, егда́ тебе́ Госпо́дь возгласи́,/ ра́достно преше́л еси́ к Нему́/ и в черто́зе а́гничем возле́гл еси́,/ я́ко еди́н от пе́рвенцев земли́/ и блаже́нный сонасле́дник Христо́в,/ Ему́же не преста́й моля́ся,/ о́тче Парфе́ние чу́дне,/ спасти́ и просвети́ти ду́ши на́ша.

Сла́ва, глас то́йже:

Ве́лие вои́стину чу́до зрим:/ ка́ко ты, в ми́ре живы́й/ и собла́зны отовсю́ду окруже́н,/ и́ноков равноа́нгельныя доброде́тели испо́лнил еси́/ и, проти́ву духо́в зло́бы безпло́тных/ во пло́ти подвиза́вся,/ тех кре́пость низложи́л еси́./ Темже и безсме́ртия сла́вою увенча́нный от Подвигополо́жника Иису́са,/ не преста́й моля́ся Тому́,/ о́тче пречу́дне Парфе́ние,/ о и́же ве́рою и любо́вию чту́щих тя.

И ны́не, пра́здника:

Да отве́рзется дверь Небе́сная днесь:/ Безнача́льное бо Сло́во О́тчее,/ нача́ло прии́м под ле́ты,/ не отсту́пль Своего́ Божества́,/ от Де́вы я́ко Младе́нец четыредесятодне́вен/ Ма́терию во́льне прино́сится в це́рковь зако́нную,/ и Сего́ на ру́ки прие́млет ста́рец,/ отпусти́, зовы́й, раба́, Влады́ко,/ и́бо о́чи мои́ ви́деста спасе́ние Твое́./ Прише́дый в мир спасти́ род челове́чь,/ Го́споди, сла́ва Тебе́.

Или Богоро́дичен: Творе́ц и Изба́витель мой:

На благослове́нии хле́бов тропа́рь свято́му два́жды, глас 4:

Пра́вило ве́ры и о́браз кро́тости,/ воздержа́ния учи́теля,/ яви́ тя ста́ду твоему́,/ я́же веще́й и́стина,/ сего́ ра́ди стяжа́л еси́ смире́нием высо́кая,/ нището́ю бога́тая,/ о́тче Парфе́ние,/ моли́ Христа́ Бо́га/ спасти́ся душа́м на́шим.

Таже пра́здника или́ Богоро́дице Де́во:

НА У́ТРЕНИ

На Бог Госпо́дь: тропа́рь святи́теля два́жды. Сла́ва, и ны́не, пра́здника или́ Е́же от ве́ка:

По 1-м стихосло́вии, седа́лен, глас 4:

А́ще и в молве́ пребыва́л еси́ пло́тию, я́ко па́стырь многопопечи́тельный,/ но от Бо́га мы́слию не отлуча́лся еси́,/ и Той от Тебе́ никогда́же отступи́, о свяще́нне!/ Те́мже мо́лимтися, о́тче Парфе́ние,/ не оста́ви нас, немощны́х,/ но привлецы́ на ны ми́лость Иису́сову/ и просвети́ на́ша смы́слы, прило́ги стра́стными помраче́нныя.

Сла́ва, и ны́не, пра́здника, глас тойже.

Подо́бен: Удиви́ся Ио́сиф:

Младе́нствуеши мене́ ра́ди, Ве́тхий де́ньми,/ чище́нием приобща́ешися, Чисте́йший Бо́же,/ да плоть уве́риши мне ю́же от Де́вы./ И сим Симео́н поуча́яся,/ позна́ Тя Бо́га я́вльшагося пло́тию,/ и, я́ко Жизнь, лобза́ше и ра́дуяся ста́рчески взыва́ше:/ отпусти́ мене́, Тебе́ бо ви́дех, Живота́ вся́ческих.

Или́ Богоро́дичен, глас то́йже:

Услы́ши, Влады́чице, от боле́зненныя души́ вопию́щаго раба́ Твоего́/ и мно́гих мои́х зол пода́ждь ми оставле́ние,/ Тебе́ бо и́мам Предста́тельницу в день и нощь,/ изба́ви, Богоро́дице, от огня́ гее́нскаго/ и поста́ви мя одесну́ю Сы́на Твоего́ и Бо́га.

По 2-м стихосло́вии седа́лен, глас 1:

Погуби́х тала́нт мой, его́же прия́х, увы́ мне! что сотворю́?/ Где обря́щу други́й?/ Ка́ко явлю́ся Влады́це?/ Что ли отвеща́ю Ему́?/ К тебе́ убо притека́ю, святи́телю,/ да бу́деши засту́пник мой, с Богоро́дицею моля́ся Го́сподеви/ да́ти ми оставле́ние грехо́в и ве́лию ми́лость.

Сла́ва, и ны́не, пра́здника, глас тойже:

Подо́бен: Лик А́нгельский:

Сый со Отце́м на Престо́ле святе́м,/ прише́д на зе́млю, от Де́вы роди́ся/ и Младе́нец бысть, ле́ты Сый неопи́сан,/ Его́же при́им Симео́н на ру́ки, ра́дуяся, глаго́лаше:/ ны́не отпуща́еши, Ще́дре, возвесели́в раба́ Твоего́.

Или́ Богоро́дичен, глас то́йже:

Упра́ви, Чи́стая, окая́нную мою́ ду́шу, и уще́дри ю,/ от мно́жества прегреше́ний во глубину́ попо́лзшуюся поги́бели, Всенепоро́чная,/ и в час мя стра́шный, сме́ртный Ты исхити́ оглаго́лующих де́монов и вся́кия му́ки.

По полиеле́и седа́лен, глас 2:

Очи́ма мои́ма ослепи́хся,/ и тьма обдержи́т ду́шу мою́,/ и недоуме́нием лю́тым объя́т есмь,/ не имы́й же ктому́ жезла́ по́мощи,/ о ка́мение вы́ну претыка́юся,/ и но́зе мои́ острупи́шася от язв,/ в ров же страсте́й впадо́х и, ка́ко изы́ти, не вем./ Помози́ у́бо ми, о́тче,/ изведи́ мя от се́ти сея́, ю́же врази́ соста́виша ми,/ бу́ди же наста́вник мой,/ да си́це сподо́блюся дости́гнути Го́рняго о́наго Иерусали́ма, Ца́рства Небе́снаго.

Сла́ва, и ны́не, пра́здника, глас 2:

Днесь Симео́н ста́рец во храм вхо́дит, ра́дуяся ду́хом,/ Законода́вца Моисее́ва и Исполни́теля зако́на на ру́ки восприя́ти./ Он у́бо мра́ком и гла́сом неявле́нным Богови́дец сподо́бися бы́ти,/ покрове́нным лице́м евре́ев неве́рная сердца́ изобличи́,/ сей же Первове́чное Сло́во О́тчее воплоще́нное понесе́/ и язы́ком откры́ Свет, Крест и Воскресе́ние./ И А́нна проро́чица показа́ся,/ Спа́са Изба́вителя Изра́илю пропове́дающи./ Тому́ возопии́м, Христу́ Бо́гу на́шему:/ Богоро́дицы ра́ди поми́луй нас.

Или́ Богоро́дичен, глас то́йже:

Богоро́дице, не пре́зри мя, тре́бующа заступле́ния Твоего́,/ на Тя бо упова́ душа́ моя́, поми́луй мя.

Таже степе́нна, 1-й антифо́н, глас 4.

Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми. Ева́нгелие от Иоа́нна, зача́ло 35 от полу́. По 50-м псалме́ стихи́ра, я́же и на лити́и пе́рвая: Днесь, ве́рнии, свяще́нное соверша́им торжество́: Пе́рвый кано́н по уста́ву, пра́здника или́ Богоро́дицы, та́же святи́теля два кано́на. Кано́н пра́здника и пе́рвый кано́н святи́теля (зри в службе выше).

Ин кано́н святи́теля, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу, побе́дную песнь пои́м, вопия́ше.

Моле́бное тебе́ пе́ние предначина́я, смуща́юся, о́тче,/ ка́ко досто́йно есть воспева́ти тя./ Оба́че е́же от любве́ приноше́ние мое́ приими́ и устне́ моя́ отве́рзи,/ я́ко да возвещу́ хвалу́ твою́, Парфе́ние святи́телю.

Мо́ре страсте́й ты немо́кренно мину́л еси́, сла́вне,/ от враг невреди́вся,/ и́хже ополче́ния во глубину́ преиспо́дния низве́ргл еси́,/ поя́ Го́сподеви, сла́вно бо просла́вися.

Погуби́ супоста́ты, гоня́щия мя, чудоно́сче,/ се бо настиза́ют уже́, и несть ми избавле́ния,/ а́ще кто не защити́т мя от них/ или́ а́бие не погря́знут, я́коже дре́вле еги́птянов полцы́.

Богоро́дичен: Рождество́м Твои́м лесть бесо́вскую упраздни́вшая,/ Многомо́щная Всемогу́щаго Ма́ти,/ и мене́, враго́м прельща́ема, при́сно на брег спасе́ния возведи́,/ пою́щаго Го́сподеви, сла́вно бо просла́вися.

Ин. Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Обнища́вшее лю́те се́рдце мое́/ предста́тельством твои́м обогати́, свя́те,/ и́маши бо вои́стину ве́лие к Бо́гу дерзнове́ние,/ я́ко Иису́сов подви́жник до́блий, Парфе́ние.

Душа́ моя́ изнемо́же в боре́ниих и напа́стех/ и на гно́ищи стра́стнем ны́не низлежи́т,/ но да возведе́тся от а́да преиспо́дняго,/ си́лою же Бо́жиею да препоя́шется, моли́ся, святи́телю.

Расшири́шася уста́ твоя́ на враги́ ро́да челове́ча,/ моли́тв бо твои́х не терпя́ще,/ я́ко огне́м опаля́еми, стеня́ще, от Тебе́ бежа́ху./ Тем и е́же на нас неи́стовство их упраздни́.

Богоро́дичен: Тебе́ Симео́н ду́шу ору́жию пройти́ глаго́лаше,/ е́же и сбы́стся при Кресте́ Сы́на Твоего́./ Ско́рбем у́бо на́шим спострада́ти могу́щи,/ я́ко Сама́ тех вкуси́вшая го́речи,/ услади́ их нам, Пречи́стая.

Седа́лен, глас 3.

Подо́бен: Боже́ственныя ве́ры:

Испо́лнь Ду́ха Боже́ственнаго сый, де́лы просия́ благоче́стия,/ свяще́нне чудотво́рче Парфе́ние,/ от ле́сти челове́ки обрати́л еси́,/ боля́щих стра́сти исцеля́я./ О́тче преподо́бне, Христа́ Бо́га моли́/ спасти́ся душа́м на́шим.

Сла́ва, и ны́не, пра́здника, глас 8:

Подо́бен: Свире́лей па́стырских:

Роди́лся еси́ на земли́, Собезнача́льный Отцу́,/ прине́слся еси́ в це́рковь, Непостижи́мый./ Ра́дуяся же, ста́рец на ру́ки Тя восприя́т, зовы́й:/ ны́не отпуща́еши, его́же посети́л еси́, по глаго́лу Твоему́,/ благоизво́ливый спасти́ я́ко Бог род челове́ческий.

Или́ Богоро́дичен, глас то́йже:

Ра́бски ны́не притека́ю к покро́ву Твоему́, Пренепоро́чная,/ изба́ви мя, Богороди́тельнице, слия́ния страсте́й,/ я́ко безстра́стия Вино́внаго ро́ждшая.

Ин. Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ Боголе́пно пое́т, взыва́ющи,/ от смы́сла чи́ста о Го́споде пра́зднующи.

На стра́жи па́стырстей стоя́л еси́, иера́рше,/ бо́дрым о́ком ста́до твое́ озира́я,/ во уны́нии спя́щих возбужда́я,/ заблужда́ющия возвраща́я,/ хи́щники же дале́че отгоня́я устраше́нием Боже́ственных глаго́л.

О пи́ще теле́сней небре́гл еси́,/ Бо́жия любве́ насыща́яся при́сно жела́нием ненасы́тным./ Моя́ бо пи́ща есть, вопия́л еси́, досточу́дне, е́же твори́ти во́лю Го́спода моего́/ и де́ло Его́ соверши́ти.

Огра́да ми бу́ди от вся́каго прило́га и напа́сти сопроти́вныя,/ да ника́ко лука́ваго сне́дию бу́ду,/ но да же́ртва сотворю́ся Бо́гови прия́тная/ твои́ми, святе, моли́твами.

Богоро́дичен: Очище́ния не тре́бующая, днесь по зако́ну очища́ешися/ и, Сы́на нося́щи, во храм вхо́диши./ Срета́ет же Тебе́ Симео́н, вели́чие Тебе́ возвеща́я и скорбь несказа́нную.

Ин. Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Нощь глубока́ грехо́внаго помраче́ния на мя нападе́,/ но твои́ми, светоно́сче, моли́твами/ свет невече́рний да возсия́ет ми,/ стопы́ моя́ на и́стинный путь направля́я.

Стра́ха ра́ди Бо́жия дух любве́ в се́рдце твое́ прия́л еси́,/ па́стве твое́й спасе́ние породи́в,/ а́ще же и мно́го боле́зновал еси́,/ оба́че сугу́бо и возвесели́ тя всесладча́йший Иису́с, Госпо́дь наш.

Ме́ртвыя воскреси́л еси́,/ бе́сы изгна́л еси́ и вся челове́ков неду́ги цели́л еси́ в житии́ твое́м, чудотво́рче,/ но и ны́не притека́ющих к тебе́ спаса́еши от вся́каго озлобле́ния.

Богоро́дичен: Безболе́зненно Христа́ Бо́га пло́тию ро́ждшая,/ но и ма́терних скорбе́й не избе́гшая,/ на́ша, я́же в совлече́нии дре́вняго челове́ка, боле́зни утиши́/ и в но́ваго облещи́ся помози́ нам, Всепетая.

Ин. Песнь 6

Ирмо́с: Жите́йское мо́ре,/ воздвиза́емое зря/ напа́стей бу́рею,/ к ти́хому приста́ницу Твоему́ прите́к, вопию́ Ти:/ возведи́ от тли живо́т мой,/ Многоми́лостиве.

Бе́здну милосе́рдия Бо́жия беззако́ний мои́х бе́здною преогорчи́х,/ и покры́ мя сень сме́ртная,/ ко Го́споду же воззре́ти отню́д не могу́,/ но моли́твами твои́ми, о́тче, ко исправле́нию жития́ да возведу́ся.

Смуще́ние по́мысл мои́х укроти́, святи́телю,/ тишину́ Боже́ственную, я́же в се́рдцы твое́м почи́вшие,/ и мне низводя́ в ду́шу, пребога́те.

В тиме́ние страсте́й преслуша́нием я́коже низверго́хся иногда́,/ та́ко, лю́те смири́выйся ны́не,/ на спасе́ния стези́ да возставля́юся, о́тче Парфе́ние, предста́тельством твои́м.

Богоро́дичен: Поноше́ние нападе́ на ду́шу мою́,/ и ждах соскорбя́щаго, и не бе, и утеша́ющих и не обрето́х,/ у́бо к Тебе́ притека́ю, Богома́ти,/ да всеси́льным Твои́м умири́ши лю́те мя, обурева́ема,/ в приста́нище безстра́стия наставля́ющи.

Конда́к святи́теля, глас 3.

Подо́бен: Де́ва днесь:

Чуде́с прия́л еси́ Боже́ственную благода́ть,/ Богому́дре свяще́нне Парфе́ние, чудотво́рче Богоно́се,/ вся ве́рных стра́сти очища́я, ду́хи лука́вства, о́тче, изгоня́я./ Сего́ ра́ди тя воспева́ем, я́ко вели́каго таи́нника Бо́жия благода́ти.

И́кос:

Чистото́ю, я́коже тайнови́дец и друг Христо́в Богосло́в Иоа́нн, у́мныя о́чи уясни́в,/ зрел еси́, Богому́дре Парфе́ние, сокрове́нная и та́йная,/ я́же познава́я, ми́ра непостоя́нная презре́л еси́,/ ника́коже к сим прилепи́тися восхоте́л еси́,/ еще́ же и ча́да твоя́ от су́етных отвраща́л еси́,/ лу́чшим жела́нием тех разжиза́я;/ те́мже и по всей вселе́нней сла́вно бысть и́мя твое́,/ я́ко вели́каго таи́нника Бо́жия благода́ти.

Ин. Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же, оте́ц на́ших.

После́довал еси́ Христо́ви всем се́рдцем твои́м по всем путе́м Его́ ско́рбным/ и за́поведи Его́ преступи́ли па́че вся́каго зла убоя́лся еси́./ Те́мже и яви́ тебе́ лице́ Свое́ возлюби́вый Тя,/ благослове́нный Бог оте́ц на́ших.

В седмери́цею разжже́нной пе́щи искуше́ний неврежде́н сохрани́выйся, о́тче Парфе́ние,/ и мене́ из пла́мене грехо́внаго неопа́льна изми́,/ да па́ки в чудесе́х твои́х просла́вится благослове́нный Бог оте́ц на́ших.

Душе́ю сокруше́нною и се́рдцем смире́нным Иису́сови моли́твы принося́ в житии́ твое́м,/ до́бре услы́шан был еси́,/ у́бо и о мне ны́не помоли́ся,/ да ущедрит тя благослове́нный Бог оте́ц на́ших.

Богоро́дичен: Огнь Божества́ во чре́ве неопа́льно прие́мшая, Де́во,/ и мене́ приима́ти Сего́ Пло́ти и Кро́ви сподобля́й при́сно,/ да стра́сти моя́ попали́т благослове́нный Бог оте́ц на́ших.

Ин. Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо, е́же хоте́ти./ Тя превозно́сим во вся ве́ки.

Зла́та и бога́тства не поклони́лся еси́ куми́ру,/ сокро́вище се́рдца твоего́ в Бо́зе полага́я,/ нестяжа́ние же возлюби́в, кро́тостию и нищелю́бием преукраси́лся еси́, сла́вне.

А́ще и препя́тия вы́ну полага́ше тебе́ в до́брых твои́х де́лех князь тьмы,/ оба́че ника́коже тебе́ вреди́в,/ сам посрамля́емь быва́ше, всезло́бный,/ и твое́ю, о́тче, моли́твою опаля́емь.

Путь жития́ простра́нный,/ сла́достию прельща́ющий нас, облича́й, му́дре, я́ко лжи́вый/ и скорбь вели́кую нанося́щий душа́м,/ я́ко да ра́достно сотвори́м у́зкаго пути́ терно́вное ше́ствие.

Богоро́дичен: Две́ре Благослове́нная,/ Е́юже спасе́ние в мир вни́де, Цари́це Блага́я,/ отве́рзи ми вхо́ды Небе́снаго жи́тельства,/ преступле́нием заключе́нныя иногда́.

Ин. Песнь 9

Ирмо́с: Бо́га/ челове́ком невозмо́жно ви́дети/ на Него́ же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Святи́телей сла́во, о́тче Парфе́ние,/ уче́ньми твои́ми низложи́вый иногда́ злосла́вия вознесе́нную горды́ню,/ и мои́х страсте́й воста́ние укроти́,/ смире́ние ми подая́ и се́рдце сокруше́нное.

Поще́нием кре́пким и моли́твою/ ору́жие, бесо́м стра́шное, восприя́л еси́, о́тче,/ род бо сей ничи́м же, кроме́ сих, побежда́ется./ Те́мже и мне в доброде́телех преуспева́ти подаждь.

Тро́ицы бо́дрый служи́телю и покая́ния пропове́дниче,/ уны́ния моего́ дрема́ние отжени́/ и бо́дрствовати помози́ ми, свя́те Парфе́ние,/ сего́ же прося́, моле́ние мое́ убо́гое скончава́ю.

Богоро́дичен: Всеблаже́нная Де́во/ и но́выя благода́ти свяще́нный киво́те,/ заве́т Твой и обетова́ние ро́ду христиа́нскому помяни́/ и ско́ро помощи́ мне потщи́ся, моля́щу Ти ся.

Свети́лен:

Светоно́сное Иису́сово И́мя,/ возлю́бленное и вожделе́нное тебе́ от млада́го во́зраста,/ но́ваго тя, Моисе́ю подо́бнаго, Богови́дца соде́ла, во мрак та́инственный входя́щаго./ Те́мже, Парфе́ние небоявле́нне,/ и мою́ ду́шу, мра́ком грехо́вным покрове́нную,/ озари́ любве́ Иису́совы заре́ю/ и на безстра́стия го́ру смире́нием возведи́.

Сла́ва, и ны́не, пра́здника:

Ду́хом во святи́лищи предста́в,/ ста́рец на ру́ки восприя́т зако́на Влады́ку, вопия́:/ ны́не соу́з мя плотски́х разреши́, я́коже рекл еси́, с ми́ром:/ ви́дех бо очи́ма открове́ние язы́ков и Изра́илю спасе́ние.

Или́ Богоро́дичен:

Светоза́рная Бо́жия пала́то/ и недоуме́нный Светода́вца престо́ле, Ма́ти Безневе́стная,/ просвети́ ны све́том доброде́тели,/ да о́браз Бо́жий, помраче́нный страстьми́,/ па́ки сла́вою дре́влею просия́ет в нас,/ ве́рою и любо́вию Тя воспева́ющих.

На хвали́тех стихи́ры святи́теля на 4.

Аще ли попра́зднство, пое́м ему́ 3 стихи́ры и свято́му 3.

Стихи́ры пра́здника, глас 2 (зри в первой службе святителя).

Стихи́ры святи́теля, глас 8:

Не уче́нии то́кмо,/ но и де́лы Боже́ственными/ собира́л еси́ ста́до Христо́во,/ и́мже лю́ди науча́л еси́,/ та́яжде сам твори́л еси́,/ о́браз быв доброде́тельнаго жития́,/ и́го Иису́сово ра́достно нося́,/ те́мже ны́не блаже́ннаго поко́я/ наслажда́ешися во Ца́рствии Бо́жии.

Увяда́ют пле́велы и́дольскаго злосла́вия/ возсия́вшу со́лнцу Христо́выя про́поведи,/ апо́стольски тобо́ю возглаша́емыя,/ кла́сы же благове́рия прозяба́ют,/ и жа́тва собира́ется в Небе́сную жи́тницу,/ ея́ же неизринове́ным обрести́ся и нам,/ мо́лим ти ся, Парфе́ние Богоблаже́нне.

Не́бо, людски́ми грехи́ заключе́нное,/ дождь оби́льный пролива́ет,/ ни́вы и вся се́яния плод прино́сят,/ ско́рбнии лю́ди ра́дуются,/ Парфе́ний чу́дный мо́лится,/ вси же, лику́юще, восхваля́ют его́/ и чудя́тся таково́й благода́ти,/ челове́ку дарова́нней от Бо́га.

Сла́ва, глас то́йже:

Тро́ицы побо́рниче сла́вный/ и держа́вы бе́совския низложи́телю,/ помози́ нам три све́тлыми доброде́тельми украша́тися,/ ве́рою чи́стою, я́ко свети́льником путево́дным,/ и наде́ждею несумне́нною,/ лю́таго отча́яния губи́тельною,/ соу́з же соверше́нства святу́ю любо́вь,/ я́ко хлеб насу́щный, нам пода́ждь,/ о Парфе́ние, о́тче наш,/ тебе́ бо даде́ся благода́ть моли́тися за ны.

И ны́не, пра́здника или́ Богоро́дичен, глас то́йже:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

НА ЛИТУРГИ́И:

Блаже́нны от кано́на пе́сни 3-я и 6-я. Проки́мен, глас 7: Честна́ пред Го́сподем смерть преподо́бных Его́. Стих: Что возда́м Го́сподеви о всех, я́же воздаде́ ми? Апостол ко Евре́ем, зача́ло 335. Аллилу́ия, глас 4: Воззва́ша пра́веднии, и Госпо́дь услы́ша их. Стих: Мно́ги ско́рби пра́ведным: Ева́нгелие от Луки́, зача́ло 24, или́ от Иоа́нна, зача́ло 36. Прича́стен: В па́мять ве́чную бу́дет пра́ведник.